Thursday, August 18, 2022
ሌሎች ዓምዶች
    - ማስታወቂያ -
    - ማስታወቂያ -

    ከአቅሙ በታች እያመረተ ነው የተባለው ቢሾፍቱ አውቶሞቲቭ ኢንዱስትሪ ዕዳው 12.6 ቢሊዮን ብር ደረሰ

    - ማስታወቂያ -

    ተዛማጅ ፅሁፎች

    የቢሾፍቱ አውቶሞቲቭ ማምረቻ ኢንዱስትሪ የማምረት አቅም ከስታንዳርድ በታች እያመረተ እንደሚገኝ የፌዴራል ዋና ኦዲተር መሥሪያ ቤት ሪፖርት አመላከተ፡፡ ምርት ለማምረት በገባው ውለታ መሠረት ተሽከርካሪዎችን አምርቶ ማስተላለፍ እንዳልቻለ፣ የማምረት አቅሙ ከጊዜ ጊዜ እየወረደና ገቢውም እየቀነሰ መሆኑን፣ እስካሁን 12.6 ቢሊዮን ብር የአገር ውስጥና የውጭ ብድር ዕዳ እንዳለበት በዋና ኦዲተር ሪፖርት ቀርቧል፡፡

    በሌላ በኩል ገበያን መሠረት ያደረገና ገበያ ተኮር ምርትና አገልግሎት እያመረተ እንደማያቀርብ፣ የበለጠ ክምችትን በሚያሳድግና ትርፋማነትን በሚያቀጭጭ አሠራር እያመረተ መሆኑ በሪፖርቱ ተገልጿል፡፡

    በተጨማሪም ቢሾፍቱ አውቶሞቲቭ ኢንዱስትሪ አፈጻጸሙ ከጊዜ ጊዜ እየወረደ ሀብት አጠቃቀሙ በዕቅድ ያልተመራና ለብክነት የተጋለጠ መሆኑን፣ ለረዥም ዓመታት የምርት ክምችት በመፍጠር ተሽከርካሪዎቹ ላልተፈለገ ብልሽት መዳረጋቸው በቂ የመንቀሳቀሻ ገንዘብ እንዳይኖረው ምክንያት መሆናቸው በሪፖርቱ ተጠቁሟል፡፡

    በማምረቻ ኢንዱስትሪው ሪፈራል ጋራዥ ውስጥ ከተለያዩ የአገሪቱ ክፍሎች ለጥገና ገብተው ሳይጠገኑ ለረዥም ዓመታት የቆሙ በርካታ ተሽከርካሪዎች ሳይወገዱ ተከማችተው ለፀሐይ፣ ለዝናብ፣ ለአቧራና ለሙቀት ከመጋለጣቸውም በላይ፣ በአፈር እየተበሉ በግቢው ውስጥ በሚገኝ ጫካና ሜዳ ላይ ሳር በቅሎባቸው ተበታትነው እንደሚገኙ ተገልጿል፡፡

    ቢሾፍቱ አውቶሞቲቭ ኢንዱስትሪ

    የማምረቻ ኢንዱስትሪው የግዥ ሥርዓት ሕግና አሠራርን ያልተከተለ፣ ቀልጣፋና ወጪ ቆጣቢ አለመሆኑን የጠቆመው የኦዲት ሪፖርቱ፣ ተቋሙ ለሥራ መጓተትና ለሠራተኛ እሮሮ የተጋለጠ መሆኑን አስረድቷል፡፡ ለአብነት ኅዳር 1 ቀን 2011 ዓ.ም. ተሻሽሎ በወጣው የግዥ አፈጻጸም መመርያ መሠረት በግዥው ባህሪና በዋጋ መጠን ላይ ተንተርሶ እንደ አስፈላጊነቱ በአገር አቀፍና ዓለም አቀፍ ጨረታ አወዳድሮ ግዥ ማከናወን እንዳለበት በግልጽ ቢቀመጥም፣ ያላግባብ የወጣ አጠቃላይ ዋጋው 952 ሚሊዮን ዶላርና 27 ሚሊዮን ዩሮ ስምምነት ከሕግ አግባብ ውጪ መካሄዱ በሪፖርቱ ተብራርቷል፡፡

    በቢሾፍቱ አውቶሞቲቭ ኢንዱስትሪው እስከ 2012 ዓ.ም. ድረስ ሠራተኞችን ያለ ምንም የትምህርት ማስረጃና የሥራ ልምድ የሚቀጠሩበት ሁኔታ እንደነበር ያመላከተው የኦዲት ሪፖርቱ፣ በ2013 ዓ.ም. በኢንዱስትሪው ፕሮጀክቶች አገልግሎት (IPS) በተጠና መዋቅርና አደረጃጀት መሠረት ከ800 በላይ ሠራተኞች አስፈላጊውን የትምህርትና የሥራ ልምድ ማሟላት አልቻሉም ተብለው ከተቋሙ መባረራቸው፣ በዚህም ምክንያት ልምድ ያላቸውን በርካታ ሠራተኞችን እንዳጣ ተገልጿል፡፡

    በሌላ በኩል የቢሾፍቱ አውቶሞቲቭ ማምረቻ ኢንዱስትሪ ለአበልና ለልዩ ልዩ ክፍያዎች የሚወጡ ወጪዎች ደንብና መመርያን መሠረት ያላደረጉ መሆናቸውን፣ እንዲሁም ከተቋቋሙበት ዓላማ ውጪ የማበደር ሕግና መብት ሳይኖረው ለድጋፍ በሚል ለንጋት ኮከብ ትራንስፖርት አገልግሎት አክሲዮን ማኅበር 16 ሚሊዮን ብር ማበደሩ በኦዲት ሪፖርቱ ተጠቅሷል፡፡

    - Advertisement -spot_img

    የ ጋዜጠኛው ሌሎች ፅሁፎች

    - ማስታወቂያ -
    - ማስታወቂያ -spot_img

    በብዛት ከተነበቡ ፅሁፎች