Monday, August 8, 2022
ሌሎች ዓምዶች

    ሕወሓት ወደ ትግራይ ለሚመጡ የፌዴራል መንግሥት ሠራተኞች ዋስትና እሰጣለሁ አለ

    - Advertisement -spot_img

    በብዛት የተነበቡ

    የፌዴራል መንግሥት መሠረታዊ አገልግሎቶች ለመጀመር ሠራተኞችን ወደ ትግራይ የሚልክ ከሆነ ሕወሓት ለደኅንታቸው ዋስትና እንደሚሰጥ አስታወቀ፡፡

    የክልሉ መሪ ደብረጽዮን ገብረ ሚካኤል (ዶ/ር) በዓለም አቀፉ ማኅበረሰብ በኩል ለፌዴራል መንግሥት እንዲደርስ ያደረጉት ደብዳቤ ለፌዴራል ሠራተኞች የደኅንነት ዋስትና እንደሚሰጡ ያሳወቁ ሲሆን፣ አገልግሎቶቹ እንዳይጀመሩ የሚያደርጉ ምንም እንቅፋት እንደማይኖር የአሜሪካ ኤምባሲ ባወጣው መግለጫ ገልጿል፡፡

    ማክሰኞ ሐምሌ 26 ቀን 2014 ዓ.ም. ለመጀመርያ ጊዜ ወደ መቀሌ የዘለቁት በምሥራቅ አፍሪካ የአሜሪካ ልዩ መልዕክተኛ ማይክ ሐመር፣ የአውሮፓ ኅብረት ልዩ ተወካይ በምሥራቅ አፍሪካ አነቴ ወበር፣ የተመድ ልዩ መልዕክተኛ፣ እንዲሁም የካናዳ፣ የጣሊያንና የእንግሊዝ አምባሳደሮች በፌዴራልና የክልሉ መካከል የታሰበው ድርድር ሊጀመር በሚችልበት ሁኔታዎች ላይ ከደብረጽዮን ጋር ውይይት አድርገዋል፡፡

    ወደ መቀሌ ያቀናው የዲፕሎማቶች ቡድን በበኩሉ፣ ‹‹በአፍሪካ ኅብረት ጥላ ሥር የሚደረግ ድርድር በአፋጣኝ መጀመር አለበት፤›› ያለ ሲሆን፣ በተባበሩት መንግሥታት ድርጅት የሰብዓዊ መብት ምክር ቤት የተቋቋመው የባለሙያዎች ኮሚሽንም ወደ ትግራይና ሌሎች አካባቢዎች ሄዶ ምርመራ እንዲጀምር ማሳሰባቸውን የአውሮፓ ኅብረትና የአሜሪካ ኤምባሲ ትናንት ሐምሌ 26 ቀን 2014 ዓ.ም. ባወጡት መግለጫ ይፋ አድርገዋል፡፡

    ከባለፈው ሳምንት ወዲህ ምዕራባውያኑ በምሥራቅ አፍሪካ በመደቧቸው ልዩ መልዕክተኛቸው በኩል ድርድር በአፋጣኝ እንዲጀመር ጫና እየፈጠሩ መሆኑን ምንጮች የገለጹ ሲሆን፣ ባለፈው ሳምንት የአሜሪካ ጉዳይ አስፈጻሚ ትሬሲ ጆኮብሰንም በኤምባሲው በነበረ መግለጫ ላይ፣ ‹‹የድርድሩን ቦታና ጊዜ በፍጥነት ያሳውቃሉ ብለን እጠብቃለን›› ብለው ነበር፡፡ በነጋታው ሐሙስ ሐምሌ 21 ቀን 2014 ዓ.ም. የጠቅላይ ሚኒስትሩ የደኅንነት አማካሪ አቶ ሬድዋን ሁሴን፣ መንግሥት በማንኛውም ሰዓትና ቦታ ለመነጋገር ዝግጁ መሆኑን ይፋ ያደረጉ ሲሆን፣ ድርድሩ ያለ ምንም ቅድመ ሁኔታ መሆን እንዳለበትም በትዊተር ገጻቸው አስፍረዋል፡፡ ለስድስት ቀናት አዲስ አበባ የቆዩት የተመድ ሰብዓዊ መብት ባለሙያዎች ኮሚሽን ግን ወደ መቀሌ እንዲሄዱ መንግሥት አለመፍቀዱን አቶ ሬድዋን ገልጸዋል፡፡

    ምንም እንኳን የፌዴራል መንግሥት ድርጅት ከድርድር በፊት ሕወሓት ጦር መፍታት አለበት የሚለውን ቅድመ ሁኔታ የሰረዘ ቢመስልም፣ ሕወሓት በበኩሉ ግን ከድርድር በፊት መሠረታዊ አገልግሎቶች መጀመር አለባቸው ሲል ያስቀመጠውን ቅድመ ሁኔታ ግን ገፍቶበታል፡፡ በተለይ የመብራት፣ የቴሌኮም፣ የባንክና የሌሎች መሠረታዊ አገልግሎቶች ከድርድሩ በፊት አንገብጋቢ ናቸው በማለት ለልዩ መልዕክተኞች የነገረ ሲሆን፣ እነሱም የዚህ ቅድመ ሁኔታ መሟላት ለድርድሩ መቃናት ጠቃሚ ነው ብለዋል፡፡ ወደ ትግራይ የሰብዓዊ ዕርዳታና የነዳጅ አቅርቦት እንዲደርስ መንግሥት የፈቀደ ሲሆን፣ የክልሉ ሕዝብ ግን ዘርፈ ብዙ የደኅንነት ጫና እንዳለበት የልዩ መልዕክተኞች ቡድን አሳውቋል፡፡

    ሌላው ድርድሩን ሊያዘገዩ ይችላሉ ተብለው ከሚጠበቁት ውስጥ፣ ድርድሩ የሚካሄድት ቦታ ሲሆን ‹‹በማን አስፈጻሚነት ሥር ይሆናል?›› የሚለውም በእንጥልጥል ላይ ያለ ጉዳይ ነው፡፡ የኢትዮጵያ መንግሥት በአፍሪካ ኅብረት ታዛቢነት እንዲካሄድ የገለጸ ሲሆን፣ የሕወሓት ተወካዮች ግን በምዕባውያን ተመልካችነት በናይሮቢ እንዲደረግ ሲጠይቁ ቆይተዋል፡፡

    ድርድሩ ለ20 ወራት የዘለቀውን ግጭት ከማስቆም በላይ በአገሪቱ ዘላቂ ሰላም ለማስፈን የመጀመርያ ዕርምጃ ይሆናል ተብሎ ይጠበቃል፡፡   

    - Advertisement -
    - Advertisement -spot_img

    ትኩስ ጽሑፎች

    ተዛማጅ ጽሑፎች

    - Advertisement -
    - Advertisement -