ክቡር ሚንስተር

[ክቡር ሚኒስትሩ ወደ ሥራ ለመሄድ እየተዘገጃጁ ከባለቤታቸው ጋር እየተነጋገሩ ነው]

  • የተከበሩ ሚኒስትር በዓል እየተቃረበ እኮ ነው፡፡
  • ያው እንደተመለደው እናከብረዋለን፡፡
  • እንደተለመደው ምን ማለት ነው?
  • ፋሲካ አይደል?
  • እና?
  • ዶሮና በግ ይበቃናል፡፡
  • ይበቃናል?
  • ምነው?
  • የደላቸውማ በምን እንደሚያከብሩ ልንገርህ?
  • እሺ፡፡
  • የደላቸውማ ሙሉ የቤት ዕቃ ይለውጣሉ፡፡
  • እ. . .
  • አዲሱን ኤልጂ ቲቪ ያስገባሉ፡፡
  • እ. . .
  • ከጎልድ እስከ ብሉ ሌብል ድረስ በካርቶኖች ያስመጣሉ፡፡
  • ህም. . .
  • የዶሮውን ብዛት ትተህ ቢያንስ ሦስት የፍየል ሙክቶች ያርዳሉ፡፡
  • ሦስት የፍየል ሙክቶች?
  • አዎ!
  • ምን ሊያደርጉላቸው?
  • ወይ የእኛ ሞኝ?
  • አልገባኝም፡፡
  • አንዱ ፍየል ቁርጥ፣ ሁለተኛው ጥብስ፣ ሦስተኛው ደግሞ ወጥ ይሆናል፡፡
  • ይህንን ሁሉ ፍየል ማን ነው የሚበላው?
  • ዘመድ አዝማድና ወዳጆቻችን፡፡
  • እሺ ለዚህ ሁሉ ወጪው ከየት ይመጣል?
  • ወይ አንተ ሞኝ?
  • እንዴት?
  • ሌሎቹ ከየት እንደሚያመጡት አታውቅም?
  • ከየት ያመጡታል?
  • በስጦታ ይመጣላቸዋል፡፡
  • እኔ የሚሰጠኝ ከሌለስ?
  • ሥልጣንህን ተጠቀም፡፡
  • ምን ማለትሽ ነው?
  • ጓደኛህ ቤት እኮ ሄጄ ስንቱን ጉድ አየሁ?
  • ምን አየሽ?
  • አንድ የጭነት ተሽከርካሪ የማይበቃው የስጦታ ክምር ነዋ፡፡
  • እነ ማን ናቸው የሚሰጡት?
  • ተጠቅመው የሚጠቅሙ ልማታዊ ባለሀብቶች፡፡
  • ሥልጣኔን ለዚህ እንድጠቀም ነው የምትመክሪኝ?
  • ከዚያም በላይ ነው፡፡
  • ለምሳሌ?
  • በትንሹ የራሳችን የመኖሪያ ቪላ ከነመዋኛው፣ የምናከራያቸው ሕንፃዎች፣ የኮንስትራክሽን ማሽኖችና ተሽከርካሪዎች ያስፈልጉናል፡፡
  • እነዚህ ሁሉ ከየት ይገኛሉ?
  • ሌሎቹ ተሿሚዎች ከየት እንደሚያመጧቸው አታውቅም?
  • ከየት ያመጣሉ?
  • ሥልጣናቸውን በአግባቡ ተጠቅመውበት ነዋ፡፡
  • ይኼማ ሥልጣንን ያላግባብ መጠቀም ነው የሚባለው?
  • የአንተ ሞኝነት እያበሳጨኝ ነው፡፡
  • ቀዝቃዛ ውኃ ጠጪበት፡፡
  • ውኃ ከምጠጣ አንተን ጥፊ ባልስህ ይሻለኛል፡፡
  • ለምን ትናደጃለሽ?
  • ኑሮህና ሥልጣንህ አይመጣጠኑም፡፡
  • አንቺ ሴትዮ ምን አድርግ ነው የምትይኝ፡፡
  • ኑሮህ ሥልጣንህን እንዲመስል ተጠቀምበት፡፡
  • የምትይው ከእኔ መርህ ጋር አይሄድም፡፡
  • የአንተ አጉል የድርቅና መርህ ይቀየራል፡፡
  • በምንድነው የሚቀየረው?
  • በሰጥቶ መቀበል መርህ፡፡
  • ወይ ዕዳ?

[ክቡር ሚኒስትሩን ሾፌራቸው ወደ ቢሮአቸው እየወሰዳቸው ነው]

  • ምነው ዛሬ ሙዚቃ አልከፈትክም?
  • ክቡር ሚኒስትር ደብሮኛል፡፡
  • ለምን ደበረህ?
  • በዓሉ ቀዘቀዘብኝ፡፡
  • ያለህን አብቃቅተህ በዓሉን ማሳለፍ ትችላለህ፡፡
  • የድሮ ክቡር ሚኒስትር ሾፌር እኮ የነገረኝ ሌላ ነው፡፡
  • ምን አለህ?
  • በዓል ሲመጣ በሽበሽ ነው ነበር ያለኝ፡፡
  • የአሁኑ ምን የተለየ ነገር አለው?
  • ድርቅ ነው፡፡
  • የምን ድርቅ?
  • ሸጎጥ የሚያደርግ የለ፣ በግል የለ፣ ውስኪ የለ፣ ብቻ ምን አለፋዎት ደርቄያለሁ፡፡
  • ማን ነው ለሾፌር ይህንን ሁሉ የሚያደርገው?
  • ባለጉዳዮች ናቸዋ፡፡
  • የማን ባለጉዳዮች?
  • የክቡር ሚኒስትሩ፡፡
  • ምን ለማግኘት?
  • ለመጠቃቀም፡፡
  • በምን ምክንያት?
  • የሆነ ፕሮጀክት ይሰጣቸዋል በምትኩ ወረታውን ይከፍላሉ፡፡
  • ለማን?
  • ለክቡር ሚኒስትሩ፡፡
  • አንተ ምን ቤት ነህ ታዲያ?
  • የመረጃ ልውውጡ ከሾፌር እኮ ነው የሚጀምረው፡፡
  • እና ምን ይሁን ነው የምትለው?
  • ክቡር ሚኒስትር ለስለስ ይበሉ፡፡
  • ምን ማለት ነው?
  • ትንሽ ደረቅ ስለሚሉ ሰው ተቸግሯል፡፡
  • በእናንተ ቤት ኃላፊነትን መወጣት የሚተረጎመው እንዲህ ነው?
  • አይ ክቡር ሚኒስትር?
  • ምነው?
  • ዕድሜ ጠገቡን ተረት ረሱት መሰለኝ?
  • ምንድነው የሚባለው?
  • ‹‹ሲሾም ያልበላ ሲሻር ይቆጨዋል›› ነዋ፡፡
  • በአንተ ቤት ተርተህ ሞተሃል፡፡
  • እኔማ በበዓሉ ፈንጥዤ ብሞት ነበር ደስ የሚለኝ፡፡
  • ሆሆ. . .

[ክቡር ሚኒስትሩ ቢሮአቸው ሲገቡ ጸሐፊያቸው ተከትላቸው ገባች]

  • ክቡር ሚኒስትር የእንኳን አደረስዎት ፖስት ካርዶች ይቀበሉኝ፡፡
  • ማን ነው የላከልኝ፡፡
  • ከመንግሥታዊ መሥሪያ ቤቶችና ከኤምባሲዎች የተላኩ ናቸው፡፡
  • ጥሩ፡፡
  • በጣም ያሳዝናል፡፡
  • ምን ተፈጠረ?
  • የአንድ ክቡር ሚኒስትር ቢሮ የፖስት ካርድ መጋዘን በመሆኑ ነዋ፡፡
  • ምን?
  • የድሮ ክቡር ሚኒስትር የሚመጡላቸው የበዓል ስጦታዎች እኔ ነኝ ያለ አይሱዙ አይበቃቸውም ነበር፡፡
  • ማን ነገረሽ?
  • ጸሐፊያቸው፡፡
  • አመንሻት?
  • ምን ማመን ብቻ? ኑሮዋ እኮ ያስታውቃል፡፡
  • እንዴት?
  • እሷን ጸሐፊ ከማለት ሚኒስትር ማለት ይቀላል፡፡
  • የእውነት?
  • ለበዓል ከምታገኛቸው ስጦታዎች በተጨማሪ የራሷ ቤት፣ መኪና፣ ቡቲክና የሽቶ መሸጫዎች አሉዋት፡፡
  • ምን ሠርታ አገኘች?
  • የክቡር ሚኒስትሩ ቀኝ እጅ ነበረች፡፡
  • ይገርማል፡፡
  • እርስዎ ነዎት የሚገርሙት፡፡
  • ምኔ ነው የሚገርመው?
  • ወይ አይበሉ ወይ አያስበሉ፡፡
  • አንቺ ምን አልሽ?
  • ሁሉም ሰው የሚለውን ነው ያልኩት፡፡
  • እንዲህ በቀላሉ ሀብት ማፍራት ይቻላል እንዴ?
  • ሰው የሚነግርዎትን ቢሰሙ ይሻላል፡፡
  • ምንድነው የሚነገረኝ?
  • አዋጭ የሆኑ ምክረ ሐሳቦች፡፡
  • ምንድናቸው እነሱ?
  • መደራደርና ጥቅምን መተሳሰብ፡፡
  • ምን?
  • በድርድር ይሰጣሉ ጥቅምዎትንም ያገኛሉ፡፡
  • ከዚያስ?
  • ሁሉም በየደረጃው ተጠቃሚ ይሆናል፡፡
  • ይኼ ምን የሚሉት መርህ ነው?
  • የጋራ ተጠቃሚነት መርህ ይባላል፡፡
  • እቺን ይወዳል?

[ክቡር ሚኒስትሩ አማካሪያቸውን አስጠርተው እየተነጋገሩ ነው]

  •  ሪፖርቱን ጨረስክ?
  •  አዎን ክቡር ሚኒስትር፡፡
  •  ሁሉም ነገር ተሟልቷል?
  •  አልተሟላም ክቡር ሚኒስትር፡፡
  •  ለምን?
  •  ትንሽ ሙዴ ልክ አይደለም፡፡
  •  ምን ሆነሃል?
  •  በዓሉ ሲቃረብ ከፍቶኛል፡፡
  •  ለምን?
  •  የአሁኑ በዓል እንደጠበቅኩት አልሆነም፡፡
  •  ምንድነው የጠበቅከው?
  •  አለ አይደል. . .
  •  ምን?
  •  ያንን ፕሮጀክት ለሰዎቹ ብንሰጣቸው እኮ ደህና እንዘጋ ነበር፡፡
  •  ያለ ጨረታ?
  •  በድርድር፡፡
  •  ስማ ሕግ ጣስ ነው የምትለኝ?
  •  ድርድር ሕግ መጣስ ሆነ እንዴ?
  •  እንዴት ነው የምንደራደረው?
  •  ኮሚሽናችንን ይዘን ነዋ፡፡
  •  የምን ኮሚሽን?
  •  የተለመደ አሠራር ነው፡፡
  •  ኮሚሽን መቀበል?
  •  አዎ፡፡
  •  እንዴት እባክህ?
  •  የአገር አሠራር ነው እያልኩኝ ነው ክቡር ሚኒስትር፡፡
  •  ለምሳሌ?
  •  የቱን ነግሬ የቱን ልተው?
  •  ማለት?
  •  ኧረ ክቡር ሚኒስትር ነቃ ይበሉ?
  •  ምን ለመሆን?
  •  ይኼኔ እኮ በስጦታና በቼክ ተንበሽብሸን ነበር፡፡
  •  ምን አድርግ ነው የምትለኝ?
  •  በዓሉን እናድምቀው፡፡
  •  ከዚያስ?
  •  በአካባቢያችን ያሉት ሁሉ በደስታ ይጥለቅለቁ፡፡
  •  ደስታ የሚገኘው በዚህ መንገድ ነው?
  •  ክቡር ሚኒስትር እኔ ማዛጋት ሰልችቶኛል፡፡
  •  ምን ትሆን ታዲያ?
  •  ሪፖርቱን አዘግይተን ፕሮጀክቱን በአስቸኳይ እንስጥ ክቡር ሚኒስትር?
  •  ለማን?
  •  አሰፍስፈው ከሚጠበቁት መካከል የተሻለ ይዞ ለቀረበ ይሰጥ፡፡
  •  እንዲህ ነው የምታማክረኝ?
  •  የሚበጀው ይኼው ነው ክቡርነትዎ፡፡
  •  ባለቤቴ፣ ሾፌሬ፣ ጸሐፊዬና አማካሪዬ አንድ ዓይነት ነገር ነው የምታስቡት?
  •  በጭራሽ ክቡር ሚኒስትር፡፡
  •  ከቤት ጀምሮ አንድ ዓይነት ነገር ነው የምሰማው፡፡
  •  ሐሳቡ አንድ ቢሆንም አቅጣጫው የተለያየ ነው ክቡር ሚኒስትር፡፡
  •  እንዴት?
  •  እርስዎ እንደ እግዜአብሔር፣ ባለቤትዎ እንደ ቄሳር፣ እኛ ደግሞ እንደ ዜጋ የሚገባንን ነው መጠየቅ ያለብን ክቡር ሚኒስትር?
  •  ምን ማለት ነው?
  •   በጋራ ተጠቃሚነት ላይ ያተኮረ የሀብት ክፍፍል ለማለት ነው ክቡር ሚኒስትር፡፡
  •  እና የሚገኘውን ኮሚሽን ደልድለሃል ማለት ነው?
  •  የመደልደሉ ሥልጣን ባይኖረኝም አሥልቼዋለሁ ክቡር ሚኒስትር፡፡
  •  ሥሌትህ ምን ይላል?
  •  40/60 ክቡር ሚኒስትር፡፡
  •  ይኼ 40/60 እንዲህ መቀለጃ ይሁን፡፡
  •  የሁሉም ዓይን እዚያ ላይ ነው እኮ ያለው ክቡር ሚኒስትር፡፡
  •  የ40/60 ሥሌት ይገለጽልኝ እስቲ፡፡
  •  እኛ 40 በመቶውን ስንቧጨቅ እርስዎ ከነቤተሰብዎ 60 በመቶውን ክቡር ሚኒስትር፡፡
  •  እንዴት ነው እባክህ የተሠላው?
  •  በዓሉን ታሳቢ በማድረግ ነው ክቡር ሚኒስትር፡፡
  •  አሁን ይኼንን ሰው ቢሰማ ምን ይላል?
  •  ‹‹ጉድ አንድ ሰሞን ነው›› ሲባል አልሰሙም ክቡር ሚኒስትር?
  •  ወይ ጣጣ!