አዲሱን ድረ ገጽ ይሞክሩ!
አዲሱን ድረ ገጽ ይሞክሩ!

ደስታ በዳንኪራ

የግልገል ጊቤ ቁጥር ሦስት ሃይድሮ ኤሌክትሪክ ኃይል ማመንጫ ግድብና የኃይል ማስተላለፊያ መስመር ታኅሣሥ 9 ቀን 2009 ዓ.ም. ሲመረቅ ከነበሩት ዝግጅቶች አንዱ የባህል ትርዒት ነበር፡፡ (ፎቶ በናሆም ተስፋዬ)

    *************************

ወዳጆቼ አስቡበት

ትንፋሽ ሳጣ ልቤ ትርታው ተቋርጦ

ፈገግታዬ ሲደበዝዝ ግርማ ጥላዬ ተሟጥጦ

አትጠራጠሩ በእውነት ሙቻለሁ

ተለይቻለሁ! ሄጃለሁ! አልፌ አለሁ!

 

ቀብሬ እዚያው

እንዲሆን ነፍሴ ሥጋዬን ትታ

ከንፋ አድማስ ከዘለቀችበት

ኑዛዜዬን እተዋለሁ ወዳጆቼ አስቡበት፡፡

ንጉሤ ጎሳዬ ‹‹ቅጠሎች ነን›› ሞስኮ (1991)

                           *********************

ያስቸገሩት የ86 ዓመቷ ዘራፊ

በወጣትነታቸው ዝርፊያ የጀመሩት ዶሪስ ፓየን ዛሬም በ86 ዓመታቸው አስቸጋሪ የጌጣጌጥ ሌባ መሆናቸው እንዳነጋገረ ስካይ ኒውስ ዘግቧል፡፡ አዛውንቷ በዘራፊነት ታሪካቸው ሁለት ሚሊዮን ፓውንድ ዋጋ የሚያወጡ ጌጣጌጦችን እንደሰረቁ ተገልጿል፡፡ አሁን በ86 ዓመታቸው የተያዙት ደግሞ የሁለት ሺሕ ዶላር የአንገት ጌጥ ሲሰርቁ ነው፡፡ በስርቆት ታሪካቸው ጉድ ያሰኙት ዶሪስ እ.ኤ.አ 2013 ላይ አስገራሚ የዝርፊያ ሕይወታቸውን የሚያትት ዘጋቢ ፊልምም ተሠርቶላቸው ነበር፡፡ ይህ ደግሞ ይበልጥ ታዋቂ አድርጓቸዋል፡፡

ዓመታትን በእሥር ያሳለፉት ዶሪስ በዘጋቢ ፊልሙ የሚጸጽታቸው ነገር ምን እንደሆነ ተጠይቀው ሲመልሱ ‹‹በዘራፊነት ሕይወቴ የሚጸጽተኝ አንድ ነገር ብቻ ነው፡፡ እሱም መያዜ›› ብለዋል፡፡ የ690 ዶላር የጆሮ ጌጥ እንዲሁም የ33,000 ዶላር የጋብቻ ቀለበት አዛውንቷ በቅርብ ከሰረቋቸው መካከል ናቸው፡፡

                        ****************

ድመት በመፍራት ለፖሊስ የተደረገ ጥሪ

የለንደን ፖሊስ ሥራ በሚበዛበት በፈረንጆች ገና ወቅት ድመት ረዥም ርቀት እየተከተለኝ ነው በማለት ከአንዲት ሴት የተደረገውን ጥሪ እስካሁን ካስተናገዳቸው ሁሉ ትርጉም አልባው የይድረሱልኝ ጥሪ እንደሆነ አስታወቀ፡፡ የሜትሮ ዘገባ እንደሚያመለከትው፣ የለንደን ፖሊስ የአደጋ ጊዜ ስልክ 999 ላይ ተመሳሳይ ትርጉም አልባ የይድረሱልኝ ጥሪዎች በብዛት እንደሚደረጉና ሰዎች ከዚህ ድርጊታቸው ይታቀቡ ዘንድ ይህ መማሪያ እንዲሆን እንደሚፈልግ አስታውቋል፡፡ የአደጋ ጊዜ መስመሩን ለዋዛ ፈዛዛ ከሚያጨናንቁት በተጨማሪ መረጃ ፈልገው የሚደውሉም የዛኑ ያህል እንደሆኑ ተገልጿል፡፡ ይህ ሕንፃ፣ መናፈሻ ወይም መንገድ የት ነው ብለው የሚደውሉ ጥቂት አይደሉም፡፡

                        *************************

ሙሉ በሙሉ የታይታኒክ አምሳያ የሆነ መርከብ በቻይና ሊሠራ ነው

ግዝፈቱን ጨምሮ ሙሉ በሙሉ ታይታኒክን የሚመስለውና በቻይና የሚሠራው መርከብ የቱሪስቶች መስህብ ይሆን ዘንድ ታይታኒክ መርከብ ያጋጠመውን የመስመጥና ከበረዶ ግግር ጋር የመጋጨትን ነገር በምስለ መስመጥና ግጭት (ሲሙሌሽን) ቱሪስቶች እንዲያሳልፉት እንደሚያደርግም የስካይ ኒውስ ዘገባ ያሳያል፡፡ የመርከቡ ሥራ መጀመሩን ያመለከተው ዘገባው ሥራውን የያዘው ሰቨን ስታር ኢነርጂ ኢንቨስትመንት ቡድን በመጪው የፈረንጆች ዓመት መጨረሻ ላይ እንደሚጠናቀቅ ማሳወቁን ጠቁሟል፡፡

                  ****************

‹‹ለምን?››

‹‹ለምን?››ና ሌሎችም እውነተኛ ታሪኮችን የያዘው መጽሐፍ በእስክንድር መርሐፅድቅ ተፅፎ ለገበያ ቀርቧል፡፡ 140 ገፅ ያለው መጽሐፉ እሑድ ታኅሳስ 16 ቀን 2009 ዓ.ም. በቅርስ ጥናትና ጥበቃ ባለሥልጣን አዳራሽ ከ2፡30 ጀምሮ የሚመረቅ ሲሆን፣ በ40 ብር እየተሸጠ ነው፡፡