አዲሱን ድረ ገጽ ይሞክሩ!
አዲሱን ድረ ገጽ ይሞክሩ!

​ክቡር ሚኒስትር

[ክቡር ሚኒስትሩ ቤታቸው ሲገቡ ባለቤታቸው ቲቪ እየተመለከቱ አገኙዋቸው]

  • ሰላም ውዴ፡፡
  • እንዴት ዋልሽ?
  • ታንኪው፡፡
  • ለምኑ?
  • ለቲቪው፡፡
  • ከየት ነው የመጣው?
  • እንደዚህ ዓይነት ጨዋታ ደስ አይለኝም፡፡
  • የምን ጨዋታ ነው?
  • የፈረንጆቹ ጨዋታ ነዋ፡፡
  • ምንድን ነው የምትቀባጥሪው?
  • ሰርፕራይዝ ለማድረግ ፈልገህ ነው?
  • የምን ሰርፕራይዝ ነው?
  • ቲቪውን ነዋ፡፡
  • እኮ ከየት ነው የመጣው?
  • እሱንማ አንተ ንገረኝ፡፡
  • እ…
  • እኔ አልላኩትም ለማለት ፈልገህ ነው?
  • ለመሆኑ ቲቪውን አውቀሽዋል?
  • ምን እያልክ ነው?
  • በየትኛው አቅሜ ነው እንደዚህ ዓይነት ቲቪ ልገዛ የምችለው?
  • የሚገዛልህ አይጠፋማ፡፡
  • እንደዚህ ዓይነት ነገር ውስጥ እንደማልገባ ታውቂያለሽ፡፡
  • ምን እያልከኝ ነው?
  • ቲቪው እኮ በጣም ዘመናዊ ነው፡፡
  • እኔም በጣም ወድጄዋለሁ፡፡
  • ከ500 ሺሕ ብር በላይ ነው፡፡
  • በጣም ይገርማል፡፡
  • እና ማን ነው ያመጣው?
  • እኔ አላውቅም፡፡
  • ቤት ማን አመጣው ታዲያ?
  • ወዳጆችህ!

[ክቡር ሚኒስትሩ ጸሐፊያቸው ጋ ደወሉ]

  • አቤት ክቡር ሚኒስትር፡፡
  • ይቅርታ ከመሸ ደወልኩልሽ፡፡
  • ችግር የለውም፡፡
  • ዛሬ ቤት ምን ልከሽልኛል?
  • ቅድም አስቤዛ ልኬያለሁ፡፡
  • እኮ ምንድን ነው የላክሽው?
  • ስኳር፡፡
  • እሺ፡፡
  • ዘይት፡፡
  • ሌላስ?
  • ሥጋ ያላኩልዎት ፆም ነው ብዬ ነው፡፡
  • ቲቪ አላክሽም?
  • ኧረ አላኩም፡፡
  • ማን ነው የላከው ታዲያ?
  • ተጀመረ ማለት ነው፡፡
  • ምኑ?
  • ስጦታ መሰጣጣቱ፡፡
  • የምን ስጦታ ነው?
  • በቃ ክቡር ሚኒስትር ሊያስገቡዎት እኮ ነው፡፡
  • የት ነው የሚያስገቡኝ?
  • መስመሩ ውስጥ፡፡
  • የምን መስመር?
  • የጥቅሙ ነዋ፡፡
  • እ…
  • ቲቪ ተልኮልዎት…
  • እ...
  • መሬት እንዳይቀበሉዎት!

[ክቡር ሚኒስትሩ በጣም ተናደው የቀድሞው ጓደኛቸው ጋ ደወሉ]

  • ሰላም ክቡር ሚኒስትር፡፡
  • ሰላም ወዳጄ፡፡
  • ከየት ተገኙ ዛሬ ክቡር ሚኒስትር?
  • እስቲ ክቡር ሚኒስትር የሚለውን ተወው፡፡
  • እሱማ ፕሮቶኮል ነው፡፡
  • የት ነው ያለኸው?
  • እዛ ድሮ የምናመሽበት ግሮሰሪ ነኝ፡፡
  • መጣሁ ጠብቀኝ፡፡
  • እንዴ ክቡር ሚኒስትር?
  • ምነው?
  • በጣም ብዙ ሰው አለ እኮ?
  • መኪና ውስጥ እንሆናለን፡፡
  • እሺ እጠብቅዎታለሁ፡፡

[ክቡር ሚኒስትሩ ከጓደኛቸው ጋር መኪና ውስጥ አንድ ሁለት ማለት ጀመሩ]

  • ሥራ እንዴት ነው ክቡር ሚኒስትር?
  • በጣም ያስቸግራል፡፡
  • ማለት ክቡር ሚኒስትር?
  • ሁሉም ሌባ ብቻ ነው፡፡
  • ለዚያ አይደል እንዴ የተሾሙት፡፡
  • አሁን ግን አልቻልኩም፡፡
  • ምን እያሉ ነው?
  • በቃ ሁሉም በሙስና ነው የሚንቀሳቀሰው፡፡
  • መቼም አልገቡበትም?
  • እ…
  • ሙስና ውስጥ አልገቡም አይደል?
  • እኔማ መግባት አልፈልግም፡፡ ግን…
  • ግን ምን?
  • በግድ እየገፋፉኝ ነው፡፡
  • በፍፁም እንዳይገቡ፡፡
  • ምን ላድርግ?
  • ምን ሆነው ነው?
  • አንድ ነገር እንድታማክረኝ ነው፡፡
  • እኮ ምን?
  • የማላውቀው ሰው ስጦታ ላከልኝ፡፡
  • ምን ዓይነት ስጦታ?
  • ከ500 ሺሕ ብር በላይ የሚያወጣ ቲቪ፡፡
  • እ…
  • ምን ላድርግ?
  • እንዳይቀበሉት፡፡
  • ምን ላድርገው?
  • ለእኔ ይስጡኝ!

[ክቡር ሚኒስትሩ ግሮሰሪ ወጥተው ሲያሽከረክሩ ትራፊክ ያዛቸው]

  • እስቲ መንጃ ፈቃድ?
  • ይኸው፡፡
  • ይኼ እኮ መታወቂያ ነው፡፡
  • ምን ፈልገህ ነው?
  • መንጃ ፈቃድ፡፡
  • ዋናው መንዳት መቻሌ ነው፡፡
  • ጭራሽ ጠጥተዋል?
  • ምነው ቀናህ?
  • እ…
  • ጋብዘኝ እኮ አላልኩህም፡፡
  • ጠጥቶ ማሽከርከር አይቻልም እኮ፡፡
  • ማን ነው ያለው?
  • ሕጉ፡፡
  • የትኛው ሕግ?
  • እሺ ጌታዬ እርስዎም መኪናውም ይታሰራሉ፡፡
  • ምን?
  • ሞተሩን ያጥፉት፡፡
  • ሕይወትህን እንዳላጠፋው፡፡
  • ሰውዬ ወደ ጣቢያ እንሂድ፡፡
  • ማን እንደሆንኩ አውቀሃል?
  • ማን ነዎት?
  • ክቡር ሚኒስትር!

[ክቡር ሚኒስትሩ አረፋፍደው ቢሮ ሲገቡ አማካሪያቸውን አገኙት]

  • ምነው አረፈዱ?
  • ትናንት ትንሽ ቀማምሼ ነው፡፡
  • ምን ተገኘ?
  • አንዳንዴ ጠጣ ጠጣ ይልሃል አይደል?
  • ከዚህ ሲሄዱ ሰላም ነበሩ እኮ፡፡
  • ቤት ስገባ ተናድጄ ነው፡፡
  • ከሚስትዎ ተጣሉ?
  • ኧረ አንድ ነገር አጋጥሞኝ ነው፡፡
  • ትራፊክ ይዞዎት እንደነበር ሰምቻለሁ፡፡
  • ምን?
  • ምነው ደነገጡ?
  • እንዴት አወቅክ?
  • መረጃ ሁሌም ይደርሰናል፡፡
  • ሁሉም ሰው ሰምቷል?
  • መስማት ያለበት ሰምቷል፡፡
  • ተዋርጃለኋ?
  • በምን ተናደው ነው የጠጡት?
  • አንዱ ቲቪ ልኮልኝ ነዋ፡፡
  • ታዲያ ይኼ ምን ያናድዳል?
  • እ…
  • እንዲያውም በጣም ያስደስታል፡፡
  • ምን አልክ?
  • ገና ይቀጥላል ክቡር ሚኒስትር፡፡
  • ምኑ?
  • ቪ8ቱ…
  • እ…
  • ፎቅ…
  • እ…
  • ኧረ ስንቱ?
  • ምንድን ነው የሚሻለኝ?
  • ቶሎ መግባት ነዋ፡፡
  • የት?
  • ኔትወርኩ ውስጥ፡፡
  • ወይ ጣጣ፡፡
  • ሚኒስትር መሆንዎን ትራፊኩ ሲያውቅ እንዴት እንደተሸማቀቀ አይተዋል አይደል?
  • ቀላል ተሸማቀቀ፡፡
  • ስለዚህ በደንብ ይጠቀሙበት፡፡
  • ምኑን?
  • ሥልጣንዎትን፡፡
  • እ…
  • የያዙት ሥልጣን ትርፉ ይኼ ነው፡፡
  • ምንድን ነው ትርፉ?
  • ስጦታ!

[ክቡር ሚኒስትሩ ከሌላ ሙሰኛ ሚኒስትር ጋር እያወሩ ነው]

  • ራስ ምታቱ ለቀቀዎት ክቡር ሚኒስትር?
  • የምን ራስ ምታት?
  • ትናንት ቀማምሰው ተይዘው ነበር አይደል እንዴ?
  • እ…
  • ምነው ደነገጡ?
  • አንተም ሰምተሃል?
  • ወሬ መቼ ይደበቃል ብለው ነው?
  • ስማ የፈለኩህ ለአንድ ጉዳይ ነው፡፡
  • ለምን ጉዳይ ክቡር ሚኒስትር?
  • በርካታ ነጋዴዎች በጣም ተማረዋል፡፡
  • ምን ሆነው?
  • በገበያ ውስጥ መወዳደር አቃተን እያሉ ነው፡፡
  • ታዲያ ነፃ ገበያ እኮ ነው፡፡
  • የኮንትሮባንድ ንግድ አስቸገረን እያሉ ነው፡፡
  • ምን እናድርግላቸው?
  • እነሱ እኮ ታክስ እየከፈሉ ነው የሚነግዱት፡፡
  • ታዲያ በነፃ ገበያ መርህ መወዳደር ነዋ፡፡
  • መወዳደር አቅቷቸው ከገበያ እየወጡ ነው እያልኩህ?
  • እኔ እኮ ይኼ አይመለከተኝም፡፡
  • እንዴት አይመለከትህም?
  • ሌላ የግል ሥራ፣ የመንግሥትም ሥራ አለብኝ፡፡
  • በጣም ያሳዝናል፡፡
  • ክቡር ሚኒስትር በግሌ እኮ የምሠራው ገበያው ውስጥ ያለውን ችግር ለመቅረፍ ነው፡፡
  • እ…
  • ስለዚህ እርስዎም ቢያግዙን ጥሩ ነው፡፡
  • አንተም የኮንትሮባንድ ንግድ ውስጥ አለህበት ማለት ነው?
  • ክቡር ሚኒስትር…
  • እዚህ ንግድ ውስጥ ያሉት በርካቶች የመንግሥት ሰዎች መሆናቸውን ነግረውኛል፡፡
  • መሄድ አለብኝ ክቡር ሚኒስትር፡፡
  • በነገራችን ላይ የሚያምር ሰዓት አድርገሃል፡፡
  • ዋጋውም ቀላል አይደለም፡፡
  • ምን ያህል ነው?
  • 20 ሺሕ፡፡
  • 20 ሺሕ ብር?
  • ዩሮ!