አዲሱን ድረ ገጽ ይሞክሩ!
አዲሱን ድረ ገጽ ይሞክሩ!

ከተሞች የከተሙባት ጎንደር

ሰባተኛው የኢትዮጵያ ከተሞች ፎረም 231 ከተሞችን ይዞ በጎንደር እየተከበረ ነው፡፡ በ17ኛው ክፍለ ከተማ የተመሠረተችው ጎንደር በ15 ሺሕ የሚገመቱ እንግዶቿን ተቀብላ ለሰባት ቀናት የሚቆየውን መሰናዶ ታስተናብራለች፡፡ ‹‹የከተሞች ዘላቂ ልማትና መልካም አስተዳደር ለሕዳሴያችን›› በሚል መሪ ቃል እየተከበረ ባለው የከተሞች ቀን፣ ፕሬዚዳንት ሙላቱ ተሾመን (ዶ/ር) ጨምሮ የተለያዩ ከፍተኛ ሹማምንት ተገኝተዋል፡፡ ፎቶዎቹ ሥነ በዓሉን በከፊል ያሳያሉ፡፡

(ፎቶ በመስፍን ሰሎሞን)

                            ***

የድመት ጠለፋ

ድመቶች እየተጠለፉ ከተወሰኑ ቀናት በኋላ የሆዳቸው አካባቢ ፀጉር ተላጭቶ ወደ አሳዳሪዎቻቸው እየተመለሱ የመሆኑን ምስጢር ለመፍታት የቨርጂኒያ ፖሊስ እየጣረ መሆኑን ሮይተርስ ዘግቧል፡፡ የፖሊስ ካፒቴን ኬሊ ዋከር እንደተናገሩት፣ ካለፈው ታኅሣሥ ጀምሮ ሰባት ድመቶች ለቀናት ከጠፉ በኋላ ፀጉራቸው ተመልጦ ወደ ቤታቸው ተመልሰዋል፡፡ ‹‹የድመቶቹ መመለጥ እንዲሁ በዘፈቀደ የተደረገ ሳይሆን በጥንቃቄ በሕክምና ማዕከል ውስጥ የተካሄደ ነው የሚመስለው፤›› ብለዋል፡፡

                              ***

ለ30 ዓመታት እንደ እንስሳ የብረት አጥር ውስጥ እንዲኖር የተደረገው ሰው

ደቡብ ቻይና ውስጥ የሆነ ነው፡፡ ልጇ በሙት መንፈስ ተይዟል ብለው በማመን ከባለቤቷ ጋር ተስማምተው ልጃቸውን ለረዥም ዓመታት የብረት ፍርግርግ ውስጥ ታስሮ እንዲኖር ማድረጋቸውን እናትየው ጠቅሶ ዴይሊ ሚረር ዘግቧል፡፡ እናቲቱ እንደገለጸችው ሕፃኑ የተባለው የሙት መንፈስ ይጸናወተው የጀመረው ገና የስድስት ዓመት ልጅ ሳለ ነው፡፡ እናትና አባት ስለ ሕፃኑ ሁኔታ ምንም ዓይነት የሕክምና ባለሙያ ሳያማክሩ ልጃቸውን ለ30 ዓመታት እንደዚያ ባለ የብረት አጥር ውስጥ እንዲኖር ቢያደርጉም ልጁ ግን የአዕምሮ ሕመምተኛ መሆኑ በመጨረሻ ተረጋግጧል፡፡

                                                             ***

ጥሬ ጨው

መስለውኝ ነበረ፡

የበቁ ነቁ

ያወቁ የረቀቁ

የሰው ፍጡሮች፡

ለካ እነሱ ናቸው፡

ጥሬ ጨው . .ጥሬ ጨው

ጥሬ ጨዋዎች፡

መፈጨት - መስለቅ

መደለዝ - መወቀጥ-

መታሸት - መቀየጥ

ገና እሚቀራቸው፡

‹‹እኔ የለሁበትም!››

ዘወትር ቋንቋቸው፡፡

ደበበ ሰይፉ ‹‹የብርሃን ፍቅር›› (1971 ዓ.ም.)