አዲሱን ድረ ገጽ ይሞክሩ!
አዲሱን ድረ ገጽ ይሞክሩ!

ክቡር ሚንስተር

[ክቡር ሚኒስትሩ ከአማካሪያቸው ጋር ቢሮአቸው ውስጥ እየተነጋገሩ ነው]

  • አንተ ምን ሆነሃል?
  • ትንሽ ተበሳጭቼ ነው ክቡር ሚኒስትር፡፡
  • ፊትህን ጥለኸዋል እኮ?
  • አዋረዱን ክቡር ሚኒስትር፡፡
  • ማነው የሚያዋርደን?
  • የብሔራዊ ቡድን ተጫዋቾች ናቸው ክቡር ሚኒስትር፡፡
  • ምን አደረጉ?
  • አልሰሙም እንዴ ክቡር ሚኒስትር?
  • ምኑን?
  • መሸነፋችንን ክቡር ሚኒስትር፡፡
  • መሸነፍ ይገርማል እንዴ?
  • ኧረ ይኼ ይብሳል ክቡር ሚኒስትር፡፡
  • ለምን?
  • አምስት ለባዶ እኮ ነው የረፈረፈን ክቡር ሚኒስትር፡፡
  • ማን?
  • የጋና ብሔራዊ ቡድን ክቡር ሚኒስትር፡፡
  • ጨዋታው የት ነበር?
  • እዚያው ጋና ክቡር ሚኒስትር፡፡
  • ከልማታዊ መንግሥታችን ጋር ግንኙነታቸው እንዳይበላሽ ብለው ነው በአምስት ብቻ የማሩን ገባህ?
  • እንዴ ክቡር ሚኒስትር?
  • ለነገሩ ጋና እኮ ወደፊት ለዓለም ዋንጫ ያሠጋል ይባልለታል፡፡
  • ቢሆንስ ክቡር ሚኒስትር?
  • በአምስት ጎሎች ብቻ የማሩን ለወዳጅነታችን ሲሉ ነው አልኩህ፡፡
  • ከዚህ በላይ ምን ይምጣ ክቡር ሚኒስትር?
  • ደርዘን ቢከቱብን ምን ትሆን ነበር?
  • ጨርቄን ጥዬ አብድ ነበር ክቡር ሚኒስትር፡፡
  • እንኳንም በትንሹ ገላገለህ፡፡
  • ክቡር ሚኒስትር?
  • አቤት?
  • ይኼ የእግር ኳሳችን ጉዳይ ምን ይሻለዋል?
  • ጥልቅ ተሃድሶ ያስፈልገዋል፡፡
  • እንዴት ተደርጎ ክቡር ሚኒስትር?
  • በመጀመሪያ ይጠረነፋል፡፡
  • ብሔራዊ ቡድኑ?
  • አዎ፡፡
  • ከዚያስ?
  • ተጨዋቾቹ አንድ ለአምስት ይደራጃሉ፡፡
  • ከዚያስ ክቡር ሚኒስትር?
  • ከዚያማ ሥልጠናው በልማታዊ አስተሳሰብ ይካሄዳል፡፡
  • ክቡር ሚኒስትር ፊፋ ይኼንን አይፈቅድም እኮ?
  • ፊፋ ምን አገባው?
  • የእግር ኳሱ የበላይ አስተዳዳሪ እሱ ነዋ ክቡር ሚኒስትር፡፡
  • ሌላ ዘዴ እንጠቀማለን፡፡
  • ምን ዓይነት ዘዴ?
  • ከውስጥ የሚሠራው ከደጅ እንዳይታይ አድርገን ነዋ፡፡
  • ይኼ ምን ማለት ይሆን ክቡር ሚኒስትር?
  • እግር ኳሱን ልማታዊ አቅጣጫ ማስያዝ ይባላል፡፡
  • ኧረ ይኼ አያዋጣም ክቡር ሚኒስትር፡፡
  • ታዲያ የጎል ጎተራ ሆነህ ትቀጥላለህ?
  • እርስዎ እንዲህ ነው የሚያስቡት ክቡር ሚኒስትር?
  • አማካሪው አንተ ምን የተሻለ ሐሳብ አለህ?
  • ከላይ እስከ ታች እንደገና ብናደራጀው ይሻላል እላለሁ ክቡር ሚኒስትር፡፡
  • ምን ይዘህ እባክህ?
  • ክለቦቹንና ፌዴሬሽኑን ይዘን ነዋ ክቡር ሚኒስትር፡፡
  • ጨለምተኛ ሆነሃል ማለት ነው፡፡
  • እንዴት ክቡር ሚኒስትር?
  • አምስት ጎሎች ተቆጠሩብን ብለህ እያለቃቀስክ አልነበረም?
  • አዎን ክቡር ሚኒስትር፡፡
  • በልማታዊ አቅጣጫ የማይፈታ ችግር የለም፡፡
  • እንዴት አድርገን ክቡር ሚኒስትር?
  • ያለ የሌለ የሰው ኃይላችንን ይዘን በመሠለፍ ነዋ፡፡
  • ማለት ክቡር ሚኒስትር?
  • ጋናዎች 11 አይደሉ?
  • አዎን ክቡር ሚኒስትር፡፡
  • እኛ ደግሞ 33 ሆነን እንገባለን፡፡
  • ያለ ሕጉ ክቡር ሚኒስትር?
  • ካስፈለገ ሕጉን ልማታዊ እናደርገዋለን፡፡

[የክቡር ሚኒስትሩ አማካሪ እንደወጣ ጸሐፊያቸው ገባች]

  • ፈለግሽኝ?
  • አዎን ክቡር ሚኒስትር፡፡
  • ለምን?
  • አንድ ችግር ገጥሞኝ ክቡር ሚኒስትር፡፡
  • ምንድነው እሱ?
  • የ40/60 ቤቶች ዕጣ ሊወጣ አይደል ክቡር ሚኒስትር?
  • እና?
  • ዕጣው ውስጥ እንድገባ እንዲያደርጉኝ ነዋ ክቡር ሚኒስትር፡፡
  • አንቺ የሠራሽው ቤት አለሽ አይደል?
  • 40/60 ተመዝግቤያለሁ እኮ ክቡር ሚኒስትር፡፡
  • በሕጉ መሠረት ባንኩ አያስተናግድሽም ገባሽ?
  • ኧረ ክቡር ሚኒስትር?
  • ምነው?
  • በአንዲት ብጫቂ መመርያ ችግር ውስጥ ልግባ እንዴ ክቡር ሚኒስትር?
  • ቤት እያለሽ እንዴት ተመዘገብሽ?
  • ቤቱ በባሌ ስም ነው ክቡር ሚኒስትር፡፡
  • አየሽ የአንቺም ማለት እኮ ነው፡፡
  • እኔና ባሌ ግን. . .
  • ግን ምን?
  • ለጊዜው ተለያይተናል ክቡር ሚኒስትር፡፡
  • ለ40/60 ቤት ብለሽ ትዳርሽን ታፈርሻለሽ?
  • እንደሱ አይደለም ክቡር ሚኒስትር፡፡
  • እንዴት ነው ታዲያ?
  • ቤቱ ሲገኝ እንደገና አንድ ላይ እንሆናለን ክቡር ሚኒስትር፡፡
  • አሁን አንድ ላይ አይደላችሁም እንዴ?
  • አንድ ላይ ነን ክቡር ሚኒስትር፡፡
  • እንዴት ነው ታዲያ ተፋታን የምትይኝ?
  • አልጋ ለይተናል ክቡር ሚኒስትር፡፡
  • ምን?
  • ለልጆቹ ብለን ነው አንድ ጣሪያ ውስጥ ያለነው ብለን አስወርተናል ክቡር ሚኒስትር፡፡
  • ማታ ማታ ግን. . .
  • ማታ ማታማ ተቃቅፈን ነው የምንተኛው ክቡር ሚኒስትር፡፡
  • ሲነጋስ?
  • እንዴት አደራችሁ እየተባባልን ከተለያዩ ክፍሎች እንወጣለን ክቡር ሚኒስትር፡፡
  • ይኼ ደግሞ ከየት የመጣ ፋሽን ነው?
  • የአገሩ ባለሀብትና ባለሥልጣን እንዲህ አይደል እንዴ የሚኖረው ክቡር ሚኒስትር?
  • አሁን ይኼ ኑሮ ይባላል?
  • ዓላማ ካለ አሪፍ ይሆናል ክቡር ሚኒስትር፡፡
  • እኔ ግን ኪራይ ሰብሳቢ ኑሮ ብየዋለሁ፡፡
  • ለምን ክቡር ሚኒስትር?
  • ፀረ ልማት ነው፡፡

[ክቡር ሚኒስትሩን ሾፌራቸው ወደ አንድ ስብሰባ እየወሰዳቸው ነው]

  • እነዚህን የመሳሰሉ ሕንፃዎች ማን ነው የገነባው እባክህ?
  • ክቡር ሚኒስትር የ40/60 ቤቶች ናቸው፡፡
  • እንዲህ ያምራሉ እንዴ?
  • ደስ ይላሉ ክቡር ሚኒስትር፡፡
  • መቼ ነው ዕጣቸው የሚወጣው?
  • አልታወቀም ተብሏል ክቡር ሚኒስትር፡፡
  • በዕጣ የሚያገኟቸው ሰዎች በልማታችን ደስተኛ እንደሚሆኑ አልጠራጠርም፡፡
  • ምን ዋጋ አለው ክቡር ሚኒስትር?
  • ምን ማለትህ ነው?
  • በመጀመሪያው ዙር እኮ በጣም ትንሽ ቤቶች ናቸው የሚወጡት ክቡር ሚኒስትር፡፡
  • ምን ያህል ተመዝጋቢዎች አሉ?
  • ከ160 ሺሕ በላይ ናቸው አሉ ክቡር ሚኒስትር፡፡
  • በትዕግሥት መጠበቅ አለባቸው፡፡
  • አራት ዓመት ጠበቁ እኮ ክቡር ሚኒስትር?
  • ለመሆኑ ይቆጥባሉ?
  • 16 ሺሕ የሚሆኑት ሙሉ በሙሉ ከፍለዋል ክቡር ሚኒስትር፡፡
  • እነዚህ ልማታዊ ናቸው እባክህ?
  • አራት ዓመት ገንዘባችንን ብንሠራበት ኖሮ ቢያንስ ሁለት ቤቶች ይገዛልን ነበር እያሉ እያዘኑ ነው ክቡር ሚኒስትር?
  • ሌሎቹስ?
  • ሌሎቹም በየወሩ ከኑሮ ጋር እየታገሉ ይቆጥባሉ ክቡር ሚኒስትር፡፡
  • ትዕግሥት ካለ ሁሉም ይደረስበታል፡፡
  • በዚህ አዝጋሚ ሁኔታ ትዕግሥት የሚባለው ቃል ከመዝገበ ቃል ሳይጠፋ አይቀርም ክቡር ሚኒስትር፡፡
  • ምን እያልክ ነው?
  • የቤት ተመዝጋቢዎችን እሮሮ በቀጥታ ቢሰሙት ያልኩት ይገባዎታል ክቡር ሚኒስትር፡፡
  • የምን እሮሮ ነው የምታወራው?
  • ሰው የኪራይ ኑሮ አንገፍግፎታል ክቡር ሚኒስትር፡፡
  • ከታገሡ የተመኙት ይደርሳል አልኩህ፡፡
  • አሁን ግን ችግሩ ከመጠን በላይ ሆኗል ክቡር ሚኒስትር፡፡
  • በልማት ዘመን የምን ችግር ነው የምታወራው?
  • ከ160 ሺሕ በላይ ቤት ፈላጊዎች በስንት ዓመት የሚደርሳቸው ይመስልዎታል?
  • እኛ እኮ ደርግን ለመጣል የታገልነው ለ17 ዓመታት ነው፡፡
  • ክቡር ሚኒስትር ያንንና ይኼንን ምን አገናኛቸው?
  • በአንድ ሌሊት እንዲሁ የሚገኝ ነገር የለማ፡፡
  • ክቡር ሚኒስትር በአንድ ሌሊት ሚሊየነር የሚሆኑ በዝተው የለ እንዴ?
  • በዚህ ዘመን ግን በልማታዊ አቅጣጫ ከተመራህ በግማሽ ሰዓትም ይሳካል፡፡
  • ክቡር ሚኒስትር እውነትዎን ነው?
  • ስዋሽ ታውቀኛለህ?
  • አሁን ገና አሳቁኝ፡፡

[ክቡር ሚኒስትሩ ማታ ቤት ሲደርሱ ባለቤታቸው እየጠበቋችው ነበር]

  • እንዴት አመሸሽ ውዴ?
  • አለሁልህ፡፡
  • ምን አዲስ ነገር አለ?
  • ስልኬ ሲጮህ ነው የዋለው፡፡
  • በደህና ነው?
  • ምን ደኅንነት አለ ብለህ ነው?
  • ምነው?
  • ሁሉም እየደወለ አማልጂኝ ይላል፡፡
  • ከማን ጋር?
  • ከአንተ ጋር ነዋ ክቡር ሚኒስትር፡፡
  • በምን ምክንያት?
  • በፈረደበት 40/60 ነዋ፡፡
  • ምን ለመሆን?
  • ዕጣው ውስጥ ለመካተት፡፡
  • የቤቱ ጉዳይ እኔን አይመለከትም፡፡
  • ማንን ነው የሚመለከተው ታዲያ?
  • ባንኩን ነዋ፡፡
  • እንደምንም ብለህ ለሦስቱ እንኳ ተሟሟትላቸው እባክህ?
  • አይመለከተኝም አልኩሽ፡፡
  • እንደምንም ብዬ እንደማግባባህ ቃል ገብቼላቸው ነበር፡፡
  • ፀረ ልማት ቃል ከአፍሽ ባይወጣ ጥሩ ነበር፡፡
  • ለምን እባክህ?
  • ከአቅም በላይ ነው፡፡
  • ይህችም ውለታ ሆና ከአቅም በላይ ሆነች?
  • ስላልገባሽ ነው፡፡
  • ምኑ ነው የማይገባኝ?
  • 40/60 ቤቶች ላይ ዓይኖች በዝተዋል፡፡
  • ለምን?
  • ቤቶቹን አይተሻቸዋል?
  • አውቃቸዋለሁ ይኼን ያህል ናቸው፡፡
  • መንግሥት ቤት ባይሰጠኝ ኖሮ እኔም ዕጣ ውስጥ ብገባ ደስ ይለኝ ነበር፡፡
  • ምን አልክ የተከበርከው ሚኒስትር?
  • እነዚህ ቤቶች እኮ ውብ ናቸው፡፡
  • አንተ ሰው ያምሃል እንዴ?
  • ምነው?
  • ሰው መዋኛ ያለው ግዙፍ ዘመናዊ ቪላ ይመኛል አንተ ግን. . .
  • እኔ ምን?
  • ተወው የእኔ ዕድል ነው፡፡
  • የአንቺ ዕድል ምን ሆነ ደግሞ?
  • ዕድሌማ እንደ ቢዝነስ ሰው ሳይሆን. . .
  • ምን?
  • እንደ ደረቅ ካድሬ ከሚያስብ ጋር አቆራኝቶኝ ነዋ፡፡
  • ይኼን ፀረ ልማት አስተሳሰብሽን ተይ ብያለሁ፡፡
  • አንተም እኝኝኝ አትበልብኝ፡፡
  • አንቺም እንደ ፀረ ሰላም ኃይሎች አትሁኝብኝ፡፡
  • እንዴት እባክህ?
  • ሰላሜን ነሳሽዋ?
  • ትልቅ ነገር እንደ መመኘት. . .
  • እና?
  • ዝም ብለህ አነስተኛና ጥቃቅን ትወዳለህ፡፡
  • አነስተኛና ጥቃቅን እኮ የልማታችን አጋር ነው፡፡
  • አንተ ሰውዬ?
  • አቤት?
  • እንዲህ ዓይነቱን የሰቸለ አባባልህን ሌላ ቦታ ተጠቀም፡፡
  • ለምን?
  • ስሰማው ያቅረኛል፡፡
  • አንቺ ጤና የለሽም እንዴ?
  • አንተን በሽተኛውን ልጠይቅህ እንጂ?
  • እኔ በሽተኛ?
  • ታዲያስ?
  • እንዴት እባክሽ?
  • ጓደኞችህ የትና የት ተተኩሰዋል. . .
  • እኔስ?
  • አንተማ ገና ከመሬት አልተነሳህም፡፡
  • እስቲ ይህንን አባባል ተርጉሚልኝ?
  • ተቸክለሃል!