አዲሱን ድረ ገጽ ይሞክሩ!
አዲሱን ድረ ገጽ ይሞክሩ!

በቤቶች ፕሮጀክት ጽሕፈት ቤት የቀድሞ ኃላፊዎች ላይ ክስ መመሥረት አለመቻሉን ዓቃቤ ሕግ አስታወቀ

  • ፍርድ ቤቱ ክሱ ያልመሠረተበት ምክንያት አሳማኝ አይደለም ብሏል

 የፌዴራል ጠቅላይ ዓቃቤ ሕግ ከፌዴራል ፖሊስ ወንጀል ምርመራ ቡድን በቤቶች ፕሮጀክት ጽሕፈት ቤት የቀድሞ ኃላፊዎች በእነ ወ/ሮ ፀዳለ ማሞ (አምስት ሰዎች) ላይ ምርመራውን አጠናቆ መዝገቡን ያስተላለፈለት ቢሆንም፣ በተሰጠው ጊዜ ውስጥ ክስ መመሥረት አለመቻሉን ማክሰኞ መስከረም 2 ቀን 2010 ዓ.ም. ለፍርድ ቤት አስታወቀ፡፡ ፍርድ ቤቱ ግን ዓቃቤ ሕግ ክስ ላለመመሥረት ያቀረበው ምክንያት አሳማኝ አለመሆኑን ገልጿል፡፡

ዓቃቤ ሕግ በእነ ወ/ሮ ፀዳለ ላይ ክስ ያልመሠረተው የተሰጠው ጊዜ አጭር ከመሆኑም በተጨማሪ፣ በእነሱ መዝገብ መካተት ያለባቸው ሌሎች ተጠርጣሪዎች በመኖራቸውና የምርመራ ሒደቱን አጠናቆ አንድ ላይ ለማቅረብ መሆኑን ለፍርድ ቤቱ አስረድቷል፡፡

ተጠርጣሪዎቹ በጠበቆቻቸው አማካይነት ለፍርድ ቤቱ እንዳስረዱት፣ ተጠርጣሪዎቹ የአዲስ አበባ ከተማ አስተዳደር ቤቶች ልማት ጽሕፈት ቤት ከፍተኛ ኃላፊ ሆነው ሲሠሩ ጉዳት አድርሰዋል? ወይስ አላደረሱም? የሚለውን ለማወቅ መሥራት የጀመረው በ1999 ዓ.ም. ነው፡፡ የምርመራ መዝገብ የተከፈተውም በ2003 ዓ.ም. መሆኑንና ተጠርጣሪዎቹም በቁጥጥር ሥር ከዋሉ አንድ ወር ከ15 ቀናት እንደሆናቸው አስረድተዋል፡፡

ከዚህም ባለፈ የፌዴራል ፖሊስ ወንጀል ምርመራ ቡድን የምርምራ ሥራውን ማጠናቀቁንና ለዓቃቤ ሕግ በማስረከቡ፣ ዓቃቤ ሕግ በተሰጠው ጊዜ ክስ እንዲመሠርት ትዕዛዝ መስጠቱን አስታውሰው፣ መርማሪ በድኑ በዘጋው የምርመራ መዝገብ ውስጥ አዲስ ተጠርጣሪዎች ይካተቱና የምርመራ ጊዜ ይሰጠኝ ማለቱ ተገቢና የሕግ መሠረት ስለሌለው ሊሰጠው እንደማይገባ ተቃውሟቸውን ገልጸዋል፡፡

ዓቃቤ ሕግ የተለያየ ምክንያት እየፈጠረ ጊዜውን ለመራዘም ጥያቄ ማቅረቡ የተጠርጣሪዎችን መብት ከመጋፋቱም በላይ፣ ተገቢ ያልሆነና የሕግ መሠረት የሌለው በመሆኑ የዋስትና መብታቸው ተከብሮላቸው ጉዳያቸውን በውጭ ሆነው እንዲከታተሉ ፍርድ ቤቱን ጠይቀዋል፡፡

ዓቃቤ ሕግ ከመርማሪ ቡድኑ የቀረበለትን የምርመራ መዝገብ ዓይቶና መርምሮ ሲቀበል ክስ ለመመሥረት በቂ መሆኑን ካረጋገጠና ፍርድ ቤት ቀርቦ የክስ መመሥረቻ ጊዜ አስፈቅዶ እያለ፣ ተጠርጣሪዎቹን አስሮ ለሌላ ተጠርጣሪ መያዣ ሊያደርጋቸው እንደማይገባም አስረድተዋል፡፡

ዓቃቤ ሕግ በበኩሉ ተጠርጣሪዎቹ የተጠረጠሩበት ወንጀል ከአሥር ዓመታት በላይ ሊያስቀጣቸው ስለሚችል ዋስትናውን እንደሚቃወም አስረድቷል፡፡

ፍርድ ቤቱ የሁለቱንም ወገኖች ክርክር ካደመጠ በኋላ በሰጠው ትዕዛዝ ዓቃቤ ሕግ ክስ ላለመመሥረቱ ያቀረበው ምክንያት እንዳልተቀበለው በመግለጽ፣ ቀደም ብለው የክስ መመሥረቻ ከሚፈቀድለት ጊዜ ቀንሶ እንደነበር በማስታወስ፣ መስከረም 5 ቀን 2010 ዓ.ም. ክሱን መሥርቶ እንዲቀርብ ትዕዛዝ ሰጥቷል፡፡