ለአማራ ንግድ ምክር ቤት የአመራሮች ምርጫ አመቻች ኮሚቴ ተሰየመ

 

  • የኢትዮጵያ የዘርፍ ምክር ቤት ዕግድ እልባት አላገኘም

ሲያወዛግብ የሰነበተው የአማራ ንግድና ዘርፍ ማኅበራት ምክር ቤት ጠቅላላ ጉባዔና የአመራር አባላት ምርጫ በድጋሚ እንዲካሄድ ለማስቻል፣ የአማራ ክልል ንግድ ኢንዱስትሪና የገበያ ልማት ቢሮ የምርጫ አመቻች ኮሚቴ አዋቀረ፡፡

አመቻች ኮሚቴውን የኢትዮጵያ ንግድና ዘርፍ ማኅበራት ምክር ቤት እንዲመራው የተወሰነ ሲሆን፣ የኢትዮጵያ ንግድ ምክር ቤትም በዚህ ኮሚቴ ውስጥ እንዲወክሉት ዋና ፀሐፊውን አቶ ውቤ መንግሥቱን እንደመደበ ታውቋል፡፡

በአማራ ንግድ ምክር ቤት ውስጥ ለተፈጠረው ውዝግብ መፍትሔ እንደሚያስገኝ በታመነበት የአማራ ክልል ውሳኔ መሠረት፣ የአማራ ንግድና ዘርፍ ማኅበራት ምክር ቤትን እንደ አዲስ የሚመሠርት ጠቅላላ ጉባዔና የምክር ቤት ቦርድ አመራሮች ምርጫ ይደረጋል፡፡  

ከኢትዮጵያ ንግድ ምክር ቤት የተገኘው መረጃ እንደሚያመለክተው ከሆነ፣ የአማራ ንግድና ዘርፍ ማኅበራት ምክር ቤትን እንደ አዲስ ለማደራጀት የተዋቀረው ኮሚቴ ስድስት አባላትን በማካተት ከባህር ዳር፣ ከደብረ ብርሃን ንግድና ዘርፍ ማኅበራት ምክር ቤት፣ ከደብረ ማርቆስ እንዲሁም ከክልሉ ዘርፍ ምክር ቤት የተውጣጡ ተወካዮች የተካተቱበት ኮሚቴ ነው፡፡ የክልሉ ንግድና ዘርፍ ማኅበራት ምክር ቤት ዋና ፀሐፊም የኮሚቴው አባል እንዲሆኑ ተደርጓል፡፡ ዋና ፀሐፊው ግን በኮሚቴ ውስጥ ድምፅ የመስጠት መብት አይኖራቸውም ተብሏል፡፡  

ይህ ኮሚቴ የምዝገባ ማረጋገጫ የዕውቅና ሠርተፊኬቱ የተሰረዘበትን የአማራ ንግድና ዘርፍ ማኅበራት ንግድ ምክር ቤት ጠቅላላ ጉባዔ እንዲካሄድ ከማስቻል ባሻገር አዲስ ምርጫ እንዲደረግ ለማቻቸት የተዋቀረ ነው፡፡ ኮሚቴው ተጠሪነቱ ለአማራ ንግድ ኢንዱስትሪና የገበያ ልማት ቢሮ እንደሆነም ለማወቅ ተችሏል፡፡

ከአዋጅ ውጭ በተደረገ ውክልና የንግድ ምክር ቤቱን አመራር ይዘዋል የተባሉትን አመራሮች ከሁለት ወር በፊት ያገደው የአማራ ክልል መንግሥት፣ አዲስ ምርጫ በአንድ ወር ውስጥ እንዲካሄድ ቢወስንም በተባለው ጊዜ ምርጫው ሊካሄድ እንዳልቻለ መዘገቡ ይታወሳል፡፡  

ከሕግ አግባብ ውጭ በተያዘ ውክልና በአመራር ቦታው ላይ የነበረውና በአቶ ጌታቸው አየነው የሚመራው ቦርድ፣ ዕግድ ከወጣበትም በኋላ ከክልሉ ንግድና ኢንዱስትሪ ቢሮ ዕውቅና ውጭ ጠቅላላ ጉባዔ በመጥራት ስብሰባ ለማካሄድ አስተላልፎት የነበረውን ጥሪ ቢሮው በማገድ የተጠራው ስብሰባም እንዳይካሄድ አድርጓል፡፡

ከቢሮው ዕውቅና ውጭ ለካሄድ ዝግጅት ሲደረግበት ነበር የተባለው ስብሰባ ከታገደ በኋላ የአማራ ንግድና ዘርፍ ማኅበራት ምክር ቤት የምዝገባና የዕውቅና ሠርተፊኬት የታገደ ቢቆይም ከሰሞኑ ግን የንግድ ምክር ቤቱ የምዝገባ ሠርተፊኬት ከነጭራሹ እንዲሰረዝ፣ አሊያም አሁን ያለው ምክር ቤት እንዲፈርስ ተደርጎ በምትኩ እንደ አዲስ ለመመሥረት እንቅስቃሴ በመደረግ ላይ እንደሚገኝ ለማወቅ ተችሏል፡፡

የሪፖርተር ምንጮች እንደሚገልጹት፣ በአጭር ጊዜ ውስጥ ይካሄዳል የተባለው ምርጫ፣ የክልሉ ንግድ ምክር ቤት በመወከል በኢትዮጵያ ንግድ ምክር ቤት ውስጥ የክልሉን ምክር ቤት የሚወክሉ አዳዲስ አመራሮችን እንደሚያመጣ ይጠበቃል፡፡

እንደ አማራ ንግድና ዘርፍ ማኅበራት ምክር ቤት ሁሉ የሕግ ጥሰት የተፈፀመበት ምርጫ አካሂዷል ተብሎ የታገደው የኢትዮጵያ የዘርፍ ማኅበራት ምክር ቤት ጉዳይ አሁንም በእንጥልጥል ላይ ይገኛል፡፡

የኢንዱስትሪ ሚኒስቴር በዘርፍ ምክር ቤቱ ላይ ዕገዳ ከጣለ ጀምሮ የአመራር አባላት ምርጫ እንዲካሄድ መንገዶችን እንደሚያመቻች ቢጠበቅም እስካሁን የተደረገ እንቅስቃሴ እንደሌለ እየተገለጸ ነው፡፡ ይህም ከስምንት ወራት በላይ የዘገየውን የኢትዮጵያ ንግድ ምክር ቤት ጠቅላላ ጉባዔና ምርጫ ከዚህም በላይ ሊያዘገው ይችላል የሚል ሥጋት አሳድሯል፡፡ ውዝግቦቹ ባለመፈታታቸውና ተጨባጭ መፍትሔዎች ባለመቀመጣቸው ምክንያትም የኢትዮጵያ ንግድ ምክር ቤት ጠቅላላ ጉባዔ ከስድስት ወራት በላይ ሳይካሄድ እንዲቆይ አስገድዷል፡፡