ፋና ወጊዋ የቦስተን ማራቶን ሯጯ

ከ50 ዓመታት በፊት የ20 ዓመቷ ካትሪን ስዊዘር ታሪክ ሠራች፡፡ በቦስተን ማራቶን ተወዳዳረች፡፡ 261 ቁጥር መለያን የያዘ ሙሉ ቱታ ለብሳ ለሴቶች ክፍት ባልሆነው ውድድር በአቋሟ ፀንታ ሮጠች፡፡

ዘመኑ 1959 ዓ.ም. ነበር፡፡ በይፋ ባይገለጽም ማራቶን የወንዶች ውድድር ብቻ ነበር፡፡ ውድድሩ እየተካሄደ ሳለ አዘጋጆቹ እርሷን ከውድድሩ ለማስወጣት ኃይል እስከመጠቀም ደረሱ፡፡ ቢያንገላቷትም አልተሳካላቸውም በ4 ሰዓት ከ20 ደቂቃ ሩጫዋን ፈጸመች፡፡

የስዊዘር ጥረትና ትጋት ግን ለታላቅ ለውጥ በር ከፈተ፡፡ በ1964 ዓ.ም. የቦስተን ማራቶን ውድድርን ለሴቶች ክፍት መሆኑን ይፋ አደረገ፡፡ የሴቶች ማራቶን የኦሊምፒክ ስፖርት ሆኖም ከአራት ዓመታት በኋላ በ1976 ዓ.ም. በሎስ አንጀለስ ላይ ተጀመረ፡፡ ዘጆርናል እንደዘገበው፣ ዘንድሮ 70ኛ ዓመቷ ላይ ሆና ከ32 ሺሕ ሯጮች ገሚሶቹ ሴቶች በሆኑበት የቀድሞውን 261 ቁጥር ለብሳ አብራ ስትሮጥ፣ በ4 ሰዓት ከ44 ደቂቃ ከ21 ሰከንድም ሩጫዋን ፈጸመች፡፡

እንተሳሰብ

ኑሮ እሽት! አ’ርጎን ቢከሳ ገላችን

ቢሳሳ ቢታጠፍ ቢዝል ጉልበታችን፤

ላንተ ቀን አድልቶ ገበያው ቢደራ

እንዴት ይጠፋሃል መኖር ከ‘ኛ ጋራ?

ጭነኽ አሸክመኽ መንገድ ስትነዳ

አንደኛ ያለውን ምስኪን እንዳትጎዳ፤

ህይወት ዘዋራ ነው እግር ካገናኘን

አፍኽን ሞቅ አርገኽ እስኪ ጎድን በለን፡፡

መላኩ ደምለው ‹‹ብልጭታ›› (2008)

*******

ቤኔዲክትዮስ 16ኛ ዘጠናኛ ዓመታቸውን በባቫሪያን ባህል አከበሩ

የሮም ልሂቅ ፖፕ (ፖፕ ኢመረተስ) ቤኒዲክትዮስ 16ኛ፣ ዘጠናኛ ዓመታቸውን ባለፈው ሰኞ በቫቲካን በሚገኘው መኖሪያ ቤታቸው አክብረዋል፡፡

ቫቲካን ሬዲዮ እንደዘገበው፣ በፀሓያማው የሮማ ቀን ጃምቦ ቢራን ሲጎነጩ ባህላዊውን የባቫሪያን ሙዚቃም ከተወለዱባት የጀርመኗ ባቫሪያ ግዛት ሊጎበኟቸው ከመጡ አገሬዎች ጋር አጣጥመዋል፡፡ የግዟቷ ጠቅላይ ሚኒስትርን ጨምሮ ወንድማቸው ሞንሲኝየር (ሊቀ ካህናት) ጆርጅ ራት ዚንግርም በድግሱ ተገኝተዋል፡፡ ልሂቅ ፖፕ የተወለዱት ሚያዝያ 8 ቀን 1919 ዓ.ም. በደቡባዊ ጀርመን ሲሆን፣ የዘንድሮው በዓላቸው ከማዕዶት (የፋሲካ ሰኞ) ጋር ገጥሞላቸዋል፡፡ ቤኔዲክትዮስ በ2005 ዓ.ም. በገዛ ፈቃዳቸው ከሮም ፖፕነታቸው መነሣታቸው ይታወሳል፡፡

*******