የአዲስ አበባ ከተማ መሥሪያ ቤቶች የግዥ ሕግጋትን በአብዛኛው እንደሚጥሱ ተገለጸ

 

በአዲስ አበባ ከተማ አስተዳደር መሥሪያ ቤቶች በአብዛኛዎቹ የመንግሥት ግዥ አዋጅን፣ ደንቦችና መመርያዎችን እንደማያከብሩ ተገለጸ፡፡

የአዲስ አበባ ከተማ አስተዳደር ዋና ኦዲተር የ2009 ዓ.ም. የሁለተኛው ግማሽ ዓመት ሪፖርት እንደሚያመለክተው፣ ብዛት ባላቸው መሥሪያ ቤቶች የሒሳብ ግድፈት ተስተውሏል፡፡

በተለይም በወጪ አጠቃቀም የመንግሥት የግዥ አዋጅ፣ ደንቦችና መመርያዎችን አለማክበር፣ ተቋማት የተመደበላቸውን በጀት በአግባቡ አለመጠቀም፣ የንብረት አስተዳደርና አጠቃቀም ቁጥጥር ሥርዓቱን አለማጠናከር፣ የተሰበሰቡ ተከፋይ ሒሳቦች በወቅቱ አለማወራረድ፣ የኦዲት ተደራጊ ተቋማት ለኦዲት አስተያየቶችና ሪፖርቶች የማስተካከያ ዕርምጃ በአፋጣኝ አለመውሰድ ተጠቃሽ ዋና ዋና ችግሮች ሆነው ቀርበዋል፡፡

የአዲስ አበባ ከተማ አስተደደር ዋና ኦዲተር ወ/ሮ ጽጌወይን ካሳ ለከተማው ምክር ቤት እንደገለጹት የፋይናንስ አስተዳደር ሕግ፣ ደንብና መመርያ በሚፈቅደው መሠረት በትክክል ሥራ ላይ መዋሉን ለማረጋገጥ በ2009 በጀት ዓመት በሁለተኛ ግማሽ ዓመት በተደረገው የኦዲት ሥራ፣ የሒሳብ አያያዝ ግድፈቶችና የውስጥ ቁጥጥር ድክመቶች፣ እንዲሁም አፈጻጸማቸው ከደንብና ከመመርያ ውጪ ሆነው የተገኙ መሥሪያ ቤቶች አሉ፡፡

ዋና ኦዲተሯ ምክር ቤቱ አጽንኦት ሊሰጣቸው ይገባል ካሏቸው መካከል የስምንት መሥሪያ ቤቶች በወቅቱ ያልተወራረደ የተሰብሳቢ ሒሳብ 589,573,583.10 ብር፣ የ17 መሥሪያ ቤቶች በወቅቱ ያልተወራረደ ተከፋይ ሒሳብ 203,470,178.10 ብር፣ ዘጠኝ መሥሪያ ቤቶች ለማን እንደሚከፈል የማይታወቅ የተከፈይ ሒሳብ 257,399,502.40 ብር፣ 15 መሥሪያ ቤቶች የግዥ አዋጅ፣ ደንብና መመርያ ሳይከተል የተፈጸመ ግዥ 154,842,854.06 ብር፣ ዘጠኝ መሥሪያ ቤቶች ከደንብና ከመመርያ ውጪ የተከፈለ አበልና ደመወዝ 353,708.15 ብር፣ የአራዳ ክፍለ ከተማ ፐብሊክ ሰርቪስና የሰው ሀብት ልማት ጽሕፈት ቤት 46 ሠራተኞች ሥልጠናው የማይመለከታቸው ሆኖ እያለ፣ ሥልጠናው ላይ እንደተገኙ ተደርጎ የተከፈለ አበል 57,422.00 ብር እና 20 ተቋማት ደግሞ የንብረት ኦዲት ማድረግ ያልተቻለባቸው  ሆነው ተመዝግበዋል፡፡

አንድ የአዲስ አበባ ምክር ቤት አባል ‹‹የኦዲት ሪፖርት ማድመጥ ብቻ ሳይሆን፣ አስተማሪ ዕርምጃ ሊወሰድ ይገባል፤›› በማለት አስተያየት ሰጥተዋል፡፡

ወ/ሮ ጽጌወይን እንደተናገሩት፣ በአጠቃላይ ኦዲት ተደርገው የኦዲት ግኝት የተገኘባቸው ተቋማት የተጠያቂነት ሥርዓት እንዲኖር ማድረግ ትኩረት ሊሰጠው የሚገባ ጉዳይ ነው፡፡

ኦዲት ተደርገው ምላሽ ያልሰጡና ዕርምጃም ያልወሰዱ ተቋማት በርካታ መሆናቸው ተጠቁማል፡፡ ከ2003 እስከ 2008 በጀት ዓመት ድረስ ኦዲት ተደርገው ምላሽ ያልሰጡና የእርምት ዕርምጃ ያልወሰዱ 105 ተቋማት እንደሆኑ ተጠቅሷል፡፡

ወ/ሮ ጽጌወይን እንደገለጹት፣ ሰኔ 1 ቀን 2005 ዓ.ም አፈ ጉባዔ ታቦር ገብረመድኅን (ዶ/ር) እና ምክትል ከንቲባ አባተ ስጦታው የመሩት መድረክ ተካሂዶ ነበር፡፡

‹‹በዚህ ወቅት ተቋማቱ የእርምት ዕርምጃ ወስደው ምላሽ የሚሰጡበት መርሐ ግብር ተዘርግቷል፡፡ በተቀመጠው የጊዜ ገደብ ምላሽ እንዲሰጡ ደብዳቤም ተጽፏል፤›› ብለዋል፡፡ ወ/ሮ ጽጌወይን ጨምረውም ጉዳዩ የሚመለከታቸው ተቆጣጣሪ አካላት ተቋማቱ ዕርምጃ እንዲወስዱ የሚያርጉትን ድጋፍ እንዲቀጥሉበት ጠይቀዋል፡፡