አዲሱን ድረ ገጽ ይሞክሩ!
አዲሱን ድረ ገጽ ይሞክሩ!

ይወስዳል. . . ያመጣል

 

በኦሞ ሸለቆ ውስ|ጥ የሚገኘውና በኮንሶ ኮረብታዎችና ዕርከኖች መካከል የሚያልፈው ጠመዝማዛው ዐውራ ጎዳና!

ፎቶ በኤሪክ ላፎርጉ

***

‹‹እኛም አለን ሙዚቃ…››

የባህል ሙዚቀኞች በሰሜን ኢትዮጵያ በእምቢልታና በማሲንቆ

ስም አልባው ጥላ ቢሱ አገር ወዳድ

ይህች የኔ አገር ነች፣ የተወለድኩባት፤

ይህን የማይል ሰው ነፍሱ የሞተበት በቁሙ ሙውት፤

ከቶ ይገኝ ይሆን የዚህ ሰው ዓይነት? እውን?

ልቡ በናፍቆት ነዶ ያልከሰለ፣ ከተሰደደበት ባይተዋርነት፤

ባዕድ ጠረፍ ለቆ ሲያስታውስ አገሩን ኮቴውም ሲያመራ ሲያስብ ወዳገሩ፣

አለ ብላችሁ ነው ያልተጨነቀላት የዚህ ዓይነት ኩሩ?

እንዲህ ያለ ካለም፣ ብሉ ደህና አርጋችሁ ታዘቡት አደራ፤

እሱን የሚያሞግስ አዝማሪም አይኖርም የሚይሽሞነሙነው ለሱ የሚራራ፤

ሹመቱም ቢበዛ፣ ዝናውም ቢያኮራው ፉከራው ቢንጣጣ፤

ያሰኘውን ያህል ሃብቱም ገደብ ቢያጣ፤

መጠሪያው ሹመቱ በዝቶ ቢትረፈረፍ፤

ገንዘቡም ቢበዛ በኃይሉም ቢመካ በትምክህት ቢንሳፈፍ፤

ይህ ስንኩል ወራዳ ራስ ወዳድ ፍጡር፤ በቁመናው ሳለ፤

ዝናውን ያጣታል እጥፍ ሞት ሲሞትም፣ ወዲያው ይወርዳታል

ወደ እርኩሲቷ አፈር ወደመነጨባት ወዳዋረዳት፤

ያኔ ይወርዳታል ግብአተ መሬቱን፡፡

  • በሰር ዋልተር ስኮት፣ ስድ ትርጉም በዳዊት ዘኪሮስ

****

 

የስዎን እሺ የምጭንበት

ቢትወደድ ኃይለ ጊዮርጊስ ለባለጉዳዮች አቤቱታ በቶሎ ምላሽ አይሰጡም ነበር፡፡ በሌላ በኩል ለጠየቃቸው ሁሉ ‹‹እሺ›› እንጂ ‹‹አይሆንም›› የሚል ምላሽ አይሰጡም፡፡ በአንድ ወቅት አንድ ኢትዮጵያዊ ዜግነት የነበረው ግሪካዊ ለቤት መሥሪያ የሚሆን 200 ካሬ ሜትር ቦታ በፒያሳ አካባቢ እንዲሰጠው ንጉሡን አስፈቀዶ ቢትወደድ ዘንድ ይሄዳል፡፡

ቢትወደድ ኃይለ ጊዮርጊስም እንደተለመደው እሺ እያሉ ሳይፈጽሙለት ሦስት ዓመታት አለፉ፡፡ አንድ ቀን ታዲያ ግሪካዊው ቢትወደድ ዘንድ ይሄድና ‹‹30 አህያ፣ 20 አጋሰስና 10 ግመል የምገዛበት ገንዘብ ያበድሩኝ›› ሲል ይጠይቃቸዋል፡፡ በሁኔታው የተገረመው ቢትወደድም ‹‹ይህ ሁሉ የጭነት ከብት ምን ልታደርግበት ነው?›› ሲሉ ጠየቁት፤ እርሱም ‹‹ዝም ብለው ያበድሩኝ እንጂ አልነግረዎትም›› ይላቸዋል፡፡

 ‹‹እንግዲያውስ ለምን እንደፈለከው ካልነገርከኝ እኔም አላበድርህም›› ሲሉት ‹‹የሰዎን እሺ የምጭንበት›› አላቸው ይባላል፡፡ በዚህን ጊዜ በነገሩ ስቀው የጠየቀውን የገንዘብ ብድር ሳይሆን ለቤት መሥሪያ የሚሆነውን ቦታ ሰጡት፤ ንጉሡም ይህንን ሰምተው ኖሮ ቢትወደድን አስጠርተው ‹‹በሰው ስታላግጥ ነገረልን›› አሉዋቸው ይባላል፡፡

  • (ካሕሣይ ገብረእግዚአብሔር)
  •  

እንዲመስል አድርጐ የማስረዳት ጥበብ

ሰውዬው ጀብደኛነቱን ሲገልጥ ‘‘ጥንቸልዋ ስትሮጥ የኋላና የፊት እግርዋን ጆሮዋን ጭምር በአንድ ጥይት አቦነንኩት፤’’ አለ፡፡ ጓደኛው ግን ‘‘ኧረ እንደሚመስል አድርገህ አውራ! የኋላና የፊት እግርን ከጆሮ ጋር ምን አገናኝቷቸው ነው ይህን ሁሉ የአካል ክፍል በአንዲት ጥይት መምታት የምትችል?’’ አለው፡፡ ተኳሹም ሲመልስ ‘‘በኋላ እግሮችዋ ጆሮዋን ስታክ ነው፤’’ ብሎ ነበር፡፡ ግን ‹‹አንዱ የኋላ እግርስ እሺ ተመታ እንበል፣ የፊት እግሮቿስ ከጆሮ ግንድ ጋር አብረው እንዴት ተመቱ? ስለዚህ ‘‘ነብር ሳይገድሉ ቆዳውን ለመሸጥ ያስማማሉ፤ እንደሚባለው ነው፡፡ ፈጽሞ አንተ አልተኮስህም፣ ጥንቸሏም አልሞተችም’’ አለው፡፡

* * *

ዛሬ በልተናል ለነገም ክምር አይተናል

አንድ አባት ዝንጀሮ ‘‘እኔ ከዚህ ሁሉ የዝንጀሮ መንጋ ጋር አብሬ ስንጋጋ በወንጭፍ ድንጋይ ዓይኖቼን ማጣት አልፈልግም፤’’ ብሎ ለብቻ መሰማራት ጀመረ፡፡ ነገር ግን ጾሙን ወደ ዋሻው ገብቶ ተቀመጠ፡፡ እናት ዝንጀሮ ደግሞ ከመንጋው ሳትለይ በተሰማራችበት ቦታ ሁሉ ጥሩ ዕድል አጋጥሟት ታላቅ ክምር ስትዘነጥል ውላ ተመለሰች፡፡ አባት ዝንጀሮን ‘‘እንዴት ዋልክ! ስተለው ዝም አላት፡፡ ‘‘ምነው ምን ሆነሃል? ደህና አይደለህም ወይ?’’ ብትለው መልስ መስጠት አልቻለም፡፡ ልጆቹም ‘ሰላም’ ሲሉት ዝም አለ፡፡ እናት ዝንጀሮ ትንሽ ቡጫሊት የሆነች ልጅዋን እጭኗ ላይ አድርጋ ስታስጨፍር ‘‘በሞኝ ክምር ዝንጀሮ ልጅዋን ትድር ‘እንዲሉ ዛሬም በልተናል ለነገም ክምር አይተናል’’ ስትል ሰምቶ አባት ዝንጀሮ ነቃ አለና ‘‘የት ነው እባክሽ?’’ አለ ይባላል፡፡ ታዲያ ይህ የራስ ወዳድነት ጸባይ ግን በአባት ዝንጀሮ ተመካኘ እንጂ የሰውን ራስ ወዳድነት ባህርይ አጉልቶ የሚያሳይ ነው፡፡ 

መጋቤ አዕላፍ መክብብ አጥናው ‹‹ሁለገብ የአእምሮ ማዝናኛ›› (2005)

  •  

የዓለም ሙዚቃ ቀን በባሕር ዳር

የዓለም ሙዚቃ ቀን በዓለም ለ35ኛ ጊዜ በኢትዮጵያ ለአምስተኛ ጊዜ ተከብሯል፡፡ የዘንድሮው በዓል በባሕር ዳር ከተማ ሐምሌ 1 እና 2 ቀን 2009 ዓ.ም. በልዩ ልዩ ዝግጅቶች ሲከበር የሙሉዓለም የባህል ማዕከል የሙዚቃ ጓድ ትርዒቶቹን አቅርቧል፡፡ በውይይት መድረኩ ላይ ኪነጥበባዊ ዝግጅቶች ባሕር ዳርን የበለጠ ለማስተዋወቅ እንደሚረዱ ያመለከቱት የባሕር ዳር ከተማ የመንግሥት ኮሙዩኒኬሽን ጉዳዮች ኃላፊ አቶ በሰላም ይመኑ፣ ‹‹ቤተ ተውኔት ለመሥራት ጥያቄ ላቀረቡ አካላት ፈቃድ በመስጠት የከተማው ሕዝብ በኪነ ጥበብ ተጠቃሚ የሚሆንበትን መንገድ አመቻችተናል፤›› በማለት አስረድተዋል፡፡ በአልባብ ቴአትርና የሙዚቃ ፕሮሞሽን አማካይነት የዓለም ሙዚቃ ቀን ማክበር የተጀመረው በ2004 ዓ.ም. በአዲስ አበባ ሲሆን፣ ሁለተኛውን ሐዋሳ፣ ሦስተኛውን በድጋሚ አዲስ አበባ፣ አራተኛውን የመቐለ ከተማ ማዘጋጀታቸው ታውቋል፡፡ (በዳዊት ቶሎሳ)

***