አዲሱን ድረ ገጽ ይሞክሩ!
አዲሱን ድረ ገጽ ይሞክሩ!

ክቡር ሚንስተር

[ክቡር ሚኒስትሩ ከሥራ ወጥተው ቤታቸው ከሚስታቸው ጋር እያወሩ ነው]

  • ዛሬ መቼም ያልጠበቅኩትን ነገር ነው የሰማሁት፡፡
  • ምንድነው ያልጠበቅሽው ነገር?
  • አስቸኳይ በተጠራው ፓርላማ የወሰናችሁትን ነዋ?
  • ያለመክሰስ መብት መነሳቱን ነው?
  • በነገራችን ላይ ሰው የበርካታ ሰዎች ያለመከሰስ መብት ይነሳል ብሎ ጠብቆ ነበር፡፡
  • ማለት? አልገባኝም?
  • እንዴ ስኳር የላሱት በርካቶች ናቸው ነው የሚባለው?
  • ምን ለማለት ፈልገሽ ነው?
  • እንዲያውም ሰሞኑን ስኳሩ ከፍ ያላለ ባለሥልጣን የለም አሉ፡፡
  • ወሬውንማ ማን ብሎሽ?
  • የምሬን ነው ሕዝቡ እየጠየቀ ነው፡፡
  • ምን ብሎ?
  • እውነት ስኳር የላሱት እነዚህ ብቻ ናቸው ወይ? ብሎ ነዋ፡፡
  • እንግዲህ እሱን ጥያቄ ስኳሩን የላሱትን ሰዎች ጠይቂያቸው፡፡
  • እየጠየቅኩህ እኮ ነው አንተን?
  • አሃ ልሰሃል እያልሽ ነው?
  • እሱን ልቦናህ ያውቀዋል፡፡
  • ለማንኛውም ያልተጠየቅሽውን አታውሪ፡፡
  • በነገራችን ላይ የአስቸኳይ ጊዜ አዋጁን ታነሱታላችሁ ብዬም አልጠበቅኩም፡፡
  • እንዴት አልጠበቅሽም?
  • ከታወጀ ዓመት ሳይሞላው ይነሳል ብዬ አልገመትኩም፡፡
  • በመጀመርያ እንዲያውም ለስድስት ወራት ተብሎ ነበር የታወጀው፡፡
  • ማለቴ አገሪቷ ያለችበት ሁኔታ አዋጁን የሚያስነሳ ስላልመሰለኝ ነው፡፡
  • አገሪቷ ምን ዓይነት ሁኔታ ውስጥ ነው ያለችው?
  • ያው ከቀን ገቢ ግምት ጋር ሰው እየተንጫጫ ነው፡፡ እዚህም እዚያም ተቃውሞዎች አሉ፡፡ ባለሥልጣናትም እንደ ቆሎ እየተዘገኑ እስር ቤት እየገቡ ነው፡፡
  • እሺ ሌላስ?
  • ይኼ ሁሉ ችግር እያለ አስቸኳይ አዋጁ ይነሳ ማለታችሁ ገርሞኝ ነው፡፡
  • አዋጁን እኮ ያስነሳነው ዋናዎቹን አስቸጋሪዎች ስላስገባናቸው ነው፡፡
  • ለዚያ ነው ያነሳችሁት?
  • ከዚያ ባለፈም አገሪቷ አንፃራዊ ሰላም ላይ ናት፡፡
  • አንፃራዊ ሰላም ማለት?
  • ይኸው ዜጎች በሰላም ወጥተው በሰላም ይገባሉ፡፡
  • እሱስ ልክ ነህ፡፡
  • የዲፕሎማቲክ ማኅበረሰቡም ጫና እያሳደረብን ነው፡፡
  • ምን ብሎ?
  • ቱሪስቶች በአዋጁ ምክንያት እንደ በፊቱ እየገቡ አይደለማ?
  • ለነገሩ መነሳቱ እኔን በጣም አስደስቶኛል፡፡
  • ለምን?
  • ባለፈው ያሰብናትን ነገር እናሳካለና፡፡
  • ምንድን ነበረች እሷ?
  • የቱር ኩባንያ መክፈቱን ነዋ፡፡
  • እ. . .
  • እኔ እኮ ጫፍ ላይ ደርሼ ነው ያቆምኩት፡፡
  • ለምንድነው ያቆምሽው?
  • የአስቸኳይ ጊዜ አዋጁ ሲታወጅ ቱሪዝም እንደሚቀዘቅዝ ገብቶኝ ነዋ፡፡
  • አርቆ አሳቢ ነሽ እኮ ነው፡፡
  • ስማ ከዚህ ዘርፍ እኮ የሚገኘው በዶላር ነው፡፡
  • እሱማ ልክ ነሽ፡፡
  • ስለዚህ የውጭ ምንዛሪም ችግር አይሆንብንም፡፡
  • ምን ላድርግሽ አንቺን?
  • ኢንቨስተር ነዋ፡፡
  • አንቺ እኮ ከሰው ሁሉ  ተለይተሽ. . .
  • የተባረኩ ነኝ?
  • ሙሰኛ ነሽ!

[የክቡር ሚኒስትሩ ልጅ ያለመንጃ ፈቃድ ጠጥቶ ሲያሽከረክር ትራፊክ ፖሊስ ይይዘዋል]

  • እንዴ? ለመሆኑ አንተ ዕድሜህ ስንት ነው?
  • ምን አገባህ?
  • ምን አገባህ? ትራፊክ ፖሊስ እኮ ነኝ፡፡ ምን አገባህ ማለት አትችልም፡፡
  • ፖሊስ ብትሆንስ ታዲያ?
  • እስኪ መንጃ ፈቃድህን አምጣ፡፡
  • አላመጣም፡፡
  • ይቺን ይወዳል፡፡ የምን ድንፋታ ነው?
  • ሰውዬ ዞር በልልኝ ልሂድበት፡፡
  • እንዴ ጠጥተሃል ደግሞ?
  • በአንተ ገንዘብ አልጠጣሁ፣ ምን አገባህ ታዲያ?
  • መናገር እስኪያቅትህ እኮ ነው እየተኮላተፍክ ያለኸው?
  • እሱ አንተን አይመለከትህም፡፡
  • ደግሞ የድፍረትህ ድፍረት በዚህ በጠራራ ፀሐይ ነው እንዴ የምትጠጣው?
  • ከፈለግኩ ከእንቅልፌ ስነሳ ከቁርሴ ጋር አብሬ መጠጣት እችላለሁ፡፡
  • ለመሆኑ በጠራራው እንዲህ የሆንከው የቀን  ገቢ ግምት ከፍተኛ ገንዘብ መጥቶብህ ነው?
  • ምን አልከኝ?
  • ለነገሩ አንተ ዕድሜህም ለንግድ ገና አልደረሰም፡፡
  • ሰውዬ ዞር በልልኝ፡፡
  • ለማንኛውም አሁን ከመኪና ወርደህ ትነፋለህ፡፡
  • እኔ ኦረዲ ነፍቼ ነው የመጣሁት፡፡
  • ምን?
  • ዊድ ነዋ፡፡
  • እንዴ አደንዛዥ ዕፅ ትጠቀማለህ ማለት ነው?
  • ምን ይገርምሃል ታዲያ? እንኳን እኔ አትሌቶቻችንም ይወስዱ የለ እንዴ?
  • በል በል አንተም መኪናውም ትታሰራላችሁ፡፡
  • ኪኪኪ. . .
  • ምን ያስቅሃል?
  • እኔ እስር ቤት?
  • አዎን፡፡
  • በል አንተ ራስህ እንዳትገባ፡፡
  • ማለት?
  • አላወቅከኝም መሰለኝ?
  • ማን ነህ አንተ?
  • የእንትና ልጅ ነኝ፡፡
  • የማን?
  • የክቡር ሚኒስትሩ!

[የክቡር ሚኒስትሩ ልጅ ወዲያው ስልክ ይደውልላቸዋል]

  • ሄሎ ዳዲ፡፡
  • እሺ  ጎረምሳው፡፡
  • ይኸው ትራፊክ ይዞ እያሰቃየኝ ነው፡፡
  • ማንን? አንተን?
  • አዎ ዳዲ፡፡
  • እንዴት ቢዳፈረኝ ነው?
  • ስነግረው እኮ አልሰማ ብሎኝ ነው፡፡
  • ማንነቴን ነግረኸው ነው የሚያሰቃይህ?
  • ብነግረው ሊሰማኝ አልቻለም ስልህ?
  • በጣም  ተናንቀናል ማለት ነው?
  • አይገርምህም ዳዲ?
  • እስኪ ስልኩን አቀብለው፡፡

[ትራፊክ ፖሊሱ ማንንም እንደማያናግር ነገረው]

  • ስልኩን አልቀበልም አለኝ ዳዲ፡፡
  • በጣም ተደፋፍረናል ማለት ነው፡፡
  • ምን ላድርግ ታዲያ ዳዲ?
  • ይኸውልህ መኪናውን ዳር አቁመውና ቁልፉን ለራሱ ስጠው፡፡
  • ከዚያስ?
  • እኔ ከእሱ እረከበዋለሁ፡፡
  • ቁልፉን ነው?
  • ቁልፉን ብቻ ሳይሆን . . .
  • እ. . .
  • ሥልጣኑንም!

[ክቡር ሚኒስትር ከሾፌራቸው ጋር ወደ ቢሮ እየሄዱ ነው]

  • ሰሞኑን እየተፈጠረ ያለውን ነገር እየተከታተሉ ነው ክቡር ሚኒስትር?
  • ምኑን?
  • በጣም ብዙ ነገር አለ፡፡
  • ምን ሰምተህ ነው?
  • ኔማር የሚሉት ተጫዋች በ198 ሚሊዮን ፓውንድ ተሸጠ ሲባል ሰምቼ ገርሞኝ ነዋ?
  • ምኑ ነው የገረመህ?
  • በዛው ሳምንት የሶማሊያ በጀት 170 ሚሊዮን ፓውንድ መሆኑ በሶሻል ሚዲያ ሲናፈስ ነበር፡፡
  • ምን ይጠበስ ታዲያ?
  • ማለቴ የአንድ ተጫዋች ግዥ ከአንድ አገር በጀት መብለጡ አስገርሞኝ ነው?
  • ለምንድነው የማታውቀውን ነገር የምትዘባርቀው?
  • ለነገሩ ሌላም ያስደነቀኝ ነገር ነበር፡፡
  • ምን?
  • ይኸው በሙስና ተጠርጥረው የገቡት ግለሰቦች ያደረሱት ጉዳት ከአንዳንድ ክልሎች በጀት ይበልጣል አሉ፡፡
  • አንተ የመቼው ፖለቲካ ተንታኝ ነህ?
  • እንዲያው የታዘብኩትን ላውራ ብዬ ነው፡፡
  • ነገርኩህ የአንተ ሥራ እኔን ከቦታ ቦታ ማመላስ ነው፡፡
  • እንዴ ክቡር ሚኒስትር እኔም እኮ ዜጋ ነኝ፡፡ ስለዚህ አገሪቷ ውስጥ የሚካሄደው ጉዳይ ይመለከተኛል፡፡
  • እሱን የለመድክበት ቢራ ቤት ማውራት ትችላለህ፡፡
  • ለነገሩ አሁን ከቢራ ቤት ውጪ ስለኢትዮጵያዊነት ማውራት እንደ ስህተት እየተቆጠረ ነው፡፡
  • ምን ማለት ነው?
  • ይኸው በሩጫ መድረኩ ላይ ራሱ ይኼን ጉዳይ እያየነው አይደል እንዴ?
  • ምን እያልክ ነው?
  • እንደ አገር ለኢትዮጵያ በቡድን ከመሥራት ይልቅ ግለኝነት እየተንፀባረቀ ነው እኮ?
  • ወይ ጣጣ፡፡
  • ለነገሩ ይኼ ጣጣ የእንትን ጣጣ እንደሆነ እናውቃለን፡፡
  • የምን ጣጣ ነው?
  • የፌዴራሊዝም፡፡
  • እስኪ የፖለቲካ ትንተናህን አቆየው፡፡
  • እሺ አንድ ነገር ግን ልነግርዎት እፈልጋለሁ፡፡
  • ምን?
  • ሰሞኑን የሚጥለው ኃይለኛ ዝናብ የሥራ መደቤን ከመኪና ሾፌርነት ወደ መርከበኛነት እንዳያስቀይረኝ እየሠጋሁ ነው፡፡
  • አልገባኝም?
  • መንገዶቹ ወደ ሰው ሠራሽ ሐይቅነት እየተለወጡ ነው፡፡
  • ምን?
  • ለማንኛውም መንግሥት የመንገድ ፕሮጀክቶቹን በሌላ ፕሮጀክቶች መቀየራቸውን ያጋለጠ ይመስለኛል፡፡
  • በምን መቀየሩን?
  • በግድብ!

[ሰሞኑን በሙስና ተጠርጥረው በታሰሩ ባለሥልጣናት ምክንያት የፈራ የመንገድ ኮንትራክተር ክቡር ሚኒስትሩ ጋ ደወለ]

  • ሰላም ክቡር ሚኒስትር፡፡
  • እዚህ አገር አለህ እንዴ?
  • ከአገሬ የት እሄዳለሁ ብለው ነው?
  • ሰሞኑን ሰዎች ስልኩ አይሠራም ብለው ጠይቀውኝ ስለነበር ነው፡፡
  • እሱማ ብዙ እየወተራብኝ ነው፡፡
  • ምንድነው የተወራብህ?
  • ሰሞኑን እስር ቤት መግባትህ አይቀርም እያሉኝ ነው፡፡
  • ለዚያ ነው ስልክህን ያጠፋኸው?
  • ያው ቤተሰብም ስለተደናገጠ ከግርግሩ ልራቅ ብዬ ነው፡፡
  • ታዲያ እኔ ጋ እንዴት ደወልክ?
  • የሚወራው ወሬ ሊያስተኛኝ ስላልቻለ ነው፡፡
  • ምን ላድርግ ታዲያ? አንተ ስኳሯን ልሰህ ነበር እንዴ?
  • እሱማ ሐኪም ስኳር አትውሰድ ብሎኝ ነበር፡፡
  • ለምን ወሰድክ ታዲያ?
  • ያው ተገድጄ ነዋ፡፡
  • ተገድጄ ስትል?
  • ያው ለአንዳንድ ኃላፊ ስጦታ ነገር ሰጥቼ አውቃለሁ፡፡
  • ተወዳድረህ እንድትሠራ እንጂ ጊፍት ሰጥተህ እንድታሸንፍ ማን ፈቀደልህ?
  • ያው ተወዳድረን ካለፍን በኋላ ገንዘብ ለማስለቀቅ ስጦታ መልቀቅ ስላለብን ነው፡፡
  • ምን ልርዳህ ታዲያ?
  • እንዲያማልዱኝ ፈልጌ ነዋ፡፡
  • ምንድነው የማማልድህ?
  • እስር ቤት እንዳልጣል ነዋ፡፡
  • እንዳማልድህ ከፈለክ ለእኔ መመማለጃ አስገባልኝ፡፡
  • ምንድነው መማለጃው?
  • ቪ8!