Sunday, August 7, 2022
ሌሎች ዓምዶች
    - ማስታወቂያ -
    - ማስታወቂያ -

    በ1.2 ቢሊዮን ብር እየተገነባ የሚገኘው የአይሲቲ መንደር ዘንድሮ እንደሚጠናቀቅ ተነገረ

    - ማስታወቂያ -

    ተዛማጅ ፅሁፎች

    የመገናኛና ኢንፎርሜሽን ቴክኖሎጂ ሚኒስቴር በ1.2 ቢሊዮን ብር ወጪ እያስገነባ የሚገኘው የአይሲቲ መንደር ዘንድሮ እንደሚጠናቀቅ፣ ሚኒስትሩ ዶ/ር ደብረ ጽዮን ገብረ ሚካኤል ለፓርላማው ገለጹ፡፡ ፕሮጀክቱ ከተጀመረ ከአምስት ዓመት በላይ ቢሆነውም በአስፈጻሚ አካላት ቸልተኝነት ላለፉት ዓመታት ሲጓተት እንደቆየ ባለፈው ዓመት ሪፖርት መደረጉ ይታወሳል፡፡ የፕሮጀክቱ ዓላማ በኢንፎርሜሽን ቴክኖሎጂ የተሰማሩ የግልም ሆኑ የመንግሥት ተቋማትን አንድ ላይ አሰባስቦ የዘርፉን ብሎም የአገሪቱን ዕድገት ማፋጠን የሚችሉበትን ሁኔታ መፍጠር ነው፡፡ በዚህም መሠረት ፕሮጀክቱ በአዲስ አበባ ከተማ ቦሌ ቡልቡላ አካባቢ በሚገኝ 200 ሔክታር መሬት ላይ እየተገነባ ነው፡፡ ከተጠቀሰው አጠቃላይ መሬት ውስጥ 130 ሔክታር የሚሆነው በዘርፉ የተሰማሩ የግል ተዋናዮችን የሚያስጠልል ነው፡፡ የተቀረውን ለሚኒስቴሩ የቢሮ አገልግሎት የሚውል ሕንፃ ለመገንባት የተመደበ ነው፡፡ ፕሮጀክቱ ባለፈው ዓመት ይጠናቀቃል ተብሎ ፕሮግራምና በጀት የተያዘለት ቢሆንም ሊጠናቀቅ አልቻለም፡፡ ፕሮጀክቱ በዚህ ዓመት እንደሚጠናቀቅ በምክትል ጠቅላይ ሚኒስትር ማዕረግ የኢኮኖሚና ፋይናንስ ክላስተር አስተባባሪና ሚኒስትር ዶ/ር ደብረ ጽዮን ለፓርላማ ቢገልጹም፣ በግማሽ ዓመት ለፕሮጀክቱ ከተመደበው 83.1 ሚሊዮን ብር ውስጥ መጠቀም የተቻለው 11.2 ሚሊዮን ብር ወይም 13 በመቶውን ብቻ ነው፡፡ ሚኒስትሩ በዚህ ዓመት እንደሚጠናቀቅ ከመናገራቸው በተጨማሪ ይኼንኑ ያሳያል ያሉትን የፕሮጀክት አፈጻጸም ገልጸዋል፡፡ ከሚኒስቴሩ ሕንፃ ግንባታና ኔትወርክ ተከላ ውጪ የሌሎች ሕንፃዎች ግንባታ በመጠናቀቅ ላይ መሆኑን፣ የአስተዳደር ሕንፃና ሁለት ተገጣጣሚ ሕንፃዎች መጠናቀቃቸውን ገልጸዋል፡፡ እስካሁን ድረስም ስድስት የአገር ውስጥና የውጭ ኩባንያዎች በፓርኩ ውስጥ ለሚያቋቁሙት የሞባይል ማምረቻ ኢንዱስትሪ፣ የሶፍትዌር ልማት ማዕከልና ሌሎች የኢንፎርሜሽን ቴክኖሎጂ አገልግሎቶች የሚውሉ ቦታዎችን መውሰዳቸውን ገልጸዋል፡፡ በመንደሩ ውስጥ እየተገነቡ ባሉ የኢንኩቤሽን ሕንፃዎች ውስጥ ገብተው ለመሥራት የፈለጉ ከ20 በላይ የሚሆኑ የአገር ውስጥና የውጭ ኩባንያዎች የማስተናገድ ሥራ እየተሠራ መሆኑንም ገልጸዋል፡፡ እስካሁን ድረስ ሳምሰንግ፣ ኤምቲኤን፣ ቴክኖ ሞባይል፣ ዜድቲኢና ሁዋዌ መንደሩ ውስጥ ለመግባት ፍላጎት አሳይተዋል፡፡ በዕድገትና ትራንስፎርሜሽን ዕቅዱ በቴሌኮሙዩኒኬሽን ዘርፍ ከተጣሉ ግቦች መካከል የሞባይል ደንበኞችን ቁጥር 40 ሚሊዮን ለማድረስ ታቅዶ በአሁኑ ወቅት 30 ሚሊዮን መድረሱን ገልጸዋል፡፡ የዳታና ኢንተርኔት ደንበኞችን 3.69 ሚሊዮን ለማድረስ ግብ ተጥሎ ከዕቅዱ በላይ 7.76 ሚሊዮን መድረሱን ተናግረዋል፡፡

    - Advertisement -spot_img

    የ ጋዜጠኛው ሌሎች ፅሁፎች

    - ማስታወቂያ -
    - ማስታወቂያ -spot_img

    በብዛት ከተነበቡ ፅሁፎች