‹‹ታሪክ ተደመሰሰ!››

ቢቢሲ ቴሌቪዥን በመጋቢት 23 ቀን 2009 ዓ.ም. ሥርጭቱ፣ በዓለም ሥልጣኔ ታሪክ ሁነኛ ሥፍራ ያላት/የነበራት ሞሱል ከተማ በጽንፈኛው እስላማዊ መንግሥት (ዳኢሽ) ከነቅርሷ መውደሟን ተከትሎ በዘገባው የገለጸው፡፡

ዳኢሽ ሞሱልን ለሁለት ዓመት ከመንፈቅ ከተቆጣጠረና በአገዛዙም አምስት ሺሕ ዓመታት ያስቆጠሩ ቅርሶች ያሉበትን ሙዚየም ዶግ አመድ በማድረግ የተለያዩ ሐውልቶችን በማፈራረስ የፈጸመው እኩይ ተግባር ‹‹ሥልጣኔን ማጥፋት ነው፤ ትውስታንም መደምሰስ ነው፤›› ብሎታል የቢቢሲው ጋዜጠኛ ጄርሚ ቦውን፡፡ በዋጋ የማይተመኑት የአሶርያውያንና የሱሜራውያንን አንቲካ ቅርሶች አንድም ተዘርፈዋል፤ አሊያም ተደምስሰዋል፡፡ ዳኢሾች እነዚያን በሞሱል ሙዚየም የነበሩትን ኪነ ቅርጾች ‹‹የሐሰተኛ አማልክት›› ምልክቶች ናቸው በማለት ነበር ያወደሟቸው፡፡ ‹‹ኩኒፎርም›› የሚባሉት የጡብ ላይ ጽሑፎች ቅድመ ፊደል የነበረውን አጻጻፍ የሚያሳዩ ለዘመኑ ሥልጣኔ ታላቅ አስተዋጽኦ ያደረጉት እነዚህ ቅርሶችም የጥፋቱ ሰለባ ሆነዋል፡፡ በሰሜን ኢራቅ ውስጥ የምትገኘው ሞሱል ከተማ የጥንቱ አሶር ግዛት ነነዌ ከተማ ነች፡፡