አዲሱን ድረ ገጽ ይሞክሩ!
አዲሱን ድረ ገጽ ይሞክሩ!

የኦሮሚያ ክልል የጅማ አባ ቡና ጥያቄ ፍትሕ እንዲያገኝ መጠየቁ ተሰማ

  • አገራዊው የውድድር አወቃቀር እንዲጠና እየተጠየቀ ነው

 በውድድር ዓመቱ ከፕሪሚየር ሊግ ወደ ከፍተኛው ሊግ መውረዳቸው ከተነገረላቸው ሦስቱ ክለቦች አንዱ የሆነው የጅማ አባ ቡና እግር ኳስ ክለብ የወረደው ተገቢ ባልሆነ መንገድ መሆኑን በመጥቀስ ፍትሕ እንዲሰጠው ለኢትዮጵያ እግር ኳስ ፌዴሬሽን ደብዳቤ አስገብቷል፡፡ የኦሮሚያ ወጣቶችና ስፖርት ቢሮም ጅማ አባ ቡና ያቀረበው የፍትሕ ጥያቄ ተገቢው ምላሽ እንዲያገኝ ለፌዴሬሽኑ ተመሳሳይ ጥያቄ ማቅረቡም ታውቋል፡፡ የኢትዮጵያ እግር ኳስ ፌዴሬሽን ዋና ጸሐፊ አቶ ወንድምኩን አላዩ ጥያቄው መቅረቡን አረጋግጠዋል፡፡

በየውድድር ዓመቱ በተለያየ የተሳታፊ ቁጥር ሁለት አሠርታትን የደፈነው የኢትዮጵያ ፕሪሚየር ሊግ፣ ለየእግር ኳስ ዕድገት በተለይም ከቅርብ ዓመታት ወዲህ ምንም የፈየደው ነገር እንደሌለ እየተነገረ ይገኛል፡፡ ይባስ ብሎ የዘንድሮው መርሐ ግብር የተጠናቀቀው ከመቼውም ጊዜ በባሰ ከእግር ኳሳዊ ባህሪው ባፈነገጠ መልኩ ለመሆኑ የተለያዩ ማሳያዎች እየቀረቡበት ይገኛል፡፡

ከነዚህ ማሳያዎች መካከል በሊጉ ከአንድ ዓመት ቆይታ በኋላ ወደ ከፍተኛው ሊግ መውረዱ የተነገረለት የጅማ አባ ቡና ክለብና የኦሮሚያ ክልል ወጣቶችና ስፖርት ቢሮ ለብሔራዊ ፌዴሬሽኑ ያቀረቧቸው የፍትሕ ጥያቄዎች ተጠቃሽ ናቸው፡፡ በከፍተኛውም ሆነ በብሔራዊ ሊጉ ተመሳሳይ አቤቱታዎችና እሮሮዎች ለፌዴሬሽኑ እየቀረቡ መሆኑ ታውቋል፡፡    

ለጅማ አባ ቡናም ሆነ ለኦሮሚያ ክልል ወጣቶችና ስፖርት ቢሮ የፍትሕ ጥያቄ መነሻው በሊጉ 30ኛው ሳምንት መርሐ ግብር በሐዋሳ የሐዋሳ ከተማና የኢትዮጵያ ኤሌክትሪክ  ክለቦች መካከል የተመዘገበው የጨዋታ ውጤት መሆኑ ሪፖርተር ቀደም ሲል መዘገቡ ይታወሳል፡፡

ብሔራዊ ፌዴሬሽኑ ጉዳዩን ‹‹እየተከታተልኩ ነው›› ከሚለው ውጪ እስካሁን ምንም ያለው ነገር የለም፡፡ የፌዴሬሽኑ ዋና ጸሐፊ አቶ ወንድምኩን አላዩ አሁንም ቅሬታው መቅረቡን ካልሆነ ውሳኔውን አስመልክቶ ዝምታን መርጠዋል፡፡

በዚህ ጉዳይ ማንነታቸውን ከመግለጽ የተቆጠቡ የሪፖርተር ምንጮች እንደሚናገሩት ከሆነ፣ ለእግር ኳስ ፌዴሬሽኑ እየቀረቡ ያሉ የፍትሕ ጥያቄዎች ተገቢ ምላሽ የማያገኙ ከሆነ አንዳንድ ክልሎች ቡድኖቻቸውን ብሔራዊ ፌዴሬሽኑ ከሚያስተዳድራቸው የሊግ አወቃቀሮች እንደሚያስወጡ ማስጠንቀቂያ መስጠት ጀምረዋል፡፡  

በሌላ በኩል አሁን ያለው የሊግ አወቃቀር ከተጀመረ ጀምሮ ከእግር ኳሱ ዕድገት ይልቅ ለአገሪቱ ሀብት ብክነት ምክንያት እየሆነ ስለመሆኑም የሚናገሩ አሉ፡፡ እነዚህ አስተያየት ሰጪዎች በዚህ የሊግ አወቃቀር ክለቦች ከዓለም አቀፍ እግር ኳስ ማኅበር (ፊፋ) የጉዞ ደንብና መመርያ ውጪ ቡድኖቹ ከፍተኛ ወጪ እንዲያወጡ እያደረጋቸው ይገኛል፡፡ ይኼ አሠራር ደግሞ ከወጪው ባሻገር ተጨዋቾች ላይ በሚያደርሰው ድካምና እንግልት ምክንያት ሜዳ ውስጥ ተገቢው እንቅስቃሴ እንዳይታይ ምክንያት እየሆነ ስለመሆኑም ይከራከራሉ፡፡ በመሆኑም የሚሉት እነዚሁ አስተያየት ሰጪዎች፣ የሚመለከታቸው አካላት እግር ኳሱ እንዲለወጥ ፍላጎት ካላቸው የሊግ አወቃቀሩ ላይ ጥናትና ውይይት ተደርጎበት ቢቻል ለ2010 የውድድር ዓመት ማሻሻያ እንዲደረግበት ይጠይቃሉ፡፡ ጥናቱ እውን ሆኖ ተግባር ላይ የሚውል ከሆነ ደግሞ በተለይም በአሁኑ ወቅት እያቆጠቆጠ ለሚገኘው የ‹‹ወንዜነት›› አመለካከትም መፍትሔ እንደሚሆን ጭምር ይመክራሉ፡፡