አዲሱን ድረ ገጽ ይሞክሩ!
አዲሱን ድረ ገጽ ይሞክሩ!

‹‹ሕጉ ሲከበር የኢትዮጵያ ሙዚቃ በጣም ጥሩ ይሆናል›› ሙዚቀኛ ኤልያስ መልካ

ሙዚቃ አቀናባሪ፣ የግጥምና ዜማ ደራሲ ኤልያስ መልካ ተወልዶ ያደገው አዲስ አበባ ነው፡፡ ሙዚቃ የጀመረው በለጋ ዕድሜው ቤተክርስቲያን ውስጥ ነው፡፡ ያሬድ ሙዚቃ ትምህርት ቤት ቼሎ፣ ፒያኖና ክራር የተማረ ሲሆን፣ በመዲና፣ አፍሮ ሳውንድ፣ ዜማ ላስታስና ሌሎችም ባንዶች ከሠራ በኋላ፣ በራሱ ስቱዲዮ (በገና ስቱዲዮ)  ወደ መሥራት ተሸጋገረ፡፡ ከአንጋፋዎቹ ድምፃውያን መሐሙድ አህመድ፣ ዓለማየሁ እሸቴና አስቴር አወቀ አንስቶ በበርካታ ሙዚቀኞች አልበም ተወዳጅነትን አትርፏል፡፡ በዘመናዊ የኢትዮጵያ ሙዚቃ ስመ ጥር ከሆኑ ሙዚቀኞች አንዱ ኤልያስ፣ ከሠራቸው አልበሞች የቴዎድሮስ ካሳሁን (ቴዲ አፍሮ)፣ እዮብ መኮንን፣ ዘሪቱ ከበደ፣ ሚካያ በኃይሉ፣ ሚካኤል በላይነህ፣ አብነት አጎናፍርና ኃይለሚካኤል ጌትነት (ኃይሌ ሩትስ) ይጠቀሳሉ፡፡ በቅርቡ በገበያ ከዋሉት የጌቴ አንለይ፣ ቤሪ፣ ዳን አድማሱና ዘለቀ ገሠሠ አልበሞችም ይገኙበታል፡፡ እሱ፣ ኃይሌ ሩትስ፣ ዮሐንስ በቀለ (ጆኒ ራጋ) እና ሌሎች ባለሙያዎች በጥምረት በሚሠሩበት አውታር መልቲሚዲያ ከኢትዮ ቴሌኮም ጋር አዲስ የሙዚቃ ገበያ መገበያያ ሥርዓት አስተዋወቀ፡፡ ይህ በኮፒ ራይት መብት ጥሰት ሳቢያ የተመሰቃቀለውን የሙዚቃ ይለውጣል የሚል ተስፋም ተጥሎበታል፡፡ ስለ መገበያያ ሥርዓቱ እንዲሁም የሙዚቃ ሥራዎቹ ምሕረተሥላሴ መኰንን ኤልያስ መልካን አነጋግራዋለች፡፡

ሪፖርተር፡- አውታር መልቲሚዲያ በሞባይል ገንዘብ (ኤርታይም) የሙዚቃ አልበም በ15 ብርና ነጠላ ዜማ በ4.50 መግዛት የሚያስችል የመገበያያ ሥርዓት በቅርቡ አስተዋውቋል፡፡ የሶፍትዌሩ ዝግጅት እንዴት ተወጠነ?

ኤልያስ፡- ከዚህ በፊት የሙዚቃ ሲዲ በየሱፐርማርኬቱ እንደማንኛውም ሸቀጥ እንዲሸጥ ለማድረግ አስበን ነበር፡፡ ኦዲዮ ቪዥዋል ከሚባለው ማኅበር ነፃ ለመውጣት ነበር፡፡ ሙዚቀኛ ከነሱ ጋር ካልተስማማ አልበም ማውጣት አይቻልም፡፡ ያን ለማስተካከል እንደ ውኃ ወይም ብስኩት ሲዲ በየሱፐርማርኬቱ እንዲሸጥ ከሰባት ዓመት በፊት ጥናት ጀመርን፡፡ የሲዲ መደርደሪያ ለማሠራት ስንዘጋጅ በአንዴ የዶላር ዋጋ ጨመረና ከኛ ጋር ሊሠራ የነበረው ሰው ዋጋው ጨመረበት፡፡ ኢትዮ ቴሌኮም ደግሞ ባለፉት አሥር ዓመታት እያደገ መጣ፡፡ የሰው የሲዲ አጠቃቀም እያነሰ ሲመጣም በየሱፐርማርኬቱ የመሸጥን ሐሳብ ተውነው፡፡ ከዚያ 888ን የመሰሉ የጽሑፍ መላኪያዎች ሲመጡ በዚህ መንገድ ሙዚቃ መላክ የሚቻል ከሆነ ብለን አጠያየቅን፡፡ በዚህ መንገድ የጽሑፍ መልዕክት እንጂ ሙዚቃ አይሄድም ተባልንና ተውነው፡፡ ከዚያ በፓኬጅ ዳታ የሚገዛበትና የፎርጂ አገልግሎት ሲመጣ እነ ኃይሌ ሩትስ አሁን ሳይቻል አይቀርም አሉ፡፡ እኔና ጆኒ ራጋ በሲዲው ለፍተን ስላልተሳካ ከዚህ በኋላ ተነሳስተን እዚያ ውስጥ አንገባም አልን፡፡ ታዲዮስ የሚባል የአይቲ ባለሙያና ኃይሌ ግን ገፋፉንና ቴሌ ስንሄድ ይቻላል ተባልን፡፡ ሰው ሲዲ ከመጠቀም ሞባይል ስለሚመርጥ ጥሩ ይመስለናል፡፡ አሁን ሸክላ እየሰበሰብን ፋይሎቹን በአዲሱ ፎርማት ለማድረግ እየቀዳን ነው፡፡ 

ሪፖርተር፡- ቀድሞ የተሠሩ ሙዚቃዎችን በሸክላ ማግኘት ቀላል አይደለም፡፡ አሁን ያላችሁት ምን ደረጃ ላይ ነው?

ኤልያስ፡- አዎ በጣም ከባድ ነው፡፡ ሸክላዎቹ ከአቀማመጥ አንፃር ችግር አለባቸው፡፡ አንዳንድ ሸክላዎች ደግሞ አይገኙም፡፡ ብዙ ፋይሎች ብንሰበስብም አብዛኛው ፋይል በኤምፒስሪ የተቀየረ ነው፡፡ ሌላው ሰዎች በየቤታቸው እያጫወቱ ከካሴት ወይም ከሸክላ የቀዷቸው ናቸው፡፡ አንዱን ሙዚቃ ለመስማት በአማካይ አምስት ደቂቃ ስለሚወስድ  ሙሉውን ቢያንስ አራት ቀን ይወስዳል፡፡ ሙዚቃዎቹን ስንፈትሻቸው ጥራት ያላቸውም አሉ ኤምፒስሪ እንዲሆኑ ግን አልፈለግንም፡፡ ወደ ኤምፒስሪ መቀየርም ካለባቸው ከዋናው እንዲቀየሩ ሸክላዎቹን ፈልገን አገኘን፡፡ በዚህ ብዙ መመስገን ያለባቸው ሰዎች አሉ፡፡ አብዲ ነጋሽ ብዙ ሸክላዎች ወስደን ቀድተን እንድንመልስ ፈቅዶልናል፡፡ አመሐ ተወዳጅ፣ አየለ ማሞ፣ ጌታቸው ደባልቄና መርዓዊ ስጦት ሙዚቃዎቹ ይገኙ እንጂ ታሪኩን በመንገር እንረዳችኋለን ብለውናል፡፡ ሙዚቃዎቹ በአዳዲሶቹ ስፒከሮች ተስማሚ እንዲሆኑ ማስተከካል ያስፈልጋል፡፡ አንዳንዶቹ ሙዚቃዎች  የሚገኙት ኢቢሲ ብቻ ነው፡፡ ኢቢሲ እንደ ራሱ ንብረት ይዟቸዋል፡፡ አንዳንዶቹ የራሱ ንብረት ቢሆኑም በሕግ ሃያ ዓመት በኋላ የተቋሙ አይደሉም፡፡ አብዛኞቹ በኢትዮጵያ ሬዲዮ የተቀዱ ሙዚቃዎች ሃያ ዓመት ስላለፋቸው የሙዚቃ ደራሲዎቹ፣ አቀናባሪዎቹና የሙዚቃ ተጫዋቾቹ ናቸው፡፡ ለነሱ እንዲሰጥም በሙዚቀኞች ማኅበር በኩል አብረን እየሠራን ነው፡፡  

ሪፖርተር፡- በጥቅምት መጨረሻ መገበያያ ሥርዓቱ ሲተዋወቅ ከሰባት ወር በኋላ ሥራ ይጀምራል ተብሎ ነበር፡፡ በዚህ አካሄድ የሚሳካ ይመስልሃል?

ኤልያስ፡- ይመስለኛል፡፡ ካስተዋወቅን ወዲህ ብዙ ሥራ ተሠርቷል፡፡ አሁን ስድስት ወር ይቀረናል፡፡ በመሀል እንቅፋት የሆነ ጉዳይ አለ፡፡ የኮፒ ራይት ሶሳይቲ እኛ ዳታ በምንሰበስብበት መንገድ ስላልተሰበሰበለት ሮያሊቲ መሰብሰብ አልቻለም ነበር፡፡ ለአውታር ዳታ ስንሰበስብ ለኮፒ ራይት ሶሳይቲም ሆኖ እስከዛሬ ያልሠራውን ይሠራል ብለን ነበር፡፡ ሸራተን ሶፍትዌሩን ስናስተዋውቅ ግን ዳዊት ይፍሩ ኮፒ ራይት ሶሳይቲ መፍረሱን ነገረን፡፡ መፍረሱን ማንም አያውቅም ነበር፡፡ የአዕምሯዊ ንብረት ጽሕፈት ቤት ዳይሬክተር አቶ ማንደፍሮ ቢሮ ስንሄድ የድሮው ፈርሶ ሌላ ሊቋቋም እንደነበረ፣ በጥቅምት ሊወሰዱ እንደነበረና በወቅቱ አገሪቱ ውስጥ አለመረጋጋት ስለነበር እንደ ተራዘመ አለን፡፡ መመሥረቻ ጽፈው መተዳደሪያ ደንብ ቀርፀው ሊወስዱት አዕምሯዊ ንብረት ጽሕፈት ቤት የገቡት ኦዲዮ ቪዥዋል የነበሩትና መብታቸው ያልሆነ ሰዎች ናቸው፡፡ ኮፒ ራይት ሶሳይቲ እኛና ሙዚቃው እንዳይጎዳ ለመጠበቅ የሚቋቋም ነው፡፡ እኛ ሳናውቅ ከነሱ የምንጠበቅባቸው ሰዎች የነበረውን አፍርሰውና አዲስ አቋቁመው ትንሽ ሙዚቀኞች ይዘውና ሙዚቀኛ ነን ብለው ገብተው ነበር፡፡ ኢትዮጵያ ቆንጆ የቅጂና ተዛማጅ መብቶች ጥበቃ ሕግ አላት፡፡ መተዳደሪያ ደንቡን ሳነበው አዋጅ ቁጥሩን ይጠቅሱና አዋጁ የማይለውን ይጽፋሉ፡፡ ልብ ተብሎ ካልታየ ሕጉ የተጠቀሰ ይመስላል፡፡ ይኼ ወንጀል ነው፡፡ እኛን በሚጠብቅ መልኩ፣ እኛ ከሬዲዮና ቴሌቪዥን ፋይሎች እንድንወስድ መጻፍ ነበረበት፡፡ ኦዲዮ ቪዥዋል የሚባለው ስም ትክክል አይደለም፡፡ ሥራቸው ሙዚቃ መነገድ ነው፡፡ ኦዲዮ ቪዥዋልና ሙዚቃ መነገድ የተለያየ ነው፡፡ ኦዲዮ ቪዥዋል የፊልም እንጂ የሙዚቃ አይደለም፡፡ በፊልም የዳይሬክተሩ ወይም ፕሮውዲሰሩ ጉልበት ትልቅ ነው፡፡ በሙዚቃ እንደዚህ አይደለም፡፡ የነይልማ ገብረአብ፣ ፀጋዬ ደቦጭና የእኛን ጊዜ ያለፈባቸውን ኦሪጂናል ሲዲዎች በሕገወጥ መንገድ ኦዲዮ ቪዥዋሎች እየሸጡ ነው፡፡ ከነሱ ሰብስቦ ወደ ባለቤቶች የሚያመጣው የኮፒ ራይት ሶሳይቲ ነው፡፡ እሱን ደግሞ እነሱ ሊይዙት ነው፡፡ በዚህ ምክንያት ሰሞኑን ረብሻና አለመግባባት አለ፡፡ ይህ ባለፈው ሁለት ሳምንት መሥራት ያለብንን እንዳንሠራ አድርጎናል፡፡

ሪፖርተር፡- ባለፉት ጊዜያት በነበረው የሙዚቃ ሥርጭት ሒደት ባለሙያዎች  እንደተጎዱ ስለሚገለጽ አዲሱ ሥርዓት ለሙዚቃው ዘርፍ ምን አስተዋጽኦ ያበረክታል?

ኤልያስ፡- በነጋሪት ጋዜጣ ታትሞ የወጣ ሕግ አዋጅ ቁጥር ጠቅሶ የማይለውን መጻፍ ወንጀል ነው፡፡ መብት ያልሆነን እንደ መብትና እንደ ባለመብት የማይታወቅን እንደሚታወቅ አድርጎ መጻፍ የተከለከለ ነው፡፡ ለምሳሌ ሙዚቃ ሲሸጥ መብት ያለው ካሴቱ ወይም ሲዲው ሳይሆን ሥራው ነው፡፡ ቁሱ አይቆጠርም ቢልም እንዲቆጠር አድርገው፣ ሲዲውን ስለገዛሁት የኔ ነው እያሉ ነው፡፡ አዕምሯዊ ንብረት ጽሕፈት ቤት ይህንን ማወቅ ነበረበት፡፡ ዳይሬክተሩ ጥሩ ይመስለኛል፡፡ የኢትዮጵያን ሕግ አለማወቁ ግን የመጥፎ ሰው ያህል እየጎዳን ነው፡፡ ሕገ መንግሥቱ አሪፍ ነው፡፡ ሕግ ስላለ ብቻ መብት ይከበራል ማለት ግን አይደለም፡፡ በሙዚቃ ባለ መብት የመሆንና ያለመሆን ጉዳይ ትልቅ ርዕስ በመሆኑ ነው አዋጅ የወጣው፡፡ አዕምሯዊ ንብረት ይህንን ሳያይ ሊያፀድቀው ነበር፡፡ ባለቀ ሰዓት ስላወቅን ከሙዚቀኞች ማኅበር ጋር ሆነን ለማስተካከል እየሞከርን ነው፡፡ ሙዚቃውን በሚመለከት የሚሠራ ማንኛውም የመንግሥት አካል የኛ ሥራ የሚሠራው ለሊት መሆኑን መገንዘብ አለበት፡፡ በምርጫም ተባለ በግዳጅ ሕይወቱ እንደዚህ ነው፡፡ በብዙ አገርም ሥራው ለሊት ነው፡፡ ጠዋት ተነስቶ በየቢሮው ዙሮ ጉዳይ ማስፈጸም ይከብደናል፡፡ ጠዋት ስብሰባ ቢጠራ ለሊት ሳንሠራ አድረን ወይም ከሁለት ቀን በፊት አስተካክለን ካልሆነ አንመጣም፡፡ በስንት መከራ ጠዋት ሄደን ጥሩ ነው ብለን ተነጋግረን ሌላ ቀን ስንሄድ ተቀያይሯል፡፡ መሥሪያ ቤት ለሊት ይከፈት ሳይሆን ለሊት ስለምንሠራ ይታሰብልን ነው፡፡ ለምሳሌ እኔ ሁሌ የምነቃው አንድ ሰዓት አካባቢ ነው፡፡ ለሊት ሠርተን ጠዋት ሁለት ሰዓት አካባቢ ሁሉም ይተኛል፡፡ ለሊት በምንሠራው ቀን የሚነግሥበት ሌላው ነው፡፡ የት ነበራችሁ? እየተባልን ስለሆነ ይህ ጉዳይ ትኩረት እንዲሰጠው እንፈልጋለን፡፡

ሪፖርተር፡- ድምፃዊ፣ የሙዚቃ አቀናባሪ፣ ፕሮዲውሰር፣ የሙዚቃ ደራሲና የግጥም ደራሲ ከሙዚቃ ሽያጩ 20 በመቶ ተጠቃሚ ስለሚሆኑበት አሠራር ብታብራራልን?

ኤልያስ፡- የኛ ሮያሊቲ አይደለም፡፡ ሮያሊቲ ከተጠቀሙ ሰዎች ገንዘብ መሰብሰብ ነው፡፡ ለምሳሌ ሬዲዮ፣ ባር፣ የሠርግ መናፈሻ ወይም ዲጄዎች ከሚከፈላቸው በፐርሰንት ሮያሊቲ ይሰበሰባል፡፡ አውታር ግን ሱቅ ነው፡፡ አውታር ከዜማ ደራሲው፣ ገጣሚው፣ ድምፃዊውና አቀናባሪው ፍቃድ ተሰጥቶት ለገበያ የሚቀርብ ነው፡፡ የሞባይል ዩኤስኤስዲ ባይኖር ሱቅ እንደመክፈት ነው፡፡ ከሽያጩ አምስት ዓመት ያልሞላውን ለባለቤቱ፣ አምስት ዓመት ያለፋቸውን ለአምስቱ አካላት ማከፋፈል ነው፡፡ ይህ የሚሆነው ይሸጥልን ብለው ሲፈቅዱ ነው፡፡ ሌሎች ሙዚቀኞችም በሌላ ስም የአውታር ዓይነት ሊኖራቸው ይችላል፡፡

ሪፖርተር፡- ሙዚቃ የጀመርከው ቤተክርስቲያን ውስጥ ነው፡፡ ብዙ የመዝሙር አልበሞችም አቀናብረሃል፡፡ በወቅቱ ስለነበረው የሙዚቃ አጀማመርህ ብትነግረን?

ኤልያስ፡- ታላቅ ወንድሜ ቤት ክራር ይሠራ ስለነበር ክራር እጫወት ነበር፡፡ በደርግ ጊዜ የፕሮቴስታንት ቤተክርስቲያኖች ዝግ ስለነበሩ በየቤቱ ፕሮግራም ይደረጋል፡፡ እኛ ቤት ቦክስ ጊታር ይዘው መጥተው ፕሮግራም ሲደረግ ጊታርን በቅርብ የማየት፣ የመንካትና የመውደድም ዕድል ነበረኝ፡፡ ቤተክርስቲያን ውስጥ ቁጥራቸውን የማላውቀው ካሴቶች ሠርተናል፡፡ ለአምስት አንድ ካሴት ለመሥራት ጠዋት ገብተን ማታ ጨርሰን እንወጣ ነበር፡፡

ሪፖርተር፡- በወቅቱ ከነበረህ ተሞክሮ የማትዘነጋውና ለዛሬው የሙዚቃ ሕይወትህ አስተዋጽኦ ያደረገ ቅፅበት አለ?

ኤልያስ፡- በሙዚቃ ኮርድ መለወጥ ትልቁ ነገር ነው፡፡ ፊት ለፊት የሚጮህ ነገር አይደለም፤ ያለሱ ግን ሙዚቃ አይሠራም፡፡ ኮርድ እንደሚቀየር ባውቅም የቱ ጋር እንደሚቀየር አላውቅም ነበር፡፡ ከዛ ለምን እንደሚቀየር ለረዥም ጊዜ ትልቁ ጥያቄዬ ነበር፡፡ በ13 ዓመቴ ቤት ውስጥ ጊታር ተገዝቶልኝ ነበር፡፡ ቤት ሁሌ የሚከፈተው ጌታያውቃል የተጫወተው ተከፍቶ ጠዋት ከአልጋዬ እየተነሳው ኮርድ ሲቀየር ገባኝ፡፡ ያንን የተለየ ቀን አልረሳውም፡፡ አብዛኛው ስቱዲዮ ያሉት ከቤተክርስቲያን የመጡ ሙዚቀኞች ጌታያውቃልና እያሱ ገነት ያስተማሯቸው ናቸው፡፡ ጌታያውቃል ሲያስተምረኝ ያሬድም ስገባ ኮርድ ገብቶኝ ነበር፡፡

ሪፖርተር፡- እንደ መነሻህ የምትጠቅሰው ሙዚቀኛ ጌታያውቃል ሆኖ አንተስ የኔ ውጤት የምትለው ሙዚቃኛ አለ?

ኤልያስ፡- ከጌታያውቃል ይልቅ ኢያሱ አስተምሮኛል፡፡ ትልቁ ጊታር አስተማሪዬ የሮሐ ባንድ ጊታሪስት ሰላም ሥዩም ነው፡፡ ቅንብር እነ ደረጄ መኮንን፣ ቴዎድሮስ መኮንን፣ አበጋዝና ዳዊት ይፍሩ አስተምረውኛል፡፡ የኔ ውጤት የምላቸው ያሉም ይመስለኛል፡፡ ስሰማቸው ለምን ያንን ኮርድ እንደመረጡ፣ ማን ከማን እንደተማረ ይገባኛል፡፡ ከኋላዬ ተነስተው የሚበልጡኝ ጎበዝ ጊታር ተጫዋቾችና አቀናባሪዎችም አሉ፡፡ ቢበልጡኝም ከኔ በመማራቸው ደስ ይለኛል፡፡

ሪፖርተር፡- ከያሬድ ከተመረቅህ በኋላ የመጀመርያ የቅንብር ሥራህ የመሐሙድ አህመድ ‹‹ሁሉም ይስማ›› አልበም ላይ ነበር፡፡ በመጀመሪያ ሥራህ ከአንጋፋ ድምፃዊ ጋር መጣመር ምን ይመስል ነበር?

ኤልያስ፡- ለማ ድማሙ የሚባል ኪቦርዲስት ቅንብሩን ጀምሮ ሳይጨርስ ሞተ፡፡ መንገሻ የሚባል ጊታሪስትም ሞቶ ስለነበር ለመተካት ወደ ባንዱ ገባሁ፡፡ ‹‹ሁሉም ይስማ›› የሚለውን አልበም እየጨረሱ ነበር፡፡ ‹‹ሁሉም ይስማ›› የሚለው ዘፈን ኢንትሮና ብሪጅ አልተሠራም ነበር፡፡ አንድ ጉራግኛ ዘፈን ደግም አልተቀናበረም ነበር፡፡ የመጀመሪያ ኢንትሮዬ ‹‹ሁሉም ይስማ›› ዘፈን ነበር፡፡ የተቀዳው ፈረንሣይ አገር በሙሉ ባንድ ነበር፡፡ በጣም ዕድለኛ ነኝ፡፡ ያሬድ አራተኛ ዓመት ሳልጨርስ መዲና ባንድ ገባሁ፡፡ መዲና  እነ ያሬድ ተፈራ፣ የኛ አስተማሪዎች እነ እዝራና አክሊሉ የነበሩበት የሸራተን ባንድ ነበር፡፡ ሸራተን ደግሞ እነ ጥላሁን ገሠሠ፣ መሐሙድ አህመድ፣ ሚኒልክ ወስናቸው፣ አስቴር አወቀና ኤፍሬም ታምሩ ይሠራሉ፡፡ ከትልልቆቹ ጋር የመሥራት ዕድል ነበረኝ፡፡ መሐሙድ ቱር ሲያደርግም እንደ ጊታሪስት አብሬ ቱር አድርጌያለሁ፡፡ ከያሬድ የተመረቅኩት ናይት ክለብ እየሠራሁ ነበር፡፡  

ሪፖርተር፡- በመዲና፣ አፍሮ ሳውንድ፣ ዜማ ላስታስተና ሌሎችም ባንዶች ሠርተህ ወደ ስቱዲዮ ስላደረከው ሽግግር ግለጽልን?

ኤልያስ፡- በአንድ ጊዜ ብዙ ቦታ እሠራ ነበር፡፡ ለምሳሌ የሴቫንስ ባንድ ኬንያዊ ጊታሪስት ኬንያ ሲሄድ እሠራለሁ፡፡ አፍሮ ሳውንድን ከመሠረቱት ሰዎች አንዱ ስለሆንኩ እዛም እሠራለሁ፡፡ መዲና ደግሞ ዋናው ባንዴ ነው፡፡ በኋላ እኔና ሁንአንተ ዜማ ላስታስን  መሠረትን፡፡ አንድ ክርስቲያን ግርማ የሚባል ልጅ ስቱዲዮ አልፎ አልፎ እየሄድኩ ኳየሮች አሬንጅ አደርግ ነበር፡፡ አዲስ ዜማ እንደተጀመረ ለዲጄ ዚ መግቢያ ሠራሁለት፡፡ መግቢያውን ይዤው ኮፊ ሐውስ ከቴዲ ጋር ተገናኘንና እኔ መኪና ውስጥ ገብተን ሞተር ሳስነሳ ሙዚቃው ተነሳ፡፡ ቴዲ ሰማውና እንደዚህ ከተቻለ የኔንም ሥራልኝ አለኝ፡፡ ያኔ ቋሚ ስቱዲዮ ስላልነበረኝ በክርስቲያን ስቱዲዮ ሠራሁለት፡፡ በሲዲ ሙዚቃውን ኤክስፕረስ ባንድ ወስጄ ተከፍቶ ቴዲ እየዘፈነ ተቀዳ፡፡ የቴዲ አልበም ወጥቶ ሲወደድና ገና ስቱዲዮ ሳይኖረኝ ስድስት ሰባት ወረፋ መጣልኝና ቀብድ ተቀበልኩ፡፡ ሜላት ኮምፒውተር በዚያ ጊዜ የነበረውን ዘመናዊ ኮምፒውተር ዴል ወስዳችሁ ሥሩና አምጡ አለችን፡፡ ብዙም ብር አልነበረንም፡፡ ናይት ክለብም ቱር ማድረግም ስልሰለቸኝ ማረፍ እፈልግ ነበር፡፡ ከትልልቅ ሰዎች ጋር መጫወትና ቱር እያደረጉ አገር ማየት መጀመሪያ ላይ ያስደስተኝ ነበር፡፡ በሰዓቱ እንደማይገባኝ አላውቅም ነበር፡፡ ከትልልቅ ሰዎች ጋር የተጫወትኩት ጎበዝ ስለሆንኩ ይመስለኝ ነበር፡፡ አሁን ሳስበው ግን ላያጋጥመኝም ይችል ነበር፡፡

ሪፖርተር፡- ከአንጋፋ ድምፃውያን እንዲሁም ከአማተሮች ጋር በርካታ ሙዚቃዎች ሠርተሃል፡፡ ከሥራዎችህ በይበልጥ የተደሰትክበት አለ?

ኤልያስ፡- ሁልጊዜ መጨረሻ ላይ የሠራሁት ደስ ይለኛል፡፡ አንድ ሙዚቃ የምሠራው ደስ እስከሚለኝ ድረስ ነው፡፡ ለዘፋኝ ሲዲ ከባድ ነገር ነው፡፡ የዘፋኙ ቤተሰብ፣ ሲዲው እስኪወጣ የሚጠብቁ ሰዎችና ዘፋኙም አሉ፡፡ ሙዚቃ እያስደሰተ ቢያለፋም ተጨርሶ ሲታይ የበለጠ ደስ ይላል፡፡ ሁልጊዜ ያንን እንዲህ ባደረኩት ኖሮ ስል አዲስ በምሠራው  አደርገዋለሁ፡፡ በአብዛቹ ሥራዎች ዘፋኞቹም እኔም ደስተኛ ነን፡፡ በሰዓቱ የአቅሜን ነው የሠራሁት፡፡ ወደኋላ ተመልሼ መስማት አያስደስተኝም፡፡ በሬዲዮ ስሰማቸው ግን ደስ ይለኛል፡፡ ሲዲ ከእጄ ከመውጣቱ በፊት እጨነቃለሁ፡፡ ሁልጊዜ የሚገርመኝና ልለምደው የማልችለው ነገር ማስተር ሊወጣ ሲል ዘፋኞቹ ራሳቸው እስኪገረሙ ድረስ በጣም እጨነቃለሁ፡፡ በቃ ልሰጠው ነው ብዬ ስለምጨነቅ ሰውነቴም ይጎዳል፡፡ ዘፋኞቹ እስከሚሰለቻቸው ድረስ ሳልተኛ ደጋግሜ እሰማዋለሁ፡፡ አንዳንዴ ዘፋኞቹን ሂዱ ብዬ ቀኑን ሙሉ አንዱን ሲዲ ስሰማው የሰለቸኝ ነገር ሳገኝ ይኼ መጥፎ ነው ማለት ነው ብዬ ድጋሚ እነካካዋለሁ፡፡ ሥራዎቼ የኔ ብቻ ሳይሆኑ የዘፋኞቹ ድምፅም አለ፡፡

ሪፖርተር፡- ሙዚቀኞችና አድማጮች በተለይም በዘመናዊ የኢትዮጵያ ሙዚቃ ኤልያስ ትልቅ ለውጥ አምጥቷል ይላሉ፡፡ አንተ በሙዚቃው የኔ አስተዋጽኦ የምትለው ምንድነው?

ኤልያስ፡- በአንድ ስቱዲዮ ውስጥ በኮምፒውተር መሥራት ብዙ ትችቶች እንዳሉበት አውቃለሁ፡፡ ብዙ ሰዎች መጥፎ ተፅዕኖ ነው እንደሚሉም አውቃለሁ፡፡ እኔ ግን በምሠራው ደስተኛ ነኝ፡፡ አንዳንዴ በኮምፒውተር የሚገኘው በሌላ አይገኝም፡፡ ሰዎች ስም ሳያነቡ ያንተ ሙዚቃ ነው ሲሉኝ የራሴ ከለር አለኝ ብዬ አስባለሁ፡፡ እኔ እንደ አበጋዝ ለመጫወት፣ እንደ ዳዊት ይፍሩ ለማቀናበር፣ እንደ ደረጄ መኰንን ለመሥራትና ከነሱ ደስ የሚለኝን ለማድረግ ነው የሄድኩት፡፡ በዚያ ውስጥ የኔ ከለር መምጣቱ አይቀርም፡፡ ስለዚህ አስተዋጽኦ አለኝ ብዬ አስባለሁ፡፡

ሪፖርተር፡- በርግጥ ኮምፒውተር ሙዚቃ መሥራት በተደጋጋሚ ይተቻል፡፡ አንተ ከምትሥራው ሙዚቃ አንፃር ምላሽህ ምንድነው?

ኤልያስ፡- ዋናው ጥሩ ሙዚቃ መስማት ነው፡፡ በሙዚቃ ብዙ አክራሪዎች አሉ፡፡ አድማጭ ደስ ካለው ይሰማዋል፡፡ ዋናው ሰዎችን ማሳመን ነው፡፡ በገንዘብና በቴክኖሎጂም አሪፍ አገሮችም ጎበዝ ድራመርና ጥሩ ድራም አጠገባቸው እያለ በኮምፒውር ይሠራሉ፡፡ ለምን አኩስቲክ አልሆነም? ለምን ኤሌክትሪክ ሆነ? ይባላል፡፡ አኩስቲክ እኛ ጋርም ስለሚቻል እየቀዳን ነው፡፡ እኔ አክራሪ አይደለሁም፡፡ ሰዎች ግን ይተቻሉ፡፡ ድሮ በኮምፒውተር ማቀናበር አይቻልም ነበር፡፡ ጊዜው ያመጣውን ነው የተጠቀምነው፡፡ የድሮውንም መጠቀም ይቻላል፡፡ ለምን የድሮው ብቻ አልሆነም የሚል ጭቅጭቅ ግን ብዙ አያስማማኝም፡፡

ሪፖርተር፡- ሙዚቃ አንዳች መልዕክት ለማስተላለፍ ወይም ለተለያየ ዓላማም ሊውል ይችላል፡፡ ላንተ ሙዚቃ ምን ዓይነት መሣሪያ ነው?

ኤልያስ፡- ሙዚቃ በጣም እወዳለሁ፡፡ ሙዚቃ ለመስማት ምንም ዕውቀት አያስፈልግም፡፡ ስለዚህ ሰዎችን የምፈልገው ስሜት ውስጥ ማስገባት መቻል ነው፡፡ ለጥሩም ለመጥፎም  አነሳሽ ነው፡፡ ሙዚቃ በትንሽ ሰዓት የሚባለውን ብሎ መጨረስ ነው፡፡ ለኔ ከመልዕክት በላይ ዜማ ጉልበት አለው፡፡ ሰው በዜማው ተስቦ ሲመጣ የሚባለውን ይሰማል፡፡ ግጥም እጽፋለሁ፣ ዜማ እሠራለሁ፣ አቀናብራለሁም፡፡ መልክዕቱ ሁልጊዜ ጥቅም የሚያመጣ፣ ለመልካም ነገር የሚያበረታታ፣ ያዘነን የሚያጽናና እያጫወተ ጥሩ ነገር የሚያስተላልፍ ነው፡፡ ሙዚቃ ለማስለቀስም ቅርብ ነው፡፡ እዬዬ ሄደች ምን ላድርግ? ዓይነት ዘፈን ድሮም ስለማልወድ መሥራት አልፈልግም፡፡ ሙዚቃን ባጠቃላይ እንዲህ ነው ልለው ባልችልም በጥሩ ጎኑ አየዋለሁ፡፡ ሰው ባለፈ ነገር እንዲያዝን ሳይሆን አስተካክሎ እንዲሄድ ማድረግ ነው፡፡ አጉል መካሪ ሆኖ ከላይ ቁጭ ማለት ግን አልፈልግም፡፡

ሪፖርተር፡- የሠራሀቸውን ሙዚቃዎች በሙሉ በአንድ መጠቅለል ባይቻልም፣ በተደጋጋሚ ከምታነሳቸው ጽንሰ ሐሳቦች መካከል ሰው መሆንን፣ ፍቅርና ጥላቻን፣ አገርንና መንፈሳዊነትን እንዴት ትገልጻቸዋለህ?

ኤልያስ፡- ሰዎች ስለሆንን አንዳንዴ መሳሳታችን አይቀርም የሚለውን አላምንበትም፡፡ ለኔ ሰው መሆን ጥሩ መሆን ብቻ ነው፡፡ ሰውነት ለኔ ለመስተካከል፣ እግዚአብሔርን ለመፍራት መሄድ ነው፡፡ መሳሳት አይቀርም በሚል ምክንያት ካልተሳሳትክ አትማርም የሚል ነገር በፍፁም የለኝም፡፡ ፍቅር ብዙ ዓይነት ነው፡፡ መጥፎ ነገርን መውደድ ፍቅር ስለሆነ ብቻ ጤነኛ አይደለም፡፡ ሰው መውደድ ያለበትን መምረጥ አለበት፡፡ የራሱን ልብ ብቻ እያዳመጠ መሄድ የለበትም፡፡ ከሱ በላይ አስተማሪ የእግዚአብሔር ቃል አለለት፡፡ ልቡን ብቻ ወይም ልቡ የማይታመን ሰውን እያዳመጠ ከሄደ እርስ በርስ መጨራረስ ነው፡፡ ጥላቻ ደግሞ ጥሩም ነገር አለው፡፡ ለምሳሌ መጥፎ ነገርን መጥላት፡፡ አገር ለኔ ኢትዮጵያዊ ሰው ነው፡፡ ቁሳቁስ ያልፋል፡፡ አገር ማለት ከሌላው ለራስ ወገን ማዳላት አይደለም፡፡ በመሬት የተነጠፈ ነገር አገር ነው ብዬ አላስብም፡፡ በእግዚአብሔር ቃልም ሰው ይበልጣል፡፡ መንፈሳዊነት የግድ ስለሆነ ሰው መንፈሳዊ ላይሆን አይችልም፡፡ የጥሩ ወይም የመጥፎ መንፈሳዊነት አለ፡፡ መንፈሳዊነት እግዚአብሔርን መፍራት ከሆነ ጥሩ ነው፡፡

ሪፖርተር፡- ሙዚቃ ለመሥራት ምን ያነሳሳሃል?

ኤልያስ፡- ሙዚቃ መስማት መዝናናትም ሥራም ነው፡፡ በዓለም ሙዚቃ ሕጋዊ መኮራረጅ አለ፡፡ ብዙ ጊዜ ማታ ልንሠራ ስንል ምን እንደምንሠራ ሳናውቅ እንገኛለን፡፡ አንዳንዴ በሲኤንኤን ዜና ሲያልፍ የሚሰማው ሙዚቃ ወይም ብዙ ሙዚቀኛ የሚግባባበት ኮርድ መስማት ያነሳሳል፡፡ ሙዚቃ መስማት ያነሳሳኛል፡፡

ሪፖርተር፡- ቃለ መጠይቁን ከመጀመራችን በፊት እየሠራህ የነበረው ሙዚቃ ምንድነው?

ኤልያስ፡- በግብፅ ወይም በሊቢያ በኩል አውሮፓ ለመሄድ ሲሉ ባህር ውስጥ ለሚሰጥሙ ስደተኞች ሙዚቃ እየሠራን ነው፡፡ ታደለ ሮባ፣ የሺ ደመላሽ፣ ዳዊት ነጋ፣ በኦሮምኛ፣ በአማርኛና በትግርኛ ሌላ ደግሞ በሶማልኛ የሚሠራና የግብፅ ሰው አለ፡፡ ለየብቻና ሁሉም አንድ ላይ ሙዚቃውና ክሊፑ ሊሠራ ግብፅ ሄደው ነበር፡፡ መጀመርያ ፍሬሙን የሠራሁት እኔ ነኝ፡፡ አንድ የፊልም ስኮር የሚሠራ ታዋቂ አሜሪካዊ ግብፅ ሄዶ ሠራውና ተመልሶ ወደ እኔ መጣ፡፡ እኔ ጊታር አስገባሁበት፡፡ የሚሰማህን አድርግ ተብዬ ሚክስ አደረኩት፡፡ ልክ እንደ ሲንፎኒ ቢግ ባንድ ነው፡፡

ሪፖርተር፡- ምን ዓይነት ሙዚቃ ታዳምጣለህ? የምትወደውስ ሙዚቀኛ አለ?

ኤልያስ፡- ያገኘሁትን እሰማለሁ፡፡ አልመርጥም፡፡ የምሰማበት ቀንና ስሜት ይወሰናል፡፡ በተለያዩ ስታይሎች የምወዳቸው ሙዚቀኞች ብዙ ናቸው፡፡

ሪፖርተር፡- ሙዚቃ ስታዳምጥ የምትፈልገው እሴት ምንድነው?

ኤልያስ፡- ዋናው የሙዚቃው ቅንብር ሆኖ መልዕክቱ ሁለተኛ ነገር ቢሆንም፣ መልዕክቱ የሚረብሽ ከሆነ ወደ አንደኛ ደረጃ ይመጣል፡፡ ሙዚቃ ሰዎችን እያባባበለ መጥፎ ነገር የሚነግር ከሆነ አደገኛ ነው፡፡ ለምሳሌ ‹‹አንዳንድ ቀንማ ይሻላል ውሽማ›› እያለ ጨዋታ በሚመስል መንገድ ሰዎች ከመጥፎ ነገር እንዳይመሰሉ የሚያበረታታ ሙዚቃ አደገኛ ነው፡፡ አንዳንዱ ጥሩ መልዕክት ይናገርና ቅንብሩ ሰው ስለማይጋብዝ መልዕክቱ ይከስራል፡፡ ሰው በጣም ደስ በሚል ሙዚቃ ይሳብና መልዕክቱ መጥፎም ይሆናል፡፡ ጥሩ መልዕክት ከጥሩ ድምፅ ጋር ቢመጣ አሪፍ ነው፡፡ በግጥሙ ምክንያት የማልሠራው ሙዚቃና በመልዕክቱ ምክንያት የማልሠራው ማስታወቂያ አለ፡፡ የኮንዶምና የወሊድ መከላከያ ማስታወቂያዎችን መተባበር አልፈልግም፡፡ ጥሩነታቸውንም ማየት አልፈልግም፡፡ ከነዚህ የቢራ ማስታወቂያ ብሠራ ይሻለኛል፡፡

ሪፖርተር፡- ከሙዚቃ ውጭ ምን ያስደስተሃል?

ኤልያስ፡- ሙያዬን የሚመለከት ነገር አነባለሁ፡፡ ያገኘሁትን መጽሐፍ ማንበብ ልክ ነው ብዬ ስለማላምን አላነብም፡፡ በተለይ ከሆኑ ዓመታት ወዲህ መጽሐፍ ቅዱስ ብቻ ነው የማነበው፡፡ ሙያዬን በተመለከተ ስለሕጉም አነባለሁ፡፡

ሪፖርተር፡- ግጥም የምትጽፈው የድምፃውያኑን ማንነት ከግምት በማስገባት ነው ወይስ የምታምንባቸውንና ሰው እንዲሰማቸው የምትፈልጋቸውን ነገሮች በማሰብ ነው?

ኤልያስ፡- ከአንድ ዘፋኝ ጋር ስቱዲዮ ውስጥ ሙዚቃ ሲሠራ እንደ ቤተሰብ ይሆናል፡፡ ካሴት ሲሠራ ረዥም ጊዜ ስለሚወስድ የሰውየው አመለካከት ይታያል፡፡ የሁሉም አመለካከት ጥሩ ነው ማለት አይደለም፡፡ ያላመነበትን ነገር እንዲያምንበት ለማድረግ እሞክራለሁ፡፡ ሌላም አገር ምክንያታዊነት ወይም ሪዝኒንግ የሚሉት ሰዓት አለ፡፡ በአንድ ነገር ተከራክረው በመጨረሻ ያሸነፈውን ያደርጋሉ፡፡ ተናግሮ ባሳመነ ብቻ ሳይሆን መሠረታዊ ነገሮች ይታያሉ፡፡ ሙዚቀኞች የተረዱትን፣ ከሕይወታቸው የተማሩበትን ቢሠሩ ደስ ይለኛል፡፡ አንዳንድ ዘፋኝ ምንም ብጽፍ ይሸጥ እንጂ ግድየለውም፡፡ እኔ መልካም ነው ብዬ የማውቀውን ነገር እጽፋለሁ፡፡ ተነጋግረን እንተማመናለን፡፡ ብዙ ጊዜ ግን አለመግባበት አንዳንድ ሥራዎች ይቋረጣሉ፡፡

ሪፖርተር፡- በብዛት የምትሠራው የዘፋኞችን የመጀመሪያ አልበም ነው፡፡ ድምፃውያንን የምትመርጥበት የተለየ መሥፈርት አለህ? ወይስ በመካከላችሁ የሚፈጠር ግብብነት አለ?

ኤልያስ፡- የመጀመሪያ አልበም ቢሆን ደስ ይለኛል፡፡ ጀማሪ ሲሆን ድምፁን ሰምቼ አስገባዋለሁ፡፡ ሰው በተፈጥሮ ድምፅ ምክንያት ላይዘፍን አይችልም፡፡ ሪትም ከጠበቀ መጥፎ የሚባል ድምፅ የለም፡፡ ዘፋኝ እንደሆነ የሚታወቅበት ትንሽ ምክንያት ስለሆነ ወፍራም ወይም ቀጭን በመሆን ለውጥ የለም፡፡ ዘፋኙ ያለውን ነገር መፈለግ ደስ ይላል፡፡ በመፈለጉ ጎበዝ ነኝ መሰለኝ ያዋጣኛልም፡፡ በሁለተኛ አልበም ዘፋኙ ታዋቂ ሆኖ ገንዘብ ኖሮት ስለሚመጣ የትም ቦታ ቢሄድ ተቀባይነት እንዳለው ያውቃል፡፡ ስለዚህ እኔን የሚታገሰኝ እንዳልቀየመው ይመስለኛል፡፡ መታገሱ ደግሞ እኔን ያስጨንቀኛል፡፡ ጀማሪው እንደፈለገው የትም ቦታ ፊት አይሰጠውም፡፡ አዲስ ዘፋኝ ስድስትና ሰባት ዘፈን እስኪዘፍን ምን መሥራት እንዳለበት ስለማይታወቅ ይታገሳል፡፡ አንዳንዴ ሁለተኛ ካሴት መሥራት እኔንም ይሰለቸኛል፡፡ ሌላው አንድ ዘፋኝ ስቱዲዮ እያለ ሌላው ሾው ሠርቶ ሲመጣ፣ የመጀመሪያው ሳይጨርስ ስቱዲዮ ሊገባበት ሲል ሞራሉ ይጎዳል፡፡ ዘፋኞች ቱር ጨርሰው ሁለተኛ ካሴት ለመጀመር ሁለት ዓመት ይበቃቸዋል፡፡ ለመሥራት ግን በአማካይ አራት ዓመት ይፈጃል፡፡ አንድ ዘፋኝ ውጤት ከመጣ እንደተገላገልኩ እቆጥረዋለሁ፡፡ በሌላ ዘፋኝ ደግሞ እርግጠኛ ወዳልሆንኩበት በመግባት (ሪስክ) እወስዳለሁ፡፡ በዚህ ምክንያት ሁለተኛ ካሴት የሠራሁት ጥቂት ነው፡፡ ከሆነ ዓመት ወዲህ ደግሞ ፈጽሞ አልሠራሁም፡፡ የሰውየው ሕይወትም ይመለከተኛል፡፡ ስቱዲዮና የራሴን ሕይወት የሚያውክ ነገር እንዳይመጣ ሕይወቱን እመለከታለሁ፡፡

ሪፖርተር፡- የአንተን ትውልድ ሙዚቀኞችን ከሥራዎቻቸውና ከተደማጭነታቸው አንፃር እንዴት ታያቸዋለህ?

ኤልያስ፡- ጥሩ ይመስለኛል፡፡ ስለ ድሮ ሙዚቀኞች ስንሰማ ድሮም ጥሩ ያልነበረ ነገር እንሰማለን፡፡ ምናልባት የድሮዎቹ የግድ አንድ ላይ ብቻ መሥራት ነበረባቸው፡፡ እኛ ስንመጣ ግን እንደዚህ ዓይነት ችግር የለም፡፡ አሁን ብዙ ጊዜ ራስን ችሎ መሥራት ነው፡፡ የአሁኑ ጥሩ ትውልድ ነው፡፡ ትሁትም ነው፡፡ እኔ በደንብ የምደመጥበት ሰዓት ስለሆነ ለኔ ተስማሚ ነው፡፡ ከትንሽ ዓመታት በኋላ ስጠየቅ አኩርፌ እገኝ ይሆናል፡፡

ሪፖርተር፡- በዓለም የሙዚቃ ካርታ የኢትዮጵያ ሙዚቃ የቱ ጋር ነው ብለህ ታስባለህ?

ኤልያስ፡- የሙዚቀኛ መብት ያልተከበረው ኢትዮጵያ ውስጥ ብቻ ይመስለኛል፡፡ ሌላ አገርም እንደ ኢትዮጵያ የሙዚቀኛ መብት አልተከበረም ብሎ መናገር አገሮቹን መሳደብ ይመስለኛል፡፡ መንግሥት እያለ እንደ ኢትዮጵያ የሙዚቃ መብት ያልተከበረበት አገር ያለ አይመስለኝም፡፡ ሙዚቃ የሚወደድበት አገር ሆኖ፣ ሉዓላዊ አገር ሆኖ፣ ኢትዮጵያ ኮፒ ራይት ባለማክበር ብቸኛ አገር ትመስለኛለች፡፡

ሪፖርተር፡- ከድምፃውያን ውጪ ከሙዚቃው ጀርባ ላሉት ባለሙያዎች የሚሰጠው ትኩረት አናሳ ሙሆኑ ሙዚቀኞችን ምን ያህል ፈትኗል?

ኤልያስ፡- ኢትዮጵያ አሪፍ የቅጂና ተዛማጅ መብት ሕግ አላት፡፡ የተተረጎመው ከስዊዘርላንድ ነው፡፡ ሲወጣም አብሬ ነበርኩ፡፡ ምንም ሳይስተካከል ቀጥታ አሪፍ ሆኖ ተተርጉሟል፡፡ በደንብ የተሞከረ ስለሆነ ብዙ አገሮችም ከስዊዘርላንድ ነው የሚወስዱት፡፡ ሕጉ ሲከበር የኢትዮጵያ ሙዚቃ በጣም ጥሩ ይሆናል፡፡ ኢትዮጵያዊ ሙዚቃ ሠርቶ ሲቆም ወዲያው ባዶ ይሆናል፡፡ ሌላ አገር ግን አንድ ሙዚቃም የሠራ ሰው ቢያንስ መካከለኛ ገቢ እንዳለው ሰው ይኖራል፡፡ ከ30 እና ከ40 ዓመታት በላይ የሙዚቃውን ኢንዱስትሪ የያዘውና ከሰው ጋር የሚገናኘው ቡድን የጨከነ ወንጀለኛ ነው፡፡ በፊት በሱፐርማርኬት ሙዚቃ ለመሸጥ አሁን ደግሞ በቴሌ በኩል የምንሞክረው ይህንን ለማስተካከል ነው፡፡ ከሙዚቃ ጀርባ ያሉት ብቻ ሳይሆን ከፊት ያሉትም ይጎዳሉ፡፡ ለምሳሌ የዘሪቱ ጌታሁን እንቁጣጣሽ ዘፈን እንኳን በሥነ ሥርዓት ቢከፈትላት ሀብታም ትሆን ነበር፡፡ ከኋላ ያሉት ሰዎች ቀድመው ይጎዳሉ፡፡ ከፊት ያሉት ደግሞ ትንሽ ቆይተው ይጎዳሉ፡፡ ከፊትም ከኋላም ላለው ሰው ሕጉ ሊከበርለት ይገባል፡፡ ሕገ መንግሥት ብቻ ሳይሆን መንግሥትም ስላለ ይህን ማድረግ አለበት፡፡ ብዙ ሰው እየሠራና ሙዚቃው እየተሸጠ ይቸገራል፡፡ ሙዚቃ አቀናባሪው ሙልጌታ አባተ ብዙ ሙዚቃ ሠርቷል፡፡ ሙዚቃውም በጣም ተሽጧል፡፡ የሞተው ግን ተቸግሮ ነው፡፡ ይኼ ውሸት ይመስላል፡፡ ሰው እንዴት የውሸቱን ታሞ፣ የውሸቱን መታከሚያ አጥቶ ይሞታል? መንግሥት ለምን እንዳላየ እንደሆነ አልገባንም፡፡ ለምን ሙዚቀኛ ይሞታል? አይደለም፡፡ ሀብታምም ደሃም ሰው ሁሉ ይሞታል፡፡ ነገር ግን ገንዘቡን ሌሎች ያልሠሩ ሰዎች ወስደውበት መሞቱ ያሳዝናል፡፡ መንግሥት መፍትሔ አምጣ፣ ዕርዳንም አልተባለም፡፡ እኛ ማድረግ የምንችለው ነገር ስላለ አግዘን ነው፡፡

ሪፖርተር፡- በሕይወትህ ከገጠሙህ ውጣ ውረዶች ትልቁ መሰናክል ምንድነው?

ኤልያስ፡- አሁን የሠራነውን ያህል እያገኘን አይደለም፡፡ ሕግ ስላልተከበረና ሙዚቃ ጡረታ ስለሌለው ሙዚቀኛ ሠርቶ ሲያቆም ይፈርሳል፡፡ ከጎኔ የፈረሱ ሰዎች አይቻለሁ፡፡ በሕይወቴ የማልረሳው ፈተና ናይት ክለብ ሰልችቶኝ የነበረበት ጊዜ ነው፡፡ እንደ ባንድ ኃላፊ ከሥሬ ብዙ ዘፋኝ ነበር፡፡ ጥዬው እንዳልሄድ ብዙ ሰው የቤት ኪራዩን የሚከፍለውና የሚተዳደረው በዛ ባንድ ነበር፡፡ እዚያው መቀጠልም ከአቅሜ በላይ ነበር፡፡ አንድ ቀን ማታ ናይት ክለብ እየሄድን አልበትነው ነገር አልቀጥለው ነገር ብዬ አለቀስኩ፡፡ ያ ዕለት ከናይት ክለብ ሥራ የመጨረሻዬ ነበር፡፡ ባንዱ ቢቆም ይጎዱ የነበሩ ዘፋኞችን ወደ ስቱዲዮ አስገባኋቸው፡፡ ስቱዲዮ ውስጥ እየተደጋገፍን፣ የያዝናቸውን ሠርጎች እየሠራን አለፈ፡፡ የምንሠራው ቡፊ ዳላጋ ነበር፡፡ ከዛ ቤት አልፈልግም ብሎ የወጣ ባንድ የለም፡፡ እኛ እየተለመንን እምቢ ብለን ወጣን፡፡ ትዕግሥት በቀለ፣ ሚካኤል በላይነህ፣ መዝሙር ዮሐንስ በዛ ምክንያት ስቱዲዮ ገቡ፡፡

ሪፖርተር፡- በአንፃሩ ደስተኛ የሆንክበት ወቅትስ?

ኤልያስ፡- በአብዛኛው ደስተኛ ነኝ፡፡ በሥራም አልተቸገርኩም፡፡ በእርግጥ ገንዘብ አጥሮኝ በጣም ተቸግሬ አውቃለሁ፡፡ ብዙ ብር ሳልፈልገው ወይም ምን እንደማደርገው ሳላቅድ ቁጭ ብሎብኝም ያውቃል፡፡ ከዚህ በፊት ብዙ ጥፋትና መጥፎ ነገር አሳልፌያለሁ፡፡ እግዚአብሔር ከብዙ አደጋ አትርፎኛል፡፡ ናይት ክለብ በ20 ዓመቴ ኮንኮርድ ነበር የጀመርኩት፡፡ ከፕሮቴስታንት ቀጥታ ኮንኮርድ ነው የገባሁት፡፡ የነበርኩበት ጥሩ ነው ማለቴ ሳይሆን፣ የገባሁበት ነገር አስቸጋሪ ነበር፡፡ ከዚያ ጥፋት በኋላ ግን ብዙ ነገር ቀሎኝ አገኘሁት፡፡ ብዙውን ነገር በጊዜ ስላገኘሁት ይቺ ዓለም ቀላኝ ነበር፡፡ አሁን ሁለተኛ ኑሮ እንደምኖር ነው የማስበው፡፡ ብዙ ከኔ ጋር የነበሩ ሰዎች በመኪና አደጋ ሞተዋል፡፡ ድንዝዝ ካለው ጊዜ በመትረፌ አሁን ደስተኛ ነኝ፡፡

ሪፖርተር፡- ይህ የሕይወትህ ክፍል በሙዚቃዎችህ ይንፀባረቃል?

ኤልያስ፡- በዚያ ጊዜ የሠራኋቸው ሙዚቃዎች የማይረቡ ናቸው፡፡ መልዕክታቸው ራሱ ይናገራል፡፡ መጥፎ ነገሮችን የሚያበረታቱ ነበሩ፡፡ የሚያርም ሥራ እንዳልነበር ያስታውቃል፡፡ አሁን ሥራዎቼ በትክክል ይገልጹኛል ብዬ አስባለሁ፡፡ የጻፍኩትን ብቻ ሳይሆን ሰው የጻፈውንም ዓይቼ ነው የምሠራው፡፡ አጠገቤ ያሉ ዘፋኞችም በዚህ ነገር ተቃውሞ የላቸውም፡፡ በተለይ የእዮብን ከጻፍኩ በኋላ ብዙ ሰው የግጥሙን ኃላፊነት ሊሰጠኝ ይደፍራል፡፡

ሪፖርተር፡- የተነሳኸው ከቤተክርስቲያን መዝሙር ሲሆን፣ አሁን ሙዚቃ እየሠራህ ነው፡፡ በሁለቱ መካከል ተቃርኖ አለ ብለው የሚያምኑ ሰዎች አሉ፡፡ በሌላ በኩል የሙዚቃው መልዕክት የሚያመዝንባቸውም አሉ፡፡ ለአንተ በሁለቱ መካከል ያለው ሚዛናዊት ምንድነው?

ኤልያስ፡- ድሮ ቤተክርስቲያን ነን የሚሉም ከእግዚአብሔር ቃል ጋር ይስማማሉ በዬ አላምንም፡፡ አሁን ደግሞ መልዕክቶቹ ጥሩ ስለሆኑ ከመዝሙር ጋር ይቀራረባል ብዬ ሳይሆን፣ ይበልጣል ብዬ አስባለሁ፡፡ መዝሙር ለእኔ የእግዚአብሔር ቃል የሚመክረው ምክር ነው፡፡ ድሮ የነበርኩበት መንፈሳዊ ከሚባለው ከወጣሁ በኋላ በመጥፎ ጊዜ የተሠሩትም አሁን ያለውን አይመጥኑም፡፡ ስለዚህ እንኳን ወጣሁ እላለሁ፡፡ በሰዓቱ እንዳጠፋሁ ባውቅም አሁን እግዚአብሔርን አመሰግናለሁ፡፡

ሪፖርተር፡- ራስህን በአንድ ቃል ብትገልጽ ምን ትላለህ?

ኤልያስ፡- ከባድ ጥያቄ ነው፡፡ በአንድ ቃል መግለጽ ያስቸገራል፡፡ እኔ እስካሁን የተናገርኩትን ነኝ፡፡