ክቡር ሚኒስትር

[ክቡር ሚኒስትሩ በአዲሱ መሥሪያ ቤታቸው የመጀመሪያ የሥራ ቀን ከአማካሪያቸው ጋር እየተወያዩ ነው]

  • የእዚህን መሥሪያ ቤት መሠረታዊ የሚባሉ ችግሮች ማወቅ እፈልጋለሁ፡፡
  • ክቡር ሚኒስትር አንድ ሳምንት ያስፈልገናል፡፡
  • ጊዜ የለኝም በአስቸኳይ አቅርብልኝ፡፡
  • ክቡር ሚኒስትር መሥሪያ ቤቱ በአደገኛ ኔትወርክ የተጠላለፈ ስለሆነ ትንሽ ጊዜ ያስፈልጋል፡፡
  • ይኼንን ኔትወርክ የሚባል ነገር ለመበጣጠስ ምን እናድርግ?
  • ክቡር ሚኒስትር ዋና ዋና የሚባሉትን ቦታዎች ማፅዳት ነው፡፡
  • ለምሳሌ?
  • ለምሳሌ ፋይናንስ፣ ግዥና ጨረታ፣ የሰው ኃይል፣ ሕዝብ ግንኙነት፣ ጠቅላላ አገልግሎትና የመሳሰሉትን፡፡
  • ሌላስ?
  • የሚኒስትር ዴኤታዎች የሚመሯቸውን ዘርፎች፡፡
  • በእነዚህ ላይ ትኩረት አድርገህ የዳሰሳ ጥናትህን በአስቸኳይ አቅርብልኝ፡፡
  • እሺ ክቡር ሚኒስትር፡፡
  • ሌላ ደግሞ ኔትወርክ የሚያደራጁትንና ወሬ የሚያቀባብሉትን እንዳትረሳ፡፡
  • እሺ ክቡር ሚኒስትር፡፡
  • በተጨማሪ የጥቅማ ጥቅም ምንጭ የሆኑትን ትኩረት አድርግባቸው፡፡
  • አደርገዋለሁ ክቡር ሚኒስትር፡፡
  • ዓይንና ጆሮህን በእያንዳንዱ እንቅስቃሴ ላይ አድርግ፡፡
  • እሺ ጌታዬ፡፡

[ክቡር ሚኒስትሩ አማካሪያቸውን ካሰናበቱ በኋላ ጸሐፊያቸውን ጠሯት]

  • አቤት ክቡር ሚኒስትር?
  • ምን አዲስ ነገር አለ?
  • ክቡር ሚኒስትር ብዙ ሰዎች እየደወሉ ነው፡፡
  • ምን ይፈልጋሉ?
  • ቀጠሮ ያዢልኝ እያሉ ነው፡፡
  • ለምን?
  • ክቡር ሚኒስትር ጉዳይ አለን ነው የሚሉት፡፡
  • ለምሳሌ ምን ምን ጉዳዮች አሉዋቸው?
  • አንዱ ከልጅነት ጀምሮ አውቃቸዋለሁ ካላገኘሁዋቸው እያለ ነው፡፡
  • እሺ?
  • ሌላው ስጦታ ይዤ ልምጣ እያለ ነው፡፡
  • ስጦታ?
  • የተወሰኑት ደግሞ የቆየ አቤቱታ አለን ይላሉ፡፡
  • ሌላስ?
  • አንድ ሁለት የሚሆኑት የምሣ ወይም የእራት ግብዣ ጥሪ ሊያደርጉልዎት ይፈልጋሉ፡፡
  • የተለየ አለ?
  • ክቡር ሚኒስትር ረስቼው?
  • ምኑን?
  • የውጭ ኢንቨስተሮችም ካላገኘናቸው ይላሉ፡፡
  • ምን ፈልገው ነው?
  • ክቡር ሚኒስትር እንኳን ደስ ያለዎት ለማለት መሰለኝ፡፡
  • ሌላ የምትነግሪኝ አለ?
  • የተወሰኑ ባለሀብቶች በጋራ የላኩት ስጦታ አለ፡፡
  • ምንድነው እሱ?
  • በትልቅ ካርቶን ታሽጎ ስለመጣ አልከፈትኩትም፡፡
  • መቼ ነው የመጣው?
  • ዛሬ ጠዋት ክቡር ሚኒስትር፡፡
  • ስልክ ደውለሽ በአስቸኳይ መጥተው እንዲወስዱ ንገሪያቸው፡፡
  • ኧረ  ጡር ይሆናል ክቡር ሚኒስትር፡፡
  • እንቢ ካልሽ ራስሽን አሸክሜ ነው የማስመልሰው፡፡

[ክቡር ሚኒስትሩ እንደ እሳቸው የተሾሙ ሌላ ሚኒስትር ዘንድ ደወሉ]

  • ክቡር ሚኒስትር ሥራ እንዴት ነው፡፡
  • አሁን ፅዳት ላይ ነው ያለሁት፡፡
  • የምን ፅዳት?
  • መሥሪያ ቤቱን እያፀዳሁ ነዋ?
  • ይኼንን ያህል ቆሽሿል?
  • አይ ክቡር ሚኒስትር በጣም፡፡
  • ምን አጋጠመህ ክቡር ሚኒስትር?
  • በረት ታውቃለህ?
  • የምን በረት?
  • ለዓመታት ያልተጠረገ በረት፡፡
  • ምንድነው የምትለው ክቡር ሚኒስትር?
  • ኧረ ብዙ ጉድ አለ፡፡
  • ለምሳሌ?
  • ሥራና ሠራተኛ አልተገናኙም፡፡ ዕቅድ ይታቀዳል አፈጻጸም ዜሮ፡፡ በዚያ ላይ ሌብነት፡፡
  • ምን ዓይነት ሌብነት?
  • በኔትወርክ በተደራጀ ኃይል የሚፈጸም ሌብነት፡፡
  • እህ. . .
  • ሥልቱ የረቀቀ ውንብድና፡፡
  • እህ. . .
  • አንዳንድ ሰነዶችን ስታገላብጥማ ያዞርሃል፡፡
  • ወይ ጉድ፡፡
  • ክቡር ሚኒስትር አንተም ቶሎ ማፅዳት ጀምር፡፡
  • ለመጀመር እየተዘጋጀሁ ነው ክቡር ሚኒስትር፡፡
  • ታዲያ ሥልታዊና ዘዴኛ መሆን አለብህ፡፡
  • ማለት?
  • በኔትወርክ የተደራጀው ኃይል እንደ ማፊያ ነው፡፡
  • ምን ያደርጋል?
  • ሥራ ከማበላሸት ጀምሮ ነፍሰ በላ ነው፡፡
  • እኛ ከጠነከርን ምንም ችግር የለም፡፡
  • እንዳይመስልህ፡፡
  • ምነው?
  • ጭልፊት ታውቃለህ?
  • አዎን፡፡
  • ኔትወርኩና ጭልፊት አንድ ናቸው፡፡
  • ምን ያደርጋሉ?
  • ሰላማዊ መስለው ዙሪያህን ያንዣብባሉ፡፡
  • ከዚያስ?
  • አንተንም ሰዎችህንም ያጠፋሉ፡፡

[ክቡር ሚኒስትሩ ከአንድ የቅርብ ዘመዳቸው ስልክ ተደውሎላቸው እየተነጋገሩ ነው]

  • ክቡር ሚኒስትር እንኳን ደስ ያለዎት፡፡
  • እንኳን አብሮ ደስ ያለን፡፡
  • እንግዲህ በርታ ማለት ነው ክቡር ሚኒስትር፡፡
  • ለምኑ?
  • ያው ጫናው ብዙ ነው ብዬ ነው፡፡
  • እንግዲህ ጫናውን ለመሸከም ተዘጋጅቼያለሁ፡፡
  • ግን ጠንቀቅ ማለት ያስፈልጋል፡፡
  • አይዞህ አትፍራ፡፡
  • በብቃት እንኳን አይታሙም፡፡
  • በምን እታማለሁ?
  • አለ አይደል?
  • ተናገረው፡፡
  • እንዳይዘናጉ ክቡር ሚኒስትር፡፡
  • በምን እንዳልዘናጋ?
  • ወቅቱ ከባድ ነው ክቡር ሚኒስትር፡፡
  • ይገባኛል ግን አትፍራ፡፡
  • ዙሪያዎን በሚገባ ይቃኙ ክቡር ሚኒስትር፡፡
  • ምን አለ ብለህ ነው?
  • አነካኪዎች አሉ፡፡
  • ምንድናቸው?
  • ከጉቦ ጀምሮ ብዙ የሚያቀባብሉ ክቡር ሚኒስትር፡፡
  • እኔ ዘንድ ቦታ የላቸውም፡፡
  • እንዳይመስልዎት ክቡር ሚኒስትር፡፡
  • ምን ያመጣሉ?
  • አስማተኞች ናቸው፡፡
  • አስማት?
  • አዎን ክቡር ሚኒስትር፡፡
  • ምንድነው የምታወራው?
  • ሰዎቹ ያደነዝዛሉ ተክነውበታል፡፡
  • ልክ አስገባቸዋለሁ፡፡
  • እኔ እንጃ ክቡር ሚኒስትር አይናቋቸው፡፡
  • ይኼን ያህል ያስፈራሉ?
  • ከማስፈራትም በላይ ያሸብራሉ፡፡
  • ወቸው ጉድ፡፡

[ክቡር ሚኒስትሩ የቢሮ ውሎአቸውን ጨርሰው ወደ ቤት እየሄዱ ከሾፌራቸው ጋር እያወሩ ነው]

  • ክቡር ሚኒስትር በጣም ደስ ብሎኛል፡፡
  • ምን ተገኘ?
  • የክቡር ሚኒስትር ሾፌር መሆን ለካ አሪፍ ነው፡፡
  • ምንድነው የምትለው?
  • ክቡር ሚኒስትር ከነጋ ከ50 በላይ ስልኮች ተደወሉልኝ፡፡
  • ለአንተ?
  • አዎን ክቡር ሚኒስትር ደስ ሲል፡፡
  • እነማን ናቸው የደወሉት?
  • እኔ የት አውቃቸዋለሁ?
  • ምን አሉህ?
  • እንኳን ደስ አለህ ሲሉኝ ነው የዋሉት፡፡
  • ምን አልካቸው?
  • ምን ይባላል በደስታ መቀበል ነው እንጂ፡፡
  • ለዚህ ነው ደስ ያለህ?
  • ክቡር ሚኒስትር ከዚህም በተጨማሪ ስጦታ የሚልኩልኝ እንዳሉ ነግረውኛል፡፡
  • ለአንተ?
  • አዎ ክቡር ሚኒስትር?
  • ምን ስለሆንክ?
  • የእርስዎ ሾፌር በመሆኔ ነዋ፡፡
  • ቆይ! ቆይ! ምንድነው የሚልኩልህ?
  • ምን እንደሆነ አልነገሩኝም ክቡር ሚኒስትር፡፡
  • ለዚህ ነዋ በደስታ የምትፈነድቀው?
  • እንዴታ ክቡር ሚኒስትር፡፡
  • ካሁን በኋላ እንዲህ ያለ ነገር መስማት አልፈልግም፡፡
  • ክቡር ሚኒስትር ምናለበት ደስታዬ ላይ ቀዝቃዛ ውኃ ባይቸልሱበት?
  • ዝም በል!

[ክቡር ሚኒስትሩ ቤት ሲገቡ ባለቤታቸው እየጠበቋቸው ነበር]

  • ክቡር ሚኒስትር የአዲሱ ሥራህ ውሎ እንዴት ነበር?
  • ትንሽ ግራ ያጋባል፡፡
  • ምን ገጠመህ?
  • ተርመስመስ ያሉ ነገሮች አሉ፡፡
  • እስኪ ንገረኝ፡፡
  • ጥንቃቄ የሚያስፈልጋቸው ብዙ ጉዳዮች አሉ፡፡
  • አይዞህ አትሥጋ ይለመዳል፡፡
  • ምኑ ነው የሚለመደው?
  • ሥራውም ኑሮውም ክቡር ሚኒስትር፡፡
  • ትቀልጃለሽ?
  • ራስህ አትቀልድ እባክህ?
  • ምን ለማለት ነው?
  • ነቃ ማለት ያስፈልጋል፡፡
  • ሞላጫና ሌባን ለመጠንቀቅማ ነቃ ማለት ያስፈልጋል፡፡
  • ከዚያም በላይ ትኩረት ማድረግ አለብህ፡፡
  • ለምኑ?
  • አጉል ሀቀኛ ነኝ እያልክ እንዳትሸወድ፡፡
  • አንቺ ሴትዮ ካሁኑ ጀመረሽ እንግዲህ?
  • ምኑ ነው የሚጀምረኝ?
  • ስንትና ስንት ኔትወርክና ጭልፊት እያንዣበበ እኮ ነው፡፡
  • ኔትወርኩን በትልቅ መቀስ ትቆራርጠዋለህ፡፡
  • እሺ?
  • ጭልፊቱን ደግሞ በወንጭፍ ትጥለዋለህ፡፡
  • ከዚያስ?
  • ከዚያማ አካባቢህን  በብቸኝነት ትቆጣጠራለህ፡፡
  • ምን ማለት ነው?
  • የራስህን ኢምፓየር መሠረት ታስይዛለህ፡፡
  • እንቺ እኮ አታፍሪም፡፡
  • በዓይን አውጣ ዘመን ዓይናፋርነት አይሠራም፡፡
  • ትንሽ እንኳ ይሉኝታ የለሽም?
  • ይሉኝታ የፋራ ነው፡፡
  • ምን አድርግ ነው የምትይኝ?
  • ነቃ በል!
  • ምን ለማድረግ?
  • ሰው ለመሆን!
  • የአንቺ መንገድ ሰው ሰው አይልም፡፡
  • ምን ምን እያለህ ይሆን ክቡር ሚኒስትር?
  • ሰይጣን! ሰይጣን!
  • የነገርኩህን ብታስብበት ይሻላል፡፡
  • አንቺም ብታስቢበት ይሻልሻል፡፡
  • ምን ማለት ነው?
  • አለበለዚያ አውጅብሻለሁ፡፡
  • ምን?
  • የአስቸኳይ ጊዜ አዋጅ!