በአዲስ አበባ የመሬት ጉዳይ ከፍተኛ ሥልጣን የተሰጠው ኮርፖሬሽን ተቋቋመ

 

የአዲስ አበባ ከተማ አስተዳደር መካከለኛውን የከተማ ክፍል የሚያለማና በመሬት ጉዳዮች ላይ ከፍተኛ ሥልጣን የተሰጠው ኮርፖሬሽን አቋቋመ፡፡

‹‹የአዲስ አበባ ማዕከላትና ኮሪደሮች ልማት ኮርፖሬሽን›› በሚል ስያሜ የተቋቋመው አዲሱ የመንግሥት የልማት ድርጅት መሬት የማዘጋጀት፣ የማልማት፣ የማስተላለፍና የማስተዳደር ሥልጣን ተሰጥቶታል፡፡

የአዲስ አበባ ከተማ አስተዳደር ከንቲባ አቶ ድሪባ ኩማ ሐሙስ ሐምሌ 6 ቀን 2009 ዓ.ም. በተጠናቀቀው የምክር ቤት ስብሰባ የኮርፖሬሽኑን መቋቋም በገለጹበት ወቅት፣ ‹‹ኮርፖሬሽኑ በመሀል አዲስ አበባ በመልሶ ማልማት ቦታዎች 300 ሔክታር መሬት በማልማት ሥራውን ይጀምራል፤›› ብለዋል፡፡

በመሀል አዲስ አበባ ከአፍሪካ ኅብረት እስከ ቤተ መንግሥት መሀል ያሉ ቦታዎችን በማልማት ሥራ የሚጀምረውን ይህን ኮርፖሬሽን፣ ‹‹በቀጣይ ለከተማው ዕድገት ትልቅ አስተዋጽኦ አለው፤›› በማለት ከንቲባው ገልጸዋል፡፡

ኮርፖሬሽኑ ከተሰጡት ሥልጣንና ኃላፊነቶች መካከል ለአልሚዎች መሬት የማስተላለፍ፣ የማዕከላትና የኮሪደሮች ልማት የሚካሄድባቸውን ቦታዎች በፕላን ቅደም ተከተል በሕግ የማስለቀቅ፣ በሕጉ መሠረት ለተነሺዎች ካሳ የመክፈል፣ ምትክ ቦታና ቤት ለሚያስፈልጋቸው መስጠት፣ መልማት አለባቸው የተባሉ ቦታዎች ከማንኛውም ሕጋዊ የይገባኛል ጥያቄ ነፃ አድርጎ ለልማት ዝግጁ ማድረግ፣ እንደየሁኔታው መሠረተ ልማት በማሟላት ወይም እንዲሟላ በማድረግ ማልማት ወይም እንዲለማ ማድረግ ተጠቃሾች ናቸው፡፡

ኮርፖሬሽኑ ተጠሪነቱ ለከተማው ሥራ አስኪያጅ ሆኖ ሰባት ወይም ዘጠኝ አባላት ባሉት ቦርድ ይመራል፡፡ በአዲስ አበባ መሬት ልማትና ማኔጅመንት ቢሮ ሥር የሚገኙት የመሬት ልማትና ከተማ ማደስ ኤጀንሲና የመሬት ባንክና ማስተላለፍ ጽሕፈት ቤት ኮርፖሬሽኑ በተቋቋመበት አዋጅ መሠረት፣ በማዕከላትና በኮሪደሮች የሚገኙ ቦታዎች ላይ ያላቸው መብትና ግዴታዎች ለኮርፖሬሽኑ ተላልፈው ተሰጥተዋል፡፡

የአዲስ አበባ ከተማ አስተዳደርን አገልግሎት አሰጣጥ የተሻለ ለማድረግ የባለሙያንና የፖለቲካን ሚና የሚለይ ጥናት መካሄዱ ይታወቃል፡፡

በዚህ ጥናት ከተጠቀሱ ጉዳዮች መካከል የአዲስ አበባ መሬት ልማትና ማኔጅመንት ቢሮ ተቆጣጣሪ ሆኖ እንዲቀጥል፣ የማዕከላትና የኮሪደሮች ኮርፖሬሽን ደግሞ የልማት ሥራውን እንዲያካሂድ ተመልክቷል፡፡

ነገር ግን ይህ ጥናት ከመካሄዱ በፊት በዚሁ የምክር ቤት ስብሰባ ወቅት በፀደቀው አሥረኛው የአዲስ አበባ ከተማ አስተዳደር ማስተር ፕላን፣ የከተማዋን ዋና ዋና ቦታዎች የሚያለማ ኮርፖሬሽን እንደሚያስፈልግ ተገልጾ ነበር፡፡

በዚህ መነሻ የተዘጋጀው ኮርፖሬሽን በሚቀጥሉት ስድስት ወራት ራሱን አደራጅቶ የከተማ አስተዳደሩ ግዙፍ የልማት ድርጅት እንደሚሆን ተገልጿል፡፡