ኬንያዊቷ የሪዮ ኦሊምፒክ ማራቶን ባለወርቅ አበረታች ንጥረ ነገር ተገኘባት

 

በሪዮ ኦሊምፒክ የመጀመሪያዋ ኬንያዊት የኦሊምፒክ ማራቶን አሸናፊዋ ጀሚማ ሰምጎንግ፣ የተከለከለው አበረታች ንጥረ ነገር መውሰዷን ማረጋገጡን የኢንተርናሽናል አትሌቲክስ ፌዴሬሽኖች ማኅበር አስታወቀ፡፡

ማኅበሩ ሐሙስ መጋቢት 28 ቀን 2009 ዓ.ም. ባወጣው መግለጫ እንደገለጸው፣ በአትሌቷ ደም ውስጥ የተገኘው አበረታች ንጥረ ነገር ኢሪይትሮፖይቴን (ኢፒኮ) የተሰኘ ነው፡፡

የሰምጎንግ ሌላኛው ‹‹ቢ›› ናሙና ተመርምሮ በተመሳሳይ ፖዘቲቭ ሆኖ ከተገኘባት እገዳ ይጸናበታል፡፡ ይህም በረዥም ርቀት ከአፍሪካ ለምትጠቀሰው ኬንያ ፈተና ይሆናል፡፡

ኬንያ በኦሊምፒክ ታሪኳ በቀደምት ሦስት ኦሊምፒኮች በማራቶን የብር ሜዳሊያዎች፣ በሲዲኒ የነሐስ ሜዳሊያ ማግኘቷ ይታወቃል፡፡ የ32 ዓመቷ ሰምጎንግ በዚህ ወር የሚካሄደውን የለንደን ማራቶን ታሸንፋለች ተብላ ቅድመ ግምት ተሰጥቷት ነበር፡፡

ዘ ስታር እንደዘገበው፣ ከሦስት ዓመታት በፊት በተደጋጋሚ የማራቶን ውድድሮችን በማሸነፍ የምትታወቀዋ የሩጫ አጋሯ ኬንያዊቷ ሪቶ ጄፕቶ የሰምጎንግ ዓይነት አበረታች ንጥረ ነገር መውሰዷ በመረጋገጡ ለአራት ዓመታት መታገዷ ይታወሳል፡፡

በሪዮ ኦሊምፒክ ኬንያዊቷን ተከታትለው የገቡት የባህሬኗ ጄፕኪሩይ ኪርዋና ኢትዮጵያዊቷ ማሬ ዲባባ ነበሩ፡፡ የሰምጎንግ ውጤት ከተሰረዘ ባህሬኗ ወርቁን ስትወስድ፣ ማሬ ወደ ብር ሜዳሊያ ታድጋለች፡፡ አራተኛ የወጣችው ኢትዮጵያዊቷ  ትርፊ ፀጋዬም ነሐስ ታገኛለች፡፡