ክቡር ሚኒስትር

[ክቡር ሚኒስትሩ ከቤት ሊወጡ ሲል ልጃቸውን አገኙት]

  • ምን እያደረግክ ነው አንተ?
  • ምን አደረግኩ?
  • እስካሁን እንዴት አልሄድክም?
  • የት ዳዲ?
  • ሁሌ በዚህ ሰዓት የት ነበር የምትሄደው?
  • እ… ትምህርት ቤት?
  • አዎ ለምን አልሄድክም?
  • ዛሬ የለም፡፡
  • ለምን ተብሎ?
  • የለም ተብለን ነው፡፡
  • ታዲያ ለምን ለእኛ አላሳወቁንም?
  • እኔ እንጃ ዳዲ፡፡
  • ሌላ ጊዜ በደብዳቤ ያሳውቁን ነበር እኮ?
  • ምንም ደብዳቤ አልሰጡንም፡፡
  • ለምንድን ነው ግን የሌለው?
  • እ…
  • አንተ ልጅ እየዋሸኸኝ ነው?
  • ኧረ አይደለም ዳዲ፡፡
  • ቆይ ዳይሬክተሩ ጋ ልደውል፡፡

[ክቡር ሚኒስትሩ ዳይሬክተሩ ጋ ደወሉ]

  • ሄሎ!
  • ጤና ይስጥልኝ፡፡
  • ሰላም ምን ፈለጉ?
  • ስለልጄ ጉዳይ ለማናገር ነበር፡፡
  • መተው ያናግሩኛ፡፡
  • እ…
  • ጢንንን….

[ክቡር ሚኒስትሩ ከልጃቸው ጋር ማውራት ቀጠሉ]

  • አሁኑኑ መሄድ አለብን፡፡
  • የት ዳዲ?
  • ትምህርት ቤት ነዋ፡፡
  • እ…
  • ምንድን ተፈጥሮ ነው ንገረኝ?
  • አይ ከማሚ ጋር እሄዳለሁ፡፡
  • ለምን ከእኔ ጋር አትሄድም?
  • ወላጅ አምጣ ተብዬ ነው፡፡
  • ምን?
  • ምንም አላደረግኩም እኮ ዳዲ፡፡
  • እና ለምን ወላጅ አምጣ ተባልክ?
  • ዝም ብለው ነው እነሱ፡፡
  • ለዚህም ደርሰሃል ማለት ነው?
  • ኧረ ዳዲ አታካብድ፡፡
  • እሱን በኋላ እንነጋገራለን፡፡

[ክቡር ሚኒስትሩ የዳይሬክተሩ ቢሮ ከልጃቸው ጋር ገቡ]

  • ሰላም አረፍ ይበሉ፡፡
  • ይቅርታ ቅድም ደውዬ ነበር፡፡
  • ማን ልበል እርስዎን? ዶክተር፣ ፕሮፌሰር…
  • ክቡር ሚኒስትር ካልክ ይበቃል፡፡
  • እኔ እኮ የት ነው የማውቅዎት ብዬ ነበር?
  • ማለት?
  • የሆነ ቦታ አይቼዎታለሁ፡፡
  • የት ነው ያየኸኝ?
  • ያው ቲቪ ላይ ነዋ፡፡
  • እሺ ስለልጄ ጉዳይ ላናግርህ ነበር፡፡
  • እሱ ልጅዎት ነው እንዴ?
  • አዎ ምነው?
  • ከየት ነው የወጣው ታዲያ ክቡር ሚኑስትር?
  • ምን አደረገ?
  • በጣም አስቸጋሪ ልጅ ነው ያለዎት?
  • ይኼን ያህል?
  • አሁን እኮ ለ15 ቀን ልንቀጣው ነው፡፡
  • ምን አድርጎ?
  • ትምህርት አይማርም፣ ሁሌ እንደፎረፈ ነው፡፡
  • እ….
  • ስለዚህ ለ15 ቀን ሰስፔንድ ልናደርገው ነው፡፡
  • እንዴ በአንድ ጥፋት እንዴት ይኼን ያህል ይቀጣል?
  • ክቡር ሚኒስትር ይኼ እኮ አምስተኛ ጊዜ ነው፡፡
  • ምን?
  • ወላጅ ሲያመጣ እርስዎን ለአምስተኛ ጊዜ ነው፡፡
  • ከዚህ በፊት ማን ነበር የሚመጣው?
  • እናቱ ነበር የሚመጡት፡፡
  • እኔ ሳላውቅ?
  • ጆሮ ለባለቤቱ ባዳ ነው ይባላል፡፡
  • እንዴት?
  • ስንት የአገር ጉድ እያወቁ…
  • እ….
  • ለቤትዎት ጉድ ሆኑ ባዳ!

[ክቡር ሚኒስትሩ ሚስታቸው ጋ ደወሉ]

  • አንቺ ሴትዮ፡፡
  • ሄሎ፡፡
  • ምን እየሠራሽ ነው?
  • ምን ሆንክ ደግሞ?
  • እንዴት ነው የምትደብቂኝ?
  • አትጩህ እስቲ፡፡
  • የምታወሪው አይሰማኝም፡፡
  • አሞኛል እባክህ፡፡
  • ምን ሆንሽ?
  • ቶንሲል ነው መሰለኝ፡፡
  • የት ነው ያለሽው?
  • ቤት ነው ያለሁት፡፡
  • አሁኑኑ መጣሁ፡፡

[ክቡር ሚኒስትሩ ቤታቸው ደረሱ]

  • ምን ሆነሽ ነው?
  • ጉንፋን ነገር ነው፡፡
  • ድምፅሽ ለምን ተዘጋ?
  • ቶንሲሌም ተነስቶብኛል፡፡
  • ቀዝቃዛ ነገር ጠጣሽ እንዴ?
  • ኧረ የሰሞኑ አየር ከአቅሜ በላይ ሆኗል፡፡
  • በይ ነይ ሆስፒታል እንሂድ፡፡
  • እሺ፡፡

[ክቡር ሚኒስትሩ ሆስፒታል ሲደርሱ አንድ ባለሀብት አገኙ]

  • ሰላም ክቡር ሚኒስትር፡፡
  • አላወቅኩህም ይቅርታ፡፡
  • ባለፈው ስብሰባ ላይ ተገናኝተን ነበር፡፡
  • የትኛው ስብሰባ?
  • ከግል ባለሀብቶች ጋር ያደረጋችሁት ስብሰባ ላይ፡፡
  • እሺ እንዴት ነህ?
  • ሰላም ነኝ እኔ፣ ምነው እዚህ ተገኙ?አይ ትንሽ…
  • አመመዎት እንዴ?
  • ሚስቴን ትንሽ አሟት ነው፡፡
  • ውይ ምነው በሞትኩት?
  • አንተስ ምን ትሠራለህ?
  • ሰው ልጠይቅ መጥቼ ነው፡፡
  • ለነገሩ እሷም ቶንሲሏ ተነስቶባት ነው፡፡
  • ታዲያ እዚህ እንዴት ይመጣሉ?
  • ከሆስፒታል ውጪ የት ልሂድ?
  • ማለቴ ኢትዮጵያ ውስጥ ሕክምና በጣም ከባድ ነው፡፡
  • እ…..
  • ለእንቅርት ኩላሊት የሚቀዱ ሐኪሞች ባሉበት አገር፡፡
  • እሱስ እውነትህን ነው፡፡
  • እርስዎ ደግሞ እንዴት ያሳክሟቸዋል?
  • አልገባኝም?
  • እርስዎ የሕዝብ አገልጋይ ነዎት እኮ፡፡
  • ሌላ የሚያሳክምልኝ ሰው የለም፡፡
  • እኛ እያለን፡፡
  • እ….
  • ምን በወጣዎት ስልዎት?
  • ኧረ አይገባም፡፡
  • የእርስዎ ሚስት ደግሞ እዚህ መታከም የለባቸውም፡፡
  • ታዲያ የት ትታከም?
  • ባንኮክ ነዋ፡፡
  • ጉንፋን ነገር እኮ ነው፡፡
  • መሄድ አለባቸው ስልዎት፡፡
  • ለምን?
  • ለሙሉ ቼክአፕ!

[ክቡር ሚኒስትሩ ጋ አንድ ባለሀብት ደወለላቸው]

  • ክቡር ሚኒስትር ቀጠሯችን እንደተጠበቀ ነው አይደል?
  • አይ አይመስለኝም፡፡
  • እንዴ ክቡር ሚኒስትር?
  • አፋጣኝ ጉዳይ ገጥሞኝ ነው፡፡
  • እየቀለዱ መሆን አለበት?
  • የምን ቀልድ ነው?
  • ዛሬ መገናኘታችን ግዴታ ነው፡፡
  • የቤተሰብ ጉዳይ ገጥሞኝ ነው እኮ፡፡
  • ለሦስተኛ ጊዜ ቀጠሯችን ሊሰረዝ?
  • ምን ላድርግ?
  • የእኛ ጥምረት እኮ የብዙዎችን ሕይወት ነው የሚቀይረው፡፡
  • የሕዝቡን ሕይወት ይቀይራል ብለህ ነው?
  • የእኔና የእርስዎ ሕይወት ሲቀየር በዚያው የሕዝቡ ሕይወት ይቀየራል፡፡
  • እ….
  • እንዳይቀሩ ይምጡ!

[የክቡር ሚኒስትሩ ሾፌር አርፍዶ ደረሰ]

  • አንተ ጤነኛ ነህ?
  • ሆስፒታል ስለመጣን በዚያው ሊያስመረምሩኝ ብለው ነው?
  • እየቀለድኩ አይደለም፡፡
  • ይቅርታ ክቡር ሚኒስትር፡፡
  • ከእኔ ጋር እንደዚህ ማውራት የጀመርከው ከመቼ ጀምሮ ነው?
  • ኧረ ይቅርታ ለጨዋታ ብዬ ነው፡፡
  • የት ነበርክ እስካሁን?
  • መንገድ ተዘግቶ ነው፡፡
  • እኮ ለምን?
  • ዛሬ ከተራ እኮ ነው፡፡
  • ታቦት ይሸኛል ለካ ዛሬ?
  • እርስዎም ታቦት ይሸኛሉ እንዴ?
  • ብሸኝማ ደስ ይለኝ ነበር፡፡
  • በጣም ይገርማል፣ የቀድሞው ሚኒስትር እኮ የሚሸኙት ሌላ ነበር፡፡
  • ምን ነበር የሚሸኙት?
  • ኢንቨስተር፡፡
  • ዛሬ ታዲያ ማንን ቀጥረው ነው?
  • አንድ ኢንቨስተር፡፡
  • በቃ በታቦቱ ፋንታ እሱን ይሸኙታል፡፡
  • ማንን?
  • ኢንቨስተሩን!

[ክቡር ሚኒስትሩ ኢንቨስተሩ ጋ በጣም አርፍደው ደረሱ]

  • ምነው ክቡር ሚኒስትር?
  • ይቅርታ በጣም፡፡
  • ተስፋ ቆርጬ ልሄድ ነበር እኮ፡፡
  • መንገድ ተዘግቶብኝ እኮ ነው፡፡
  • አንዳንዴ ይረሱታል ልበል?
  • ምኑን?
  • ሚኒስትር መሆንዎን?
  • ለታቦት እኮ ነው የተዘጋው፡፡
  • የእኔ ታቦት እርስዎ ነዎት፡፡
  • እ…
  • ለማንኛውም ላረፈዱበት ይቀጣሉ፡፡
  • ምንድን ነው የምቀጣው?
  • አንድ ሔክታር መሬት!

[ለክቡር ሚኒስትሩ አንድ ሌላ ሚኒስትር ደወሉ]

  • እንዴት ነዎት ክቡር ሚኒስትር?
  • ደህና ነኝ፡፡
  • ሥራ እንዴት ነው?
  • ያው ተያይዘነዋል፡፡
  • ትልቅ ኃላፊነት እንዳለብዎት ያውቃሉ አይደል?
  • በሚገባ፡፡
  • ታዲያ ምንድን ነው የምሰማው?
  • ምን ሰሙ?
  • ከየትኛው ልጀምር?
  • ማለት?
  • ከትንሹ ይሻላል ከትልቁ?
  • አልገባኝም?
  • የቲቪውን ላውራ ወይስ የቪ8ቱን?
  • እ….
  • የበጉ ይሻላል ወይስ የባንኮኩ?
  • ስጦታ እኮ ነው፡፡
  • የመንግሥት ባለሥልጣን ስጦታ መቀበል አይችልም፡፡
  • ባህላችን እኮ ነው፡፡
  • ይኼ ሙስና ነው፡፡
  • ሙስና የሚባለው እኮ እኔ በምትኩ ሌላ ነገር ስሰጥ ነው፡፡
  • እና ሙሰኛ አይደለሁም እያሉ ነው?
  • በሚገባ፡፡
  • ለነገሩ አሁን የሚባሉት ሌላ ነው፡፡
  • ምንድን ነው የምባለው?
  • ዕጩ ሙሰኛ!