ዋሊያዎቹ በዛምቢያ

 

በኬንያ ለሚስተናገደው የ2018 የአፍሪካ አገሮች የእግር ኳስ ሻምፒዮና (ቻን) የኢትዮጵያ ብሔራዊ ቡድን (ዋሊያዎቹ) የአቋም መለኪያ ጨዋታውን ከዛምቢያ ጋር ያደርጋል፡፡

ከሳምንታት በፊት ዝግጅቱን በአዳማ ከተማ ሲያከናውን የነበረው ብሔራዊ ቡድኑ ሐሙስ ሐምሌ 27 ቀን 2009 ዓ.ም. ለወዳጅነት ጨዋታው ሉሳካ ማምራቱ ተገልጿል፡፡ ዛምቢያን በሚገጥመው ብሔራዊ ቡድን አምስት የቅዱስ ጊዮርጊስ ተጫዋቾችን እንዳላካተተ ተጠቅሷል፡፡ ሁለት የቅዱስ ጊዮርጊስ ተጫዋቾች የውጭ አገር የሙከራ ቀጠሮ ስላላቸውና ሌሎቹም በግል ጉዳይ ምክንያት በዋሊያዎቹ ስብስብ ውስጥ አለመካተታቸው ተነግሯል፡፡

አሥር ቀናትን በሐዋሳና አንድ ሳምንትን በአዳማ ከተማ ልምምዱን ሲያከናውን የነበረው የኢትዮጵያ ብሔራዊ ቡድን፣ የቻን የሁለተኛ ዙር ማጣሪያ ጨዋታ ነሐሴ 7 ቀን በሐዋሳ ስታዲየም ከሱዳን አቻው ጋር ያደርጋል፡፡ የመልስ ግጥሚያውን ከሜዳው ውጪ ከ15 ቀናት በኋላ ያከናውናል፡፡

በሌላ በኩል የዋሊያዎቹ አሠልጣኝ አሸናፊ በቀለ ብሔራዊ ፌዴሬሽኑ አስፈላጊውን ድጋፍ እያደረገለት እንዳልሆነ ሲናገሩ ተደምጠዋል፡፡ በዚህም ከፌዴሬሽኑ የሚደረገው ጣልቃ ገብነት ለሥራቸው እንቅፋት እንደሆነባቸው እየተገለጸ ይገኛል፡፡

ምንም እንኳ ፌዴሬሽኑና አሠልጣኙ ሥራቸውን በአግባቡ እየሠሩና ጥሩ ግንኙነትም ከፌዴሬሽኑ ጋር እንዳላቸው ለሪፖርተር ቢገልጹም፣ አሠልጣኙ ከቻን ማጣሪያ ውድድር በኋላ በመስከረም ወር እንደሚለቁ መረጃዎች እየጠቆሙ ይገኛል፡፡