ወደ ህዳሴ ግድብ የሚሄዱ 12 ሰዎችን በመግደል የተከሰሱ እስከ ዕድሜ ልክ በጽኑ እስራት ተቀጡ

ታላቁ የኢትዮጵያ ህዳሴ ግድብን ለመጎብኘት ወደ ጉባ በሚያመሩ የሕዝብ ማመላለሻ ተሽከርካሪዎች ላይ ቦምብ በመወርወር የ12 ሰዎችን ሕይወት ማጥፋታቸው፣ የአካል ጉዳት ማድረሳቸውና ንብረት ማውደማቸው በሰነድና በሰው ማስረጃዎች የተረጋገጠባቸው አሥር ተከሳሾች፣ ከዘጠኝ ዓመት እስከ ዕድሜ ልክ ጽኑ እስራት እንዲቀጡ ውሳኔ ተሰጠ፡፡

የፌዴራል ጠቅላይ ዓቃቤ ሕግ የመሠረተውን ክስ ሲመረምር የከረመው የፌዴራል ከፍተኛ ፍርድ ቤት አራተኛ ወንጀል ችሎት በሰጠው የቅጣት ውሳኔ እንደገለጸው፣ ፍርደኞቹ ራሱን የቤኒሻንጉል ሕዝቦች ነፃ አውጭ ንቅናቄ በተባለው ቡድን ውስጥ አባል መሆናቸው ተረጋግጧል፡፡ በኤርትራ ሃሬና አካባቢ በሚገኝ ወታደራዊ ካምፕ ውስጥ የሚኖሩትን አብዱልዋሃብ መሃዲና አብዱራሃማን ናስርን ጨምሮ አሥሩም ተከሳሾች የቡድኑ አባል መሆናቸውንና በክሱ የተጠቀሰውን የወንጀል ድርጊት ስለመፈጸማቸው፣ ዓቃቤ ሕግ በሰውና በሰነድ ማስረጃ ማረጋገጥ መቻሉን ፍርድ ቤቱ በውሳኔው ገልጿል፡፡

ፍርደኞቹ ግን ማስተባበል አለመቻላቸውም በውሳኔው ተገልጿል፡፡ ፍርደኞቹ በኤርትራ ወታደራዊ ሥልጠና ከወሰዱ በኋላ ከ2006 ዓ.ም. ጀምሮ፣ ማንኛውም ተሽከርካሪ ወደ ህዳሴው ግድብ እንዳይሄድ ጥቃት ለማድረስ ሙሉ ትጥቅ በመታጠቅ፣ በሱዳን በኩል ወደ ቤኒሻንጉል ክልል መግባታቸውንም ዓቃቤ ሕግ በማስረጃ ማረጋገጥ መቻሉን ውሳኔው ያስረዳል፡፡

ፍርደኞቹ የቡድኑን ተልዕኮ ለማስፈጸም በመንቀሳቀስ ላይ እያሉ ጥቅምት 26 ቀን 2006 ዓ.ም. በሸርቆሌ ወረዳ ሼዲ ቀበሌ ለሕዝብ ትራንስፖርት በሚሰጥ ሚኒባስ ላይ ቦምብ ወርውረው፣ የዘጠኝ ሰዎችን ሕይወት ማጥፋታቸውም እንደተረጋገጠባቸው ፍርድ ቤቱ ገልጿል፡፡ በአራት ሰዎች ላይም ከባድ የአካል ጉዳት ማድረሳቸውንም አክሏል፡፡ ፍርደኞቹ ከወራት ቆይታ በኋላ ሚያዝያ 4 ቀን 2006 ዓ.ም. በቤኒሻንጉል ጉሙዝ ክልል ጉባ አካባቢ ዕጣን በማውጣት ላይ የነበሩ ሦስት ወጣቶችን ገድለው የሚጠቀሙበትን ተሽከርካሪም ማቃጠላቸውን ፍርድ ቤቱ ገልጿል፡፡

የፍርደኞቹ የወንጀል ድርጊት በዓቃቤ ሕግ በመረጋገጡ ሦስት ተከሳሾች በሌሉበት ጥፋተኛ በመባላቸው በዕድሜ ልክ ጽኑ እሥራት እንዲቀጡ ተወስኗል፡፡ ሦስት ተከሳሾች አንዳንድ የቅጣት ማቅለያ የተያዘላቸው በመሆኑ እያንዳንዳቸው በ21 ዓመታት ጽኑ እስራት እንዲቀጡ ሲወስን፣ ሦስት ተከሳሾች ደግሞ የወንጀል አፈጻጸማቸው መካከለኛ በመሆኑና አንዳንድ የቅጣት ማቅለያ ተይዞላቸው፣ እያንዳንዳቸው በ16 ዓመት ጽኑ እስራት እንዲቀጡ ውሳኔ ተሰጥቷል፡፡

የወንጀል አፈጻጸሙ ዝቅተኛ መሆኑ የተገለጸና ሁለት የቅጣት ማቅለያ የተያዘለት አንድ ፍርደኛ በዘጠኝ ዓመታት ጽኑ እስራት እንዲቀጣ ውሳኔ ተሰጥቷል፡፡ በሌሉበት የቅጣት ውሳኔ የተላለፈባቸውን ፍርደኞች የፌዴራል ፖሊስና የአዲስ አበባ ፖሊስ ኮሚሽን አፈላልገው በመያዝ ለማረሚያ ቤት እንዲያስረክቡ ትዕዛዝ ተሰጥቷል፡፡