የሳምንቱ ገጠመኝ

የዶናልድ ጆን ትራምፕ የአሜሪካ ፕሬዚዳንታዊ ምርጫ አሸናፊነት ካስገረማቸው ሰዎች መካከል አንዱ መሆኔን ባልክድም፣ በዚህ ዓለም ላይ ሁሌም ድንገቴ (Surprise) መኖሩን ስለማውቅ ብዙም ግራ አልተጋባሁም፡፡ በአሜሪካኖቹ ምርጫ አሁን የገባኝ ነገር ቢኖር ትራምፕ ብቻ ሳይሆኑ አብዛኛው ሕዝብ የፖለቲካ ተቋማትና ፖለቲከኞች ፀር (Anti Establishment) መሆኑ ነው፡፡ ትራምፕን የመረጡ ሰዎች በተለያዩ ዓለም አቀፍ ሚዲያዎች ሲናገሩ እንደሰማሁት፣ ብዙዎቹ በአገሪቱ ፖለቲከኞች ተስፋዎችና አማላይ ንግግሮች ተሰላችተዋል፡፡ ይኼ መሰላቸት ደግሞ ትራምፕን የመሰሉ ነውጠኛና ጀብደኛ እንዲመረጡ በር ከፍቷል ማለት ነው፡፡

ትራምፕ በተደጋጋሚ የአሜሪካ የአስተዳደር ሥርዓትን ሲተቹ፣ ‹‹ደካማ፣ የተሰነካከለና ሙሰኛ …›› ማለታቸው አይዘነጋም፡፡ የአሜሪካ ሚዲያዎች ደካማ ጎናቸውን እየፈለጉ በተቻለ መጠን እንዳይመረጡ ቢረባረቡም፣ ሰውየው ግን በሕዝብ ድምፅ ተመራጩ ፕሬዚዳንት ሆነዋል፡፡ ትራምፕ የአሜሪካ ፖለቲከኞች በሹክሹክታ የሚያወሩትን በአደባባይ እንደፈለጉ ስለሚናገሩ በብዙዎች ቢጠሉም፣ ሕዝቡ ግን የልብ አውቃ ብሏቸዋል፡፡ ትራምፕ በነጭ ዘረኝነት መንፈስ ጥቁሮችን፣ ሙስሊሞችን፣ ላቲኖዎችንና የመሳሰሉትን በአደባባይ ሲያንቋሽሹ የነበሩና በብዙዎችም እንደ ወንበዴ ቢታዩም አሸናፊ ሆነዋል፡፡ ሴቶችን በመጎንተልና በማንጓጠጥ አስከፊ ድርጊቶቻቸው ቢጋለጡም የማታ ማታ ተመራጭ ሆነዋል፡፡ ይኼ በግልጽ የሚያሳየው ሕዝቡ በፖለቲከኞች ላይ ባደረበት ጥላቻ ምክንያት እሳቸው ምን ቢከፉ ይሻሉናል ማለቱን ነው፡፡

ከትራምፕ ማሸነፍ መረጋገጥ በኋላ እዚህ አገር ውስጥ በአብዛኛው ማለት ይቻላል ከመገረም ያለፈ ብስጭትም ተሰምቷል፡፡ አራት ኪሎ የንግድ መደብር ያለው ጓደኛዬ፣ ‹‹አሜሪካኖች የሥራቸውን ይስጣቸው፡፡ የግብረ ሶዶማውያንን ነፃነትና መብት በሕግ አውጀው ኃጢያት ውስጥ መግባታቸው አንሶ፣ አሁን ደግሞ ቀንድ የሌለው ሰይጣን ሾሙ፡፡ በመጽሐፉ ውስጥ የተጻፈው ትንቢት የሚፈጸመው በዚህ ሰይጣን አማካይነት ነው፡፡ የዓለም ፍፃሜ መጀመሪያ ውስጥ ገብተናል፤›› ሲል ነው ምሬቱን የነገረኝ፡፡ አራት ልጆቻቸው አሜሪካ የሚኖሩ ጎረቤቴ ደግሞ፣ ‹‹ከእንግዲህ አሜሪካ አበቃላት፡፡ ያቺን የመሰለች ትልቅ አገር መጥፋቷ ነው፡፡ ይኼ ወፈፌ ልጆቻችንን አንድ በአንድ እየለቀመ እነዚያ ሳዑዲ ዓረቢያዎች እንዳደረጉት ቦሌ አየር ማረፊያ ያራግፍልናል፡፡ ይኼ ክፉ መንፈስ የተጠናወተው ዕብድ ያለ ነገር አይደለም የተመረጠው …›› እያሉ ሲብሰከሰኩ ነበር፡፡ ብዙዎች ተመሳሳይ ሐሳብ ነው ያንፀባረቁት፡፡

የዕለት ኑሮውን ጫማ በመጥረግ የሚገፋው ደንበኛዬ ግን ከሰዎቹ የተለየ ሐሳብ ነው ያለው፡፡ ‹‹እኔ እኮ የእኛ ሕዝብ ይገርመኛል፡፡ ነፍስ ካወቅኩ ጀምሮ ለአሜሪካ ፕሬዚዳንት ሆነው የሚመረጡ ሰዎች የተናገሩትን ሲፈጽሙ አይቼ አላውቅም፡፡ ኦባማ ራሱ ብዙ አውርቶ ስንቱን ተግባራዊ አደረገ? ትራምፕ ማለት ጥሩምባ ነው፡፡ የማያውቅበት ፖለቲካ ውስጥ ዘሎ ገብቶ ዕድል ቀንቶታል፡፡ ይኼ ጡረታ መውጣት የሚገባው ሰው የተናገረውን ለመፈጸም አይደለም ትናንት የተናገረውን ዛሬ አያስታውሰውም፡፡ አሜሪካኖቹ ብልጥ አይደሉ? ሲያስቸግራቸው የሆነ ነገር ያደርጉትና ወይ በጊዜ ይሸኙታል ካልሆነም እስከ ዕለተ ሞቱ አልጋ ያስይዙታል፡፡ ለእኔ የሚታየኝ ይኼ ነው፤›› ሲለኝ በጣም አስገረመኝ፡፡

አሜሪካ ውስጥ ካለፈው ረቡዕ ምሽት ጀምሮ በ25 ከተሞች ፀረ ትራምፕ ተቃውሞዎች ተቀስቅሰዋል፡፡ አደባባይ በመውጣት ሺዎች የአሜሪካን ሰንደቅ ዓላማና የትራምፕን ምሥሎች አቃጥለዋል፡፡ መንገዶችን ዘግተዋል፡፡ መደብሮችን ሰባብረዋል፡፡ ሒላሪ ክሊንተንን ለሥልጣን ለማብቃት ሌት ተቀን የለፉ ደም አንብተዋል፡፡ የአሜሪካን አስተዳደራዊ ሲስተምና ነባሩን ፖለቲካዊ አካሄድ አልፈልግም ያለው ሕዝብ ለትራምፕ ኃላፊነቱን ሰጥቷል፡፡ ከአፍሪካ እስከ እስያ፣ ከአውሮፓ እስከ ላቲን አሜሪካና አውስትራሊያ ድረስ የተደበላለቁ ስሜቶች ተሰምተዋል፡፡ እንግዲህ ዴሞክራሲ ብዙኃን አናሳዎችን የሚያሸንፉበት ስለሆነ ሒላሪ እንዳሉት ውጤቱን ከእነ ሕመሙ በፀጋ መቀበል ነው፡፡ በእርግጥ ከዚህ በፊት እነ አዶልፍ ሒትለርንና ቤኒቶ ሙሶሎኒን የመሳሰሉ አደገኛ ሰዎች ሥልጣን ላይ የወጡት በጉልበት ሳይሆን በምርጫ መሆኑን መዘንጋት አይገባም፡፡ ዋናው ቁም ነገር ሕዝብ መረጥኩ ካለ እንግዲህ ምን ይደረጋል? መቀበል ነው እንጂ፡፡

በበኩሌ የአሜሪካ ምርጫ ያን ያህል ስሜት ሰጥቶኝ ሳይሆን፣ ከውጤቱ በኋላ የታዘብኳቸው ነገሮች ናቸው ይኼንን ያጻፉኝ፡፡ በቀደም ዕለት የሲኤንኤን ድረ ገጽ ላይ ያነበብኩት ደግሞ የበለጠ መነሻ ሆኖኛል፡፡ ትራምፕን ለመቃወም ከወጡና ቃለ መጠይቅ ከተደረገላቸው በርካታ ሰዎች መካከል የ18 ዓመቷ ብሩክሊን ዋይት የያዘችው መፈክር ‹‹ጥላቻ ማሸነፍ የለበትም›› ይላል፡፡ ስለዚህ ጉዳይ ስትናገር፣ ‹‹ይኼ ሰውዬ (ትራምፕ) በጥላቻ የተሞላ ነው፡፡ በርካታ ወዳጆቻችንና የቤተሰብ አባሎቻችንን ከዚህ አገር ያባርራል የሚል ሥጋት አለኝ፡፡ በዚህ የጥላቻ መንፈስ ውስጥ ሆኖ የአሜሪካ ፕሬዚዳንት እንዲሆን ከተመረጠ አደጋ ነው፡፡ እሱ ፕሬዚዳንት ይሁን ግዴለም፡፡ ግን ሰው የማያዳምጥ እንዴት አገር ይመራል? እሺ ተመረጠ ይባል፡፡ ግን ሰዎችን ያዳምጥ፡፡ ይህንን የማያደርግ ከሆነ ግን ተቃውሞአችንን የሚያስቆም አይኖርም…›› ብላለች፡፡ አሜሪካ በትራምፕ ደጋፊዎችና ተቃዋሚዎች ምክንያት ከመቼውም ጊዜ የተከፋፈለች ትመስላለች፡፡ ይኼንን ለመጠገን ደግሞ ብዙ ጊዜ ይፈጃል፡፡ በበኩሌ እንደ ጥላቻና እንደ አለመደማመጥ አገር የሚያጠፋ ችግር ያለ አይመስለኝም፡፡ እናንተስ?

(ክብሩ ዓለማየሁ፣ ከብሥራተ ገብርኤል)