Sunday, August 14, 2022
ሌሎች ዓምዶች
    - Advertisement -
    - Advertisement -

    የተመረጡ ፅሑፎች

    ‹‹እንደጀመርን እንጨርሰዋለን›› ለታላቁ ግድብ ብቻ ያደረገው ማነው?

    የአዲስ አበባ ከተማን ያስፈልጓታል የተባሉ መሠረተ ልማቶች ለማሟላት ብዙ እየተሠራ መሆኑ አይካድም፡፡ በተለይ በመንገድ መሠረተ ልማት ዘርፍ እየተሠሩ ያሉና ሊሠሩ የታቀዱ ፕሮጀክቶች ጥቂት የሚባሉ አይደሉም፡፡

    ከሰሞኑ እንደሰማነውም የጋራ መኖሪያ ቤቶች በተገነቡባቸው አካባቢዎች ትኩረት ተሰጥቶ መንገድ እንዲገነባላቸው ለማድረግ እየተወሰደ ያለውም ዕርምጃ እሰየው የሚያሰኝ ነው፡፡ የመንገድ መሠረተ ልማት ሳይሟላላቸው በቀሩ አንዳንድ የጋራ መኖሪያ ቤቶች አካባቢ ነዋሪዎች ምን ያህል ተቸግረው እንደነበር የምናስታውሰው በመሆኑ፣ አሁን ግን ከጋራ የመኖሪያ ቤቶቹ ግንባታ ጎን ለጎን ለመሠረተ ልማቱ ትኩረት መስጠቱ እንደመልካም ተግባር ይታያል፡፡ ይህ ማለት ግን በአዲስ አበባ ከተማ የመንገድ ግንባታ ሥራ ጋር ተያይዞ የሚታይ ችግር የለም ማለት አይደለም፡፡ ብዙ ችግሮች አሉ፡፡

    የጥራት መጓደልና የግንባታ መዘግየት ችግሮች በተደጋጋሚ የሚነሱ ናቸው፡፡ ከነዚህ ችግሮች ጎን ለጎን ሊታይ የሚችለውና ሰሞኑን መታዘብ እንደቻልነው ደግሞ ከጅምራቸው የሚቋረጡ ግንባታዎች በተለያዩ ቦታዎች መታየታቸው ነው፡፡ ይህ ገና ከጅምሩ የሚሽመደመዱ ፕሮጀክቶች ደግሞ የመንገድ ግንባታው መጠናቀቅ ሊያስገኝ የሚችለውን ጠቀሜታ ከማሳጣቱም በላይ፣ ተጀምረው የተተው ፕሮጀክቶች እያስከተሉ ያሉት ኢኮኖሚያዊና ማኅበራዊ ቀውሶች ፕሮጀክቶቹ ምነው ባልተጀመሩ የሚያሰኙ በመሆናቸው ጭምር ነው፡፡ ይህንን አስተያየት ለመስጠት የወደድኩት ሰሞኑን በአንድ ሁለት ቦታዎች የተመለከትኩት ጅምር የመንገድ ሥራዎች እያሳረፉ ያሉት ተፅዕኖ እንዲህ በቀላሉ መታለፍ ስለማይኖርባቸው ነው፡፡

    ከኦሎምፒያ ወደ መስቀል ፍላወር በሚወስደው መንገድ ላይ የታዘብኩትን ላስቀድም፡፡ ይህ መንገድ በከተማ ውስጥ ከፍተኛ የትራፊክ ፍሰት ከሚስተዋልባቸው መንገዶች መካከል አንዱ ነው፡፡ መንገዱ ከሚያስተናግደው ከፍተኛ የተሽከርካሪዎች ምልልስ ባሻገር ከመንገዱ ግራና ቀኝ በርካታ የንግድና የቢዝነስ ተቋማት ያሉበት ነው፡፡ የዚህ መንገድ መለያ ይህ ብቻ አይደለም፡፡ ወደ ተለያዩ አቅጣጫዎች ለመጓዝ የሚያስችል ማቋረጫም በመሆኑ ወሳኝ ሊባል የሚችል መንገድ ነው፡፡ ከአገልግሎት ብዛት አንፃር እርጅና የተጫጫነውን ይህንን መንገድ ለማደስ መወሰኑ የሚጠበቅ ነበር፡፡ በዚህ ውሳኔ መሠረት መንገዱን ለመገንባት ከጥቂት ሳምንታት በፊት አንደኛውን የመንገድ ክፍል መቆፈር ይጀመራል፡፡ ዶዘሮች የቆፈሩት መንገድ በዚያ አካባቢ የሚጓዙ ተሽከርካሪዎችን ማስተናገድ ባለመቻሉ አሽከርካሪዎች አማራጭ መንገዶችን እንዲጠቀሙ አስገድዷል፡፡ ከመንገዱ አስፈላጊነት አንፃር ግንባታውን ለማካሄድ ቁፋሮ ሲጀመር በቶሎ ሊያልቅ ይችላል የሚል ግምት አሳድሮ ነበር፡፡ በአካባቢው ያሉ የንግድና የቢዝነስ ተቋማት ተመሳሳይ እሳቤ ነበራቸው፡፡ ቆይቶ ግን ይህ ግምታቸው የማይሰምር መሆኑን ይረዳሉ፡፡ የመንገዱ መቆፋፈር በአካባቢው ያለውን የቢዝነስ እንቅስቃሴ በከፍተኛ ሁኔታ ጎድቷል፡፡

    - Advertisement -

    በአካባቢው በተለያዩ ቢዝነሶች ላይ ያሉ አንዳንድ ነጋዴዎች እንደሚገልጹትም በተቆፋፈረው ወይም አንድ ሰሞን ሥራው ተጀምሮ ሳይታሰብ በተቋረጠው መንገድ ምክንያት ተሽከርካሪዎች ላላቸውም ሆነ ለእግረኛ ደንበኞቻቸው እንቅፋት በመሆኑ ወደ ንግድ ድርጅቶቻቸው የሚመጡ ደንበኞቻቸው ቀንሰዋል፡፡

    ደንበኞቻቸውን ለማግኘት የተቸገሩ ትላልቅ የሚባሉ ሆቴሎች ደግሞ ጉዳቱ የባሰ ሆኖባቸዋል፡፡ ገበያ ከጠፋ ስንት ጊዜያችን  የሚሉት ጥቂት አይደሉም አሉ፡፡ በቀን ሃያና ሰላሳ ደንበኞችን ተቀብለው የሚያስተናግዱ ሆቴሎቹ መኝታ ክፍሎች አሁን ሁለትና ሦስት ደንበኞች ማግኘት ብርቅ ሆኖባቸዋል፡፡ መግቢያና መውጫ በማጣት የተቸገሩ ነዋሪዎችንም መታዘብ ይቻላል፡፡

    እንዲህ ያሉ የመሠረተ ልማቶች ሲካሄዱ እንዲህ ያሉ ተፅዕኖዎች ማጋጠማቸው አይካድም፡፡ ግንባታው ሲጠናቀቅ ደግሞ ሊገኝ የሚችለው ጥቅም ቀላል ላይሆን ይችላል፡፡ ይህ ከሆነ ደግሞ ግንባታው እስኪጠናቀቅ መታገስ ግድ ይላል፡፡

    ለመልካም ነገር መታገስ ተገቢ ነው፡፡ አሁን ግን በዚህ የመንገድ ግንባታ ሥራ ላይ የከፋ የሆነውና ምሬት እያስከተለ ያለው መንገዱን ለመሥራት በረዥሙ የተቆፋፈረው መንገድ መልክ ሳይዝ ሥራው መቆሙ ነው፡፡ ይህ ደግሞ የተጎዱትን ያህል ተጎድተው ሥራው ሲያልቅ እንጠቀማለን በማለት በትዕግስት ልባቸውን የከፈቱ የኅብረተሰብ ክፍሎችን ስሜት ይጎዳል፡፡

    በኦሎምፒያ መስቀል ፍላወር ለመንገድ ሥራ ወዲህ ወዲያ ሲሉ የነበሩ ማሽነሪዎች ሳይታሰብ እብስ ማለታቸው እንቆቅልሽ መሆኑ ብቻ ሳይሆን ሥራውን ለመጀመር የሚታይ ተስፋ ያለመኖሩ ብዙዎችን እያነጋገረ ነው፡፡ ይህም እየተጎዱም ቢሆን የመንገዱን መጠናቀቅ ሲናፍቁ የነበሩ የአካባቢው ነዋሪዎችና የንግድ ተቋማት ባለቤቶች የግንባታ ሥራው ምነው ባልተጀመረ እንዲሉ አስገድዷቸዋል፡፡

    ሊጠናቀቅ የማይችል ከሆነ ለምንስ ይጀመራል? የሚለው ጥያቄ የብዙዎች ሲሆን፣ መንገዱን በባለቤትነት የሚያሠራውም መሥሪያ ቤት ተጀምሮ ስለ ተቋረጠው ፕሮጀክት የተነፈሰው ነገር የለም፡፡ ግን አካባቢው ታርሶ ሥራው ቆሞ ብዙዎችን እያስቆዘመ ነው፡፡

    በተመሳሳይ በቃሊቲ የአሽከርካሪዎች ማሠልጠኛ አካባቢ ለእድሳት የተቆፈረ መንገድ እንደተጀመረ ቆሟል፡፡ በዚህ አካባቢ የተቆፈረው መንገድ እንደ ኦሎምፒያ፣ መስቀል ፍላወር መንገድ የንግድ ተቋማት የሌሉበት ቢሆንም ሌላ ተፅዕኖ ግን አለው፡፡ ከዚህም ባለፈ ለቀላል የባቡር ፕሮጀክቱ ተብሎ ሃያ ሁለት አካባቢ እንዲሁ ተቆፋፍሮ ከቆመ ጥቂት የማይባሉ ወራት ተቆጥረዋል፡፡ በዚህ አካባቢ ያሉ ነዋሪዎች በመንገዱ መቆፈር ሳቢያ በተፈጠረው አቧራ ቀን ተሌት እየተሰቃዩ ይገኛሉ፡፡ እንደ መስቀል ፍላወሩ መንገድም በዚህ አካባቢ ያሉ የንግድ ተቋማት የግብይት ድርቅ ከመታቸው ሰነባበቱ፡፡

    ተጀምረው የተቋረጡት ሥራዎች ምክንያታቸው ምንድነው? የሚለው ጥያቄ አሳማኝ መልስ ያሻዋል፡፡ በተጠቀሱት አካባቢዎች ቀላል ለማይባል የትራፊክ መጨናነቅ ምክንያት በመሆን ችግር መፍጠራቸው በግልጽ ይታያል፡፡ በመንገዶቹ መቆፋፈር ምክንያት የተፈጠረው የመንገድ ጥበት ረዥም የትራፊክ መጨናነቅን በመፈጠር እንቅፋት ሆኗል፡፡ ስለዚህ በተመሳሳይ ወቅት ለግንባታ ተቆፋፍረው የተተውት የእነዚህ መንገዶች ጉዳይ በተለይ ሥራቸውን በፍጥነት አጠናቅቆ ወደ ሥራ ማስገባት እንደሚችል ሳይታመንበትስ  ከሆነ ባለሥልጣኑ ሊጠየቅበት ይገባል፡፡

    ባይነካኩ ኖሮ እየታየ ያለው ችግር እንደማይፈጠር ይታወቃልና ባለሥልጣኑ ማብራሪያ መስጠት ብቻ ሳይሆን የጀመረውን እንዲጨርስ መደረግ አለበት፡፡ ገና በጅምሩ ሥራው የቆመው በምክንያት ነው ቢባል እንኳን ችግሮቹን ቀድሞ ለማወቅ ለምን አልተቻለም? እንደ ምሳሌ እነዚህን መንገዶች አነሳን እንጂ በከተማዋ ውስጥ በርካታ በጅምር ተቆፋፍረው የቀሩ መንገዶች ስለመኖራቸው ይታወቃል፡፡

    አሁንም ቢሆን የተጀመሩት ሥራዎች መጠናቀቅ አለባቸው፡፡ ማጠናቀቅ የማይችል ከሆነ ግን ቢያንስ የተቆፋፈሩትን በማስተካከል ጊዜያዊ አገልግሎት እንዲሰጡ ማድረግ ይገባል፡፡ ‹‹እንደጀመርን እንጨርሰዋለን›› የሚለው መፈክር ጠዋት ማታ በሚለፈፍበት አገር አባባሉን ለአንድ ለታላቁ ህዳሴ ግድብ ብቻ ያደረገው ማነው? የተጀመሩ ሥራዎችን የማጠናቀቁ ልምድ በሌሎችም መስኮች ሊንፀባረቁ ይገባል፡፡ ሊጠናቀቅ የማይችል ከሆነ ደግሞ አለመጀመር ይሻላል፡፡ ከዚህ ጉዳይ ጋር ተያይዞ የመጨረሻ የማጠናቀቂያ ሥራ ሳይሠራላቸው ዝም ብለው የሚተው ፕሮጀክቶችም አሉ፡፡ የተለያዩ ግንባታዎች ለማካሄድ በአስቸኳይ የሚፈርሱ ግንባታዎች ላይ ይሠራል የተባለው ፕሮጀክት ለዓመታት ሲዘገይም ይታያል፡፡ እንዲህ ዓይነት ግድፈቶች ሊታረሙ ይገባል፡፡

     

    Latest Posts

    - Advertisement -

    ወቅታዊ ፅሑፎች

    ትኩስ ዜናዎች ለማግኘት