በሕገወጥ ዕርድ የሚሳተፉ የውጭ ዜጎችን ሳይቃጠል በቅጠል እንበላቸው

እንደየአገሩ ሁኔታ ለአገሬው ተብለው የተከለሉ የሥራ ዘርፎች አሉ፡፡ ከአገሩ ዜጎች በቀር የሌሎች አገር ዜጎች የማይነኳቸው የሥራ መስኮች በሕግ ጭምር ይከለላሉ፡፡ ዝርዝር ሕግ ባይኖራቸውም አንዳንድ የሥራ ዘርፎች በልምድ የውጭ ዜጎች እጃቸውን የማያስገቡባቸው መሆኑ ይታወቃል፡፡

በአገራችንም ከትላልቅ ኩባንያዎች ጀምሮ አነስተኛ የምንላቸው የቢዝነስ ሥራዎች ውስጥ በአገሬውና በውጭ ዜጎች የሚሠሩና የማይሠሩ ተብለው  የተለዩ ሥራዎች አሉ፡፡ አነስተኛ የችርቻሮ ንግድ ውስጥ የውጭ ዜጎች አይገቡም፡፡ ሌላው ጥሩ ማሳያ የሚሆነው ደግሞ በኢትዮጵያ ሕግ በፋይናንስ ኢንዱስትሪ ውስጥ የውጭ ኩባንያዎችና ዜጎች በፍፁም መሳተፍ አለመቻላቸው ነው፡፡ ለኢትዮጵያውያን ተብሎ በተቀመጠው ሕግ መሠረት እየተተገበረ ያለ ሕግ አለ ከተባለ ለፋይናንስ ተቋማት የወጣው ሕግ አንዱ ነው ሊባል ይችላል፡፡

ይህ እንደተጠበቀ ሆኖ በቀላሉ የአገሬው ዜጎች ሊሠሩዋቸው በሚችሉ የሥራ ዘርፎች ላይ የውጭ ዜጎች እንደፈለጉ እንዲፈነጩ ባይፈቅድም፣ በአንዳንድ የሥራ ዘርፎች ውስጥ የውጭ ዜጎች እንደፈለጉ ሲሆኑ መመልከቱ እስከ መቼ? የሚል ጥያቄ ያስነሳል፡፡

ባልተፈቀደላቸው ዘርፍ መሰማራታቸው ያልበቃቸው አንዳንድ የውጭ ዜጎች፣ በሕገወጥ ተግባራትም ሲሳተፉ ይታያል፡፡ ከውጭ ዜጎች የዕውቀት ሽግግር የሚገኘውን ያህል አንዳንድ ተግባራቸው ደግሞ በመጥፎ ምሳሌነት የሚያስፈርጃቸው ነው፡፡

አንዳንዴ የውጭ ዜጎች ከእኛ የተሻሉ ናቸው ብሎ የማሰብ አጉል ልምድ የተጠናወታቸው ስለማይጠፉ፣ እነሱ የሚሠሩት ሥራ ሕገወጥ እንዳልሆነ የሚቆጥሩ የዋሆች ይኖራሉ፡፡ አንዳንዴ የእነሱ ተባባሪ በመሆን ችግሩን የሚያባብሱ አይጠፉም፡፡

በአገሬውም ዜጋ ቢሆን ሲፈጸም የሕግ ተጠያቂ በሚያደርጉ አንዳንድ ተግባራት ላይ የውጭ ዜጎች እጅ እየረዘመ ነው መባሉ፣ ጉዳዩን በቅርበት ሆኖ መቆጣጠር እንደሚገባ አመላካች ይሆናል፡፡ ለምሳሌ በሕገወጥ ዕርድ የተሰናዳን ሥጋ ማዘዋወር ፈጽሞ እንደማይፈቀድ ይታወቃል፡፡ ነገር ግን ኃላፊነት የጎደላቸው የውጭ ዜጎች በሕገወጥ የዓሳማ ዕርድ ውስጥ እጃቸው አለበት ሲባል መስማቱ አሳዛኝ ነው፡፡

ይህ ከሆነ ደግሞ ድርጊቱ ሕገወጥ ዕርድን ለመቆጣጠር ያለውን የላላ አሠራር ከማሳየቱም በላይ፣ በሕጋዊ መንገድ የሚሠሩ የዓሳማ ሥጋ አቅራቢዎችን መጉዳቱም አይቀርም፡፡ በሕገወጥ መንገድ የሚቀርቡ ምርቶች ደግሞ ለገበያ ትርምስ መንስዔዎችም ናቸው፡፡

አሁን አሁን ደግሞ የአኗኗር ዘይቤያችን እየተለወጠ በመምጣቱ፣ ከዚህ ቀደም ብዙም ለምግብነት የማናውላቸው እንደ ዓሳማ ሥጋ ያሉ ምግቦች የአስቤዛችን አካል እየሆነ መጥቷል፡፡ በርካታ ሱፐርማርኬቶች የዓሳማ ሥጋን በተለያየ መንገድ ለገበያ እያቀረቡ ነው፡፡ ነገር ግን በአንዳንድ የውጭ ዜጎች ታርዶ የሚቀርብ የዓሳማ ሥጋ አለ ሲባል መስማት ከባድ ነው፡፡

የውጭ ዜግነት የያዙ ግለሰቦች በሕገወጥ ዕርድና ግብይት ላይ ተሰማርተዋል የሚለው ሹክሹክታም፣ አሁን አሁን የአደባባይ ሚስጥር እየሆነ ነውና ሳይቃጠል በቅጠል፡፡

ስለዚህ መንግሥት ከውጭ ዜጎች ሥራ ጋር በተያያዘ ብዥታ የሚፈጥሩ ጉዳዮችን በመመርመር ከጊዜው ጋር የሚሄዱ ሕግጋቶችን መቅረፅ ይገባዋል፡፡ የውጭ ዜጎች በየትኛው ቢዝነስ ላይ ተሠማርተዋል? እየሠሩ ያሉት ሥራ ለውጭ ዜጎች ብቻ የተፈቀደ ነው ወይ? የሚሉትን ጥያቄዎች በአግባቡ መመለስ አለበት፡፡

ንግድ ላይ የተሰማሩ ከሆኑም በሕጋዊ መንገድ እየሠሩ ነው ወይ? የሚለውን ጥያቄ በአግባቡ መመለስ ካልተቻለ ግብይቱ ይበላሻል፡፡ ሕጋዊ አሠራሮችንም ሊያፋልስ ስለሚችል ጉዳዩ ይታሰብበት፡፡