የጋቦኑ የአፍሪካ ዋንጫ መክፈቻ

በጋቦን አስተናጋጅነት ከጥር 6 ቀን 2009 ጀምሮ እየተካሄደ ያለው 31ኛው የአፍሪካ እግር ኳስ ዋንጫን ለማስተናገድ አገሪቱ 700 ሚሊዮን ዩሮ ማውጣቷ ይነገራል፡፡ ከጊኒ ቢሳዎ ጋር የመጀመሪያውን ጨዋታ አድርጋ አቻ ከመለያየቷ በፊት በተከናወነው የመክፈቻ ሥነ በዓል የቀረቡት ትርዒቶች የብዙዎችን ቀልብ ገዝተዋል፡፡ ከነሱም የአየር ላይ የአክሮባት ትርዒት ዳንኪራ እንደሚገኙባቸው ናጂ ዶት ኮም በድረ ገጹ ዘግቧል፡፡  

* * *

ትንጎራደዳለች ውበት ተጎናጽፋ

ትንጎራደዳለች ውበት ተጎናጽፋ

እንደ ሌላ አገሮች ሌቱ ደመና አልባ

ጨለማውም ይሁን ብርሃኑም የላቀ ከዋክብት የሞላ፤

የተወሃሃዱት ዓይኗን ገጽታዋ

እንደዚህ ስትፈካ በለስላሳው ብርሃን

እግዜር የነፈገው ለጠራራው ቀን።

ቅንጣት ጥላም ትሁን፤ ብታንስ አንዲት ጮራ፤

ግማሽ ያጎድለዋል ያን ስም የለሽ ፀጋ

የተጎነጎነው በጥቁር ጎፈሬ ሹሩባዋ ዞማ፤

ወይ ለስላሳው ብርሃን ፊቷ ላይ ያበራ -

የመሰከሩበት ሐሳቦች የጣሙ በጥሞና እርጋታ

ውብም ነው ተወዳጅ ያረፉበት ቦታ።

በዚያች ጉንጭና ቅንድብ ሽፋሽፍት፤

ለስላሳም፤ የረጋ፤ ሆኖም የተሟላ ርቱዕ አንደበት፤

ፈገግታዋ ኃያል፤ ቀለሟ የጋለ፤

ደግሞም የሚያሳብቅ በምሥራች ቀናት በደስታ የዋለ፤

ሰላማዊው መንፈስ፤ ከዚያም በታች ያልፋል፤

የልቧ ፍቅርም በቅንነት ሞልቷል።

  • ከጆርጅ ጎርደን ባይረን/ነፃ ትርጉም በዳዊት ዘኪሮስ

* * *

የሰመመን እግር ኳስ

በእግር ኳስ ፍቅር ልባቸው የተቃጠለው አንድሩና ስቲቭ መንግሥተ ሰማያት የእግር ኳስ ውድድር ስለመኖሩ ዕድል አብዝተው ይወያዩ ነበር፡፡ የእግር ኳስ ውድድር መንግሥተ ሰማያት ውስጥ ካልተካሄደ መንግሥተ ሰማያትን ገነት ለማለት የማይቻል በመሆኑ ቢተማመኑም ስፖርቱ ለመኖሩ እርግጠኛ ስላልነበሩ ከሁለቱ ቀድሞ የሞተ ፈጥኖ በመመለስ በመንግሥተ ሰማያት የእግር ኳስ ውድድር መኖር አለመኖሩን ለጓደኛው እንዲያሳውቅ ተስማሙ፡፡ ብዙም ሳይቆዩ አንድሩን አውቶቡስ ገጭቶ ገደለው፡፡

በሞተ በማግስቱ ስቲቭ ተኝቶ ሳለ አንድሩን በሰመመን የስፖርት ትጥቅ እንዳጠለቀ አየው፡፡ የእግር ኳስ መጫወቻ ታኬታ ጫማ ማድረጉንም ወዲያውኑ ተገነዘበ፡፡ ‹‹አሃ! የእግር ኳስ ጨዋታ አለ ማለት ነዋ!›› ብሎም አልጋው ጫፍ ላይ ተቀመጠ፡፡

‹‹አዎን፤ ሆኖም ቀድሜ ጥሩውን ዜና ልንገርህ ወይስ መጥፎውን?›› በማለት መንፈሱ ጠየቀው፡፡

‹‹ኧረ ጥሩውን አስቀድምልኝ፤›› አለ ስቲቭ ፈጥኖ፡፡

‹‹እንግዲያው፣ እኛ ዘንድ ድንቅ የሆነ የእግር ኳስ ሜዳና ምርጥ ተጫዋቾች አሉ፡፡ መላዕክቱም የእግር ኳስ ውድድር ማየት በጣም ይወዳሉ፤›› በማለት አብራራለት፡፡

‹‹ድንቅ ዜና ነው ያሰማኸኝ፡፡ መጥፎው ዜና ታዲያ ምኑ ነው?››

‹‹መጥፎው ዜናማ የማስታወቂያ መለጠፊያው ሠሌዳ ላይ ለእሑድ ውድድር ከሚሰለፉት ተጫዋቾች ዝርዝር ውስጥ ስምህን ማየቴ ነው፡፡››

  • አረፈዓይኔ ሐጐስ ‹‹የስኮትላንዳውያን ቀልዶች›› (2005)

* * *

ሰዎች ወጣት የሚያደርጋቸውን መርፌ እየተወጉ ነው

ወጣትነት ከምንም በላይ ትልቅ ስጦታ ነው፡፡ በአሜሪካ አንድ ክሊኒክ ከወጣቶች የተወሰደ ፕላዝማ በዕድሜ ለገፉ በመስጠት በግኝቱ ላይ ተጨማሪ ማረጋገጫ እየሠራ እንደሚገኝ ሜትሮ ዘግቧል፡፡ ይህ ሒደት አምቦሮሲያ የሚሰኝ ሲሆን አንድ በዕድሜው የገፋ ሰው 1.5 ሊትር የወጣት ፕላዝማ ለማግኘት ስምንት ሺሕ ዶላር መክፈል ይኖርበታል፡፡ ፕላዝማው ከ16 እስከ 25 ዓመት የዕድሜ ክልል ውስጥ ከሚገኝ ወጣት የተወሰደ ይሆናል፡፡ ይህን ሕክምና ተግባራዊ እያደረገ የሚገኘው የሕክምና ባለሙያ ጆሲ ካርማዚን እንደሚለው በፊት የተደረጉ ሙከራዎች በበርካታ ሰዎች ላይ እንደተመለከተው የወጣት ደም የተሰጣቸው በዕድሜ የገፉ ሰዎች ሲነቃቁና ደሙ ኃይል ሆኗቸዋል፡፡

* * *

8 ኢንች ርዝመት ያለው ቢላ የዋጠችው ውሻ ተረፈች

እንደ ዕድል ሆኖ መጀመሪያ ስለቱ ሳይሆን የቢላው እጀታ በመሆኑ ቀድሞ ወደ አካሏ የዘለቀው ውሻዋ በተአምር መትረፏን ስካይ ኒውስ ዘግቧል፡፡ እጀታው የውሻዋን ሆድቃና አንጀት ሲያልፍ ስለቱ ግን እንዳላለፈ በኤክስ ሬይ ታይቷል፡፡ ለውሻዋ ወዲያው ድንገተኛ ቀዶ ሕክምና ተደርጎላት በተሳካ ሕክምና ልትተርፍ ችላለች፡፡