አዲሱን ድረ ገጽ ይሞክሩ!
አዲሱን ድረ ገጽ ይሞክሩ!

ክቡር ሚኒስትር

[ክቡር ሚኒስትሩ መኝታ ቤታቸው ሆነው የቡችላ ድምፅ ይሰሙና ጥበቃቸውን አስጠሩት]

  • አንተ፡፡
  • አቤት ጋሼ፡፡
  • የምን ድምፅ ነው የምሰማው?
  • የት ጋሼ?
  • ግቢ ውስጥ ነዋ፡፡
  • እንግዲህ ወፎች ይጮሃሉ፣ የመኪና ድምፅ ይኖራል…
  • እሱን አይደለም የምልህ፡፡
  • ታዲያ የምን ድምፅ ሰምተው ነው?
  • የምን የቡችላ ድምፅ ነው የምሰማው?
  • አልሰሙም እንዴ ጋሼ?
  • ምኑን?
  • ወለደች እኮ፡፡
  • ማን?
  • የእኛ ውሻ ናታ፡፡
  • ምን?
  • እንዴ ጋሼ እርጉዝ ነበረች እኮ?
  • ከማን ነው ያረገዘችው?
  • ያስረገዛት አልታወቀም፡፡
  • እንዴት?
  • ከሰፈር ውሻ ነዋ ያረገዘችው፡፡
  • ይህ እንዴት ሊሆን ይችላል?
  • መድኃኒት ትወስድ ነበር እንዴ?
  • የምን መድኃኒት?
  • የእርግዝና መከላከያ፡፡
  • ማሾፍህ ነው?
  • አይ እንዴት ልታረግዝ ቻለች ሲሉኝ ነዋ?
  • እኔማ ማርገዟ አናዶኝ ነው፡፡
  • ለምን ክቡር ሚኒስትር?
  • ስማ በስንት መከራ ነው እኮ ያገኘኋት፡፡
  • ማለት ክቡር ሚኒስትር?
  • ምርጥ ዘር ናት፣ በብዙ ሺሕ ብር ነበር የገዛኋት፡፡
  • ዘር መቀላቀሏ ነው ያናደደዎት?
  • ታዲያስ፣ የቡችሎቹ አባት ራሱ አይታወቅም፡፡
  • እሱማ ዲቃላ ነው ያመጣችብን፡፡
  • አንተ ግን ይኼ ሲሆን የት ነበርክ?
  • የእኔ ሥራ እኮ ቤቱን መጠበቅ ነው፡፡
  • ውሻዋም እኮ ቤቱ ውስጥ ነበረች፡፡
  • እኮ በር ሲከፈት ወጥታ ነው አርግዛ የመጣችው፡፡
  • ስለዚህ ምን መደረግ እንዳለበት እኔ ነኝ የማውቀው፡፡
  • ምን ሊያደርጉ ነው ክቡር ሚኒስትር?
  • ሁሉም ውሾች መረሸን አለባቸው፡፡
  • የትኞቹ ውሾች?
  • የሰፈር ውሾች ናቸዋ፡፡
  • እነሱ ምን አጠፉ?
  • ይኸው ውሻዬን አስረገዟት አይደል እንዴ?
  • ያረገዘችው እኮ ራሷ ሄዳ ነው፡፡
  • ቢሆንም ጥፋቱ የእነሱ ነው፡፡
  • እዚህ ግቢ ገብተው አይደለም እኮ ያስረገዟት፡፡
  • አንተ ለእነሱ ተሟጋች ያደረገህ ማን ነው?
  • ከፈቀዱልኝ ግን አንድ ነገር ልናገር?
  • እሺ ተናገር፡፡
  • ሰው ፍትሕ አጣሁ እያለ የሚማረረው ለካ እውነት ነው፡፡
  • እንዴት ማለት?
  • እንዲህ ዓይነት ፍርድ ቢሮም የሚፈርዱ ከሆነ የሰው ምሬት ገባኝ፡፡
  • ያልተጠየቅከውን ለምን ትዘባርቃለህ?
  • ይቅርታ ክቡር ሚኒስትር፡፡
  • ለመሆኑ ስንት ቡችሎች ነው የወለደችው?
  • አምስት፡፡
  • ስለዚህ እናታቸው ቡችሎቹን ትጠርንፋቸው፡፡
  • በምን?
  • በአንድ ለአምስት!

[ለክቡር ሚኒስትሩ አንድ ስልክ ተደወለላቸው] 

  • ሄሎ ክቡር ሚኒስትር፡፡
  • ማን ልበል?
  • እኔን እንኳን አያውቁኝም፡፡
  • ታዲያ ለምን ደወልክ?
  • አንድ ነገር ልነግርዎት ነው፡፡
  • ምንድን ነው የምትነግረኝ?
  • ስለልጅዎት ነው፡፡
  • ምነው ልጄ ኪራይ ሰብሳቢ ሆነ እንዴ?
  • እንግዲህ እንደዚያ ሊሉት ይችላሉ፡፡
  • ከፀረ ልማቶች ጋር ገጥሟል እያልከኝ ነው?
  • ከወንጀል ጋር የተገናኘ ነው፡፡
  • ምን አልከኝ?
  • ወንጀል ነክ ጉዳይ ነው፡፡
  • የእኔ ልጅማ ወንጀለኛ አይደለም፡፡
  • እሱ ወደፊት የሚታይ ጉዳይ ይሆናል፡፡
  • ቆይ ምን አድርጎ ነው?
  • ሕገወጥ ዕቃዎችን ያዘዋውራል፡፡
  • ምን ዓይነት ሕገወጥ ዕቃ?
  • ሕገወጥ የሆኑ መድኃኒቶችን፡፡
  • ምን ዓይነት ሕገወጥ መድኃኒቶች?
  • እንዳይደነግጡ ግን ክቡር ሚኒስትር፡፡
  • ሰውዬ ለምን አትናገርም?
  • ሕገወጥ ዕፅ ያዘዋውራል፡፡
  • ምን አጠፋሪስ ምናምን ነው?
  • አይደለም ክቡር ሚኒስትር፡፡
  • ምን ዓይነት ዕፅ ነው ታዲያ?
  • ኮኬንና ኤክስተሲ!

[ክቡር ሚኒስትሩ ልጃቸውን አስጠሩት] 

  • አቤት ዳዲ፡፡
  • ድድህን ማውለቅ ነበር፡፡
  • ምነው ዳዲ?
  • ምንድን ነው የምሰማው?
  • ምን ሰማህ ዳዲ?
  • ምን ዓይነት ሥራ ነው የምትሠራው?
  • ትምህርት እማራለሁ፣ በጐን ግን ቢዝነስም አለኝ፡፡
  • እኮ ምን ዓይነት ሥራ?
  • እንዴ ዳዲ ሁሉንም ነገር ለአንተ ማሳወቅ አለብኝ?
  • አባትህ ነኝ እኮ?
  • እሱማ አውቃለሁ፡፡
  • ስለዚህ የሰማሁት እውነት ነው ማለት ነው?
  • ምን ሰማህ ዳዲ?
  • ሕገወጥ መድኃኒት ታዘዋውራለህ እንዴ?
  • ሕገወጥ የሆነው ኢትዮጵያ ውስጥ ነው፡፡
  • እንዴት ማለት?
  • ውጭ በፕሪስክሪፕሽን የሚገዙ መድኃኒቶች ናቸው፡፡
  • ከማን ጋር ነው ይኼን የምትሠራው?
  • ከሌሎች የሚኒስትር ልጆች ጋር ነዋ፡፡
  • እንዴት እዚህ ሥራ ውስጥ ገባህ?
  • የዕድገቱ ውጤት ነዋ፡፡
  • የአገሪቷ ዕድገት ነው?
  • የአንተ ዕድገት ነው እንጂ፡፡
  • እኔ ወደ ምን አደግኩ?
  • ወደ ሚኒስትርነት!

[የክቡር ሚኒስትሩ መሥሪያ ቤት የ150 ሺሕ ኮምፒዩተሮች ጨረታ አውጥቷል፡፡ አንድ ተጫራች ደወለላቸው] 

  • ሄሎ ክቡር ሚኒስትር፡፡
  • ማን ልበል?
  • ስልኬን አልያዙትም ማለት ነው ክቡር ሚኒስትር?
  • አላወቅኩህም ማን ልበል?
  • ባለፈው ተገናኝተን ነበር፡፡
  • ምን ፈልገህ ነው አሁን?
  • አይ ስለጨረታው እንድናወራ ብዬ ነው፡፡
  • ስለየቱ ጨረታ?
  • ስለኮምፒዩተሩ ጨረታ፡፡
  • የጨረታ ሰነድ ገዝተሃል?
  • ከዚያ በላይ ዋናው እርስዎ ነዎት፡፡
  • ምን እያልከኝ ነው?
  • ክቡር ሚኒስትር ይኼ ጨረታ የሁለታችንንም ሕይወት ይለውጠዋል፡፡
  • እንዴት ማለት?
  • ኮምፒዩተሮቹ የሚፈለጉት ለምን ዓላማ ነው?
  • ያው ለቢሮ ሥራ ነዋ፡፡
  • ስለዚህ ክቡር ሚኒስትር እኔ ከቻይና ላስመጣቸው እችላለሁ፡፡
  • እኛ ግን ብራንድ ዕቃ ነው የምንፈልገው፡፡
  • እኮ ዕቃውማ ብራንድ ነው፡፡
  • ከቻይና ነው የማስመጣው ስትለኝ?
  • ከውስጥ የቻይና ይሆንና ከውጭ ግን ብራንድ እናደርገዋለን፡፡
  • ዋናው ጉዳይ ለእኔ ምን ጥቅም አለው የሚለው ነው?
  • ክቡር ሚኒስትር ኮሚሽን አስባለሁ፡፡
  • በቃ የምንፈልገውን ስፔሲፊኬሽን አሁን እልክልሃለሁ፡፡
  • ቴንኪው ክቡር ሚኒስትር፡፡
  • ኮሚሽኔ ስንት ነው ግን?
  • በአንድ ኮምፒዩተር…
  • እ…
  • አምስት ዶላር!

[ለክቡር ሚኒስትሩ ሌላ ተጫራች ደወለላቸው] 

  • ሄሎ ክቡር ሚኒስትር፡፡
  • ማን ልበል?
  • ስላወጣችሁት ጨረታ ለመነጋገር ነው፡፡
  • የቱ ጨረታ?
  • የኮምፒዩተሩን ጨረታ፡፡
  • ቅድም ተነጋግረን ጨረስን አይደል እንዴ?
  • ይቅርታ ከእኔ ጋር በዚህ ጉዳይ አልተነጋገርንም፡፡
  • አንተ ማን ነህ?
  • ቅድም ምሳ ላይ ተዋውቀን ነበር፡፡
  • ጨረታውን እኮ ተስማምቼ ጨርሻለሁ፡፡
  • በምንድን ነው የተስማሙት?
  • በኮምፒዩተር ሰባት ዶላር ነዋ፡፡
  • እንዴ ክቡር ሚኒስትር ይኼማ እርስዎንም አገሪቷንም መናቅ ነው?
  • እንዴት?
  • አገሪቷስ እኮ በሁለት ዲጂት እያደገች ነው፡፡
  • እሱማ ይታወቃል፡፡
  • እርስዎም ኮሚሽን መቀበል ያለብዎት እንደዚያው ነዋ፡፡
  • እንዴት?
  • በሁለት ዲጂት!

[የክቡር ሚኒስትሩ አማካሪያቸው ቢሯቸው ገባ] 

  • ላናግርዎት ፈልጌ ነበር ክቡር ሚኒስትር?
  • ስለምን ጉዳይ?
  • በቅርቡ ስላሠራነው ሕንፃ፡፡
  • ተሠርቶ ተመረቀ አይደል እንዴ?
  • አዎ ግን በሦስት ወሩ እየተሰነጣጠቀ ነው፡፡
  • ምን?
  • እንዲያውም ሊፈርስ ሁላ ይችላል፡፡
  • በሦስት ወሩ?
  • አዎን ክቡር ሚኒስትር?
  • ምን ሆኖ?
  • በጥራት አልተሠራም፡፡
  • ጨረታ አውጥተን አይደል እንዴ ያሠራነው?
  • ማውጣትማ አውጥተን ነበር፡፡
  • እና ምን ሆነ?
  • ጨረታው የተሰጠው ግን ለመንግሥት ድርጅት ነው፡፡
  • ለምን ተሰጠው?
  • የልማት አጋር ነው ተብሎ ነዋ፡፡
  • ስለዚህ በድጋሚ ጨረታ ይውጣና መልሶ ራሱ ድርጅት ይሥራዋ፡፡
  • ተመልሶ ለዚያው ድርጅት የሚሰጠው ከሆነ ለምን ጨረታ ይወጣል?
  • ለማሳየት ነዋ፡፡
  • ምኑን ክቡር ሚኒስትር?
  • የሥራችንን ግልጽነት!

[የክቡር ሚኒስትሩ መሥሪያ ቤት በድጋሚ ያወጣውን የሕንፃ ግንባታ ጨረታ የተለመከቱ ሌላ ሚኒስትር ደወሉላቸው]

  • ሰላም ክቡር ሚኒስትር፡፡
  • እንዴት ነህ ወዳጄ?
  • በቅርቡ አልነበር እንዴ ሕንፃ ያስገነባችሁት?
  • አዎን ልክ ነው፡፡
  • ታዲያ ለምንድን ነው የሕንፃ ጨረታ ያወጣችሁት?
  • ሕንፃው ስለፈረሰ ነው፡፡
  • በሦስት ወሩ ነው የፈረሰው?
  • ሆን ብለን ነው ያፈረስነው፡፡
  • ለምን ክቡር ሚኒስትር?
  • ሕንፃውም ያስፈልገው ነበር፡፡
  • ምን?
  • ጥልቅ ተሃድሶ!