Friday, August 19, 2022
ሌሎች ዓምዶች
    - ማስታወቂያ -
    - ማስታወቂያ -

    መንግሥት የምግብ ዋጋ ግሽበት ቀንሷል ቢልም የዋጋ ንረቱ መቀጠሉን ሸማቾች ገለጹ

    - ማስታወቂያ -

    ተዛማጅ ፅሁፎች

    የማዕከላዊ ስታስቲክስ አገልግሎት ይፋ በሚያደርገው የሸማቾች ዋጋ መመዘኛ ሪፖርት በሰኔ ወር በተለይም የምግብ ዋጋ ግሽበት አንፃራዊ ቅናሽ ቢስተዋልበትም፣ በምግብ እህሎች ላይ የዋጋ ንረቱ መቀጠሉን ሸማቾች ገለጹ፡፡

    አገልግሎቱ በተለይም ባለፈው ግንቦት ወር በምግብ ዋጋ ግሽበት ፈጣን ዕድገት ከመመዝገቡ ጋር ተያይዞ የተመዘገበው አኃዝ  43.9 በመቶ መድረሱን አመላክቶ፣ ይህ አኃዝ አንፃራዊ መረጋጋት ተመዝግቦበት በሰኔ 2014 ዓ.ም. ወደ 38.1 በመቶ ዝቅ ማለቱን አስታውቋል፡፡

    ሪፖርተር በተለያዩ የገበያ ሥፍራዎች የሚሸምቱ ነዋሪዎችን በተለይም ከሰኔ ወር አንስቶ እስከ ተያዘው ወቅት ያለውን የምግብ እህሎት ዋጋ በተመለከተ ባቀረበው ጥያቄ፣ በየጊዜው የሚስተዋለው ዋጋ ጭማሪ አሁንም የቀጠለ መሆኑን ተረድቷል፡፡

    በአዲስ አበባ በተለምዶ እንግሊዝ ኤምባሲ አካባቢ ነዋሪ የሆኑትና እሳቸውን ጨምሮ ለአምስት ቤተሰቦቻቸው አስፈላጊውን የምግብ ሸቀጦች ከሾላ ገበያ እንደሚሸምቱ የተናገሩት ወ/ሮ አዲስ ዓለም ለማ፣ በሰኔ እንዲሁም የሐምሌ ወር ከገባ አንስቶ ባሉት ቀናት መሠረታዊ ናቸው በሚባሉት ሸቀጦች ላይ የሚስተዋለው የዋጋ ንረት የቀጠለ መሆኑን ተናግረዋል፡፡

    ለአብነትም ከሰኔ ወር አንስቶ አምስት ሊትር ፈሳሽ ዘይት ከ1,000 እስከ 1,050 ብር፣ አንድ ኪሎ መኮሮኒና ሩዝ 55 እና 50 ብር፣ አንድ ኪሎ የፉርኖ ዱቄት ከ50 እስከ 60 ብር በሆነ ዋጋ መሸመታቸውን የተናገሩት ወ/ሮ አዲስዓለም፣ ከዚህ ቀደም በኪሎ 47 ብር ሲገዙት የቆዩት የቀይ ጤፍ 50 ብር መግባቱን አስታውቀዋል፡፡

    በሌላ በኩል በሳር ቤት አካባቢ ነዋሪ መሆናቸውን ለሪፖርተር ያስታወቁት ወ/ሮ ሜሮን ተሾመ በምግብ ሰብሎች እንዲሁም የፋብሪካ ውጤቶች ላይ ከሳንቲም አንስቶ እስከ 50 ብር የሚደርስ  የዋጋ ለውጥ በየጊዜው የሚያጋጥማቸው መሆኑን ገልጸዋል፡፡

    ፓስታ በፍሬ ከዚህ ቀደም ይገዙበት ከነበረበት ዋጋ አሥር ብር በመጨመር 40 ብር መድረሱን ያስረዱት ነዋሪዋ፣ ከዚያ ውጭ በሰኔ ወር 170 ብር ሲሸጥ የነበረውን አምስት ኪሎ የፉርኖ ዱቄት በ200 ብር፣  የአምስቱን ሊትር ፈሳሽ ዘይት በ1,000 ብር፣ በፍሬ 30 ብር የነበረው የሞራ ሳሙና ከ45 እስከ 50 ብር መሸመታቸውን አብራርተዋል፡፡

    የሰብል ውጤቶች በሚባሉት እህሎች ላይ ከሰሞኑ የዋጋ ጭማሪ መስተዋሉን የገለጹት ወ/ሮ ሜሮን፣ በዚህም ጤፍ በሸማች ወፍጮ ቤቶች በኪሎ ከ46 እስከ 56 ብር በሚደርስ ዋጋ ሲሸጥ በመደበኛ ወፍጮ ቤቶች ደግሞ ከ55 ብር እስከ 60 ብር ይሸጣል ብለዋል፡፡

    በሰኔ ወርና ከዚያ ቀደም በነበሩት ወራት አንድ ኪሎ በቆሎ ከ30 እስከ 35 ብር ሲሸጥ መቆየቱን ሸማቾች አስታውቀው፣ በዚህ ወቅት በ40 ብር እንደሚሸጥ፣ ከሸማቾች መደብር በ170 ብር ይቀርብ የነበረው ስኳር 230 ብር እየተሸጠ ይገኛል በማለት ያለውን ወቅታዊ የገበያ ሁኔታ አስረድተዋል፡፡

    የማዕከላዊ ስታስቲክስ አገልግሎት በሰኔ ወር 2014 ዓ.ም የታየው የዋጋ ግሽበት መልካም የሚባል ደረጃ ላይ ይገኛል ሲል በሪፖርቱ ያመላከተ ሲሆን፣ በተጠቀሰው ወር የምግብ ዋጋ ግሽበት በመጠኑ መረጋጋት የታየበት፣ በተቀራኒው ደግሞ ምግብ ነክ ያልሆኑ የኢንዴክሱ ክፍሎች የመጨመር ሁኔታ ማሳየታቸውን አሳውቋል፡፡

    በሰኔ ወር በእህሎችና አትክልት ዋጋ ላይ መጠነኛ ጭማሪ መታየቱ በአገልግሎት ተቋሙ ሪፖርት ላይ የተመላከተ ሲሆን፣ ከዚህ በተጨማሪም የሚቀዳ የምግብ ዘይት ዘይትና ቅቤ፣ ቡናና ለስለሳ መጠጦች ጭማሪ ማሳየታቸው፣ በሌላ በኩል ከውጭ የሚመጣው የምግብ ዘይት ላይ መጠነኛ ቅናሽ መመዝገቡን ቀርቧል።

    በጠቅላላው የሰኔ ወር አጠቃላይ የዋጋ ግሽበት መጠን 34.0 በመቶ የምግብ ዋጋ ግሽበት 38.1 በመቶ እንዲሁም ምግብ ነክ ያልሆኑ የዋጋ ግሽበት 28.4 ሆነው መምዘገባቸውን የማዕከላዊ ስታስቲክስ ሪፖርት ሲያሳይ፣ በአንፃሩ በተለያየ አካባቢ የሚገኙ ሸማቾች በምግብ ነክ ሆነ ምግብ ነክ ባልሆኑ ሸቀጦች ዋጋ ላይ በየወቅቱ የሚደረገው የዋጋ ጭማሪ መቀጠሉን አስታውቀዋል፡፡

    - Advertisement -spot_img

    የ ጋዜጠኛው ሌሎች ፅሁፎች

    - ማስታወቂያ -
    - ማስታወቂያ -spot_img

    በብዛት ከተነበቡ ፅሁፎች