አዲሱን ድረ ገጽ ይሞክሩ!
አዲሱን ድረ ገጽ ይሞክሩ!

የኢትዮጵያ ዳያስፖራ ማኅበር የቦርድ አባላቱን መረጠ

የኢትዮጵያ ዳያስፖራ ማኅበር ላለፉት አምስት ዓመታት የመሩትን የቦርድ አባላት ምርጫ በማካሄድ ሙሉ ለሙሉ በአዲስ ተካ፡፡

እስከ 250 የሚደርሱ የማኅበሩ አባላት በተገኙበት መጋቢት 30 ቀን 2009 ዓ.ም. በተካሄደው ምርጫም፣ አቶ ዘለቀ ገሠሠ፣ አቶ ማሂር እስማኤል፣ መምህር ያሲን ራጅ፣ ወ/ት ሳሪቱ ሱሌማን፣  ዮሐንስ ገብረሥላሴ (ዶ/ር)፣ ወ/ሮ አብነት መኩሪያና አቶ እድሪስ አህመድ የቦርድ አባላት ሆነው ተመርጠዋል፡፡ ወ/ሮ ቅድስት አምሃና ወ/ሮ ኤፍራታ ለማ ደግሞ ተጠባባቂ የቦርድ አባል ሆነዋል፡፡

ምርጫውን ተከትሎ የተለያዩ የማኅበሩ አባላትና የቀድሞ የቦርድ አባላት፣ ምርጫው የሚካሄድበት ቀን መረጃ የደረሳቸው ከሦስት ቀናት በፊት መሆኑን በመግለጽ ቅሬታ አቅርበው ነበር፡፡ ሆኖም የኢትዮጵያ ዳያስፖራ ማኅበር ዋና ዳይሬክተር አቶ አብርሃም ሥዩም እንደሚሉት፣ ማኅበሩ ባለው የአባላት መረጃ መሠረት ለሁሉም አባላት መረጃው እንዲደርስ በኢትዮ ቴሌኮም በኩል ከ15 ቀናት በፊት ሦስት ጊዜ ተልኳል፡፡ ከዚህ በተጨማሪም በኢሜይል አድራሻ ሁለቴ፣ እንዲሁም በቢሮ ስልክ ስልካቸውን ማንሳት ለቻሉና አድራሻ ላልቀየሩ እንደተደወለ አክለዋል፡፡

ዳያስፖራው በአገር ውስጥ ሳይኖር ቀርቶ ወይም አድራሻ ቀይሮ ለማኅበሩ ባለማሳወቁ ካልሆነ በስተቀር፣ አባላት ለማኅበሩ በሰጡት አድራሻ መሠረት የምርጫውን ቀን እንዲያውቁ ተደርጓልም ብለዋል፡፡

ለትንሣኤ በዓል ብዙ ዳያስፖራዎች ኢትዮጵያ ይገባሉ ብሎ በመገመት የቦርድ አባላት ምርጫው ከበዓሉ አንድ ሳምንት ቀድሞ እንዲከናወን የተወሰነውም የማኅበሩ አባላት በምርጫው ተሳታፊ እንዲሆኑ ለማድረግ ታስቦ መሆኑንም ጠቅሰዋል፡፡

የማኅበሩ አባላት በሚደረጉ እንቅስቃሴዎች ሁሉ ተሳታፊ እንዲሆኑ እንደሚፈለግ ሆኖም ምርጫ ሲባል ብዙዎች እንደማይገኙ የተናገሩት ዋና ዳይሬክተሩ፣ ከዳያስፖራው የአኗኗር ባህሪ አንፃር ግን 250 የሚደርሱ አባላት ለምርጫ መገኘታቸው ትልቅ ቁጥር እንደሆነ ገልጸዋል፡፡

በዕለቱ በተሻሻለው የማኅበሩ መተዳደሪያ ደንብ ላይ ለመወያየት ታቅዶ የነበረ ቢሆንም ሳይሳካ ቀርቷል፡፡ እንደ አቶ አብርሃም፣ ብዙዎቹ አባላት መተዳደሪያ ደንቡን በግልጽ ለማወቅ ዕድል አልነበራቸውም፡፡ በዕለቱም መተዳደሪያ ደንቡ እንደመነሻ ሐሳብ ቢቀርብም፣ ከማፀደቅ ጋር ተያይዞ ከስምምነት ሳይደረስ ቀርቷል፡፡

በተሻሻለው የማኅበሩ መተዳደሪያ ደንብ ላይ አዲስ የተመረጠው ቦርድ ከባለሙያና ከበጎ አድራጎት ድርጀቶችና ማኅበራት ኤጀንሲ ጋር በመወያየት ለማኅበሩ አባላት እንዲያቀርብና በጉባኤ እንዲያፀድቅ ተወስኗል፡፡