ክቡር ሚንስተር

[የክቡር ሚኒስትሩ ቢሮ አማካሪያቸው ገባ]

  • ፈለግከኝ?
  • አዎን ክቡር ሚኒስትር፡፡
  • ምን ተገኘ?
  • በአስቸኳይ ማድረግ አለብን፡፡
  • ምንድነው የምናደርገው?
  • የሠራተኞች ስብሰባ፡፡
  • እየቀለድክ ነው?
  • ኧረ የምሬን ነው ክቡር ሚኒስትር፡፡
  • ስማ እኔ በስብሰባ የማባክነው ጊዜ የለኝም፡፡
  • ይኼ እኮ የሚባክን ጊዜ አይደለም፡፡
  • ከስብሰባ ምን ይገኛል?
  • ክቡር ሚኒስትር ሠራተኛው እኮ ብዙ ብሶት አለው፡፡
  • የምን ብሶት?
  • ሠራተኞች እኮ አጠቃላይ ስብሰባ ይደረግ እያሉ ከጠየቁ ቆዩ፡፡
  • አርፈው ሥራቸውን ለምን አይሠሩም?
  • ክቡር ሚኒስትር በርካታ ብሶቶች ውስጣቸው ስላለ መወያየት ይፈልጋሉ፡፡
  • የምን ብሶት ነው?
  • የመልካም አስተዳደር ብሶት፡፡
  • እና ምን እያልክ ነው?
  • ስብሰባ ማድረግ ግዴታችን ነው፡፡
  • እንግዲያው ከስብሰባው በፊት መወያየት ያለብን ጉዳዮች አሉ፡፡
  • ምን ዓይነት ጉዳዮች?
  • የቅድመ ስብሰባ ውይይት ነዋ፡፡
  • እኮ ምንድን ናቸው?
  • በመጀመሪያ ስብሰባው ላይ ማን ነው የሚገኘው የሚለው ላይ መወያየት አለብን፡፡
  • ሁሉም ሠራተኛ ነዋ የሚገኘው፡፡
  • ይህን እኮ ነው የምልህ፡፡
  • ማለት ክቡር ሚኒስትር?
  • እኔ ከአነስተኛና ጥቃቅን ሠራተኞች ጋር ተሰብስቤ እንድነጋገር ትፈልጋለህ?
  • ምን ማለት ነው ክቡር ሚኒስትር?
  • ከዋና ዋና ኃላፊዎች ጋር ነው መሰብሰብ የምፈልገው፡፡
  • ግን ክቡር ሚኒስትር በርካታ ብሶት ያለው እኮ ታችኛው ሠራተኛ ውስጥ ነው፡፡
  • ነገርኩህ እኮ እኔ ከእነሱ ጋር መሰብሰብ አልችልም፡፡
  • እሺ ሌላስ?
  • ሌላው ቃለ ጉባዔውን ማን ነው የሚይዘው ላይ መስማማት አለብን፡፡
  • ያው ከመሀከላችን አንዱ ይይዘዋል፡፡
  • አልስማማም ስልህ፡፡
  • ለምን ክቡር ሚኒስትር?
  • ገለልተኛ የሆነ ወገን ነው ቃለ ጉባዔውን መያዝ ያለበት፡፡
  • ምን?
  • አየህ፣ ቃለ ጉባዔው ላይ ያልተናገርነው ነገር ሊገባ ስለሚችል ገለልተኛ ወገን ነው መያዝ ያለበት፡፡
  • ገለልተኛ ወገን ማን ነው ታዲያ?
  • ከውጭ መቅጠር ነዋ፡፡
  • ምን?
  • ቃለ ጉባዔ የሚይዝ አካል ይቀጠር፡፡
  • እንዴት ነው የሚቀጠረው?
  • በጨረታ ነዋ፡፡
  • እ…
  • አየህ፣ አሠራራችን ግልጽ መሆን አለበት፡፡
  • ምን ዓይነት ጨረታ ነው የሚወጣው?
  • ከዚያ በፊት የሚቀድም ነገር አለ፡፡
  • ምን?
  • የጨረታ ዶክመንቱን የሚያዘጋጅ ኮሚቴ፡፡
  • በቃ መቼም አይካሄድም በሉኛ?
  • ምኑ?
  • ስብሰባው፡፡
  • ነገርኩህ እኮ እነዚህ ቅድመ ሁኔታዎች መመቻቸት አለባቸው፡፡
  • ስለዚህ እኔ ከእርስዎ ጋር ላድርጋ፡፡
  • ምን?
  • ስብሰባ፡፡
  • የምን ስብሰባ?
  • የተናጠል!

[የክቡር ሚኒስትሩ ሚስት ደወሉላቸው]

  • መቼም አንብበኸዋል?
  • ምኑን?
  • ጋዜጣ አላነበብክም?
  • እኔ ለወሬ ጊዜ የለኝም፡፡
  • ምን እያልክ ነው?
  • እነሱ ከወሬ ውጪ ምን ያውቃሉ?
  • ኧረ ከሚኒስትር ይኼ አይጠበቅም፡፡
  • ነገርኩሽ እኮ እኔ የማነበው ልማታዊ የሆኑ ጋዜጦችን ነው፡፡
  • ስማ ለማንኛውም ጉድ ሆነናል፡፡
  • የምን ጉድ ነው?
  • ቆሟል እያሉ ነው፡፡
  • ምን ብላክ ማርኬት ነው?
  • ኧረ አይደለም፡፡
  • ታዲያ እኛ ያወጣነው ጨረታ ነው?
  • የለም፡፡ የለም፡፡
  • ታዲያ ምንድን ነው የቆመው?
  • ኤክስፖርት፡፡
  • የምን ኤክስፖርት?
  • የቦሎቄ፡፡
  • ለምን ሲባል?
  • ይኸው ፓኪስታን የኢትዮጵያ ቦሎቄ አገሬ እንዳይገባ ብላለች፡፡
  • እኔ ጠፋሁ፡፡
  • ምርቱ ሊበላሽብኝ ነው፡፡
  • ይኼ የፀረ ልማቶች ወሬ ነው፡፡
  • እውነት መሆኑን አረጋግጫለሁ፡፡
  • አየሽ ፓኪስታንም ፀረ ልማቶች አሉ ማለት ነው፡፡
  • ይኼን ዲስኩርህን እዛው፡፡
  • ተይው እኔ ችግሩ ገብቶኛል፡፡
  • ምንድን ነው?
  • ፓኪስታን ውስጥም መሽገዋል ማለት ነው፡፡
  • እነማን?
  • ኪራይ ሰብሳቢዎች!

[ክቡር ሚኒስትሩ ሌላ ሚኒስትር ጋ ደወሉ]

  • ሰላም ክቡር ሚኒስትር፡፡
  • ምን እየተደረገ ነው?
  • ምን ተደረገ?
  • አገር ሲጎዳ እንዴት ዝም ይባላል?
  • ማን ነው አገር የጎዳው?
  • የውጪ ንግዳችን አሽቆልቁሏል እየተባለ አይደል እንዴ?
  • አዎን ክቡር ሚኒስትር፡፡
  • ኪራይ ሰብሳቢዎችን መታገል አለብን፡፡
  • ስለምንድን ነው የሚያወሩት ክቡር ሚኒስትር?
  • ፓኪስታን ይኸው ቦሎቄያችን እንዳይገባ ከለከለች አይደል እንዴ?
  • ክቡር ሚኒስትር በግልጽ የቦሎቄ ንግድ ውስጥ እንዳሉ መናገር ጀመሩ ማለት ነው?
  • እኔ እኮ መንግሥትን ለማገዝ ነው ሴክተሩ ውስጥ የገባሁት፡፡
  • በምንድን ነው የሚያግዙት?
  • የውጭ ንግዳችንን ለማጎልበት ነዋ፡፡
  • አይ ክቡር ሚኒስትር፡፡
  • ለማንኛውም አሁን በአስቸኳይ ወደ ፓኪስታን መላክ አለበት፡፡
  • ምንድነው የሚላከው?
  • የልዑካን ቡድን!

[የክቡር ሚኒስትሩ የወንድም ልጅ ደወለላቸው]

  • ሄሎ ጋሼ፡፡
  • እንዴት ነህ?
  • ኧረ ከባድ ችግር ውስጥ ነኝ፡፡
  • ሰባት ሻንጣ ሞባይል ገብቶልሃል አይደል እንዴ?
  • እሱማ ገብቷል ጋሼ፡፡
  • ባለፈው ከግማሽ በላይ የሆኑትን ሸጫለሁ ብለኸኛል አይደል እንዴ?
  • አዎን ጋሼ፡፡
  • ታዲያ የምን ከባድ ችግር ነው?
  • ታክሱ ጋሼ፡፡
  • ሞባይሎቹ ያለታክስ እንዲገቡ እኮ ነው ያስደረኩልህ?
  • እሱ ነው ችግር የፈጠረው፡፡
  • የምን ችግር ነው?
  • ይኸው ጣቢያ ነው ያለሁት፡፡
  • ለምን?
  • ለምርመራ ተፈልጌ፡፡
  • አንድ ስልክ ልደውል፡፡
  • እሺ ጋሼ፡፡

[ክቡር ሚኒስትሩ መርማሪው ጋ ደወሉ]

  • ሄሎ! ማን ልበል?
  • ክቡር ሚኒስትር ነኝ፡፡
  • ምን ልታዘዝ ክቡር ሚኒስትር?
  • ሕዝቡ ከቴክኖሎጂ ጋር እንዲራራቅ ነው እንዴ ሐሳባችሁ?
  • እንዴት ክቡር ሚኒስትር?
  • ሕዝቡ ዘመናዊ እንዲሆን ብሎ የወንድሜ ልጅ ሰባት ሻንጣ ሞባይል አስገባ፡፡
  • እሺ ክቡር ሚኒስትር?
  • ይኸው እናንተ ለምርመራ ትፈለጋለህ ብላችሁ አስራችሁታል፡፡
  • ትክክል ነው ክቡር ሚኒስትር፡፡
  • ሞባይል ማስገባቱ ምኑ ነው ጥፋቱ?
  • ታክስ አልከፈለም፡፡
  • ከዚህ በላይ ምን ይክፈል?
  • ማለት ክቡር ሚኒስትር?
  • በሌሊት በረሃ ለበረሃ ተጓጉዞ አይደል እንዴ ያስገባው?
  • ስለዚህ ለእኔ ታክስ ይክፈለኛ?
  • ምን?
  • አንድ ሻንጣ ሞባይል!

[ለክቡር ሚኒስትሩ አንድ ደላላ ደወለላቸው]

  • ሰሙ አይደል ክቡር ሚኒስትር?
  • ምኑን?
  • ትራምፕ ያለውን ነዋ፡፡
  • ምን አለ?
  • ጦራችን ሶማሊያ ይገባል እያለ ነው፡፡
  • ታዲያ እኔ ምን አገባኝ?
  • ያገባዎታል እንጂ፡፡
  • እንዴት?
  • ይኼ እኮ የሚገርም የቢዝነስ ኦፖርቹኒቲ ነው፡፡
  • የምን የቢዝነስ ኦፖርቹኒቲ?
  • የአሜሪካ ጦር ሶማሊያ ከገባ እኛ ማቅረብ እንችላለን፡፡
  • ምን?
  • ምግብ ነዋ፡፡
  • ለማን?
  • ለአሜሪካ ጦር፡፡
  • አንተ እውነትም ጂኒየስ ነህ፡፡
  • ደላላ የሆንኩት እኮ ለዛ ነው፡፡
  • ታዲያ ምን እናድርግ?
  • በአስቸኳይ ላይሰንስ ማውጣት አለብን፡፡
  • የምን ላይሰንስ?
  • የኤክስፖርት፡፡
  • ምን ኤክስፖርት ለማድረግ?
  • በርገር!