Tuesday, August 16, 2022
ሌሎች ዓምዶች
    - Advertisement -
    - Advertisement -
    ማኅበራዊየአዲስ አበባ ትምህርት ቢሮ በሠርተፍኬት ሲያስተምሩ የነበሩ 4000 መምህራንን በዲፕሎማ ሊያሠለጥን ነው

    የአዲስ አበባ ትምህርት ቢሮ በሠርተፍኬት ሲያስተምሩ የነበሩ 4000 መምህራንን በዲፕሎማ ሊያሠለጥን ነው

    ቀን:

    የአዲስ አበባ ትምህርት ቢሮ የትምህርት ጥራት ላይ ወሳኝ ሚና ያላቸውን መምህራን በማሠልጠን የጀመረውን ሥራ በማስቀጠል፣ በሠርተፍኬት ሲያስተምሩ የነበሩ 4000 የቅድመ አንደኛ ደረጃ (ሙዓለ ሕፃናት) መምህራንን ከሐምሌ 1 ቀን 2014 ዓ.ም. ጀምሮ ለቀጣይ ሦስት ዓመታት በዲፕሎማ ሊያሠለጥን መሆኑን አስታውቋል፡፡

    ቢሮው ከ80 ሚሊዮን እስከ 90 ሚሊዮን ብር የሚደርስ ወጪ በመመደብ ከዚህ ቀደም በሠርተፍኬት ሲያስተምሩ የነበሩ መምህራንን ወደ ዲፕሎማ ለማሸጋገር ባቀደው መሠረት፣ 2500 መምህራንን በደብረብርሃን መምህራን ኮሌጅ እንዲሁም 1,500 መምህራንን በአሰላ መምህራን ኮሌጅ አስገብቶ የሚያስተምር ይሆናል፡፡

    ከደብረ ብርሃን መምህራን ኮሌጅና ከአሰላ መምህራን ኮሌጅ ጋር ለቀጣይ ሦስት ዓመታት አብሮ ለመሥራት ቢሮው ሰኔ 20 ቀን 2014 ዓ.ም. ስምምነት ሲያደርግ የቢሮው ምክትል ኃላፊ አቶ ሳምሶን መለሰ እንደተናገሩት፣ ከግልና ከመንግሥት ትምህርት ቤቶች የተውጣጡ 4000 የቅድመ አንደኛ ደረጃ መምህራን ለቀጣይ ሦስት ዓመታት በዲፕሎማ ለመሠልጠን ዕድሉን ያገኙት፣ ሥልጠናውን ለመውሰድ ካመለከቱት ከ5000 በላይ መምህራን ውስጥ ኮሌጆቹ ለመግቢያ ያስቀመጡትን የመቁረጫ ነጥብ በማሟላታቸው ነው፡፡

    ከዚህ ቀደም በሠርተፍኬት እያስተማሩ የሚገኙ መምህራንን በዲፕሎማ ማሠልጠን ያስፈለገባቸው ምክንያቶች፣ የቅድመ አንደኛ ደረጃ መምህራንን ለማብቃት፣ የመምህራንን አቅም ለማሳደግና በአዲሱ የትምህርት መመርያ መሠረት የቅድመ አንደኛ ደረጃ መምህራን የትምህርት ዝግጅት ዲፕሎማ ስለሚጠይቅ እንደሆነ ተናግረዋል፡፡

    ከሦስት ዓመት በፊት ከሰባት ሺሕ መምህራን በላይ በሠርተፍኬት ተመርቀው በመንግሥትና በግል ትምህርት ቤቶች ያስተምሩ እንደነበር ያስታወሱት አቶ ሳምሶን፣ ከእነዚህ ውስጥ ሥራ የለቀቁ ሊኖሩ ቢችሉም፣ 2000 ያህል በዲፕሎማ ማሠልጠናቸውን አስታውሰዋል፡፡

    ሥልጠናው ሁሉም ሕፃናት ጥራቱን የጠበቀ ትምህርት እንዲያገኙና ሕፃናትን ያማከለ የትምህርት ሥልጠና ለመስጠት ከማገዙም በላይ፣ የመምህራን እጥረትና ደረጃ ላይ ያለውን ችግር ለመቅረፍ ያስችላል ብለዋል፡፡

    የአዲስ አበባ ትምህርት ቢሮ ኃላፊ አቶ ዘላለም ሙላቱ በበኩላቸው፣ የመምህራንን አቅም ማጎልበትና በተለያዩ ስልጠናዎች ማብቃት የትምህርት ጥራትን ለማረጋገጥ ዋነኛው ተግባር መሆኑን ገልጸው፣ የቅድመ አንደኛ ደረጃ ትምህርት የሚያስተምሩ መምህራን የትምህርት ደረጃቸውን ከሠርተፊኬት ወደ ዲፕሎማ ማሳደጋቸው በአዲሱ ሥርዓተ ትምህርት ለትምህርት ዕርከኑ የተቀመጠውን ደረጃ ለማሟላት ከማገዙ ባሻገር በቅድመ አንደኛ ደረጃ ያለውን የመምህራን እጥረት ለመቅረፍ እንደሚረዳ አስታውቀዋል።

    የትምህርት ዕድሉን ያገኙ ሠልጣኝ መምህራን ትምህርታቸውን በአግባቡ ተከታትለው በማጠናቀቅ ሕፃናቱ ማግኘት የሚገባቸውን ዕውቀት ማስጨበጥ እንደሚጠበቅባቸው አሳስበዋል፡፡

    በአዲስ አበባ በ11 ክፍላተ ከተሞች በግልና በመንግሥት ትምህርት ተቋማት የሚገኙ ከ5,600 በላይ መምህራን ለሥልጠናው ተመዝግበው የነበረ ቢሆንም፣ ኮሌጆቹ ያስቀመጡትን የመግቢያ ነጥብ ያሟሉት 4000 ብቻ በመሆናቸው ትምህርት ቢሮው ሁሉንም መምህራን ወደ ኮሌጆቹ ለማስገባት መወሰኑም ታውቋል፡፡ ትምህርቱም በክረምትና በቅዳሜና እሑድም ለሦስት ዓመታት የሚሰጥ ይሆናል፡፡

    - Advertisement -

    ይመዝገቡ

    spot_img
    spot_img

    ተዛማጅ ጽሑፎች
    ተዛማጅ

    ለሰላም ድርድሩ ‹‹ከአፍሪካ ኅብረት አደራዳሪነት ውጭ ሌላው ተቀባይነት የለውም›› የውጭ ጉዳይ ሚኒስቴር

    የሰሜን ኢትዮጵያን ጦርነትና ግጭት በሰላማዊ መንገድ ለመፍታት የተጀመረው የአፍሪካ...

    በተጠናቀቀው የበጀት ዓመት በንብረት ላይ የደረሰው የትራፊክ አደጋ በ494 በመቶ ጨምሯል

    በትራፊክ አደጋ 3,971 ሰዎች ሕይወታቸውን አጥተዋል በአገር አቀፍ ደረጃ በተጠናቀቀው...

    አዲሱን የመንግሥት መዋቅር ዘርግተው ያጠናቀቁ ተቋማት 31 በመቶ ብቻ ናቸው

    በሲቪል ሰርቪስ ኮሚሽን ሥር ካሉት 160 የፌዴራል መንግሥት መሥሪያ...

    ለተቃርኖ ምክንያት የሚሆኑ ከንቱ ድርጊቶች ይወገዱ!

    ሰሞኑን የታላቁ የኢትዮጵያ ህዳሴ ግድብ ሦስተኛ ዙር የውኃ ሙሌት...