Monday, August 8, 2022
ሌሎች ዓምዶች
    - ማስታወቂያ -
    - ማስታወቂያ -

    ዓመታዊ ትርፍን ጨምሮ በተለያዩ መለኪያዎች ከፍተኛ ውጤት ያስመዘገበው የኢትዮጵያ ንግድ ባንክ

    - ማስታወቂያ -

    ተዛማጅ ፅሁፎች

    የኢትዮጵያ ንግድ ባንክ በ2014 የሒሳብ ዓመት በተቀማጭ ገንዘብ አሰባሰብ፣ በብድር አቅርቦትና በትርፍ ምጣኔው ከዕቅዱ በላይ ማከናወን መቻሉንና ለተለያዩ የኢኮኖሚ ዘርፎች የሰጠውን አዲስ ብድር በ67 በመቶ በማሳደግ ከ179.2 ቢሊዮን ብር በላይ ብድር ማቅረቡን አስታወቀ፡፡ 

    ባንኩ የ2014 ዓ.ም. የሥራ አፈጻጸሙን ይፋ ያደረጉት የባንኩ ፕሬዚዳንት አቶ አቤ ሳኖ፣ በተለይ የተቀማጭ ገንዘብ መጠኑን ክምችት 890.1 ቢሊዮን ብር አድርሷል፡፡ ይህም በሒሳብ ዓመቱ የተቀመጭ ገንዘብ መጠኑን በ21 በመቶ እንዲያድግ አስችሎታል፡፡

    ባንኩ በሒሳብ ዓመቱ አጠቃላይ የተቀማጭ ገንዘብ መጠኑን በ112.8 ቢሊዮን ብር ለማሳደግ አቅዶ ሲሠራ የቆየ ቢሆንም፣ በሒሳብ ዓመቱ መጨረሻ ላይ ግን 154.9 ቢሊዮን ብር አዲስ ተቀማጭ ገንዘብ ማሰባሰብ ችሏል፡፡ ይህም ከዕቅዱ አንፃር የ137 በመቶ መፈጸም እንደሚያሳይ የሚያመለክት ነው፡፡

    በተጨማሪም ከባንኩ ዋና የትኩረት አቅጣጫ ከሆነው የግሉ ዘርፍ 105.6 ቢሊዮን ብር ለማሰባሰብ እንደቻለ የገለጹት አቶ አቤ፣ ይህም ከግል ዘርፍ ብቻ የተሰበሰበውን አጠቃላይ የተቀማጭ ገንዘብ ክምችት 655.4 ቢሊዮን ብር አድርሶታል። በመሆኑም ከባንኩ አጠቃላይ የተቀማጭ ገንዘብ ክምችት ውስጥ የግል ዘርፉ ድርሻ 74 በመቶ ይዟል፡፡ 

    በአጠቃላይ የባንኩ የተቀማጭ ገንዘብ ክምችት በሒሳብ ዓመቱ መጀመርያ ላይ ከነበረው 735.2 ቢሊዮን ብር የ21 በመቶ ዕድገት በማስመዝገብ ወደ 890.1 ቢሊዮን ብር ለማድረስ መቻሉን አቶ አቤ ተናግረዋል፡፡ 

    ባንኩ ከሰጣቸው የተለያዩ ብድሮች 120.6 ቢሊዮን ብር የሰበሰበ ሲሆን፣ ይህም ከዕቅድ አንፃር ተቀራራቢ የሆነ አፈጻጸም ያሳየ ሲሆን፣ ከአምና ተመሳሳይ ወቅት ጋር ሲነፃፀር የ102.5 በመቶ ብልጫ አለው ተብሏል፡፡ 

    በሒሳብ ዓመቱ ባንኩ 179.2 ቢሊዮን ብር አዲስ ብድር ለተለያዩ የኢኮኖሚ ዘርፎች መስጠቱንም ባንኩ አመልክቷል፡፡ ከዚህም ውስጥ 34 ቢሊዮን ብር ለግሉ ዘርፍ የተሰጠ መሆኑን ሪፖርቱ አመልክቷል፡፡ ባንኩ በሒሳብ ዓመቱ ለተለያዩ የኢኮኖሚ ዘርፎች ያቀረበው የብድር መጠን ካለፈው ዓመት ተመሳሳይ ወቅት ጋር ሲነፃፀር የ67.6 በመቶ ዕድገት ማሳየቱንም ከቀረበው ሪፖርት ለመረዳት ተችሏል፡፡ ባንኩ እሰጣለሁ ብሎ አቅዶ የነበረው ግን 131.6 ቢሊዮን ብር በመሆኑ አፈጻጸሙ ከዕቅድ በላይ እንደሆነ ተመልክቷል፡፡  

    በሒሳብ ዓመቱ ወደ 7.7 ቢሊየን ዶላር በመንግሥት ትኩረት ለተሰጣቸው ለተለያዩ የገቢ ዕቃዎችና ሌሎች የውጭ ምንዛሪ ክፍያዎች የተፈጸሙ መሆናቸውን የገለጹት አቶ አቤ፣ ከዚህ ውስጥ ለግሉ ዘርፍ 1.4 ቢሊዮን ዶላርና ለማዳበሪያና ሌሎች ግብዓቶች 995 ሚሊዮን ዶላር የተከፈለ መሆኑ ታውቋል፡፡ ባንኩ በሒሳብ ዓመቱ ያቀረበው አጠቃላይ የውጭ ምንዛሪ ካለፈው ዓመት ተመሳሳይ ወቅት ጋር ሲነፃፀር የ48.2 በመቶ ብልጫ ያለው ነው ተብሏል፡፡  

    የኢትዮጵያ ንግድ ባንክ በ2014 የሒሳብ ዓመት አገኛለሁ ብሎ ያቀደው ያልተጣራ ትርፍ 23.6 ቢሊዮን ብር ቢሆንም፣ በዓመቱ መጨረሻ ላይ ከዕቅዱ በላይ 27.5 ቢሊዮን ብር ያልተጣራ ትርፍ በማግኘት አዲስ ታሪክ አስመዝግቧል፡፡ በዚህም መሠረት በሒሳብ ዓመቱ መጨረሻ ያገኘው ያልተጣራ ትርፍ መጠን ከዕቅድ አንፃር የ116.3 በመቶ ብልጫ የተመዘገበበት ሲሆን ፣ ካለፈው ዓመት ተመሳሳይ ወቅት ጋር ሲነፃፀር ደግሞ የ43.9 በመቶ ዕድገት ማሳየቱ ተገልጿል፡፡ 

    ባንኩ በሒሳብ ዓመቱ የዕቅዱን ያህል አፈጻጸም ያላገኘበት የውጭ ምንዛሪ ግኝት ነው፡፡ የሒሳብ ዓመቱ ሲጀመር አገኛለሁ ብሎ ያቀደው 2.96 ቢሊዮን ዶላር ሲሆን፣ አፈጻጸሙ ግን 2.6 ቢሊዮን ዶላር ነው፡፡ በበጀት ዓመቱ ከወጪ ንግድ 282.3 ሚሊዮን ዶላር፣ ከውጭ ምንዛሪ ግዥ 187.3 ሚሊዮን ዶላር፣ ከውጭ ሐዋላ 2.2 ቢሊዮን የዶላር በድምሩ 2.6 ቢሊየን ዶላር አግኝቷል፡፡ ይህም ከዕቅድ አንፃር ሲታይ የ89.2 በመቶ አፈጻጸም የታየበት ሲሆን፣ ካለፈው ዓመት ተመሳሳይ ወቅት ጋር ሲነፃፀር ተመሳሳይ አፈጻጸም እንደሆነ ተገልጿል።

    የኢትዮጵያ ንግድ ባንክ በሒሳብ ዓመቱ 124 አዳዲስ ቅርንጫፎች የተከፈተ ሲሆን፣ ይህም ጠቅላላ የቅርንጫፎቻችን ብዛት 1,824 አድርሷል፡፡ በበጀት ዓመቱ ከተከፈቱት ቅርንጫፎችም 1.84 ቢሊዮን ተጨማሪ ተቀማጭ ገንዘብ ለመሰብሰብ መቻሉም ተጠቅሷል፡፡ 

    ባንኩ የገንዘብ አስቀማጭ ደንበኞቹን ቁጥር ከማሳደግ አንፃር በሠራው ሥራ  2.9 ሚሊዮን አዳዲስ ሒሳቦችን መክፈት መቻሉን በመግለጽ፣ በሒሳብ ዓመቱ መጨረሻ ላይ አጠቃላይ ገንዘብ አስቀማጭ ደንበኞቻችን ብዛት ወደ 35.9 ሚሊዮን ማድረስ ችሏል፡፡ 

    ከእነዚህ አጠቃላይ የአስቀማጭ ደንበኞች ቁጥር ውስጥ አምስት ሚሊዮን የወለድ አልባ አገልግሎት ተጠቃሚዎች መሆናቸው ታውቋል፡፡ ባንኩ ከዚህ የአገልግሎት ዘርፍ የሰበሰበው ተቀማጭ 69.6 ቢሊዮን ብር የደረሰ ሲሆን፣ ይህም ባንኩ ሁሉንም የኅብረተሰብ ክፍል ያማከለ አገልግሎት ለመስጠት እያደረገ ያለው ጥረት ፍሬ እያፈራለት እንደሆነ ገልጿል። ከፋይናንስ ተደራሽነትም አንፃር በወለድ አልባ አገልግሎት ዘርፍ 9.3 ቢሊዮን ብር ብድር መስጠት መቻሉን አቶ አቤ ባቀረቡት ሪፖርት ላይ ገልጸዋል፡፡  

    የኢትዮጵያ ንግድ ባንክ በአሁኑ ወቅት የሀብት መጠኑ ከ1.2 ትሪሊዮን ብር በላይ መሆኑን ሪፖርቱ አመልክቷል፡፡ ባንኩ ዓመታዊ ሪፖርቱን ባቀረበበት ፕሮግራም ላይ የተገኙት የባንኩ ዳሬክተሮች ቦርድ ሊቀመምንር አቶ ተክለወልድ አጥናፉ (የቀድሞው የብሔራዊ ባንክ ዋና ገዥ) የኢትዮጵያ ንግድ ባንክን ጨምሮ የአገሪቱ ባንኮች ለአገራዊ የኢኮኖሚ ዕድገት የበኩላቸውን አስተዋጽኦ እያበረከቱ እንደሆነ ገልጸዋል፡፡ 

    የኢትዮጵያ ኢኮኖሚ ዕድገት ሳይንገጫገጭ እንዲቀጥልና የአገሪቱ ኢኮኖሚ በየጊዜው እንዲያድግ የፋይናንስ ዘርፉ፣ በተለይም ባንኮች (ንግድ ባንክን ጨምሮ) እያደረጉት ያለው አስተዋጽኦው ከፍተኛ መሆኑን ጠቅሰዋል፡፡ 

    ለአገሪቱ ኢኮኖሚ ከፍተኛ አስተዋጽኦ ለሚያደርጉ የኢኮኖሚ ዘርፎች በተለይም ለግብርና፣ ለኢንዱስትሪና ለሌሎች ወሳኝ ዘርፎች ከመቼውም ጊዜ የበለጠ ብድርና ሌሎች የባንክ አገልግሎቶቹን እንዲያገኙ ማድረግ መልሶ ባንኮችን የሚጠቅምና ዕድገታቸው እንዲቀጥል የሚያድረግ በመሆኑ፣ በዚሁ መንገድ መቀጠል እንዳለባቸውም አመልክተዋል፡፡ 

    በዚሁ መሠረት የኢትዮጵያ ንግድ ባንክ አቅም በፈቀደ መልኩ ብድር እየሰጠ ስለሆነ ለአገር ኢኮኖሚ ዕድገት አስተዋጽኦ እያደረገ መሆኑን የገለጹት አቶ ተክለ ወልድ ሀብት በመሰብሰብም ሆነ የተሰበሰበውን ሀብት ለሚመለከታቸውና ጠቃሚ ለሆኑ ዘርፎች በመስጠት በኩልም በ2014 ዓ.ም. ጥሩ ውጤት መገኘቱን ገልጸዋል፡፡ 

    የኢትዮጵያ ንግድ ባንክ አቅም በፈቀደ መልኩ ብድር እየሰጠ መሆኑን የጠቀሱት አቶ ተክለወልድ፣ ባንኩ በተለይም ለግብርናው ዘርፍ፣ ለማዳበሪያ ግዥና ለመሳሰሉት በ2014 ዓ.ም. ወደ 60 ቢሊዮን ብር ብድር በመስጠት ለአገራዊ የኢኮኖሚ ዕድገት ድጋፍ ሆኖ መቀጠሉን አመልክተዋል።

    ይህ የብድር መጠን ባንኩ ለዚህ ዘርፍ የሰጠው ከፍተኛ ብድር እንደሆነም የቦርድ ሊቀመንበሩ አክለዋል፡፡ ሌሎች ባንኮችም የኢትዮጵያን ዕድገት ለማስቀጠል ለግብርናና መሰል ዘርፎች የሚቀርቡትን ብድር እያሳደጉ ቢሄዱ ለአገራዊ ኢኮኖሚው ግዙፍ ፋይዳ እንደሚኖረው ጠቅሰዋል፡፡  አክለውም የኢትዮጵያ ንግድ ባንክ ከወቅታዊ፣ አገራዊና ዓለም አቀፋዊ ሁኔታዎች አንፃር ያስመዘገበው ውጤት ጥሩ መሆኑን ገልጸዋል፡፡ ነገር ግን ማሻሻል የሚገባቸውን ሥራዎች በማሻሻል በቀጣዩ የሥራ ዘመን ከዚህ በበለጠ ለመሥራት መዘጋጀት እንደሚገባ አሳስበዋል፡፡ 

    - Advertisement -spot_img

    የ ጋዜጠኛው ሌሎች ፅሁፎች

    - ማስታወቂያ -
    - ማስታወቂያ -spot_img

    በብዛት ከተነበቡ ፅሁፎች