አዲሱን ድረ ገጽ ይሞክሩ!
አዲሱን ድረ ገጽ ይሞክሩ!

ክቡር ሚንስተር

 

[የክቡር ሚኒስትሩ ዘመድ ከውጭ አገር ደወለላቸው]

  • ሄሎ ጋሼ፡፡
  • እንዴት ነህ ባክህ?
  • ሰላም ነኝ ጋሼ፡፡
  • አንተ በቃ ሸፍተህ ቀረህ አይደል?
  • ምን ላድርግ ብለህ ነው ጋሼ?
  • ወደ ኢትዮጵያ እገባለሁ ስትል አልነበር እንዴ?
  • እኔማ ፎር ጉድ እመጣለሁ ብዬ ነበር፡፡
  • እና ምን ተገኘ?
  • አሁንማ ነገሮች እንኳን አልመጣሁ እያስባሉኝ ነው፡፡
  • እንዴት?
  • ወይ ጉድ ብዬ ነበራ የምመለሰው፡፡
  • እኮ ለምን?
  • እኔ እኮ ባለፈው ኢንዱስትሪ ለመገንባት ሁላ አስቤ ነበር፡፡
  • እና ምን ተገኘ?
  • እንዴ ጋሼ? ያ ሁላ ፋብሪካ ሲቃጠል ሳይ እግዚአብሔርን አመሰገንኩ፡፡
  • እንኳን ተቃጠለ ብለህ ነው ያመሰገንከው?
  • ኧረ እንኳን እኔ አልከፈትኩ ብዬ ነው እንጂ፡፡
  • አሁን እኮ አገሪቷ ተረጋግታለች፡፡
  • ተረጋግታለች ስትለኝ?
  • ይኸው የአስቸኳይ ጊዜ አዋጁ ከወጣ በኋላ ሁሉ ነገር በቁጥጥር ሥር ውሏል፡፡
  • ጋሼ ምንም የሚስብ ነገር ግን አላየሁም፡፡
  • እንዴት ማለት?
  • ይኸው የባንክ ሼሬን በግድ ልታሸጡኝ አይደል እንዴ?
  • ለምንድን ነው የምትሸጠው?
  • ኢትዮጵያዊ አይደለህም ተብዬ ነዋ፡፡
  • ኢትዮጵያዊ አይደለህም እንዴ አንተ?
  • በልቤማ ኢትዮጵያዊ ነኝ፡፡
  • በምንድን ነው ኢትዮጵያዊ ያልሆንከው ታዲያ?
  • በወረቀት፡፡
  • ፓስፖርት ቀየርክ እንዴ?
  • ሰሞኑን ፕሮሰሴ አልቆ ፓስፖርት ሰጡኝ፡፡
  • እንኳን ደስ አለህ፡፡
  • ፓስፖርት ሳገኝ ግን ሼሬን ልቀማ ነው፡፡
  • ለምንድን ነው የምትቀማው?
  • መንግሥት ሊሸጠው ነው፡፡
  • እና ምን ይሻላል?
  • ጋሼ እሱን ላማክርህ ነው የደወልኩት፡፡
  • ምን ማድረግ ይቻላል?
  • ለእኔማ የእኛው ቤተሰብ ቢወስደው ነው የሚሻለው፡፡
  • እንዴት አድርገን?
  • በውርስ!

[ክቡር ሚኒስትሩ ብሔራዊ ባንክ ደወሉ]

  • ሄሎ ክቡር ሚኒስትር፡፡
  • ምንድን ነው የምሰማው?
  • ምን ሰሙ ክቡር ሚኒስትር?
  • የባንክ ሼር እንዲሸጥ አዛችኋል እንዴ?
  • የምን የባንክ ሼር?
  • የዳያስፖራዎችን ነዋ፡፡
  • ክቡር ሚኒስትር የውጭ አገር ዜግነት ያለው ሰው እኮ የባንክ ሼር መግዛት አይችልም፡፡
  • ትውልደ ኢትዮጵያዊ ቢሆኑም?
  • ወንጀል ነው ክቡር ሚኒስትር፡፡
  • እና ልትሸጡባቸው ነው?
  • ሊወረስ የሚገባው ሼር ነበር ስልዎት?
  • ማን ነው የሚወርሰው?
  • መንግሥት ነዋ፡፡
  • እንዲያውም ሐሳብ መጣልኝ፡፡
  • ምን ዓይነት?
  • ሚኒስትር እንደመሆኔ መጠን…
  • እ…
  • ለዘመዴ መሆን እችላለሁ፡፡
  • ምን?
  • ወራሽ!

[አገር ውስጥ ያለ የክቡር ሚኒስትሩ ዘመድ ደወለላቸው]

  • ሄሎ ጋሼ፡፡
  • አንተ እንዴት ነህ?
  • አለሁ ጋሼ፣ አንተ ግን ጠፍተሃል፡፡
  • ምን ይኼ ሹመት ከዘመድ ጋር አቆራረጠኝ፡፡
  • ሹመትማ ያቀራርባል እንጂ አያቆራርጥም፡፡
  • እንዴት?
  • ስትሾም ያው ዘመዶችህን መጥቀምህ ስለማይቀር ትቀራረባለሃ፡፡
  • ብለህ ነው?
  • እንዴታ ጋሼ?
  • ምን እያደረክ ነው?
  • ይኸው ጋሼ ሥራ ፍለጋ እየተንከራተትኩ ነው፡፡
  • እንዴ ባለፈው ክረምት አይደል እንዴ የተመረቅከው?
  • ሥራዬን አቁሜ ትምህርቴን የቀጠልኩት የተሻለ ሥራ አገኛለሁ ብዬ ነበር፡፡
  • ምንድን ነበር የተማርከው?
  • ኢንጂነሪንግ፡፡
  • ታዲያ በኢንጂነሪንግ ነው ሥራ ያጣኸው?
  • ጋሼ በፊት በልምድ ስሠራ ብዙ ገንዘብ አገኝ ነበር፡፡
  • እሺ፡፡
  • ይኸው ራሴን ላሻሽል ብዬ ዲግሪ ብይዝም ሥራ ከየት ላምጣ?
  • ምን ትቀልዳለህ? ኢንጂነር ሆነህ ሥራ የለህም?
  • ይኸው መንግሥት የ70/30 ፖሊሲ ተግባራዊ ሲደረግ ጉድ ሆንና፡፡
  • እንዴት ማለት?
  • ያው 70 በመቶ የሳይንስ ተማሪ ይሁን ሲባል፣ ሥራውም በዚያን ያህል ይበዛል ብዬ አስቤ ነበር፡፡
  • ለሳይንስ ተማሪ ሥራ የለም እያልከኝ ነው?
  • ክቡር ሚኒስትር እዚህ አገር 70 በመቶው ደላላ፣ 30 በመቶው ደግሞ ኪራይ ሰብሳቢ ነው፡፡
  • ምን አልከኝ?
  • አንድ የሥራ ማስታወቂያ ሲወጣ ከ500 ሰው በላይ ነው የሚያመለክተው፡፡
  • ወይ ጣጣ፡፡
  • እና ጋሼ እንድትረዳኝ ፈልጌ ነው፡፡
  • እኔ ምን ልርዳህ? ሕንፃዬ ገና አልተጀመረም፡፡
  • እስኪጀመር አንድ ሐሳብ ነበረኝ፡፡
  • ምን ዓይነት ሐሳብ?
  • አሁን የወጣቶች ፈንድ የሚባለው ሊጀመር ነው፡፡
  • የ10 ቢሊዮን ብር ፈንዱን ነው የምትለኝ?
  • አዎን ጋሼ፣ ከእሱ ፈንድ ተጠቃሚ ብሆንስ?
  • እየቀለድክ ነው?
  • ኧረ የምሬን ነው፡፡
  • ዕድሜህ እኮ ሃምሳዎቹ ውስጥ መሆኑን ረሳኸው እንዴ?
  • ቢሆንም ጋሼ ወጣትነቴን የጨረስኩት ለዚህ ሥርዓት ስታገል ነው፡፡
  • እና ምን እያልከኝ ነው?
  • ልጦር ይገባኛል፡፡
  • በምን?
  • በወጣቶች ፈንድ!

[አንድ የተቃዋሚ መሪ ለክቡር ሚኒስትሩ ደወለላቸው]

  • ሄሎ ክቡር ሚኒስትር፡፡
  • ማን ልበል?
  • የተቃዋሚ ፓርቲ መሪው ነኝ፡፡
  • እንዴት ነህ ባክህ?
  • እናንተ እያላችሁ ምን ደኅንነት አለ?
  • አትማረር እንጂ?
  • ለምን አልማረር?
  • ሁሉን ነገር ለመቅረፍ ቆርጠን ተነስተናል፡፡
  • እኛ ደግሞ በእናንተ ተስፋ ከቆረጥን ሰነባበትን፡፡
  • ለምን?
  • ሁሌም ሊፕ ሰርቪስ ነው የምትሰጡት፡፡
  • ኧረ እኛ የፐብሊክ ሰርቪስ ነው ያለን፡፡
  • እኔ የምልዎት ሁሌ ወሬ ብቻ ነው የምታውቁት፡፡
  • እንዴት ማለት?
  • ይኸው ሙስናው ተባብሷል፡፡
  • እ…
  • የሰብዓዊ መብት ረገጣውም እንደቀጠለ ነው፡፡
  • ምን ሆናችሁ?
  • አባሎቻችን እስካሁን ዘብጥያ እንደወረዱ ነው፡፡
  • ዘብጥያ ያወረድናቸው እኮ በእናንተው ጥያቄ ነው፡፡
  • እንዴት ማለት?
  • ከሥልጣን አልወርድ ሲሏችሁ እኮ ነው ዘብጥያ ያወረድንላችሁ፡፡
  • እናንተም ዘብጥያ ካልወረዳችሁ ሥልጣን አትለቁም ማለት ነው?
  • የራሷ አሮባት የሰው ታማስላለች አሉ፡፡
  • ምን እያሉ ነው ክቡር ሚኒስትር?
  • መጀመሪያ ውስጣችሁን ፈትሹ፡፡
  • እናንተ እያላችሁ ራሳችንን መፈተሽ አንችልም፡፡
  • ለምን?
  • የፖለቲካ ምኅዳሩን አጥብባችሁታላ፡፡
  • ምኅዳሩንማ ልናሰፋው ነው፡፡
  • በምንድን ነው የምታሰፉት?
  • በድርድር ነዋ፡፡
  • የፖለቲካ ምኅዳሩ በድርድር አይሰፋም፡፡
  • ታዲያ በምንድን ነው የሚሰፋው?
  • በሥልጣን መጋራት!

[ክቡር ሚኒስትሩ አማካሪያቸውን አስጠሩት]

  • አቤት ክቡር ሚኒስትር፡፡
  • አንዱ የተቃዋሚ መሪ ደውሎልኝ ነበር፡፡
  • ምን አለዎት ታዲያ?
  • ሥልጣን አጋሩን፡፡
  • ምን?
  • አይገርምህም?
  • አይደለም ሥልጣን ሐሳባችንን አናጋራቸውም፡፡
  • እንዴት?
  • እኛ መጨነቅ ያለብን ለሌሎች ነው ክቡር ሚኒስትር፡፡
  • ለማን ነው መጨነቅ ያለብን?
  • በመጀመሪያ አብዮታዊ ዴሞክራሲን ለተጠመቁ፡፡
  • እ…
  • ሲቀጥል ለልማታዊ አጋሮቻችን፡፡
  • አልገባኝም፡፡
  • ቆይ ላስረዳዎት፡፡
  • እሺ ቀጥል፡፡
  • አብዮታዊ ዴሞክራሲ የተጠመቁት ማለት መጽሐፍ ቅዱስን አምነውና የሕይወት መርሐቸው አድርገው በክርስትና እንደተጠመቁት ማለት ነው፡፡
  • ምን አልከኝ?
  • በቃ በአብዮታዊ ዴሞክራሲ ተጠምቀው፣ አዲስ ራዕይን እንደ ሕይወት መርሐቸው የተቀበሉትን ማለቴ ነው፡፡
  • እና እነዚህ ሰዎች በኢሕአዴግ ጽሕፈት ቤት በኩል ሲያልፉ ያማትባሉ ማለት ነው?
  • በቃ ሐሳቡን በደንብ አግኝተውታል ክቡር ሚኒስትር፡፡
  • ልማታዊ አጋሮቻችን ያልካቸውስ?
  • እነሱ ማለት በክርስትናው ታማኝ ምዕመናን እንደሚባሉት ማለት ነው፡፡
  • እንዴት ማለት?
  • እነዚህ አሥራቶቻቸውን በሚገባ የሚከፍሉ ማለት ናቸው፡፡
  • አሃ በቃ እነዚህም ግብራቸውን በአግባቡ እየከፈሉ መንግሥትን የሚረዱትን ማለት ነው?
  • በሚገባ ገብቶዎታል ክቡር ሚኒስትር፡፡
  • እኔ እኮ ሥልጣን አጋሩን ሲለኝ ደንግጬ ነው፡፡
  • እነሱማ ቢችሉ የባንክ አካውንቶቻችሁንም እንጋራ ማለታቸው አይቀርም፡፡
  • እኔም እኮ እሱ ነበር ያስፈራኝ፡፡
  • አያስቡ ክቡር ሚኒስትር፡፡
  • ለምን?
  • ተቃዋሚ ቢንጫጫ…
  • እ…
  • በአንድ ሙቀጫ!