ክቡር ሚኒስትር

[የክቡር ሚኒስትሩ ሾፌር በጣም አርፍዶ ቤታቸው ደረሰ]

  • አንተ?
  • አቤት ክቡር ሚኒስትር፡፡
  • ጤነኛ ነህ ግን?
  • በዚህ ዘመን ጤነኛ አለ ብለው ነው?
  • ቀጠሮ እንዳለኝ ነግሬህ አልነበር እንዴ?
  • ምን ላድርግ ክቡር ሚኒስትር?
  • እንዴት ምን ላድርግ ትለኛለህ?
  • የለማ፡፡
  • ምንድን ነው የሌለው?
  • ነዳጅ፡፡
  • እንዴት ሆኖ?
  • ይኸው የትኛውም ማደያ ማግኘት አልቻልኩም፡፡
  • እንዴ ነዳጅ ልናወጣ ነው እያልን ባልንበት ወቅት ጭራሽ ጠፍቷል ትለኛለህ?
  • ኧረ ክቡር ሚኒስትር አያስቁኝ?
  • እንዴት ማለት?
  • ጥልቅ ተሃድሶ በማድረግ ነዳጅ ይወጣል ያለው ማን ነው?
  • ምን አልክ?
  • በጥልቅ ታድሰናል ስትሉ በጥልቅ ጉድጓድ ቆፍረን ነዳጅ እናወጣለን እያላችሁ ነው ማለት ነው?
  • ወሬውን ትተህ ሥራውን በሠራህ?
  • ምን ላድርግ አላሠራ ብለውኝ ነው፡፡
  • ማን ነው አላሠራ ያለህ?
  • ባለማደያዎቹ ናቸዋ፡፡
  • አሁን ለመሆኑ ቀዳህ?
  • ከየት አግኝቼ ክቡር ሚኒስትር?
  • እና በምን ልሄድ ነው?
  • ትንሽማ አለኝ፡፡
  • መንገድ ላይ ቢቆምስ?
  • ያው በሜትር ታክሲ እልክዎታለሁዋ፡፡
  • በጣም ተደፋፍረናል ማለት ነው?
  • ምነው ክቡር ሚኒስትር?
  • ሚኒስትር ሆኜ በታክሲ ልሄድ?
  • ምን አለበት?
  • እውነትም አንተ ደፍረኸኛል፡፡
  • የሕዝቡን ሕይወት በዚያው ቢያዩት ብዬ ነው እኮ?
  • አላደርገውም፡፡
  • በቃ እሺ እንሠለፋለና፡፡
  • የምን ሠልፍ ነው?
  • አይ ሰላማዊ ሠልፍ አይደለም፡፡
  • ታዲያ የምን ሠልፍ ነው?
  • የነዳጅ፡፡
  • ምን ዓይነት ጣጣ ነው?
  • ችግር የለውም፣ ያው ሠልፉ የእንትኑ መገለጫ ነው ይላሉ፡፡
  • የምኑ?
  • የልማቱ!

[ክቡር ሚኒስትሩ ለነዳጅ ተሠልፈው መኪናቸው ውስጥ ጋዜጣ እያነበቡ ነው፡፡ ባነበቡት ዜናም ተደናግጠው አንድ ወዳጃቸው የሆነ ዳያስፖራ ጋ ደወሉ]

  • ሄሎ፡፡
  • እንዴት ነህ ባክህ?
  • ማን ልበል?
  • ክቡር ሚኒስትር ነኝ፣ ስልኬን አልያዝከውም እንዴ?
  • ሰላም ክቡር ሚኒስትር፣ አዲስ ስልክ ይዘው ነው መሰለኝ፡፡
  • ምንድን ነው የምሰማው?
  • ምን ሰሙ ክቡር ሚኒስትር?
  • ጋዜጣ ላይ ዜና አንብቤ ደንግጬ ነው የደወልኩልህ፡፡
  • ስለምን አንብበው ነው?
  • ስለሃኪንግ፡፡
  • ስለራሺያ ሃኪንግ አንብበው ነው?
  • ኧረ በፍጹም፡፡
  • ታዲያ ስለትራምፕ አንብበው ነው?
  • ስለባንክ ነው ያነበብኩት፡፡
  • የምን ባንክ ነው?
  • የባንክ አካውንት ሃክ ተደርጎ፡፡
  • እዚህ እኛ ጋ ነው?
  • እሱማ የኢትዮጵያ ባንክ ነው፡፡
  • ታዲያ ምን አስደነገጠዎት?
  • አይ የባንኩ የውጭ አካውንት ሃክ ተደርጎ ነው ገንዘብ የተወሰደው፡፡
  • ምን ያህል ገንዘብ?
  • ኧረ ከአንድ ሚሊዮን ዶላር በላይ ነው፡፡
  • በጣም ይገርማል፡፡
  • ቀልቤ እኮ ነው ግፍፍ ያለው፡፡
  • ለምን ክቡር ሚኒስትር?
  • የእኔንም መጦሪያ ሃክ እንዳያደርጓት ብዬ ነዋ፡፡
  • እ…
  • የስንት ሰው ፊት አይቼ ያመጣኋትን ዶላር ላፍ እንዳያደርጉኝ?
  • እሱ እንኳን ያሳስባል፡፡
  • እኔ እኮ ከዚህ ሥራዬ ሳበቃ በእሷ እጦራለሁ ብዬ ነው የማስበው፡፡
  • አውቃለሁ ክቡር ሚኒስትር፡፡
  • እሷን ሃክ አድርገውብኝ ራሴን ሃንግ እንዳላደርግ፡፡
  • ኧረ የሰይጣን ጆሮ አይስማው፡፡
  • ምን ተሻለ ታዲያ?
  • እስቲ ላስብበታ፡፡
  • እኔ ግን አንድ ሐሳብ ነበረኝ፡፡
  • ምን ዓይነት ሐሳብ?
  • የባንኩን ሴኩዩሪቲ ለምን አናጠናክረውም?
  • ምን አድርገን?
  • እኔ ከዚህ መላክ እችላለሁ፡፡
  • ምን?
  • ዘበኛ!

[ለክቡር ሚኒስትሩ ሌላ ወዳጅ ሚኒስትር ደወሉላቸው]

  • ሰላም ክቡር ሚኒስትር፡፡
  • እንዴት ነህ ወዳጄ?
  • በጣም ነው ያዘንኩት፡፡
  • እኔም ዊኬንዴ ተበጥብጦ ነው ያሳለፍኩት፡፡
  • ምን ይሆን መጨረሻው?
  • ያው ቼልሲ ዋንጫ መብላቱ አይቀርም፡፡
  • ኧረ እኔ ስለኳስ አይደለም የማወራው፡፡
  • ስለተሠራው ብልግና ነው የምታወራው?
  • የትኛው ብልግና?
  • ቁማር ተበልቶ አልመድብም ስላለው ወዳጃችን?
  • ኧረ እኔ ሊቀር ነው እያልኩዎት ነው፡፡
  • ምን ዕቁባችን?
  • ለነገሩ ዕቁባችን መቅረቱ አይቀርም፡፡
  • ለምን ተብሎ?
  • አልሰሙም ማለት ነው?
  • ምኑን?
  • ለመሆኑ ክቡር ሚኒስትር ስንት ቦታ ቦርድ ነዎት?
  • ስድስት ቦታ መሰለኝ፡፡
  • አዲሱን መመርያ አልሰሙም?
  • የምን መመርያ?
  • ከዚህ በኋላ ዕድለኛ ከሆኑ የአንድ መሥሪያ ቤት ብቻ ቦርድ አባል መሆን ነው የሚችሉት፡፡
  • ለምን ሲባል?
  • ቦርድ የሆንባቸው ድርጅቶች ትርፋማ ሊሆኑ አልቻሉም፡፡
  • እኛ ግን ትርፋማ ነን፡፡
  • እንግዲህ ከቦርድ አባልነትዎ በቅርቡ ይነሳሉ፡፡
  • ይህ በፍጹም ሊሆን አይችልም፡፡
  • መመርያ ወጥቷል ስልዎት፡፡
  • እኔማ ሄጄም ቢሆን እለምናቸዋለሁ፡፡
  • ምን ብለው?
  • እኔ እስክበላ መመርያው እንዳይተገበር፡፡
  • ምን እስኪበሉ ድረስ?
  • ዕቁቡን!

[ክቡር ሚኒስትሩ ሚስታቸው ጋ ደወሉ]

  • ጉድ ሆንን ባክሽ?
  • ምን ሆንክ ደግሞ?
  • ዕቁቡ ሊቆም ነው፡፡
  • ለምን ተብሎ?
  • ከአቅም በላይ ችግር መጥቷል፡፡
  • እንዴት ሆኖ ነው ታዲያ ዕቁቡ ሊቆም የሚችለው?
  • ዕቁቡማ አልቆመም፡፡
  • ታዲያ ምን ተፈጠረ?
  • እኛ ልናቆም ነው እያልኩሽ ነው?
  • ለምን ሲባል?
  • ከየት አምጥተን እንከፍላለን?
  • እስከ ዛሬ ከቦርድ አባልነትህ የምታገኘውን ነበር እኮ የምትጥለው?
  • እኮ አሁን ሊቆም ነው፡፡
  • እኛ ዕቁቡን ሳንበላ?
  • መመርያ ወጥቷል፡፡
  • መንግሥት የለም እንዴ በአገሪቷ?
  • እኔም እንደዚያ ነው ያልኩት፡፡
  • ይኼ በፍጹም ሊሆን አይችልም፡፡
  • ምን ላድርግ ጨነቀኝ?
  • ይኼን ጉዳይ መላ ልትለው ይገባል፡፡
  • እኮ ምን ይሻላል?
  • በግልጽም ቢሆን ተናገራ፡፡
  • ምን ብዬ?
  • ዕቁቡ እስኪወጣ እንዳያነሱህ፡፡
  • እንደዚያማ ካደረግኩ ከኃላፊነቴም ልነሳ እችላለሁ፡፡
  • ስማ በዚህ ዕቁብ ድርድር የለም፡፡
  • ይኸው መሀል ላይ ደርሰን አጉል አደረጉን፡፡
  • ሰውዬ በዚህ ዕቁብ ብዙ ነገር ነው ፕላን ያደረግኩት፡፡
  • ምን ላድርግ ታዲያ?
  • ካልሆነ የሥራ ድርሻህን መቀየር ነዋ፡፡
  • ምን ልሁን?
  • ደላላ!

[ክቡር ሚኒስትሩ ምሳ ለመብላት ቤት ሲገቡ ልጃቸውን አገኙት]

  • አንተ ትምህርት የለም እንዴ?
  • አለ ግን አልሄድኩም ዳዲ፡፡
  • ለምን ሲባል?
  • ምን ያደርግልኛል ብለህ ነው?
  • ምን ማለት ነው?
  • የተማሩት የት ደረሱ?
  • ምን?
  • ይህቺ አገር ለነጋዴ ነው የምታዋጣው፡፡
  • እልም ያለ ኪራይ ሰብሳቢ ሆነሃል ልበል?
  • ዳዲ ዝም ብዬ ቢዝነስ ብሠራ ነው የሚያዋጣኝ፡፡
  • ካልተማርክ እንዴት ቢዝነስ ትሠራለህ?
  • ዳዲ ደግሞ ጅል ነህ ልበል?
  • እንዴት?
  • ስንት ያልተማረ ኮንትራክተር ባለበት አገር ውስጥ ቢዝነስ ለመሥራት መማር አለብህ ትለኛለህ?
  • ጤነኛ አልመሰልከኝም አንተ ልጅ?
  • ባይሆን ቢዝነስ ለመጀመር አንድ ሐሳብ አለኝ፡፡
  • የምን ሐሳብ?
  • ይኸው ሰሞኑን ከባለሀብቶች ላይ እየተቀማ ለወጣቶች እየተሰጠ መሆኑን ሰምቻለሁ፡፡
  • እሺ?
  • በቃ ለእኔም ከአንዱ ባለሀብት ላይ ቀማልኛ፡፡
  • ምን
  • ሕንፃ!