ክቡር ሚኒስትር

[አዲስ የተሾሙት ክቡር ሚኒስትር ከአማካሪያቸው ጋር ቢሯቸው እያወሩ ነው]

  • እንኳን ደስ አለዎት ክቡር ሚኒስትር፡፡
  • እንደዚህ አትበለኝ ባክህ?
  • እንዴት ክቡር ሚኒስትር?
  • ኧረ ይኼን መጠሪያ ተወው፡፡
  • የቱን መጠሪያ?
  • ይኼ ክቡር ሚኒስትር የሚለውን፡፡
  • ለምን?
  • በቃ እኔ ልለምደው አልቻልኩም፡፡
  • አይጨነቁ ይለምዱታል፡፡
  • እኔ እኮ ከምርምሩ ዘርፍ ስለመጣሁ ይኼን መጠሪያ መልመድ ከበደኝ፡፡
  • ክቡር ሚኒስትር ለእርስዎ እንዲያውም ሌላ መጠሪያ ነው የሚያስፈልግዎት፡፡
  • ምን የሚል?
  • ዶክተር ክቡር ሚኒስትር፡፡
  • ኧረ ባክህ በስሜ ጥራኝ?
  • ስነግርዎት ይለምዱታል፡፡
  • ምኑን ነው የምለምደው?
  • የበፊቱም ሚኒስትር እንዲህ ነበሩ፡፡
  • ማለት?
  • ገና ሲሾሙ ክቡር ሚኒስትር አትበሉኝ ይሉ ነበር፡፡
  • ማን በሉኝ ነበር የሚሉት?
  • ታጋይ በሉኝ ይሉ ነበር፡፡
  • ለነገሩ ታጋይ ነበሩ እኮ፡፡
  • ታዲያ የታገሉት ለአገር ሳይሆን ለራሳቸው ነበራ?
  • እንዴት?
  • ስኳር ይልሱ ነበር፡፡
  • ስኳር ያማቸዋል ነው ያልከኝ?
  • ለነገሩ የስኳር በሽተኛም ነበሩ፡፡
  • እ…
  • ግን የተጨማለቁ ነበር፡፡
  • በምን?
  • በሙስና፡፡
  • ሰምቻለሁ፡፡
  • ለማንኛውም ከስምዎት በላይ ሌላ የሚያስጨንቅ ብዙ ነገር አለ፡፡
  • እ…
  • ሙስናው፣ ኔትወርኩ፣ ብልሹ አሠራር ኧረ ስንቱ፡፡
  • እሱስ ልክ ነህ፡፡
  • እነሱ ላይ ማተኮር ነው፡፡
  • አንድ ጉዞ ነበረኝ፡፡
  • መንፈሳዊ ጉዞ ነው?
  • ኧረ ወደ ውጭ ለመሄድ፡፡
  • ከአገር ውጭ?
  • አዎ፡፡ ምነው?
  • አስፈቅደዋል?
  • ማንን?
  • አለቃዎትን ነዋ፡፡
  • የግል ጉዞ እኮ ነው፡፡
  • ቢሆንም ፈቃድ ማግኘት አለብዎት፡፡
  • ለግል ጉዳይም?
  • ጉዞ ለአገር ይጠቅማል ወይስ አይጠቅምም የሚለው መታየት አለበት፡፡
  • ጉዞውማ እኔን ነው የሚጠቅመው፡፡
  • ይኼን እኮ ነው ያልኩዎት፡፡
  • አንድ ጥናታዊ ጽሑፍ ለማቅረብ ነው የምሄደው፡፡
  • እ…
  • በዚያው ሰዎችን እተዋወቅበታለሁ፡፡
  • የሚቻል አይመስለኝም ክቡር ሚኒስትር፡፡
  • ብዙ ሰውም እተዋወቅበታለሁ እኮ ነው ያልኩህ?
  • ለምን በስልክ አይተዋወቋቸውም?
  • የስልክ አበሌ እኮ 300 ብር ነው፡፡
  • በቫይበር ወይም በዋትስአፕ ይደውሏ?
  • ኢንተርኔት መቼ ይሠራል?
  • ወጣ ብለው ይሞክሯ፡፡
  • ከአገር ነው?
  • ከአዲስ አበባ!

[ክቡር ሚኒስትሩ ለምሳ ቤት ሲገቡ ሚስታቸውን አገኟቸው]

  • እሺ ሥራ እንዴት ነው?
  • ባክሽ ያስፈራል፡፡
  • ምኑ ነው የሚያስፈራው?
  • ሁሉ ነገር፡፡
  • ማለት?
  • በቃ አብዛኛው ሌባና ሙሰኛ ነው፡፡
  • እና ሥራውን አልወደድከውም?
  • እንደዚያ ማለቴ አይደለም፡፡
  • እስቲ የወደድካቸውን ነገሮች ንገረኝ?
  • መኪናዬን በጣም ወድጃታለሁ፡፡
  • እውነት?
  • በቃ በሾፌርም ስለምሄድ ነው መሰለኝ በጣም ተመችታኛለች፡፡
  • ሌላስ?
  • ያው አሁን ያለኝ ክብር ሌላ ነው፡፡
  • ማለት?
  • ሁሉም ክቡር ሚኒስትር ክቡር ሚኒስትር ሲለኝ ነው የምውለው፡፡
  • እሺ ሌላስ?
  • ያው እንግዲህ የተሰጠንን አዲሱ ቤታችንን በጣም ወድጄዋለሁ፡፡
  • ስማ አሁን ማስተዋል አለብህ፡፡
  • ምን ላስተውል?
  • እነዚህ ነገሮች ከአንተ ጋር ላይቀጥሉ ይችላሉ፡፡
  • ማለት?
  • ጊዜያዊ ነገሮች ናቸው፡፡
  • ምን እያልሽ ነው?
  • ዘለቄታዊ ልታደርጋቸው ይገባል፡፡
  • ሴትዮ ምን ለማለት ፈልገሽ ነው?
  • ተረቱን በደንብ ታውቀዋለህ፡፡
  • የቱን ተረት?
  • ሲሾም ያልበላ ሲሻር ይቆጨዋል የሚለውን፡፡
  • አንቺ ጤና ያለሽ አትመስይኝም፡፡
  • በጣም ጤነኛ ነኝ፡፡
  • ሙሰኛ ሁን ነው የምትይኝ?
  • አልወጣኝም፡፡
  • እና ምን እያልሽ ነው?
  • ዕድሉን ተጠቀምበት፡፡
  • እ…
  • ተረቱን ነው የነገርኩህ፡፡
  • እኔ ተረቱን ቀይሬዋለሁ፡፡
  • ምን ብለህ?
  • ሲሾም ያልሠራ ሲሻር ይቆጨዋል ብዬ፡፡
  • ሰውዬ ተረት ኪስ አይገባም፡፡
  • ምን አልሽ?
  • የወደፊቱን አስብ፡፡
  • የወደፊቱንማ የማታስቢ አንቺ ነሽ፡፡
  • የወደፊቱን ካሰብክማ ያልኩህን ታደርጋለህ፡፡
  • ያልሽኝንማ ባደርግ የወደፊቴ ቂሊንጦ ነው፡፡
  • የአንተ ትንሽ መታሰር በቂሊንጦ፣ እኛን ያኖረናል አንበላጦ፡፡
  • አንቺ በጣም ደፋር ነሽ፡፡
  • ነገርኩህ ክቡር ሚኒስትር አስብበት፡፡
  • ምኑን ነው የማስብበት?
  • በጊዜ መመረቅ አለብህ፡፡
  • ከምን?
  • ከክቡር ሚኒስትርነት፡፡
  • ወደ ምንድን ነው የምመረቀው?
  • ወደ ክቡር ኢንቨስተር!

[የክቡር ሚኒስትሩ የቀድሞ የሥራ ባልደረባ ደወሉላቸው]

  • እንዴት ነህ ወዳጄ?
  • እንዴት ነህ ክቡር ሚኒስትር?
  • ኧረ ይኼን ክቡር ሚኒስትር ተወው፡፡
  • እንዴት ነው አዲሱ ሥራ?
  • እንዳሰብኩት አይደለም፡፡
  • ማለት?
  • በጣም አስቸጋሪ ነው፡፡
  • ምኑ ነው የሚያስቸግረው?
  • የሙሰኛው ብዛት አንገሽግሾኛል፡፡
  • እሱማ ይታወቃል፡፡
  • እንዴት እንደምመራው አላውቅም፡፡
  • ወዳጄ ምን ነካህ?
  • ምነው?
  • እንኳን አንተ ስንቱ ሙሰኛ ሲመራው አልነበረም እንዴ?
  • እኔም የጨነቀኝ እኮ እሱ ነው፡፡
  • ምኑ ነው የጨነቀህ?
  • አገሪቷ ላብራቶሪ ሆነች፡፡
  • እ…
  • ሁላችንም እየተፈራረቅንባት ምን ትሆናለች ብዬ ነው፡፡
  • ስማ አንተ የታወቀ ተመራማሪ ስለሆንክ ቢያንስ ከሙሰኞቹ ትሻላለህ፡፡
  • እሱንማ አውቃለሁ፡፡
  • ስለዚህ 100 ሚሊዮን ሰው ከጀርባ ሆኖ ያይሃል፡፡
  • እሱ እኮ ነው የሚያስደነግጠኝ፡፡
  • አገሪቷ ከአንተ ብዙ ትጠብቃለች፡፡
  • እኔም ለማገልገል እኮ ቆርጫለሁ፡፡
  • እኔም የደወልኩት ተስፋ እንዳትቆርጥ ለማበረታታት ነው፡፡
  • ብቻ ፈተናው ቀላል አይደለም፡፡
  • ወዳጄ አንተ ስንተ ፈተና ተፈትነህ ያለፍክ ሰው ነህ፡፡
  • ለማንኛውም የቻልኩትን አደርጋለሁ፡፡
  • ከሙሰኞቹ ግን ተጠበቅ፡፡
  • መንቀሳቀሻ ያሳጡኝ እነሱ ናቸው፡፡
  • ምክሬ አንድ ነው፡፡
  • ምንድን ነው ምክርህ?
  • በሀቅ አገልግሎት!

[አንድ ኢንቨስተር ክቡር ሚኒስትሩ ቢሮ ገባ]

  • ሰላም ክቡር ሚኒስትር?
  • ማን ልበል?
  • እንኳን ደስ አለዎት ለማለት ነው፡፡
  • ማን ነህ አንተ ግን?
  • እኔ ለዚህች አገር ጠቃሚ ሰው ነኝ፡፡
  • እ…
  • በርካታ ኢንቨስተሮችን ወደ ኢትዮጵያ ያመጣሁ ሰው ነኝ፡፡
  • ደላላ ነህ ማለት ነው?
  • ኧረ ኢንቨስተም አድርጌያለሁ፡፡
  • ስለዚህ ደላላ ኢንቨስተር ነህ ማለት ነው?
  • ክቡር ሚኒስትር ቁልፍ ሰው ነኝ እኔ፡፡
  • የምን ቁልፍ?
  • ለአገሪቷ ቁልፍ ሰው ነኝ፡፡
  • አሁንማ ማን እንደሆንክ አስታወስኩኝ፡፡
  • እ…
  • ከበፊቱ ሚኒስትር ጋር አገሪቷን ስትቦጠቡጧት ነበር አይደል?
  • አይሳሳቱ ክቡር ሚኒስትር፡፡
  • ምን ተሳሳትኩ?
  • የበፊቱም ሚኒስትር ችግር ነበረባቸው፡፡
  • እሱማ ነበረባቸው፣ ለዚያም ነው የተቀየሩት፡፡
  • እኔ እንደምፈልገው አይሄዱልኝም ነበር፡፡
  • እ…
  • መነሳታቸው ላይቀር በደንብ ሳይበሉ ተነሱ፡፡
  • አታፍርም ትንሽ?
  • ክቡር ሚኒስትር እኔን ሳይዙ ምንም መሥራት አይቻልም፡፡
  • ማን ነው ያለው?
  • አልሰሙኝም እንዴ ቁልፍ ሰው ነኝ እኮ፡፡
  • እንደ አንተ ዓይነቱን ሙሰኛ አልሰማም፡፡
  • ሲስተሙ በእጄ ነው፡፡
  • እያስፈራራሃኝ ነው?
  • ኧረ ምን በወጣኝ?
  • እና?
  • እየመከርኩዎት ነው፡፡
  • የአንተ ምክር በአፍንጫዬ ይውጣ፡፡
  • ለማንኛውም ቁጥርዎትን ይስጡኝ?
  • አሁን የእኔን ቁጥር አታውቀውም?
  • የስልክዎትን አይደለም፡፡
  • ታዲያ የምኔን ነው?
  • የባንክ አካውንትዎን!