ክቡር ሚኒስትር

 

[የክቡር ሚኒስትሩ ሚስት ተክዘው ሶፋ ላይ ተቀምጠዋል]

  • ምን ሆነሽ ነው?
  • ምን አልሆንም ብለህ ነው?
  • ተክዘሻል እኮ?
  • ሐሳብ ይዞኝ ነዋ፡፡
  • የምን ሐሳብ?
  • አንተ ምን አለብህ?
  • ቢዝነሱ ጥሩ አይደለም እንዴ?
  • እሱ አይደል እንዴ የሚያሳስበኝ፡፡
  • አዲስ አይደል እንዴ ቢዝነሱ?
  • ታዲያ አዲስ መሆኑ አያሳስብም?
  • ማለቴ ጥሩ እየሠራ ነው ብለሽኝ ነበር?
  • እሱማ ጥሩ እየሠራ ነው፡፡
  • ታዲያ ምንድን ነው የሚያሳስብሽ?
  • የፆሙ ነገር ነዋ የሚያሳስበኝ፡፡
  • ለዓሳ ቢዝነስ እኮ ፆም በጣም አሪፍ ነው፡፡
  • እሱማ አሪፍ ነው፡፡
  • ታዲያ ፆሙ ለምን አሳሰበሽ?
  • ሊፈታ መሆኑ ነዋ፡፡
  • ለካ እሱም አለ?
  • ፆሙ ከተፈታ ቢዝነሱ እንደዚህ ላይቀጥል ይችላል፡፡
  • ምን ይሻላል ታዲያ?
  • ፆሙን ማስቀጠል ብትችልማ ጥሩ ነበር፡፡
  • እሱንማ እንዴት ላደርገው እችላለሁ?
  • እሱማ መላ አይጠፋም፡፡
  • ምን ዓይነት መላ?
  • አንተ ማድረግ ከቻልክ፣ እኔ መላ አለኝ፡፡
  • እኮ ንገሪኛ?
  • በቃ ሕዝቡ ላይ ኑሮ እንዲከብድ ማድረግ ነው፡፡
  • እ…
  • ከዛም ሁሌም ለሕዝቡ ፆም ይሆንበታል፡፡
  • አሁን ይኼን እንዴት ማድረግ ይቻላል?
  • እሱን አንተ ታውቅበታለህ፡፡
  • አንቺ ግን እውነትም መለኛ ነሽ፡፡
  • ወድጄ አይደለም እባክህ፡፡
  • ለጊዜው ግን መፍትሔ አለኝ፡፡
  • ምን ዓይነት መፍትሔ?
  • ፆሙ ሲፈታ ዓሳ ቤቱን እንቀይረው፡፡
  • ወደ ምን?
  • ወደ ሥጋ ቤት፡፡
  • አይ አንተ?
  • ምነው?
  • አካባቢውን በደንብ አታውቀውም ማለት ነው?
  • አካባቢው ምንድን ነው?
  • በርካታ ታዋቂ ሥጋ ቤቶች አሉ፡፡
  • ስንት ሥጋ ቤቶች ነው ያሉት?
  • አራት፡፡
  • ታዲያ ምን ችግር አለው?
  • እንዴት የለውም?
  • እነሱ ሥራ እንዲያቆሙ እናደርጋለን፡፡
  • እንዴት አድርገን?
  • መጀመሪያ ጤና ላይ ችግር እንዳስከተሉ መሆኑ ተገልጾ እንዲታሸጉ ይደረጋል፡፡
  • ከዚያስ?
  • ከዚያ ደግሞ ታክስ እንዳጭበረበሩ ይገለጽና ይዘጋሉ፡፡
  • አንተ ራስህ አባ መላ ነህ እኮ፡፡
  • በዛ ላይ የሚኒስትሩ ሥጋ ቤት መብላት የማይፈልግ የለም፡፡
  • እንዴት ማለት?
  • በቃ ሌላኛው ጉዳይ ማስፈጸሚያ ቢሮ ይሆናላ፡፡
  • ምን ላድርግህ?
  • በአንቺ ወጥቼ እኮ ነው መለኛ የሆንኩት፡፡
  • ዋናው ጥያቄ ስሙ ምን ይባል የሚለው ነው?
  • ለእሱ አታስቢ፡፡
  • ማን ይባል?
  • የሚኒስትሮች ምክር ቤት ሥጋ ቤት!

[ለክቡር ሚኒስትሩ ደላላው ደወለላቸው]

  • ሰላም ክቡር ሚኒስትር፡፡
  • እንዴት ነህ?
  • የሚገርም ነገር ይዣለሁ፡፡
  • ምን ተገኘ ደግሞ?
  • ፀሎትዎትን እግዚአብሔር ሰምቶታል፡፡
  • ምን ነበር ፀሎቴ?
  • በቃ ሊተኮሱ ነው፡፡
  • ማን ነው የሚተኩሰው?
  • ኧረ ወዲህ ነው ነገሩ፡፡
  • አገሪቷ ውስጥ ጦርነት አለ እንዴ?
  • ከባለቤቱ ያወቀ አሉ፡፡
  • ማለት?
  • እሱንማ እርስዎ ነው የሚያውቁት፡፡
  • እኔ አገሪቱ ሰላም እንደሆነች ነው የማውቀው፡፡
  • ለእርስዎም ሰላም እንደሆነ አውቃለሁ፡፡
  • በምን አወቅክ?
  • አካውንትዎት ሲጨምር ሰላምዎም አንድ ላይ ይጨምራላ፡፡
  • እ…
  • ባይሆን ደምዎም ስለሚጨምር እሱ ነው ችግሩ፡፡
  • ወሬ መቼም ማን ችሎህ?
  • ክቡር ሚኒስትር ዛሬ ግን ጮማ ወሬ ነው ያለኝ፡፡
  • እኮ ምን ተገኘ?
  • አንድ ነገር አግኝቼልዎታለሁ፡፡
  • ሕንፃ አገኘህልኝ እንዴ?
  • ሕንፃውን የሚያመጣውን ነገር አግኝቼልዎታለሁ፡፡
  • ምንድን ነው እሱ?
  • ለፋብሪካ የሚሆን አምስት ሺሕ ካሬ ቦታ ተገኝቷል፡፡
  • ወደ ኢንዱስትሪው ዘርፍ መቀላቀሉ ይሻላል ብለህ ነው?
  • የመንግሥትም አቅጣጫ እሱ ነው ብዬ ነው፡፡
  • ለነገሩ ልክ ነህ፡፡
  • አሁን ከእርስዎ አንድ ነገር የምፈልገው፡፡
  • ምን ፈለክ?
  • ውክልና፡፡
  • አንተን አምኜማ ውክልና አልሰጥህም፡፡
  • የውልና ማስረጃ ሳይሆን የቃል ውክልና ብቻ ነው የምፈልገው፡፡
  • እሱን ሰጥቼሃለሁ፡፡
  • ክቡር ሚኒስትር አንድ ነገር ግን አለ፡፡
  • ምን?
  • ከቦታው ላይ የሚነሳ ገበሬ አለ፡፡
  • ታዲያ ምን ችግር አለው?
  • ያው ካሳ ያስፈልጋል፡፡
  • መክፈል ነዋ ታዲያ፡፡
  • አምስት መቶ ሺሕ ብር ይሆናል፡፡
  • ለካሳ?
  • አዎን ክቡር ሚኒስትር፡፡
  • ገበሬ ነው ብለኸኛል አይደል?
  • አዎን ነው፡፡
  • ውሉ ላይ አምስት መቶ ሺሕ ብር ብለህ አስፈርመው፡፡
  • ሲከፈልስ?
  • አንዱን መቀነስ ነዋ፡፡
  • አንዱን ምን?
  • ዜሮ!

[የክቡር ሚኒስትሩ የአጎት ልጅ ደወለላቸው]

  • ሄሎ ጋሼ፡፡
  • አቤት ጎረምሳው፡፡
  • ጉድ ሆንን ጋሼ፡፡
  • ዕቃውን አላገኛችሁትም እንዴ?
  • ዕቃውንማ አግኝተነው ነበር፡፡
  • ታዲያ ምን ተፈጠረ?
  • ችግር ተፈጥሯል ጋሼ፡፡
  • የምን ችግር?
  • ፖሊሶች ኬላ ላይ ያዙን፡፡
  • ምን?
  • አዎን ጋሼ፡፡
  • እንዴት ሆኖ?
  • ተጠቁሞብን ነው መሰለኝ፡፡
  • ማን ነው የጠቆመው?
  • ምግብ ቤት የጠረጠሩን ሰዎች መሰሉኝ፡፡
  • ስትንከረፈፉ ነዋ የተያዛችሁት፡፡
  • አይ ሾፌሩ ትንሽ ይቀበጣጥር ነበር፡፡
  • እ…
  • በቃ ስለሚገኘው ገንዘብ ምናምን ሲያወራ የሰሙት ሰዎች ጠቆሙ፡፡
  • አሁን የት ነው ያላችሁት?
  • እስር ቤት!

[ክቡር ሚኒስትር ፖሊስ ጋ ደወሉ]

  • ሄሎ ማን ልበል?
  • ክቡር ሚኒስትር ነኝ፡፡
  • ምን ልታዘዝ ክቡር ሚኒስትር?
  • እናንተ ጋ የተያዙ ሰዎች አሉ፡፡
  • አሁን ኮምፒዩተርና ታብሌት በኮንትሮባንድ ሊያስገቡ የነበሩትን ነው?
  • አዎን ስለእነሱ ነው፡፡
  • በጣም ብዙ ኮምፒዩተሮችና ታብሌቶች ነው የያዙት፡፡
  • ግዳጅ ላይ ነው ያሉት፡፡
  • የምን ግዳጅ ክቡር ሚኒስትር?
  • ለመንግሥት የሚፈለጉ ዕቃዎች ናቸው፡፡
  • ታዲያ ለምን በኮንትሮባንድ ማስገባት አስፈለገ?
  • ሚስጥራዊነታቸው እንዲጠበቅ ስለተፈለገ ነው፡፡
  • እና ምን ይሻላል ክቡር ሚኒስትር?
  • ሰዎቹን ልቀቃቸው፡፡
  • በማን ዋስትና ክቡር ሚኒስትር?
  • በእኔ ዋስትና፡፡
  • ለማያውቁት ሰው ዋስ መሆን አይከብድም?
  • አንዱ የወንድሜ ልጅ ነው፡፡
  • በጣም ይቅርታ ክቡር ሚኒስትር፡፡
  • ችግር የለውም፡፡
  • መጀመሪያም ቢነግሩኝ አይታሰርም ነበር፡፡
  • አንተም ማጣራት ነበረብሃ?
  • አሁኑኑ እለቀዋለሁ፡፡
  • በምን ዋስ?
  • ያለ ዋስ!

[ክቡር ሚኒስትሩ ቢሮ አንድ የተቃዋሚ ፓርቲ መሪ ገባ]

  • ክቡር ሚኒስትር አንድ ችግር ገጥሞናል፡፡
  • የምን ችግር?
  • በፖለቲካ ፓርቲዎች ድርድር ላይ፡፡
  • ውይይቱ በጥሩ መጠናቀቁን ሰምቼ ነበር፡፡
  • አዩ ችግሩ ከዚህ ይጀምራል፡፡
  • ከምን?
  • እርስዎ ውይይት ይላሉ፣ እኛ ድርድር እንላለን፡፡
  • ሐሳቡ እኮ ያው ነው፡፡
  • መስማማት ያልቻልነው እንዲያውም በዚህች ቃል ነው፡፡
  • በየትኛው ቃል?
  • ሐሳብ በምትለው፡፡
  • እንዴት ማለት?
  • እኛ ሐሳብ የሚለው ቃል፣ በ‹‹ሀ›› መጻፍ አለባት ስንል፣ ግማሾቹ በ‹‹ሐ›› መጻፍ አለበት አሉ፡፡ ሌሎቹ ደግሞ በ‹‹ኃ›› መጻፍ አለበት ብለዋል፡፡
  • ሰውዬ ጤነኛ ነህ?
  • በሚገባ ክቡር ሚኒስትር፡፡
  • በየትኛውስ ቢጻፍ ምን ልዩነት ያመጣል?
  • አዩ ክቡር ሚኒስትር፣ ‹‹ሀ›› ቀዳሚነትን ነው የሚያሳየው፣ ‹‹ኃ›› ደግሞ ኃይልን ሲያሳይ፣ እናንተ ግን ሐሳብን በ‹‹ሐ›› ጽፋችሁ አመጣችሁ፡፡
  • እኛ እኮ ውይይቱን ያዘጋጀነው ለሕዝቡ ጥያቄ ምላሽ ለማምጣት በማሰብ ነው፡፡
  • ቢሆንም ይኼ መስተካከል አለበት፣ ምክንያቱም በትንሹ ነገር መስማማት ካልቻልን ለሕዝቡም ጥያቄ ምላሽ ማምጣት አንችልም፡፡
  • እሺ ይስተካከላል፡፡
  • ሌላ ደግሞ ስብሰባ የሚለው ቃል የተጻፈው በእሳቱ ‹‹ሰ›› ነው፡፡
  • ምን ዓይነት አሿፊ ሰው ነህ?
  • ክቡር ሚኒስትር ይኼ እኮ ትርጉም ስላለው ነው፡፡
  • የምን ትርጉም?
  • እናንተ ተቃዋሚዎች እሳት ናቸው ልትሉ ፈልጋችሁ ነው በ‹‹ሰ›› የጻፋችሁት፡፡
  • ስለዚህ እንዴት ይጻፍ?
  • በንጉሡ ‹‹ሠ››
  • ለምን?
  • ስለምንፈልግ፡፡
  • ምን መሆን?
  • መንገሥ!