አዲሱን ድረ ገጽ ይሞክሩ!
አዲሱን ድረ ገጽ ይሞክሩ!

ክቡር ሚኒስትር

[ክቡር ሚኒስትሩ የፋይናንስ ኃላፊውን ቢሯቸው አስጠሩት]

  • አቤት ክቡር ሚኒስትር፡፡
  • አዘጋጀህልኝ?
  • ምኑን ክቡር ሚኒስትር?
  • ሪፖርቱን ነዋ፡፡
  • የትኛውን ሪፖርት ነው?
  • አንተ ሰውዬ ሥራህን ትተኸዋል እንዴ?
  • ይቅርታ ክቡር ሚኒስትር፡፡
  • የኦዲት ሪፖርቱን፡፡
  • አላዘጋጀሁትም፡፡
  • ፓርላማ የማቀርበው አይደል እንዴ?
  • ችግር የለውም አሁኑኑ አደርሰዋለሁ፡፡
  • እንዴት አድርገህ ነው የምታደርሰው?
  • ያለፈውን ዓመት ሪፖርት እኮ አፕዴት ማድረግ ነው፡፡
  • ምን?
  • ምንም አያስቡ ስልዎት?
  • ከበፊቱ ሚኒስትር ጋር እርስዎ የሚያጠፉት ተመሳሳይ ነው እያልከኝ ነው?
  • ኧረ በፍጹም፡፡
  • ቆይ እኔና የበፊቱ ሚኒስትር ስታወዳድረን እንዴት ነን?
  • በምን ክቡር ሚኒስትር?
  • በበጀት አጠቃቀማችን፡፡
  • አሁን አሁን እየተመሳሰላችሁ ነው፡፡
  • እንዴት ማለት?
  • በቃ ያለ ደረሰኝ በርካታ ገንዘብ እያወራረዱ ነው፡፡
  • እ…
  • በዛ ላይ በየጊዜው የተለያዩ ዕቃዎችን ያስገዛሉ፡፡
  • ለምሳሌ ምን?
  • ኮምፒዩተር ሊጠቀስ ይችላል፡፡
  • እኔ እኮ አንድ ኮምፒዩተር ነው ያለኝ፡፡
  • በስምዎት ግን የተመዘገቡ 17 ኮምፒዩተሮች አሉ፡፡
  • ምን?
  • እንዲያውም ክቡር ሚኒስትሩ ኢንተርኔት ካፌ ከፈቱ ወይ እየተባለ ይወራል፡፡
  • ስነግርህ አትሰማም እንዴ? ይኸው የምጠቀመው በአንድ ኮምፒዩተር ነው፡፡
  • ግን እንደነገርኩዎት በስምዎ የተመዘገቡት 17 ናቸው፡፡
  • ታዲያ የቻይና ኮምፒዩተር እየገዛችሁልኝ ምን ላድርግ?
  • እኮ ታዲያ 16ቱ የታሉ?
  • እኔ ሥራ አላሠራ ሲሉኝ ስለምናደድ እዚያው ነው የምሰብራቸው፡፡
  • ግን ኦዲተሮቹ ጠይቀውኛል፡፡
  • የትኞቹ ኦዲተሮች?
  • የመንግሥት ኦዲተሮች፡፡
  • ምን?
  • ምነው ደነገጡ?
  • እና ቢሮ መጥተው ነበር?
  • አዎን ክቡር ሚኒስትር፡፡
  • ስልካቸውን ትሰጠኛለህ?
  • ክቡር ሚኒስትር ኃላፊዎቹ ጋ ቢደውሉ አይሻልም?
  • እሺ እዚያ ልደውል፡፡

[ክቡር ሚኒስትሩ የኦዲት ኃላፊዎቹ ጋ ደወሉ]

  • ሰላም ክቡር ሚኒስትር፡፡
  • ቢሮ መጥታችሁ ነበር አሉ?
  • አዎን መጥተን ነበር፡፡
  • ታዲያ ሰላም ሳትሉኝ ምነው ሄዳችሁ?
  • ያው የመጣነው ለሥራ ነዋ ክቡር ሚኒስትር፡፡
  • ሁሉን ነገር እንደ ጠበቃችሁት ነው ያገኛችሁት አይደል?
  • ኧረ ከጠበቅነው በላይ ነው ያገኘነው፡፡
  • ሁሉን ነገር ነው ያሻሻልኩት፡፡
  • ሙስናውም ተሻሽሏል እያሉኝ ነው?
  • የምን ሙስና?
  • ለማንኛውም አሁን ቡድን አቋቁመናል፡፡
  • የምን ቡድን?
  • ኦዲት የሚያደርግ ነዋ፡፡
  • ኦዲት አደረጋችሁ አይደል እንዴ?
  • ሌላ ኦዲት የሚደረግ አካል አግኝተናል፡፡
  • ማን ነው?
  • ክቡር ሚኒስትሩ!

[ለክቡር ሚኒስትሩ አንድ ደላላ ደወለላቸው]

  • ሰላም ክቡር ሚኒስትር፡፡
  • እንዴት ነህ?
  • መቼም የዛሬውን ቀጠሮ አልረሱትም?
  • የምን ቀጠሮ?
  • እኔም እኮ ጠርጥሬ ነው የደወልኩት፡፡
  • ማንን ቀጥሬ ነበር?
  • ኢንቨስተሮቹን ነዋ፡፡
  • የትኞቹን ኢንቨስተሮች?
  • ክቡር ሚኒስትር መርሳት ጀመሩ ልበል?
  • እኔ በቀን ስንትና ስንት ኢንቨስተር እያገኘሁ የቱን ላስታውስ?
  • እነዚህ ግን የሚረሱ አልነበሩም፡፡
  • እንዴት ማለት?
  • ከቻይና የመጡት፡፡
  • ሁሌስ ቢሆን ከቻይና ውጭ ሌላ ኢንቨስተር መቼ አግኝቼ አውቃለሁ?
  • ክቡር ሚኒስትር እነዚኛዎቹ ቃል ገብተውልዎት ነበር፡፡
  • የምን ቃል?
  • ሼር ሊሰጥዎት፡፡
  • ትቀልዳለህ?
  • እህሳ ክቡር ሚኒስትር፡፡
  • እንዴት ልረሳው ቻልኩ ታዲያ?
  • እኔም እኮ ገርሞኛል፡፡
  • ስለዚህ ምሳ ሰዓት እንዳይቀሩ፡፡
  • በቃ ራሴ እየነዳሁ ነው የምመጣው፡፡
  • ከቻሉም በሔሊኮፕተርም ቢመጡ ጥሩ ነው፡፡
  • እሱን ማድረጌ አይቀርም፡፡
  • መቼ?
  • ድርሻዬን ስወስድ!

[የክቡር ሚኒስትሩ መኪና ነዳጅ ጨርሳ እየተገፋች ነዳጅ ማደያ ደረሰች፡፡ ቀጠሮ ቦታቸውም ስላረፈዱ ደላላው ደወለ]

  • የት ደረሱ ክቡር ሚኒስትር?
  • ነዳጅ ማደያ ተሰልፌ፡፡
  • ምን?
  • መኪናዬ ነዳጅ ጨረሰች፡፡
  • እየቀለዱ ነው?
  • ይኸው አሁን አስገፍቼ ነዳጅ ማደያ ደረስኩ፡፡
  • እርስዎ መቼም የመጀመሪያ ነዎት?
  • በምን?
  • መኪና እያስገፉ ማደያ ያስገቡ ሚኒስትር በመሆን፡፡
  • እኔ እኮ በብዙ ነገር ቀዳሚ ነኝ፡፡
  • በአንድ ነገር ቀዳሚ እንደሆኑ እኔም አውቃለሁ፡፡
  • በምን?
  • በኮሚሽን!

[ክቡር ሚኒስትሩ ደላላውን የቀጠሩበት ቦታ በጣም አርፍደው ደረሱ]

  • የት አሉ ኢንቨስተሮቹ?
  • ሄዱ ክቡር ሚኒስትር፡፡
  • የት?
  • ወደ አገራቸው፡፡
  • እኔን ቀጥረውኝ አልነበር እንዴ?
  • ዛሬ እንደሚበሩ ነግሬዎት ነበር እኮ?
  • ታዲያ እንዴት ሳያገኙኝ ይሄዳሉ?
  • አውሮፕላኑ ያመልጣቸዋላ፡፡
  • ከእኔ ጋር ቢስማሙ እኮ የግላቸውን አውሮፕላን መግዛት ይችሉ ነበር፡፡
  • ከሁለት ሰዓት በላይ ነው እኮ ያረፈዱት ክቡር ሚኒስትር?
  • የነዳጅ ማደያው ሠልፍ እኮ ሠልፍ እንዳይመስልህ፡፡
  • ለማንኛውም እኔ ሌላ የቢዝነስ ሐሳብ አለኝ፡፡
  • ምን ዓይነት?
  • ነዳጅ ለመግዛት ለሰዓታት ከተሠለፉ ለምን አይከፍቱም?
  • ምን?
  • ነዳጅ ማደያ!

[ክቡር ሚኒስትሩ ቢሮ እንደገቡ አማካሪያቸውን አስጠሩት]

  • በዓሉን እንዴት ነው የምናከብረው?
  • የትኛውን በዓል ክቡር ሚኒስትር?
  • የድል በዓሉን ነዋ፡፡
  • ግንቦት 20ን ነው፡፡
  • ምን ይቀባጥራል ይኼ?
  • የብሔር ብሔረሰቦች በዓልም አልፏል እኮ፡፡
  • ስማ የጥቁሮች የድል በዓል እየተባለ የሚወራለትን ረሳኸው?
  • የዓደዋ በዓልን ነው?
  • ታዲያስ?
  • አይፍረዱብኝ ክቡር ሚኒስትር፡፡
  • እንዴት?
  • ወድጄ አይደለም፡፡
  • ምን እያልክ ነው?
  • በምን ላስታውሰው ብለው ነው?
  • ይኼ ትልቅ በዓል ነው፡፡
  • አዎ ግን ቢሆንም እኛ ብዙ የምናከብረው ግንቦት 20ን፣ ብሔር ብሔረሰቦችን፣ ምናምን ነው፡፡
  • እ…
  • ክቡር ሚኒስትር ለእነዚህ በዓላት ሕዝብ በየአደባባዩ ወጥቶ፣ ቲሸርቱ ቢሉ ኮፍያው ኧረ ስንቱ፡፡
  • እና ለዓደዋ በዓል ቲሸርትና ኮፍያ ይዘጋጅ እያልክ ነው?
  • አይ ብቻ በዓሉ ብዙም ትኩረት አይሰጠውም፡፡
  • ስለዚህ እኛ ይህን በዓል ማክበር አለብን፡፡
  • እንዴት እናክብረው ታዲያ ክቡር ሚኒስትር?
  • በቃ ለሠራተኞቻችን የውይይት መድረክ ይዘጋጅ፡፡
  • እሺ፡፡
  • ስለዚህ ለፕሮግራሙ በጀት ይመደብ፡፡
  • ፕሮግራሙ ምንድን ነው የሚሆነው?
  • ጠዋት ሁለት ከሰዓት ሁለት የጥናት ወረቀቶች ይቀርባሉ፡፡
  • ሌላስ?
  • በቃ ለጥናት አቅራቢዎች ብቻ ሃምሳ ሃምሳ ሺሕ ብር ይከፈላል፡፡
  • ኮፍያና ቲሸርት የለም፡፡
  • አዋጪው መንገድ የጥናት ወረቀት የሚለው ነው፡፡
  • ግን በዚህ አጭር ጊዜ የጥናት ወረቀት የሚያቀርቡልን አራት ሰዎች ከየት እናገኛለን?
  • ለእሱ አታስብ፡፡
  • ለምን?
  • አራቱንም የጥናት ወረቀቶች…
  • እ…
  • እኔ አቀርባቸዋለሁ!

[ክቡር ሚኒስትሩ አንድ ሙሰኛ ሚኒስትር ጋ ደወሉ]

  • ሰላም ወዳጄ፡፡
  • ከየት ተገኙ ክቡር ሚኒስትር?
  • ስለዚህ የወጣቶች ፈንድ ላወራህ ነበር፡፡
  • ምን ፈለጉ ክቡር ሚኒስትር?
  • ያው ዘመዶቼን በጥቃቅንና አነስተኛ አደራጅቻቸዋለሁ፡፡
  • እሱማ እኔም አደራጅቻቸዋለሁ፡፡
  • አሁን ግን ሌላ ሐሳብ መጥቶልኝ ነበር፡፡
  • ምን ዓይነት ሐሳብ?
  • ለምን እኛም አንደራጅም?
  • በምን?
  • በአነስተኛና ጥቃቅን፡፡
  • ምን ልናደርግ?
  • ፈንዱን እንጠይቃለና?
  • ለወጣቶች ነው እኮ፡፡
  • እኛም ገና ወጣቶች አይደለን እንዴ?
  • እንዴት ሆኖ?
  • ከተሾምን ማለቴ ነው፡፡
  • እሱማ ልክ ነዎት፡፡
  • ስለዚህ በጊዜ እንደራጅ፡፡
  • በአነስተኛና ጥቃቅን?

[ክቡር ሚኒስትሩ ሌላ ሀቀኛ ሚኒስትር ጋ ደወሉ]

  • አቤት ክቡር ሚኒስትር፡፡
  • አንድ ሐሳብ ነበረኝ፡፡
  • የምን ሐሳብ ክቡር ሚኒስትር?
  • ይኼን የወጣቶች ፈንድ ለማግኘት ለምን አንደራጅም?
  • በምን?
  • በአነስተኛና ጥቃቅን፡፡
  • እርስዎ መደራጀት አይደለም የሚያስፈልግዎት፡፡
  • እና ምንድን ነው የሚያስፈልገኝ?
  • መጠየቅ፡፡
  • በምን?
  • በሙስናና በኪራይ ሰብሳቢነት!