Thursday, August 18, 2022
ሌሎች ዓምዶች
    - Advertisement -
    - Advertisement -

    የተመረጡ ፅሑፎች

    በመኪና አደጋ የሚፈሰው ደምና እንባ በባቡሩ መደገም የለበትም

    አዲስ አበባ የቀላል ባቡር ትራንስፖርት አገልግሎት የሚሰጥባት ከተማ ልትሆን እየተቃረበች ነው፡፡ ሰሞኑን የምናየው ሽር ጉድ ይህንኑ ያመላክታል፡፡ የፕሮጀክቱ የግንባታ ሥራ ተጠናቅቆ ወደ አገልግሎት ለመግባት የመጨረሻው ምዕራፍ ላይ የደረሰ መሆኑን ለማረጋገጥም ቅድመ ሙከራና የፍተሻ ሥራዎች እየተካሄዱ ነው፡፡ የቀላል ባቡሩ አገልግሎት ሲጀመር አዲስ አበቤው ከሚሳፈርባቸው ባቡሮች መካከል ለሙከራ የተመረጠው ባቡር በሐዲዱ ላይ ወዲያ ወዲህ ሲል ታይቷል፡፡ በዛሬው ዕለትም ተጋባዥ እንግዶች በተገኙበት ይፋዊ የሙከራ ጉዞ ይደረጋል፡፡ ሰሞኑን ቅድመ ሙከራ ሲደረግ የባቡር መስመሩ በሚያልፍባቸው አካባቢዎች ያሉ ነዋሪዎችና በአጋጣሚ በዚያ ሥፍራ የነበሩ መንገደኞች ለሙከራ የወጣው ባቡር ወዲያ ወዲህ ሲል ‹‹አጀብ›› ተሰኝተው ሲመለከቱ ነበር፡፡ ይህ ዕይታ አዲስ አበባ የባቡር አገልግሎት ተጠቃሚ ለመሆን የወራት ዕድሜ ብቻ እንደቀራት አመላክቷል፡፡ እንኳን ደስ አለሽ አዲስ አበባ፡፡ ሙከራው ተሳክቶ ወደ አገልግሎት ሲገባ፣ አገልግሎቱ ሳንካ እንዳይገጥመው የሁላችንም ምኞት ነው፡፡ በሁለት አቅጣጫ የተዘረጋው የአዲስ አበባ ቀላል ባቡር ሐዲድ መስመር አጠቃላይ ርዝመት 34 ኪሎ ሜትር ነው፡፡ በዚህ ኪሎ ሜትር ውስጥ የሚሰጠው የትራንስፖርት አገልግሎት የከተማዋን ችግር በተወሰነ ደረጃ ይቀርፋል ተብሎ ይጠበቃል፡፡ ያድርግልን! ከተማዋ ውስጥ ያሉ አውራ መንገዶች መሀል ለመሀል ሰንጥቆ የተዘረጋው የባቡር ሐዲድ፣ ብረታማዎቹ የባቡሩ ተሽከርካሪዎች የሚሸከማቸውን በሺዎች የሚቆጠሩ ተጓዦች ለማመላለስ በዋዜማው ላይ መገኘታቸውን ከሚያረጋግጡልን እውነታዎች መካከል ከባቡሩ ሐዲድ ግራና ቀኝ እየተገነባ ያለው ማገጃ አጥር እየተጠናቀቀ መሆኑ ነው፡፡ አጥሩ ባቡሩ በነፃነት እንዲጓዝና አዋኪ ነገሮች እንዳይገጥመውና በመንገዱ እንዳይገቡበት ከለላ ከመሆኑ ባሻገር፣ ለከተማዋ ገጽታና ውበት የራሱን አስተዋጽኦ ያደርጋል፡፡ በሌላ በኩል ግን በሁለቱም አቅጣጫ ከተዘረጋው መስመር ግራና ቀኝ የታጠረው አጥር ምንም መፈናፈኛ ያለው አይመስልም፡፡ የአጥሩ አስፈላጊነት የሚያጠራጥር አይደለም፡፡ ከለላው እግረኛው እንደፈለገ መስመሩን እንዳይሻገር ለማድረግም ታስቦ የተገነባ ነው፡፡ በተለይ አደጋ ለመከላከል ታስቦ የተሠራው ይህ አጥር፣ ምን ያህል አደጋን ለመከላከል ይችላል? የሚለው ጥያቄ አጥሩ የታጠረው መንገደኛ ሐዲዱ ውስጥ እንዳይገባና ከአደጋ እንዲጠበቅ ለማድረግ ስለመሆኑ ሁሉም የኅብረተሰብ ክፍል ሊረዳው ይገባል፡፡ አጥሩን ዘሎ ለመሻገር መሞከር እጅግ ከፍተኛ ዋጋ የሚያስከፍል አደጋ አለው፡፡ አጥሩን ዘሎ ለመሻገር መሞከር ሊያስከትል የሚችለውን አደጋ የበለጠ ለመግለጽም እዚያው አጥር ላይ ‹‹አጥሩን መዝለል ክልክል ነው፡፡ መዝለል አደገኛ ነው፤›› የሚል ምልክት በተወሰነ ርቀት ልዩነት በጉልህ ተቀምጧል፡፡ ከሰሞኑ መታዘብ እንደቻልኩት ግን የባቡር አገልግሎቱ ባይጀመርም የከተማው ነዋሪዎች አጥሩን እየዘለሉ ከወዲያ ወዲህ ማለታቸው ሲሆን፣ ነገን እንድፈራም አድርጎኛል፡፡ ቅድመ ሙከራው በሚደረግበት ወቅትም እግረኞች ወደ ሐዲዱ እንዳይገቡ ለማድረግ የፖሊስ ጥበቃ በግድ ያስፈለገበት አካባቢም ነበር፡፡ ሆኖም ጥበቃውን ጥሰው በአጥሮቹ ተንጠልጥለው ሲሻገሩ የነበሩ እግረኞች ጥቂት የሚባሉ አልነበሩም፡፡ አጥሩን መዝለል ክልክል ስለመሆኑ የሚያሳየውን ምልክት እያዩ አጥሩን ዘሎ የመሻገር አጉል ልማድ የተጠናወታቸው ሰዎች ባቡሩ ሥራ ሲጀምር በዚሁ ልምድ ላለመቀጠላቸው ማረጋገጫ የለም፡፡ አስጊ ነው፡፡ እርግጥ ነው ከባቡር መስመሩ አገነባብ፣ የታጠረው አጥርም እንደሚያሳየን ከግራ ወደ ቀኝ ወይም ከቀኝ ወደ ግራ እግረኞችን ሊያሻግር የሚችል መሠረተ ልማት ወይም መሻገሪያ ብዙም የለም፡፡ ሐዲዱን ለማቋረጥ ከተፈለገ ረዥም መንገድ በእግር መጓዝን ይጠይቃል፡፡ በተለይ ከሰሜን ወደ ደቡብ በተዘረጋው የባቡር መስመር ላይ የእግረኞችም ሆነ የተሽከርካሪዎች ማቋረጫ ብዙም የማይታይ በመሆኑ፣ የጎላ ችግር ያስከትላል የሚለው ጉዳይ ለመሬት የቀረበ ነው፡፡ ይህ ክፍተት በጉልህ ይታያል፡፡ በመሆኑም ባቡሩ ሥራ ሲጀምር አሁን በቀላሉ ተንጠልጥሎ የመሻገሩን ያህል የቀለለ አይሆንም፡፡ አደጋው የከፋ ስለመሆኑም አይጠረጠርም፡፡ በቂ ቋሚ ማቋረጫዎች ሊኖሩ ይገባል የሚለው መሠረታዊ አመለካከት እንደተጠበቀ ሆኖ፣ መሻገሪያ ስለሌለ በተገኘው ቦታ እየዘለሉ ማቋረጡ ደግሞ በራስ ላይ ፈርዶ፣ ራስን ለከፋ አደጋ መዳረግ መሆኑን መገንዘብ ነጋሪ አያሻውም፡፡ በመንገድ አጠቃቀም ዙሪያ ያለው የግንዛቤ እጦት በቀለበት መንገድ ላይ በሚገባ ታይቷል፡፡ በቀለበት መንገዱ ላይ ያሉ ማቋረጫዎችን ርቆ ሄዶም ቢሆን መጠቀም እየተቻለ የቀለበት መንገዱን የብረት አጥሮችና የግንብ ከለላዎች በመዝለል የማቋረጡ ልምድ የብዙዎችን ሕይወት ቀጥፏል፤ አካል አጉድሏል፡፡ በቀለበት መንገዱ ላይ ሲደረግ የቆየውን ልማድ በሕግም ማስተካከል ሳይቻል ቆይቷል፡፡ ይህንን ሊስተካከል ያልቻለ አጉል ልማድ ይዞ የባቡር መስመሩን ለማቋረጥ መሞከር እንዲህ እንደዋዛ መታየት የሌለበት ጉዳይ ነው፡፡ ባቡሩ ሥራ በሚጀምርበት ዋዜማ ላይ የተመለከትነው አጥር ዘሎ የመሻገር አጉል ሙከራ ባቡሩ ሥራ ከጀመረ በኋላም ይቆማል ተብሎ ስለማይታሰብ፣ ኅብረተሰቡን ከወዲሁ ግንዛቤ የማስጨበጡ ሥራ በሰፊው መሠራት ይኖበታል፡፡ ይህ እንደተጠበቀ ሆኖ መሠረታዊው ጉዳይ የእግረኞች መቋረጫዎች፣ ከተሽከርካሪ ማቋረጫዎችም በላይ ትኩረት ተሰጥቶቷቸው መገንባት አለባቸው፡፡ ኅብረተሰቡም አጋጅ አጥሮች ጥሶ መሸጋገር ሊያስከትል የሚችለውን አደጋ በመገንዘብ ከድርጊቱ መታቀብ ካልቻለ፣ በመኪና አደጋ እየተጻፈ ያለው አሳዛኝ ታሪክ በባቡሩ እንዲደገም መፍቀድ ይሆናል፡፡ አሁን ባለው ተጨባጭ ሁኔታ ከየትኛውም መፍትሔ በላይ ቀዳሚ መፍትሔ የሚሆነው ኅብረተሰቡ ራሱን ከአደጋ ማቀብ ብቻ ነው፡፡ ሰሞኑን ባቡሩና ሐዲዱን ለማለማመድ ሲካሄድ ከነበሩ የሙከራ ቦታዎች ዋነኛ መነጋገሪያ የነበረውም በመቋረጫ እጦት አጥር ዘለው የሚያቋርጡ መንገደኞች በብዛት መታየታቸው የወደፊቱን አደጋና አስከፊነቱን ከወዲሁ መገመት ስለተቻለ ነው፡፡ መንገደኞች አጥሩን እየዘለሉ ሲሻገሩ ለታዘበ፣ ነገ የሚከፋው ሕይወት ቀላል አለመሆኑን ያሳየ ስለነበር ጉዳዩ ማሳሰቡ አልቀረም፡፡ በዚህ ላይ ከለላው የተሠራው በፕላስቲክ በመሆኑ፣ በሕይወትም ሆነ በንብረት ላይ የሚደርሰውን ጥፋት ማሰብ ያሻል፡፡ ስለዚህ ለሕይወትም ለንብረትም በማሰብ መሻገር ክልክል ነው የሚለውን ትዕዛዝ ገፍተው ወዲህና ወዲያ የሚሉ መንገደኞች ሊታረሙ ይገባል፡፡ ሕግ ማክበርም ያስፈልጋል፡፡ ሕግ ለማስከበር እንደ ባቡሩ ሁሉ አጥሩም በኤሌክትሪክ መታገዝ የለበትም፡፡ በአጭሩ የባቡር መስመሩ ሥራ ከመጀመሩ በፊት ኅብረተሰቡ ስለባቡሩ አገልግሎት አጠቃቀምና ሊያደርግ ስለሚገባው ጥንቃቄ ከወዲሁ መሠራት የሚኖርባቸው ጉዳዮች አሉ፡፡ ከባቡር ፕሮጀክቱ መጠናቀቅ ጋር ይኸው ብርቱ ጉዳይ ሊታሰብበትና ሊመከርበት ይገባል፡፡ በመኪና አደጋ እየፈሰሰ ያለው ደምና እንባ በባቡሩ መደገም የለበትም፡፡

    Latest Posts

    - Advertisement -

    ወቅታዊ ፅሑፎች

    ትኩስ ዜናዎች ለማግኘት