Monday, August 8, 2022
ሌሎች ዓምዶች
    - ማስታወቂያ -
    - ማስታወቂያ -

    የአገሪቱን ደን ሽፋን በአዲስ ቴክኖሎጂ የመለካት ተግባር በዚህ ዓመት እንደሚጠናቀቅ ተገለጸ

    - ማስታወቂያ -

    ተዛማጅ ፅሁፎች

    የዓለም ምግብና እርሻ ድርጅት (ፋኦ) በየአምስት ዓመቱ የሚያወጣውን አገራዊ ሪፖርት መሠረት በማድረግ የአገሪቱ ደን ሽፋን ምን ያህል እንደሆነ ሲገለጽ ቆይቷል፡፡ ከዚህ በተጓዳኝ ከቅርብ ጊዜ ወዲህ ደግሞ በአገሪቱ በዘመቻ ከሚካሔደው የችግኝ ተከላ በመነሳትም የደን ሽፋን መጠን እየተገለጸ ይገኛል፡፡

    በመሆኑም አገሪቱ ያላት የደን ሽፋን ሦስት ከመቶ እንደነበር ሲገለጽ የሚታወስ ሲሆን፣ ከቅርብ ጊዜ ወዲህም እስከ 15 ከመቶ ባለው መጠን ውስጥ እንደሚገኝ እየተነገረና የሚመለከታቸው የመንግሥት መሥሪያ ቤቶችም ይህንን አኃዝ ሲጠቀሙበት እየታየ ነው፡፡ አንድ ወጥ የደን ሽፋን አለካክ ባለመኖሩ ምክንያት ትንበያዎቹም በየጊዜው የተለያየ መጠን ሲያሳዩ ቆይተዋል፡፡

    ካለፉት ሦስት ዓመታት ወዲህ ግን የአገሪቱን አጠቃላይ የደን ሽፋን በመስክ ከሚደረግ አሰሳ በተጨማሪ የጂኦስፓሻል ቴክኖሎጂዎችን በመጠቀም መለካትና መጠኑን ማወቅ የሚያስችሉ ሥራዎች ተጀምረዋል፡፡ ጂኦግራፊካል ኢንፎርሜሽን ሲስተም እንዲሁም ሪሞት ሴንሲንግ የተባሉ የካርታ ሥራና የሳተላይት ምስል አመንጪ ቴክኖሊጂዎችን በመጠቀም የአገሪቱን ደን ሽፋን የመለካቱ ተግባር በዚህ ዓመት ይጠናቀቃል ተብሎ ይጠበቃል፡፡ ይህንን የገለጹት በአካባቢና ደን ሚኒስቴር፣ አግሮፎረስትሪ የማኅበረሰብ ተሳትፎ ኤክስቴንሽን ተጠባባቂ ዳይሬክተር አቶ ዘሪሁን አድነው ለሪፖርተር እንደገለጹት፣ አገሪቱን ደን ሽፋን ለመለካት ሲካሔዱ የቆዩ የመስክና ቴክኖሎጂ አገዝ ዘመናዊ ልኬቶች በዚህ ዓመት ስለሚጠናቀቁ፣ የአገሪቱ የደን መጠን በትክክል እንደሚታወቅ ይጠበቃል፡፡

    ይህንን መሠረት በማድረግ የደን ሽፋንን ጨምሮ የተለያዩ የካርታና የሳተላይት ምስሎችን በከፍተኛ መጠን በማጉላት መረጃዎችን ከመሬት ላይ የሚያቀርብ አዲስ ቴክኖሎጂ በጀርመን ኩባንያዎች አማካይነት እየተዋወቀ ሲሆን፣ መንግሥት ቴክኖሎጂውን ለመግዛት ድርድር ላይ መሆኑም ታውቋል፡፡ ብላክብሪጅ የተባለው የጀርመን ኩባንያ፣ ከአገር በቀሉ ጂኦስፓሻል አናሊቲካል ሰርቪስስ (ጂኦሳስ) ጋር በመተባበር ከሚሰጡት የአቅም ግንባታ በተጨማሪ የቴክኖሎጂው ባለቤት ከሆነውና ሪሞት ሴንሲንግ ሶሉሽንስ ከተባለው ሌላ የጀርመን ኩባንያ ጋር በመሆን ቴክኖሎጂውን ለመግንሥት አካላት አስተዋውቀዋል፡፡

    የጀርመን ዓለም አቀፍ የልማት ትብብር ኤጀንሲ (ጂአይዜድ) የሚሳተፍበት ይህ ሒደት፣ ‹‹ራፒድአይ 24›› የተባለውና በመሬት ላይ እስከ አምስት ሜትር ባነስ ስፋት ውስጥ የሚገኙ የደንና ሌሎች ይዘቶችን ከሳተላይት በጥራት በማንሳት መረጃ አቀነባብሮ ለማቅረብ የሚያስችል ቢሆንም ዋጋው ግን ውድ መሆኑ ይነገራል፡፡ ትክክለኛው የቴክኖሎጂው ዋጋ ባይገለጽም፣ የአገልግሎት ወጪው ግን በአንድ ካሬ ኪሎ ሜትር እስከ አሥር ዶላር ሊጠይቅ እንደሚችል፣ የቴክኖሎጂው ባለቤት የሆነው ሪሞት ሴንሲንግ ሶሉሽስን ኩባንያ፣ ማኔጂንግ ዳይሬክተር ፕሮፌሰር ፍሎሬን ሳይገርት ይፋ አድርገዋል፡፡

    የደን ሽፋን መረጃዎችን በማቅረብ ለመተንተን ከማስቻል በላይ፣ በግብርና፣ በአየር ንብረት ለውጥ፣ የተፈጥሮ አደጋ ክስተቶች፣ የሥነ ምኅዳር ይዘቶችና ሌሎችም ተፈጥሯዊ ክስተቶችን ለመለካት የሚያስችለው ይህ መሣሪያ፣ በተለይ በደን ጭፍጨፋና መራቆት ሳቢያ የሚከሰቱ የበካይ ጋዞችን መጠን ለመለካት የሚያስችል እንደሆነም ተገልጿል፡፡ ደንን ባለመጨፍጨፍና ባለማራቆት የበካይ ጋዞችን ልቀት ለመቀነስ የሚያስችለው (ሬድ ፕላስ) የተባለው ፕሮግራም በኢትዮጵያ እየተካሔደ ይገኛል፡፡ ይህ ፕሮግራም በአገር አቀፍ ደረጃ አገሪቱ ያላትን የደን ተዓማኒነት ባላቸው የአለካክ፣ አመዘጋገብ፣ ክትትልና ሪፖርት አቀራረብ ሥርዓቶቸን የሚጠይቅ ሲሆን፣ እነዚህን ቅድመ ሁኔታዎች በማሟላት ኢትዮጵያ ከደን የካርቦን ሽያጭ ገቢ እንድታገኝ ያስችላል ተብሎ የሚጠበቅ ፕሮግራም ነው፡፡

    አገሪቱ የአረንጓዴ ኢኮኖሚ ስትራቴጂ መዘርጋቷን ተከትሎ እየተተገበረ የሚገኘውና ለጋሾች ገንዘብ እያበረከቱለት የሚገኘው ‹‹ሬድ ፕላስ›› ፕሮጀክት ተገቢውን የውጭ ፋይናንስ ለማግኘት ቅደመ ሁኔታዎቹን በሚፈለገው መጠን ማሟላት ይጠበቅበታል፡፡ ለዚህ ሲባልም ጂኦሳስ ኩባንያ ከብላክብሪጅና ከሪሞት ሴንሲንግ ሶሉሽንስ ኩባንያዎች ጋር በመተባበር ሪፖርቱን ሊያቀናብሩ ለሚችሉ የአገር ውስጥና የውጭ ባለሙያዎች ሥልጠና በመሰጠት ላይ ይገኛል፡፡ ወሎ ሰፈር፣ ድሬዳዋ ሕንፃ ላይ በሚገኘው የጂኦሳስ ቢሮ ውስጥ ሥልጠና እየወሰዱ ከሚገኙት ሃያ ኢትዮጵያውያን ደንና የአካባቢ ባለሙያዎች በተጓዳኝ ከጎረቤት አገሮች የተውጣጡ ባለሙያዎችም እየተሳተፉ ይገኛል፡፡ ለአፍሪካ ልማት አዲስ አጋርነት (ኔፓድ) የምሥራቅ አፍሪካ በይነ መንግሥታት (ኢጋድ) ወኪሎች ሥልጠናው በሚሰጥበት ቦታ በመገኘት ጉብኝት ከማድረጋቸውም ባሻገር፣ በአፍሪካ ቴክኖሎጂው የሚስፋፋበትን መንገድ እንደሚያፈላልጉም አስታውቀዋል፡፡

    የአገሪቱ የደን ሽፋን ቆጠራን ጨምሮ፣ ጠቅላላ ያለው መጠንና በዚህ ሳቢያም አገሪቱ ሊከፈላት ስለሚገባው የካርቦን ሽያጭ ገንዘብ መጠን ለማወቅ የሚያስችለውን የሬድ ፕላስ ፕሮግራም በመደገፍ፣ ኖርዌይ ከ70 ሚሊዮን ዶላር ያላነሰ ድጋፍ ማድረጓ ይታወሳል፡፡

     

     

    - Advertisement -spot_img

    የ ጋዜጠኛው ሌሎች ፅሁፎች

    - ማስታወቂያ -
    - ማስታወቂያ -spot_img

    በብዛት ከተነበቡ ፅሁፎች