Sunday, August 14, 2022
ሌሎች ዓምዶች
    - Advertisment -
    - Advertisment -

    ክቡር ሚኒስትሩ ለአንድ ብሎገር ጋ ደወሉ

    [ለክቡር ሚኒስትሩ አንድ ነጋዴ ደወለላቸው]

    • ሄሎ ክቡር ሚኒስትር፡፡
    • ውይ በጣም ስፈልግህ ነው የደወልክልኝ፡፡
    • በሰላም ነው የፈለጉኝ?
    • ኧረ በጣም ለሰላም ነው፡፡
    • አይ ያው ሰላም የሚለውን ቃል ከሰማሁት ራሱ ስለቆየ ነው የጠየኩዎት?
    • እኔ እንኳን የደስታ ዜና ይዤ ነው፡፡
    • በዚህ ጊዜ ምን የሚያስደስት ነገር አለ ብለው ነው?
    • ሕንፃዬ ሊመረቅ ነው፡፡
    • እ. . .
    • ለምርቃቱ ልጠራህ ሳስብ ነው የደወልከው፡፡
    • የደላው ሙቅ ያኝካል አሉ፡፡
    • ምን ለማለት ፈልገህ ነው?
    • የምርቃት ፕሮግራም አዘጋጅተዋል ማለት ነው?
    • ቀላል ፕሮግራም እንዳይመስልህ ያዘጋጀሁት፡፡
    • ማለት?
    • ባንድ ሁላ ጠርቼአለሁ ስልህ?
    • ኢትዮጵያ ውስጥ ያለው ሕንፃ ነው የሚመረቀው ወይስ ሌላ አገር?
    • እዚህ ያለው ሕንፃ ነው እንጂ፡፡
    • አገር ውስጥ የሉም እንዴ ክቡር ሚኒስትር?
    • ከአገሬማ ወዴት እሄዳለሁ?
    • ታዲያ ምን እየተከናወነ እንደሆነ አያውቁም እንዴ?
    • ከልማት ውጪ ምን አለ ብለህ ነው?
    • ክቡር ሚኒስትር ከጥፋት ውጪ ለማለት ፈልገው ነው?
    • ፀረ ልማት ሆነሃል ልበል?
    • ክቡር ሚኒስትር ተው እንጂ፡፡
    • ምኑን ነው የምተወው?
    • አገሪቷ እኮ ታምሳለች፡፡
    • ኧረ የሰይጣን ጆሮ ይደፈን በል፡፡
    • ይኸው የመንግሥት ጆሮ ተደፍኖ አይደል እንዴ?
    • ምን እያልክ ነው አንተ?
    • ያው መስማት ካቆማችሁ ሰነባበታችሁ ለማለት ነው፡፡
    • ምንድነው የምትቀባጥረው?
    • ክቡር ሚኒስትር ዛሬ ቀኑን ሙሉ ሳለቅስ ነበር፡፡
    • ምነው ዘመድ ሞተብህ እንዴ?
    • ከዘመድም በላይ ነው የሞተብኝ፡፡
    • ማን ሞተብህ?
    • አገር ናታ፡፡
    • ሰውዬ ምንድነው የምታወራው?
    • ክቡር ሚኒስትር ሕዝቡ እኮ እያለቀ ነው፡፡
    • የሶሪያ ሕዝብ ነው ያለቀው?
    • እንዴ ምን እያሉ ነው ክቡር ሚኒስትር?
    • ምን አልኩ?
    • ሕዝብ በሕዝብ ላይ እየተነሳ እኮ ነው፡፡
    • እሱማ ምልክቱ ነው፡፡
    • የምን ምልክት?
    • የመጨረሻው ዘመን ነዋ፡፡
    • እየቀለዱ ነው ክቡር ሚኒስትር?
    • በዚህ ጊዜ ቀልድ ይቀለዳል እንዴ?
    • ካልቀለዱማ አገሪቷ ከመፈራረሷ በፊት አፋጣኝ መፍትሔ ያስፈልጋል፡፡
    • አገር እኮ ዝም ብላ አትፈርስም፡፡
    • ክቡር ሚኒስትር እያየነው ያለው ነገር ግን በጣም ያስፈራል፡፡
    • ምን አየህ?
    • ይኸው አገሪቷ በነውጥ ጎዳና መጓዝ ከጀመረች ሰነባበተች፡፡
    • ጊዜያዊ ችግር ነው፡፡
    • ጊዜያዊ ችግር ሲሉ?
    • ዕድገታችን ያመጣው ችግር ነው ስልህ?
    • የምን ለቅሶ መልሶ መላልሶ አሉ፡፡
    • ምን አልክ አንተ?
    • ክቡር ሚኒስትር አገሪቷ ላይ እየተከናወነ ስላለው ነገር ለመሆኑ በሚገባ ያውቃሉ?
    • እህሳ?
    • ለማንኛውም በሰሞኑን ግርግር የእኔም ሱቅ ተቃጥሏል፡፡
    • ሱቅህ ስለተቃጠለ ነው አገሪቷ ልትፈርስ ነው የምትለው?
    • ክቡር ሚኒስትር የወደመብኝ ንብረት ቀላል የሚባል አይደለም፡፡ በዚያ ላይ በርካታ ሰዎች እየሞቱ ነው፡፡
    • አየህ ሠርተህ ስትለወጥ ሰዎች ስለማይወዱ፣ ለዛ ነው ንብረት የሚያወድሙት፡፡
    • እና አገሪቱ ለነጋዴዎች አትሆንም እያሉኝ ነው?
    • ለነጋዴዎችማ አትሆንም፡፡
    • ታዲያ ለማን ነው የምትሆነው?
    • ለወንበዴዎች!

    [ክቡር ሚኒስትሩ ለአንድ ብሎገር ጋ ደወሉ]

    • አቤት ጌታዬ፡፡
    • ሥራ እንዴት ነው?
    • ክቡር ሚኒስትር ወጥሬ ይዣለሁ፡፡
    • በጣም ጥሩ፡፡
    • ይኸው ቀን አልል ማታ ፖስት ሳደርግ ነው የምውለው፡፡
    • ለመሆኑ ምን ዓይነት ይዘት ያለው ነገር ነው የምትጽፈው?
    • በተሰጠኝ መመርያ መሠረት ነዋ፡፡
    • እኮ ምን ዓይነት ነው?
    • ከተቻለ ሕዝብን ከሕዝብ የሚያጋጭ፡፡
    • እሺ፡፡
    • ካልሆነ ግን ቢያንስ በሕዝቦች መካከል ጥርጣሬ የሚፈጥር መሆን አለበት፡፡
    • በሚገባ ገብቶሃል ማለት ነው፡፡
    • እንዴ ክቡር ሚኒስትር ይኼን ለማድረግ የማልፈነቅለው ድንጋይ የለም፡፡
    • በጣም ጥሩ፡፡
    • ይኸው የበሬ ወለደ ዓይነት ዘገባዎች እኮ ነው የምጽፈው፡፡
    • ተቀባይነት እያገኘህ ነው ግን?
    • እሱ ላይ አንደንድ ችግሮች አሉ፡፡
    • በዚህ ወቅት ችግር መስማት አልፈልግም፡፡
    • አውቃለሁ ክቡር ሚኒስትር፡፡
    • የሚከፈልህ እኮ ችግር እንድትፈጥር እንጂ ችግር እንድታሰማ አይደለም፡፡
    • አውቃለሁ ክቡር ሚኒስትር፡፡
    • ታዲያ የምን ችግር ነው የምታወራው?
    • የበሬ ወለደ ጽሐፎች ያን ያህል ተቀባይነት እያገኙ አይደለም፡፡
    • ስማ የምትጽፈው ጽሑፍ እውነት እንዲመስል የሚያደርጉ ሰዎችንም መልምለሃል አይደል?
    • እሱማ መልምያለሁ ግን ትንሽ የበጀት ጭማሪ ያስፈልገኛል፡፡
    • ተጨማሪ በጀት መንግሥት ራሱ መከልከሉን አልሰማህም እንዴ?
    • ምን ላድርግ ክቡር ሚኒስትር ወድጄ አይደለም?
    • ምንድነው የምታወራው ሰውዬ?
    • የጫት ወጪዬ ከአቅሜ በላይ ሆኖብኝ ነው፡፡
    • እና የጫት እርሻ ይገዛልህ?
    • ከተቻለማ ደስ ይለኛል ክቡር ሚኒስትር፡፡
    • ቀልዱን ትተህ ሥራህን በአግባቡ ሥራ፡፡
    • ሌላም ችግር ግን ገጥሞኛል፡፡
    • የምን ችግር?
    • የተለያዩ ማስፈራሪያዎች እየደረሱኝ ነው፡፡
    • ስለ እሱ አትፍራ፣ አስፈላጊው ጥበቃ ይደረግለሃል፡፡
    • ማስፈራሪያዎቹ ግን እንቅልፍ እየነሱኝ ነው፡፡
    • እንቅልፍ ያጣኸው እየሠራህ መስሎኝ?
    • ማለቴ ማስፈራሪያዎቹ እየበዙብኝ ነው ለማለት ነው፡፡
    • ለማንኛውም ሕዝቡ ካልተተራመሰ እኛም የኮንትሮባንድ ሥራችን ይደናቀፋል፡፡
    • አውቃለሁ ክብር ሚኒስትር፡፡
    • ለአንተ የሚቆረጠውም ገንዘብ የሚጨምረው የእኛ ገቢ ሲጨምር ነው፡፡
    • በትክክል ክቡር ሚኒስትር፡፡
    • ስለዚህ ሥራህን በትጋት ሥራ፡፡
    • የምሠራውን ሥራ ከወደዱት ምን ያደርጉልኛል?
    • እሾምሃለሁ፡፡
    • ምን አድርገው?
    • የጎበዝ አለቃ!

    [ክቡር ሚኒስትሩ አንድ ስልክ ተደወለላቸው]

    • ሄሎ ክቡር ሚኒስትር፡፡
    • አንተ ሰውዬ አይገባህም?
    • ምነው ክቡር ሚኒስትር?
    • በዚህኛው ስልኬ ለምን ደወልክ?
    • ይቅርታ ያኛው ስልክ ዝግ ስለሆነብኝ ነው፡፡
    • ሁለተኛውን ስልኬን የምከፍተው ማታ ማታ መሆኑን ረሳኸው?
    • ረስቼው አይደለም ክቡር ሚኒስትር፡፡
    • ታዲያ ለምን ደወልክ?
    • አስቸኳይ ጉዳይ ገጥሞኝ ነው፡፡
    • ዕቃው ተጭኗል አላልከኝም እንዴ?
    • ዕቃውማ ተጭኗል፡፡
    • ታዲያ ምን ተፈጠረ?
    • ሾፌሩ ደውሎልኝ ነበር፡፡
    • ምን አለህ?
    • ዕቃው ተይዟል ብሎኛል፡፡
    • ምን?
    • አዎን ክቡር ሚኒስትር፡፡
    • አንተ ልምድ ያለህ ሰው አይደለህ እንዴ?
    • ልክ ነው ክቡር ሚኒስትር፡፡
    • ታዲያ እንዴት ነው በድጋሚ ሊያዝብህ የቻለው?
    • ክቡር ሚኒስትር ኬላዎች በጣም ጥብቅ ቁጥጥር እየተካሄደባቸው ነው፡፡
    • ከዚህ በፊትስ ቢሆን ቁጥጥር መቼ ጠፋ?
    • አዎ ግን ጉቦ እንኳን አልቀበልም እያሉ ነው፡፡
    • እኔ ምን አገባኝ ታዲያ?
    • ከአቅሜ በላይ ሆኖ ነው ክቡር ሚኒስትር፡፡
    • እና አሁን ምን አድርግ እያልከኝ ነው?
    • ከቻሉ እንዲደውሉ ነው፡፡
    • ለማን?
    • ለፖሊስ!

    [ክቡር ሚኒስትር ዕቃቸውን ለያዘው ፖሊስ ደወሉ]

    • ሄሎ!
    • ማን ልበል?
    • እስከዛሬ ስልኬን አታውቀውም?
    • አላወኩም ማን ልበል?
    • ክቡር ሚኒስትሩ ነኝ፡፡
    • ሰላም ክቡር ሚኒስትር፡፡
    • እንዴት ነህ ባክህ?
    • ምን ልታዘዝ ክቡር ሚኒስትር?
    • እናንተ ኬላ ላይ የተያዘ መኪና ነበር፡፡
    • ስለእሱ ሪፖርት ፈልገው ነው?
    • መኪናው እንዲለቀቅ ልነግርህ ነበር፡፡
    • ምን ሆኑ ክቡር ሚኒስትር?
    • ምነው?
    • መኪናው የተያዘው እኮ ኮንትሮባንድ ጭኖ ነው፡፡
    • ዕቃው ኮንትሮባንድ አይደለም፡፡
    • ታዲያ ምንድነው?
    • ለመሥሪያ ቤታችን የሚያስፈልጉ ዕቃዎች ናቸው፡፡
    • ሾፌሩ ራሱ ኮንትሮባንድ መሆኑን አምኗል እኮ?
    • የምነግርህን አትሰማም እንዴ?
    • ክቡር ሚኒስትር ምን እየሠራሁ እንደሆነ እኮ አውቃለሁ፡፡
    • አልታዘዝም እያልክ ነው?
    • በፍፁም አላደርገውም፡፡
    • ተናንቀናል ማለት ነው?
    • ከተናናቅን ቆየን እኮ፡፡
    • ምን?
    • ክቡር ሚኒስትር ስለሆኑ የምፈራዎት መስሎዎት ነው?
    • እኔ ጠፋሁ?
    • ለማንኛውም በቅርቡ መጠየቅዎ አይቀርም፡፡
    • ማን አባቱ ነው የሚጠይቀኝ?
    • እርስዎ ግን ክቡር ሚኒስትር ነኝ ሲሉ አያፍሩም?
    • እና ማን ነኝ ልበል?
    • ክቡር ኪራይ ሰብሳቢ!

    [ለክቡር ሚኒስትሩ አንድ ዲፕሎማት ደወለላቸው]

    • ክቡር ሚኒስትር በኋላ ከተጠያቂነት አያመልጡም፡፡
    • ማን ነው የሚጠይቀኝ?
    • አገሪቷ ወዴት እያመራች እንደሆነ ያውቃሉ?
    • ወደ ዕድገት ነዋ፡፡
    • እየቀለድኩ እኮ አይደለም ክቡር ሚኒስትር?
    • በዚህ ወቅት ቀልድ ያዋጣል ብለህ ነው?
    • ታዲያ ሕዝቡ ለሚጠይቀው ጥያቄ መልስ ለምን አትሰጡም?
    • ምላሽ መስጠት ጀምረናል እኮ፡፡
    • የምን ምላሽ ነው የሰጣችሁት?
    • ይኸው ተቃዋሚዎችን እየፈታን አይደል እንዴ?
    • የሕዝቡ ጥያቄ ከዚህም የዘለለ ነው፡፡
    • ታዲያ ምን ማድረግ ይቻላል?
    • ክቡር ሚኒስትር በየቀኑ ሰዎች እየሞቱ እኮ ነው፡፡
    • ለምን የተቃውሞ ሠልፍ ይወጣሉ?
    • ሕዝብ እኮ የመቃወም መብት አለው፡፡
    • መብቱን የሰጠነው እኛው አይደለን እንዴ?
    • ምን እያሉ ነው ክቡር ሚኒስትር?
    • አትቃወም ስንለውም መስማት አለበት፡፡
    • ሕዝብ እናንተን ለምን ይሰማችኋል?
    • ለምን አይሰማንም?
    • እናንተም ስለማትሰሙት ነዋ፡፡
    • ምን ይደረግ እያልክ ነው?
    • አገሪቷ ወደ ከፋ ነገር እንዳትገባ አፋጣኝ መፍትሔ ያስፈልጋል፡፡
    • ለእሱማ ይኸው ጥልቅ ተሃድሶ ላይ ነን፡፡
    • እናንተ የሚያስፈልጋችሁ ጥልቅ ተሃድሶ አይደለም፡፡
    • ታዲያ ምንድነው?
    • ፈርሶ መሠራት!

     

    በብዛት የተነበቡ ፅሁፎች

    በወለድ ነፃ የባንክ አገልግሎት የተሰበሰበው ከፍተኛ ሀብት ጥቅም ላይ እየዋለ አይደለም ተባለ

    በኢትዮጵያ ከወለድ ነፃ የባንክ አገልግሎት የተሰበሰበው የተቀማጭ ገንዘብ መጠን...

    የታላቁ የኢትዮጵያ ህዳሴ ግድብ ሁለተኛው ተርባይን ኃይል ማመንጨት ጀመረ

    ሦስተኛ ዙር ሙሌት በዛሬው ዕለት እንደሚጠናቀቅ ይጠበቃል የታላቁ የኢትዮጵያ ህዳሴ...

    በቴሌ ብር የማይሠሩ ማደያዎች ቀነ ገደብ ተቀመጠባቸው

    ሚኒስቴሩ ከኢትዮጵያ ንግድ ባንክ ጋር ለመሥራት እየመከረ ነው በኢትዮጵያ...
    - Advertisment -

    ትኩስ ፅሁፎች

    ለሰላም ድርድሩ ‹‹ከአፍሪካ ኅብረት አደራዳሪነት ውጭ ሌላው ተቀባይነት የለውም›› የውጭ ጉዳይ ሚኒስቴር

    የሰሜን ኢትዮጵያን ጦርነትና ግጭት በሰላማዊ መንገድ ለመፍታት የተጀመረው የአፍሪካ...

    በተጠናቀቀው የበጀት ዓመት በንብረት ላይ የደረሰው የትራፊክ አደጋ በ494 በመቶ ጨምሯል

    በትራፊክ አደጋ 3,971 ሰዎች ሕይወታቸውን አጥተዋል በአገር አቀፍ ደረጃ በተጠናቀቀው...

    አዲሱን የመንግሥት መዋቅር ዘርግተው ያጠናቀቁ ተቋማት 31 በመቶ ብቻ ናቸው

    በሲቪል ሰርቪስ ኮሚሽን ሥር ካሉት 160 የፌዴራል መንግሥት መሥሪያ...

    ለተቃርኖ ምክንያት የሚሆኑ ከንቱ ድርጊቶች ይወገዱ!

    ሰሞኑን የታላቁ የኢትዮጵያ ህዳሴ ግድብ ሦስተኛ ዙር የውኃ ሙሌት...

    ለኬንያ ኤሌክትሪክ ኃይል የሚሸጥበት ታሪፍ ማሻሻያ ተደረገበት

    በቅርቡ ሙሉ ለሙሉ ስምምነቱ የተጠናቀቀው የኢትዮጵያና የኬንያ የኤሌክትሪክ ኃይል...
    spot_img

    ተዛማጅ ፅሁፎች

    [ክቡር ሚኒስትሩ የሥራ አጥነት ችግሮችን የመፍታት ተልዕኮ የተሰጠው ተቋም በዋና ጽሕፈት ቤቱ ሕንፃና ቢሮዎች ላይ ያደረገውን ዕድሳት መርቀው በመክፈት ጉብኝት እያደረጉ ነው]

    እጅግ ውብ ዕድሳት ያደረጋችሁት! በእውነቱ በጣም ድንቅ ነው፡፡ አመሠግናለሁ ክቡር ሚኒስትር። በጣም ድንቅ ነው። ዕድሳቱን ያከናወነው ድርጅት ጥሩ ልምድ ያለው ይመስላል? ተቋራጩ ማን እንደሆነ አልነገርኩዎትም እንዴ? የትኛው ተቋራጭ...

    [ክቡር ሚኒስትሩ በስንዴ የተሸፈኑ ሰፋፊ እርሻዎች ያሉበትን ሁኔታ ለመገምገም ከስንዴ ምርት ድጋፍና ክትትል ኮሚቴ ሰብሳቢ ጋር እየመከሩ ነው] 

    ክቡር ሚኒስትር እንደነገርክዎት በሁሉም ስንዴ አብቃይ አካባቢዎቻችን ያሉ አርሶ አደሮች ጥሪያችንን ተቀብለው መሬታቸውን በኩታ ገጠም አርሰው በስንዴ ዘር ሸፍነዋል። በጣም ጥሩ ዜና ነው። በጣም እንጂ። የሚገርምዎት...

    [ክቡር ሚኒስትሩ የሚመሩት የሥራ አስፈጻሚ ኮሚቴ ስብሰባ አጀንዳ አድርጎ በያዘው ወቅታዊ የፀጥታና ደኅንነት ጉዳዮች ላይ ትኩረት በመስጠት ቢጀመርም በስተመጨረሻ አጀንዳውን ስቶ ስለ መዋደድ እየተጨቃጨቀ...

    በዛሬው መደበኛው መድረካችን አጀንዳ የተለመደው የፀጥታና ደኅንነት ጉዳይ ይሆናል። ሌላ አጀንዳ የምታስይዙት አጀንዳ ከሌለ በቀር ማለቴ ነው። ክቡር ሚኒስትር... እሺ ...ቀጥል አመሰግናለሁ ክቡር ሚኒስትር። መደበኛ አጀንዳው እንደተጠበቀ...