አዲሱን ድረ ገጽ ይሞክሩ!
አዲሱን ድረ ገጽ ይሞክሩ!

‹‹እኛም አለን ሙዚቃ…›› ከ83 ዓመት በፊት የባህል ኦርኬስትራ በ1926 ዓ.ም.

 

የዓይን አዋጅ

ከመንታ መንገድ ላይ መንታ ሆኗል ልቡ

አልተሰበሰበም አልሰከነም ቀልቡ፤

እንዲህ ያለ ትውልድ ምርጫ የበዛለት

ዕድሜው ሲሸራረፍ ያሻው ሳይሞላለት፤

ቀኝ ግራ! ቢለው ግራ ቀኝ! ይሆናል

ላንድ ዓይነት ገበያ ምርጫ ምን ይሠራል፡፡

* * * * * * *

ማሳለፍ ደጉ

ይህ መዘዘኛ ሰው ነገር የሚወጥር

ተው በሉት ተው ይማር መተው ደህና ነገር፤

የከረረ ነገር ሳይበጠስ አይቀር፡፡

- መላኩ ደምለው ወ/ጊዮርጊስ፣ ‹‹ብልጭታ›› (2008)

* * * * * * *

የጃፓኑ ትልቅ አሻንጉሊት አምራች ትራምፕን ለገበያ አቀረበ

ሳይጌትሱ የተሰኘ ትልቅ የጃፓን አሻንጉሊት አምራች ድርጅት፣ በአገሪቱ ከተወሰኑ ቀናት በኋላ የሚካሄደውን የሴቶች ቀን አከባበር ታሳቢ በማድረግ፣ ‹ትንሿን› የትራምፕ አሻንጉሊት ለገበያ ማቅረቡን ሮይተርስ ዘግቧል፡፡ በዓሉ በጃፓን ቤተሰቦች ቤታቸውን በትልልቅ አሻንጉሊቶች በማስዋብ ለሴት ልጆቻቸው ጤንነትን የሚመኙበት ነው፡፡ በርግጥ ለዚህ በግል ስጦታ ይገዛ ዘንድ ኩባንያው የትራምፕ አሻንጉሊትን ማምረቱ ያስገረማቸው አሉ፡፡ ‹‹ለሴቶችም ለሕፃናትም የሚሆን ሰው አይደለም ስለዚህ የኩባንያውን እርምጃ አልደግፈውም፤›› የሚሉ አንድ አስተያየት ሰጪ አሉ፡፡ የትራምፕ የቴሌቪዥን ጥሩ የማይባሉ አስተያየቶች በመጥቀስ ሐሳባቸውን የገለጹም አሉ፡፡

* * * * * * *

ሙሴቬኒ አስገድዶ ደፋሪዎች ሞት ይገባቸዋል አሉ

የኡጋንዳ ጦር ሠራዊት በተሰማራባቸው የሰላም ማስከበሮች ስኬታማ የሆነው ሕዝቡን ስለሚያከብር እንደሆነ የገለጹት የአገሪቱ ፕሬዚዳንት ሙሴቬኒ፣ አስገድዶ ደፋሪዎችን መግደል እንደሚገባቸው ተናገሩ፡፡ ‹‹ሰው ስትገድሉ እንገድላችኋለን፡፡ እናንተም ሴት አትድፈሩ፡፡ ሴት የሚደፍር ወታደር ይገደላል፤›› ማለታቸውን ዴይሊ ሞኒተር ኡጋንዳ ዘግቧል፡፡

* * * * * * *

መስማት የተሳናቸው አይጦች እንዲሰሙ ተደረገ

በሀርቫርድ ዩኒቨርሲቲ ሜዲካል ትምህርት ቤት በተሠራ ጥናት፣ መስማት የተሳናቸው አይጦች እንዲሰሙ መደረጉን አጃንስ ፍራንስ ፕሬስ ዘግቧል፡፡ ይህ ጥናት በኔቸር ባዮቴክኖሎጂ የታተመ ሲሆን፣ ይህ ጥናት ከዘር ጋር በተያያዘ መስማት ለማይችሉ ሕክምና ለማድረግ ትልቅ እመርታ ይሆናል ተብሏል፡፡ በሕክምና ትምህርት ቤቱ ፕሮፌሰር የሆኑት ኮንስታንቴና ስታንቮክ ‹‹በዘር የሚተላለፉ 100 ያለመስማት ችግሮችን የሚያስከስቱ ጂኖች ተለይተዋል፡፡ ስለዚህም ከዚህ ቴከኖሎጂ ብዙ ሕመምተኞች ተጠቃሚ ይሆናሉ ብለዋል፡፡ የዓለም ጤና ድርጅት መረጃ እንደሚያመለክተው በዘር በሚተላለፍ ችግር ምክንያት፣ በዓለም ላይ 125 ሚሊዮን ሰዎች ለመስማት ችግር ይጋለጣሉ፡፡ ከዚህ አንጻር የዚህ ጥናት ግኝትና እዚህ ጥናት ላይ ተመሥርተው የሚሠሩ ቀጣይ ጥናቶች ተጽእኖ ከፍተኛ እንደሚሆን ይታመናል፡፡