Monday, August 15, 2022
ሌሎች ዓምዶች
    - Advertisement -
    - Advertisement -
    ማኅበራዊበንግግር የሚያምን ትውልድ ለመፍጠር

    በንግግር የሚያምን ትውልድ ለመፍጠር

    ቀን:

    በኢትዮጵያ የተከሰተው የፖለቲካ ቀውስ ተጠራቅሞ ከመጣ ችግር የመነጨ መሆኑን የሚገልጹ ብዙዎች ናቸው፡፡ የቀደሙ አባቶች በፖለቲካ አመለካከት የነበረባቸውን ልዩነት አስታርቀው መሄድ ባለመቻላቸውም ለቀጣይ ትውልድ ቁርሾ አውርደዋል የሚሉም አይታጡም፡፡ በዚህና በተለያዩ ውስጣዊና ውጪያዊ ምክንያቶች ሲንከባለል የመጣው ፖለቲካዊ አለመግባባት በንግግር ሳይፈታ በመቅረቱ በአሁኑ ትውልድ ለተፈጠረው የፖለቲካ  አለመረጋጋት ጉልህ አስተዋጽኦ እንዳለው ‹‹የአሁኑ ትውልድ ጥያቄ ምንድነው?›› የሚለውና ‹‹በጦርነት መስዋዕት እየሆነ ያለው ወጣት ለእሱ ጥያቄ ነው ወይስ ለወረሰው የአባቶቹ ጥያቄ መልስ ለማግኘት›› የሚለው መልስ ሳያገኝ ቀርቶ ለብዙዎች መፍትሔ ያላገኘ መከራከሪያ ከሆነ ዓመታት ተቆጥረዋል፡፡

    የአሁኑ ትውልድ ጥያቄ ሥራ አጥነት ነው? ወይስ ሌሎች ጥያቄዎች አሉት? በትክክል የአሁኑ ትውልድ ጥያቄ ምንድነው? መስዋዕትነት የሚከፍልበት ጦርነትስ የትውልዱ ጥያቄ ነውን? የሚሉት ሁሉ ምላሽ የሚሹ ጥያቄዎች ከሆኑም ሰንብተዋል፡፡ እነዚህን ጥያቄዎች ለመመለስ ምክክርና ንግግር በእጅጉ አስፈላጊ መሆኑ የሚሰመርበት እዚህ ላይ ነው፡፡

    በአሁኑ ዘመን ያለውንም ፖለቲካዊ፣ ማኅበራዊና ኢኮኖሚያዊ ችግር ለመፍታት በሰከነና በተረጋጋ መንፈስ በወንበር ዙሪያ መምከር ግድ እንደሚል የሚናገሩም በርካቶች ናቸው፡፡

    የዘመኑ የጥላቻ ንግግሮች፣ ክፍፍል፣ ቂም በቀልና መሰል ችግሮች መፍቻ መንገዱ ጦርነት ሳይሆን ንግግር እንደሆነ ይታመናል፡፡

    ‹‹ሴንተር ፎር ናሽናል ኤንድ ሪጅናል ኢንተግሬሽን ስተዲስ›› (ሴንስ) የተሰኘው ግብረ ሠናይ ድርጅትም የውይይት አስፈላጊነትን በማጉላት ቅዳሜ ግንቦት 13 ቀን 2014 ዓ.ም. ‹‹በትውልዶች መካከል የሚደረግ ውይይት›› በሚል ርዕስ ውይይት አካሂዷል፡፡

    በኢትዮጵያ ሰላምና መረጋጋት ለማረጋገጥ መንገድ ነው ተብሎ በታመነበት በትውልዶች መካከል የሚደረግ የውይይት መድረክ፣ የፖለቲካ ፓርቲዎች፣ የዩኒቨርሲቲ ተማሪዎችና መምህራንና ሌሎችም ተሳታፊዎች ተገኝተዋል፡፡ የውይይት መነሻ ጽሑፍ ያቀረቡት የአዲስ አበባ ዩኒቨርሲቲ የፖለቲካና ዓለም አቀፍ ግንኙነት መምህር ዮናስ አሽኔ (ዶ/ር) ሲሆኑ፣ በጽሑፋቸው ውስጥም የችግሮች መፍቻ መንገዶችን አንፀባርቀዋል፡፡

    ዮናስ (ዶ/ር) እንደተናገሩት፣ ውይይት ባህል እንዲሆን የውይይት ሐሳብን በማኅበረሰቡ ውስጥ እንዲራመድ ማድረግ ሰላምን ለማስፈን ዕድል ይከፍታል፡፡

    የሰላም መንገድ መጀመሪያ ውይይትና ንግግር መሆኑን፣ ለዚህም ለጦርነት ዝግጅት እንደሚደረገው ሁሉ ሰላም ለማምጣትም በየቦታው ውይይቶች ያስፈልጋሉ፡፡ ለጦርነት ልምምድ እንደሚደረገው ሰላምን ለማምጣትም በሁሉም የኢትዮጵያ አካባቢዎች ብዙ ውይይቶች አስፈላጊ ናቸው፡፡

    ትምህርት ቤቶች፣ ዩኒቨርሲቲዎች፣ ሲቪክ ማኅበራት፣ ሚዲያዎችና ሌሎችም የሰላም ባለቤቶች ነን የሚሉ ሁሉ የውይይት መድረኮችን ማብዛት እንዳለባቸው አስረድተዋል፡፡

    በሁሉም የኢትዮጵያ አካባቢዎች መድረኮች በበዙ ቁጥር የጦር ምሽጎች እንደሚፈርሱ የገለጹት መምህሩ፣ መድረኩ ሲበዛ የጦር መሣሪያን የሰላም ማምጫ የመሰላቸው ሁሉ ውይይትን ይመርጣሉ ብለዋል፡፡

    በጦርነት፣ በግድያና በኃይል ብቻ ችግሮች ይፈታሉ የሚለውን የጦርነት ሥነ ዘዴ በመቀየር ወደ ንግግርና ምክክር ማምጣት እንደሚገባ፣ የአሁኑ ትውልድ ደግሞ በውይይትና በንግግር ችግሮችን የሚፈታ ትውልድ ለመሆን ማዳመጥን መልመድ እንዳለበት ዮናስ (ዶ/ር) ተናግረዋል፡፡

    ያለፉትን ጊዜያት መጥፎም ሆነ ጥሩ ታሪክ፣ ጥሩ ትውስታንና ቁስሎችን በማዳመጥ ችግሮችን በቀላሉ መፍታታ እንደሚቻል ይገልጻሉ፡፡

    ማኅበረሰቡ ገድሉን ሲያወራና ሲዘክር በጋራ መዘከር አስፈላጊ መሆኑን፣ ጉዳቱንም እውቅና በመስጠትና በመዘከር ሽረትን ማምጣት እንደሚቻል ገልጸዋል፡፡

    በጊዜ ሒደት ዕውቅና መስጠትና የኑሮ ሥነ ዘዴ በማድረግ አሁን ያለውን የኢትዮጵያ ችግር መፍታት እንደሚቻል አስረድተው፣ በየቦታው የንግግር፣ የምክክርና የመወያያ ልምድን ማዳበር እንደሚገባ ገልጸዋል፡፡

    የሚያዳምጥና የሚናገር ትውልድ ለመሆን፣ አሁን ንግግር፣ ምክክር፣ ውይይትና መደማመጥን መልመድና መጀመር እንደሚገባ ገልጸዋል፡፡ ለውይይት ደግሞ ሁሉም ግለሰብ ውስጡን መፈተሽ እንዳለበት፣ ይህም ብጥብጥ እንዲነግስ፣ እንዲገዝፍ፣ እንዲሠለጥን አድርጌያለሁ ብሎ ከማመን እንደሚጀምር አስረድተዋል፡፡

    የሰላም መንገድ የሚጀመረው ከራስ እንደሆነም ያስረዳሉ፡፡ ‹‹ችግሩ ያለው ጎረቤት ወይም ሌላ ቤት ሳይሆን፣ እኔ ቤት ነው›› ማለት እንደሚገባ፣ ይህ ባለመሆኑ ግን ድንጋይ የሚወረውር፣ ጦርነት የሚሰብክ፣ ለጦርነት የሚዘፍንና ጦርነትን የችግር መፍትሔ (አስቻይ) እንደሆነ የሚያምን ትውልድ እንዲፈጠር ምክንያት መሆኑን ይገልጻሉ፡፡ ከችግሮቿ ለመውጣት በመጀመሪያ ወደ ራስ፣ ወደ ብሔር ቁርሾ፣ ወደ ሃይማኖት መመልከትና መፈተሽ እንደሚገባ አስረድተዋል፡፡

    የውይይትና የንግግር መድረኮች በትምህርት ማዕቀፎች ውስጥ ቢገቡና በ30 እና 40 ዩኒቨርሲቲዎች ውስጥ ቢዘጋጁ ብዙ ችግሮች እንደሚቀረፉ የገለጹት ዮናስ (ዶ/ር)፣ ሚዲያዎችም የሰላም የንግግር ዐውዶችን ማመቻቸት እንዳለባቸው ጠቁመዋል፡፡

    የሲቪል ማኅበረሰብ ድርጅቶች የንግግር፣ የምክክር፣ የውይይት መድረኮች ላይ ማተኮር፣ ወላጆች ልጆቻቸውን በንግግርና ሌሎችን በመስማት ውስጥ በማሳደግ በንግግር የሚያምን ትውልድን መፍጠር እንደሚገባ ተናግረዋል፡፡

    የቀድሞ ትውልዶች የአሁኑን ትውልድ ማመን እንደሚገባቸውም አክለዋል፡፡ አምባሳደር ታደለች ኃይለ ሚካኤል በበኩላቸው፣ በትውልዶች መካከል መግባባት እንዲኖር መድረኮችን ማመቻቸት ይገባል ብለዋል፡፡

    በትውልዶች መካከል የሚደረግ ውይይት የሚያስፈልገውም፣ ከፋሺስት ወረራ በኋላ በነበረው የአገር መገንባት ትውልድ፣ ለጥቆም የአብዮት ትውልድ፣ ከዚያም በኋላ በየደረጃው ውስጥ በመጡ ለውጦች ያሉ ቅራኔዎች መፈታት ስላለባቸው እንደሆነ አምሳደሯ ገልጸዋል፡፡

    የታሪክ ሒደትን በምንገነዘብበት እንደ የትምህርት ተቋማትና በሌሎችም መንገድ በአገረ መንግሥት ግንባታ ላይ የነበረ ትውልድ፣ እስከ 50ዎቹ እና 60ዎቹ ከዚያም አሁን ድረስ ባለው ትውልድ መካከል ያላግባቡ አጀንዳዎች ምንድናቸው? የሚለውን ማጤን እንደሚገባም ጠቁመዋል፡፡

    ሁሉም የራሱ ግንዛቤና ጥያቄ እንዳለው የገለጹት አምባሳደር ታደለች፣ ክርክር ለመሸናነፍ ሳይሆን የተጎጂና የታሪክ አካሄዶች ትርክቶችን በተለያየ መልኩ ለመገንዘብ በመሞከር ተግባቦትን ለማምጣት መሆን እንዳለበት አስረድተዋል፡፡

    ብዙ ልሂቃኖች የሚወጡባቸው የትምህርት ተቋማት በራሳቸው መክሸፋቸውን፣ በብዙ ግለሰቦችና በሚዲያዎች የሚነገረውም የዚህ አገር ችግር የልሂቃኑ እንጂ የሕዝብ ማኅበረሰብ ችግር እንዳልሆነ ጠቁመዋል፡፡

    አሁን ላይ ከመንግሥት አልፎ በሕዝብ ደረጃ አለመግባባት እየታየ በመሆኑ፣ ይህ ለምን ሆነ? እነኚህ ልሂቃኖች ደጋፊዎቻቸውንና ተከታዮቻቸው የሚሰባሰቡበት መንገድ የቱ ነው? ልሂቃኖች ከየት ነው የወጡት? የልሂቃን ማፍሪያ ተቋም ምን እየሠሩ ናቸው? የሚሉ ጥያቄዎች መነሳት እንዳለባቸው ገልጸዋል፡፡

    ተቋሞቹ አካታች ካልሆኑ፣ በንግግር የማያምኑ ከሆነ አስቸጋሪ መሆኑን የገለጹት አምባሳደር ታደለች፣ አካታችነት ማለት የሌላውን ሐሳብ ለመስማት መዘጋጀት እንደሆነ አስረድተዋል፡፡

    ስለ አካታችነት የሚያወራ ሁሉ የእውነት የሌሎችን ሐሳብ ለመስማት ዝግጁ ነው ወይ? የሚለው ላይ ውይይት ሊደረግ ይገባል ብለዋል፡፡

    ዴሞክራሲ የሚገነባው የሌላውን ሐሳብ ለመስማት እንደሆነ፣ መስማማት እንደማይጠበቅበት፣ የተለያዩ አንድምታዎች ሊኖሩ እንደሚችሉ፣ ለመግባባት መነጋገር እንደሚያስፈልግ፣ የመወያያ መድረኮችም የሌላው ገድልና ቁስል እንዲገባን ለማድረግ አስፈላጊ እንደሆኑ ገልጸዋል፡፡

    በተቋም ደረጃ መክሸፍን የሚናገሩትም ቢሆኑ፣ ወጣቶች መሆናቸውን ያስረዱት አምባሳደሯ፣ ምንም ዓይነት የአካዴሚ ነፃነት፣ ንግግርና ውይይቶች በትምህርትና በሁሉም የዕድሜ ደረጃ ላይ ያሉ ዜጎችን ማሳተፍ እንዳለበት ጠቁመዋል፡፡

    አሁን ላለው አገራዊ ቀውስ በየደረጃው ያሉ ተቋማት፣ አስተዋጽኦ ስለሚያደርጉ ሰላምና ዕድገት ለማምጣት መወያየትና የመፍትሔ ሐሳብ ማምጣት እንደሚገባ ገልጸዋል፡፡ በትውልድ መካከል የሚደረግ ውይይት ብቻ ሳይሆን፣ በአንድ ትውልድ መካከል ውይይት መደረግ እንዳለበት፣ ሃይማኖትን፣ ትምህርትን፣ ብሔርን፣ መመልከት እንደሚገባ፣ የራስ ሐሳብ ሳይኖር በሌላው ትርክት እየተሞሉ መምጣት እንደማያስፈልግም ተናግረዋል፡፡

    አቶ ኢብራሂም ሙሳ በሥራ አስኪያጅነት የሚመሩት ‹‹ሴንስስ›› የሚባለው ግብረ ሠናይ ድርጅት፣ በሕዝብ መካከል መስተጋብርን መፍጠር እንዲሁም በምሥራቅና አፍሪካ በኢትዮጵያ ያለውን የሕዝቦች ትስስር ማጠናከር ዓላማ ያደረገ መሆኑን ገልጸዋል፡፡

    በኢትዮ- ኬንያ ድንበር ላይ የኢትዮጵያ ቦረናና የኬንያ ቦረና እንደሚገኙ የጠቆሙት አቶ ኢብራሂም፣ ድንበር አለያያቸው እንጂ መልካቸውና ሌሎች ነገሮቻቸው አንድ መሆኑ ምስክር ናቸው ብለዋል፡፡

    ከተመረጡ ርዕሰ ጉዳዮች ላይ በሰዎች መካከል መግባባት እንዲፈጠርና በንግግር መካከል ዕውቀትና ሐሳብ እንዲመረት ለማድረግ መድረኮችን ማመቻቸት የድርጅቱ ሥራ መሆኑን ሥራ አስኪያጁ ገልጸዋል፡፡

    ለአሁኑ የኢትዮጵያ ችግሮች የ50ዎቹና የ60ዎቹ ትውልዶች ያመጡት መሆኑ ቢገለጽም፣ አጀንዳው በትክክል ወደ ውይይት መጥቶ አልተሠራበትም ይላሉ፡፡

    በዋነኛነት የመድረኩ መዘጋጀት ዋና ዓላማ ተፈጥሮአዊ የሆነውን ‹‹ሰላም›› ለማምጣት አስተዋጽኦ ማድረግ እንደሆነም ገልጸዋል፡፡

    - Advertisement -

    ይመዝገቡ

    spot_img
    spot_img

    ተዛማጅ ጽሑፎች
    ተዛማጅ

    ለሰላም ድርድሩ ‹‹ከአፍሪካ ኅብረት አደራዳሪነት ውጭ ሌላው ተቀባይነት የለውም›› የውጭ ጉዳይ ሚኒስቴር

    የሰሜን ኢትዮጵያን ጦርነትና ግጭት በሰላማዊ መንገድ ለመፍታት የተጀመረው የአፍሪካ...

    በተጠናቀቀው የበጀት ዓመት በንብረት ላይ የደረሰው የትራፊክ አደጋ በ494 በመቶ ጨምሯል

    በትራፊክ አደጋ 3,971 ሰዎች ሕይወታቸውን አጥተዋል በአገር አቀፍ ደረጃ በተጠናቀቀው...

    አዲሱን የመንግሥት መዋቅር ዘርግተው ያጠናቀቁ ተቋማት 31 በመቶ ብቻ ናቸው

    በሲቪል ሰርቪስ ኮሚሽን ሥር ካሉት 160 የፌዴራል መንግሥት መሥሪያ...

    ለተቃርኖ ምክንያት የሚሆኑ ከንቱ ድርጊቶች ይወገዱ!

    ሰሞኑን የታላቁ የኢትዮጵያ ህዳሴ ግድብ ሦስተኛ ዙር የውኃ ሙሌት...