አዲሱን ድረ ገጽ ይሞክሩ!
አዲሱን ድረ ገጽ ይሞክሩ!

ሙክታር እድሪስ በዙሪክ ዳይመንድ ሊግ ከሞ ፋራ ዳግም ይገናኛል

  • በበርሚንግሃም ዳይመንድ ሊግ ኢትዮጵያውያት አትሌቶች ድል ቀንቷቸዋል

ከለንደን የዓለም አትሌቲክስ ሻምፒዮና የ5 ሺሕ ሜትር ድል በኋላ ሙክታር እድሪስ በዙሪክ ዳይመንድ ሊግ ውድድር ከእንግሊዙ ሞ ፋራ ዳግም ነሐሴ 18 ቀን 2009 ዓ.ም. ይገናኛል፡፡

 በዓለም ሻምፒዮናው ቀነኒሳ በቀለ በ5 ሺሕ ሜትር ካስገኘው ወርቅ ስምንት ዓመታት በኋላ አዲስ ታሪክ ማስመዝገብ የቻለው ሙክታር እድሪስ ትልቅ ፉክክር እንደሚጠብቀው እየተነገረ ይገኛል፡፡

በ16ኛው የዓለም አትሌቲክስ ሻምፒዮና ላይ 10ሺሕ ሜትር 26 ደቂቃ ከ49 ሴኮንድ ከ51 በማጠናቀቅ የረዥም ርቀት ውድድር የበላይነቱን ሲያስከብር የቆየው ሞ ፋራ በዙሪክ ዳይመንድ ሊግ በመሳተፍ የዓለም ሻምፒዮና ላይ ያጣውን የ5 ሺሕ ሜትር ውጤት ዳግም ለመጨበጥ እንደሚረዳው እየተገለጸ ይገኛል፡፡

ከቀናት በፊት በበሪኒንግሀም በተከናወነው የአይኤኤፍ ዳይመንድ ሊግ ላይ በ3 ሺሕ ሜትር ድል መቀናጀት የቻለው ሞ ፋራ የመሰናበቻ ውድድርም ሆኖለታል፡፡

በሌላ ዜና በለንደኑ የዓለም ሻምፒዮና በቡድን ሥራ የተሳካላቸው ኢትዮጵያውያን አትሌቶች ከኢትዮጵያ አትሌቲክስ ፌዴሬሽን ዳጎስ ያለ የገንዘብ ሽልማት ማግኘታቸው ይታወሳል፡፡ በዚህም መሠረት ፌዴሬሽኑ በውድድሩ ላይ ትልቅ ተጋድሎ አድርጓል ብሎ ያመነበትን ዮሚፍ ቀጄልቻ ከወርቅ ተሸላሚው ሙክታር እድሪስ እኩል 40 ሺሕ ብር ሸልሞታል፡፡ የፌዴሬሽኑ ምክትል ፕሬዚዳንት ገብረ እግዚአብሔር ገብረ ማርያም ተጨማሪ 40 ሺሕ ብር ሸልሞታል፡፡

የሞ ፋ ራን የመም ላይ የበላይነት የገታው ሙክታር እድሪስ ለእንግሊዛዊውና ለኬንያውያን ሥጋት እንደሆነ ከወዲሁ እየተነገረ ይገኛል፡፡ ሐሙስ ነሐሴ 18 ቀን  ዙሪክ በሚካሄደው የዳይመንድ ሊግ ውድድር ኢትዮጵያዊያኑ ዮሚፍ ቀጄልቻ የእኔው አላምረው፣ ሰሎሞን ባሬጋና ብርሃኑ ለገሰ ተካፋይ መሆናቸው ተረጋግጧል፡፡

በአይኤኤፍ ዳይመንድ ሊግ ውድድር ላይ ፍጻሜ የደረሱ ተፎካካሪዎች 100 ሺሕ ዶላር የገንዘብ ሽልማት ተዘጋጅቶላቸዋል፡፡ የዳይመንድ ሊጉ የመጨረሻውና 14ኛው ውድድር ነሐሴ 26 ቀን 2009 ዓ.ም. በብራስልስ ይከናወናል፡፡

በዳይመንድ ሊጉ የመም ላይ የመጨረሻ ውድድሩን ሊያደርግ ይችላል የተባለው ሞ ፋራ፣ አራት ጊዜ የኦሊምፒክ ሻምፒዮን፣ አምስት ጊዜ የዓለም ሻምፒዮን፣ አምስት ጊዜ የአውሮፖ ሻምፒዮንና እንዲሁም በ5ሺሕ በ10 ሺሕ ርቀት በኦሊምፒክና ዓለም ሻምፒዮና ላይ በተከታታይ ሁለት ጊዜ ማሳካት ችሏል፡፡

በሌላ ዜና በርሚንግሃም በተከናወነው የዳይመንድ ሊግ ውድድር በ1500 ሜትር ኢትዮጵያዊቷ ዳዊት ሥዩም ርቀቱን 4፡01፡36 በማጠናቀቅ አንደኛ ደረጃን ስትጎናጸፍ ኬንያዊቷ ዊኒ ቼቤት 4፡02፡24 ሁለተኛ፣ እንዲሁም ሞሮኳዊቷ ራቤቤ አራፊ 4፡02፡95 ሦስተኛ በመሆን አጠናቃለች፡፡  ዳዊት ሥዩም በ16ኛው የዓለም ሻምፒዮና ምርጫ ወቅት ወቅታዊ አቋሟ ለሻምፒዮናው እንደማያበቃት ተናግረዋት ከምርጫ ውጪ መሆኑዋ ይታወሳል፡፡

ጐደፋይ ፀጋይ 4፡03፡00 በመግባት አራተኛ ሆና አጠናቃለች፡፡ በውድድሩ ሌላዋ ኢትዮጵያዊት ሀብታም ዓለሙ በ800 ሜትር 1፡59፡60 በማጠናቀቅ አንደኛ ወጥታለች፡፡

በወንዶች 3000 ሜትር ሞ ፋራ አንደኛ ሆኖ በማጠናቀቅ እንግሊዛውያንን ለመሰናበት አጋጣሚው ፈጥሮለታል፡፡ አትሌቱ ርቀቱን 7፡38፡64 ነበር ማጠናቀቅ የቻለው፡፡ በሴቶች 3000 ሲፋን ሀሰን 8፡28፡90 በሆነ ሰዓት በአንደኝነት አጠናቃለች፡፡