Thursday, August 18, 2022
ሌሎች ዓምዶች

    በግጭት በተጠናቀቀው የተቃውሞ ሠልፍ የመንግሥትና የሰማያዊ ፓርቲ ውዝግብ

    - Advertisement -spot_img

    በብዛት የተነበቡ

    ማክሰኞ ሚያዝያ 13 ቀን 2007 ዓ.ም. የሕዝብ ተወካዮች ምክር ቤት በሊቢያ በአረመኔያዊ ጭፍጨፋ ሕይወታቸውን ያጡ ኢትዮጵያውያን አስመልክቶ፣ የሦስት ቀናት ብሔራዊ ሐዘን በማወጅ ስብሰባውን ጀምሯል፡፡

    የዚያን ዕለት ማለዳ ሰልፉ ከመጀመሩ በፊት ሐዘኑን የሰሙ በርካቶች በተለምዶ ጨርቆስ አካባቢ ተገኝተው እርማቸውን እያወጡ ነበር፡፡ በግምት ከጠዋቱ 2፡15 ሰዓት አካባቢ ሲሆን፣ የተወሰኑ ወጣቶች፣ ‹‹ሉዓላዊነት ማለት የዜጐችን መብት የትም ቦታ ማክበር ማለት ነው›› የሚል መፈክር በመያዝ ለሠልፍ የተዘጋጁ መስለው ቆሙ፡፡ ለቀስተኛው እነርሱን ተቀላቅሎ ጉዞ ጀመረ፡፡

    የኢትዮጵያውያኑን የግፍ ግድያ የሰሙ ደግሞ ወደ ሟቾቹ ቤተሰቦች ቤት በማምራት ሐዘናቸውን እየተወጡ ነበር፡፡ የአገሪቱ ከፍተኛው የሕግ አውጪ አካል (ፓርላማ) የተቃውሞ ሠልፍ ያካተተውን የሦስት ቀናት ሐዘን ሊያውጅ በተሰበሰበበት ወቅት፣ በርከት ያሉ የጨርቆስና የአካባቢው ነዋሪዎች ደግሞ የተቃውሞ ሠልፍ ለማድረግ ከጨርቆስ ወደ መስቀል አደባባይ እየተመሙ ነው፡፡

    የሠልፉ መድረሻ ቤተ መንግሥት መሆኑ በተለያዩ ሠልፈኞች ከመገለጹ ውጪ፣ ሠልፉን ማን እንዳዘጋጀውና ጋዜጠኞች ለሚጠይቁት የሠልፉ ዓላማና መድረሻ በግልጽ የተቀመጠ ነገር አልነበረም፡፡

    ከጨርቆስ ቤተ ክርስቲያን ጀርባ የሚገኘውና ሪቼ ወደሚባለው ሠፈር የሚያወጣውን ቀጭን የአስፋልት መንገድ ይዞ፣ ሠልፈኛው ከበር በር እየተቀላቀለ ቁጥሩ እየጨመረ ቀጭኗ አስፋልትም በሒደት በሠልፈኛ እየተሞላች ጉዞውም ቀጥሎ፣ ሠልፉ ወደ ዋናው አስፋልት መንገድ ደርሷል፡፡

    የተለያዩ መፈክሮችን የሚያሰማው ሠልፈኛ ዋናው አስፋልት እስከሚደርስ ድረስ በጣም ጥቂት ፖሊሶች በስተቀር፣ ይኼ ነው የሚባል የፀጥታ አስከባሪ ኃይል በሥፍራው አልነበረም፡፡ ለነገሩ ሠልፉም ምንም ዓይነት የፀጥታ ችግር አልነበረበትም፡፡

    ሠልፉ እየተመመ መስቀል አደባባይ አካባቢ ደርሷል፡፡ በሥፍራው የደረሱት ፖሊሶች ‹‹ከዚህ በላይ የትም መሄድ አትችሉም›› ሲሉ፣ ‹‹የመቃወም መብታችን ይከበር›› የሚሉት ሠልፈኞች ደግሞ ገፍተው ጉዞ ወደ ቤተ መንግሥት ሆነ፡፡ ወደ ቤተ መንግሥት ሲደረግ የነበረው ጉዞ የአፍሪካ ኢኮኖሚክ ኮሚሽን አዳራሽ አካባቢን ማለፍ አልቻለም፡፡ ከአዳራሹ ከፍ ብሎ ከሚገኘው መስቀለኛ መንገድ ላይ በርከት ያሉ ፖሊሶች መንገዱን ዘግተው ቆመዋል፡፡ ‹‹ከዚህ በላይ ማለፍ አይቻልም›› በማለት መንገዱን ጠርቅመውታል፡፡ ሠልፈኛው ለማለፍ ያደረገው ጥረት ቀደም ሲል እንደነበረው አልተሳካም፡፡

    ሠልፈኛው ወደመጣበት እንዲመለስ የሚጠይቁት ፖሊሶች ረቡዕ ሚያዝያ 14 ቀን 2007 ዓ.ም. የሚካሄድ አገር አቀፍ ሠልፍ ስላለ፣ አሁን ተመለሱ በማለት ሠልፈኛው ወደመጣበት እንዲመለስ አደረጉት፡፡ በዚህ ወቅት ሠልፈኛው አልፋለሁ አታልፉም የሚለው ክርክሩን በመተው፣ መንግሥትንና የፖሊስ ኃይልን እየዘለፈ ወደመጣበት ተመለሰ፡፡

    የንፁኃን ዜጐችን ሕይወት ኢሰብዓዊ በሆነ የግፍ ግድያ መጥፋቱን ተከትሎ ሊደረግ የታቀደው የመጀመርያው ሠልፍ እንዲህ ተጠናቀቀ፡፡ ሠልፉ ከተጠናቀቀ ምናልባት ከአንድ ሰዓት በኋላ የተወካዮች ምክር ቤት የሦስት ቀናት የሐዘን አዋጅ አወጀ፡፡

    ባለፈው ሳምንት ረቡዕ የሦስት ቀናት ብሔራዊ ሐዘን የተጀመረው በዕለቱ በመስቀል አደባባይ በተጠራ ታላቅ የተቃውሞ ሰላማዊ ሠልፍ አማካይነት ነበር፡፡

    በዕለቱ ሠልፉን ለመታደምና ከፍተኛ የሆነ የተቃውሞ ድምፅ ለማሰማት ወደ ሥፍራው ያቀናው ሕዝብ እጅግ በርካታ ነበር፡፡ በዕለቱ የተለያዩ ፕሮግራሞች የተከናወኑ ሲሆን፣ የተለያዩ ሃይማኖት መሪዎች ንግግር ያደረጉ ሲሆን፣ የሕፃናት ሙዚቃዊ ትዕይንትም የዚሁ ፕሮግራም አካል ነበር፡፡ የሃይማኖት መሪዎች ንግግር በሚያደርጉበት ወቅት በሥፍራው የተገኙ ሠልፈኞች በተለያዩ ስሜቶች ውስጥ እንደነበሩ መረዳት ይቻላል፡፡

    የማንኛውንም ተናጋሪ ሐሳብን የማያዳምጡና የተለያዩ መዝሙሮችን የሚዘምሩ፣ መሪር በሆነ ሐዘን ተውጠው እጅግ በሚያሳዝን ሁኔታ የሚያለቅሱና እንዲሁም ንግግሮችን በፅሞና የሚከታተሉ ነበር፡፡

    ምንም እንኳን የተቃውሞ ድምፅ የሚያሰሙ ሠልፈኞች ቢኖሩም፣ ድምፃቸው ጐልቶ መውጣት የጀመረው የአዲስ አበባ ከተማ አስተዳደር ከንቲባ አቶ ድሪባ ኩማ ንግግር ማድረግ በጀመሩበት ወቅት ነበር፡፡

    ከከንቲባው ንግግር በኋላ ንግግር ለማድረግ የመነጋገሪያ ሥፍራውን የያዙት ጠቅላይ ሚኒስትር ኃይለ ማርያም ደሳለኝ ሲሆኑ፣ በዚህ ጊዜ የተቃውሞ ድምፁ በፊት ከነበረበት ጨመረ፡፡ በሠልፈኞች መካከል እንዲሁ የተለያዩ መፈክሮችን እያሰሙ የሚንቀሳቀሱ ሠልፈኞችም ነበሩ፡፡

    የጠቅላይ ሚኒስትሩ ንግግር እየተካሄደ ባለበት ወቅት በአካባቢው የነበረው ሁኔታ ምቾት ያልሰጣቸው በርከት ያሉ ሠልፈኞች ሠልፉን እያቋረጡ ወደመጡበት መመለስ ጀምረዋል፡፡ የጠቅላይ ሚኒስትሩ ንግግር ወደማጠናቀቂያው ሲቃረብ የተቃውሞ ድምፁ አቅጣጫውን ቀይሮ ወደ ግርግር ተሸጋገረ፡፡

    ግርግሩ እየተባባሰ በሄደበት ወቅት ንግግራቸውን የቋጩት ጠቅላይ ሚኒስትሩ የዕለቱ ፕሮግራም መጠናቀቁን አስታወቁ፡፡ በዚህ ጊዜ ፖሊሶች ሠልፈኛው እንዲበተን ሲጠይቁ፣ አቅጣጫው ተለይቶ ከማይታወቅ አካባቢ ድንጋይ ውርወራ ተጀመረ፡፡ ሠልፈኞች እግሬ አውጭኝ ሩጫቸውን ጀመሩ፡፡    

    የሠልፈኞችና የፖሊስ ውዝግብ ከፍ ወዳለ ግጭት ተሸጋገረ፡፡ በርካቶች የፖሊስ ቆመጥ እየቀመሱ ይወድቁ፣ ይነሱና ይሮጡ ነበር፡፡

    በዚህም ሁኔታ የተፈጠረው ግጭት አልረጋጋ በማለቱ የፌዴራል ፖሊስ አድማ በታኝ ኃይል የአስለቃሽ ጭስ መተኮስ ጀመረ፡፡ በዚህ ወቅት ግርግሩ፣ ሩጫውና ዱላው መጠኑን ጨምሮ ብዙዎችን ለመረጋገጥ አጋለጣቸው፡፡

    በዚህም ሳቢያ በርካቶች የተለያዩ ጉዳቶች የደረሰባቸው ሲሆን፣ ብዙዎቹም ወደ ዘውዲቱ ሆስፒታል በአምቡላንስ እየተወሰዱ ነበር፡፡

    በዕለቱ በፖሊስ ከደረሰው ድብደባ በተጨማሪ አብዛኞቹ ሠልፈኞች ላይ አደጋ ያደረሰው የተቃውሞ ሠልፈኞችን ለመበተን የተተኮሰው አስለቃሽ ጭስ ነበር፡፡ የአስለቃሽ ጭሱን የማቃጠልና የማፈን ኃይል መቋቋም ያቃታቸው ሠልፈኞች ከሥፍራው ለመሸሽ የሞከሩ ቢሆንም፣ የማቃጠልና የማፈን ኃይሉን መቋቋም ያቃታቸው ደግሞ ከመስቀል አደባባይ እስከ ጋንዲ ሆስፒታል ድረስ ባለው አስፋልት ዳርና ዳር ላይ ተኝተው የአካባቢው ነዋሪዎችና ሌሎች ሠልፈኞች ፊታቸውና ጭንቅላታቸው ላይ ውኃ በማፍሰስ ለመርዳትና ለመንከባከብ ሲሞክሩ ታይተዋል፡፡

    በዕለቱ በርካቶች ጉዳት የደረሰባቸው ሲሆን ሌሎች በርካቶች ደግሞ በቁጥጥር ሥር ውለዋል፡፡ በቁጥጥር ሥር ከዋሉት በርካታ ሠልፈኞች መካከል ፖሊስ የተወሰኑትን በተለምዶ ትንሿ ስታዲየም በሚባለው ሥፍራ አከማችቷቸው ነበር፡፡

    ረቡዕ ዕለት ማለዳ የተካሄደው ሠልፍ በግጭት ከተጠናቀቀ በኋላ፣ የመንግሥት ኮሙዩኒኬሽን ጉዳዮች ጽሕፈት ቤት ኃላፊ ሚኒስትር አቶ ሬድዋን ሁሴን፣ ከአሥር ሰዓት ጀምሮ በጉዳዩ ላይ በጽሕፈት ቤታቸው መግለጫ ሰጥተዋል፡፡

    በዕለቱ ከጉዳዩ ጋር የተገናኙ በርካታ ጉዳዮች ላይ መግለጫ ከመስጠት ባለፈ፣ ከጋዜጠኞች ለሚቀርቡ ጥያቄዎች ምንም ዓይነት ዕድል ሳይሰጡ መግለጫቸውን አጠናቀው የጽሕፈት ቤታቸውን አዳራሽ ለቀው ወደ ቢሯቸው አቅንተዋል፡፡

    በዕለቱ በተካሄደው ሠልፍ ጉዳት ከደረሰባቸው በርካታ ሠልፈኞች በተጨማሪ ሌሎች በርካቶችም ታስረዋል፡፡ በዕለቱ ከተከሰተው ግጭት በኋላ ከ900 በላይ ሠልፈኞች መታሰራቸውን ምንጮች ለሪፖርተር ገልጸዋል፡፡

    በዕለቱ የተያዙት ከ900 በላይ እስረኞች መጀመሪያ በአንድ ቦታ ተሰብስበው የነበረ ሲሆን፣ በመቀጠል ግን መታወቂያቸው እየታየ ወደሚኖሩባቸው ክፍላተ ከተሞች ወደሚገኙ ፖሊስ ጣቢያዎች እንዲዘዋወሩ መደረጉን ምንጮች አክለው ገልጸዋል፡፡

    ቆየት ብሎም ከፖሊስ ጣቢያዎች የተለቀቁ፣ ፍርድ ቤት ቀርበው ፍርድ ቤት ነፃ ያሰናበታቸው፣ እንዲሁም የጊዜ ቀጠሮ የተጠየቀባቸው እስረኞች መኖራቸውን ምንጮች ለሪፖርተር ጠቁመዋል፡፡

    ከጉዳዩ ጋር በተያያዘ መግለጫ የሰጡት አቶ ሬድዋን፣ የታሰሩና ጉዳት የደረሰባቸው ግለሰቦች መኖራቸውን ገልጸው፣ ‹‹በሒደቱም ሰባት ፖሊሶች የተጎዱ ሲሆን ሁለቱ ክፉኛ ተጎድተዋል፤›› በማለት አስታውቀዋል፡፡

    በተጨማሪም በዕለቱ ለተፈጠረው ቀውስ ተጠያቂው ሙሉ በሙሉ ሰማያዊ ፓርቲ ነው በማለት አቶ ሬድዋን ሰማያዊ ፓርቲን ኮንነዋል፡፡ ‹‹በመላው አገራችን ሕዝቦች በሐዘን ላይ ባሉበት፣ የፖለቲካ ፓርቲዎች አጋርነታቸውን በገለጹበት፣ የዓለም ማኅበረሰብ ሐዘናችንን እየተካፈለ ባለበት በአሁኑ ወቅት፣ አደጋው ከተሰማበት ዕለት ጀምሮ በዜጎች ደም፣ በሟች ቤተሰቦችና በመላው ኢትዮጵያውያን የጋራ ሐዘን በመነገድ ሁከትና ሌላ እልቂት ፈጥረው በችግሩ ውስጥ ለመጋለብ ያሰፈሰፉ አንዳንድ ተቃዋሚ ፓርቲዎች፣ በተለይም ሰማያዊ ፓርቲና የሐሳቡ ተጋሪ ጥቂት ደጋፊዎቹ በዛሬው ዕለትም የሕዝቡን ሐዘን ወደ ፖለቲካ ቀውስ ለመለወጥ በርካታ ጥረት አድርገዋል፤›› በማለት ሰማያዊ ፓርቲን ወቅሰዋል፡፡ ‹‹ከዚህ በተጨማሪም በሁለትና በሦስት ሥፍራዎች ተሰባስበው የተጠናና ጊዜ ተወስዶ ልምምድ የተደረገበት የሁከት ድራማ ሞክሯል፤›› በማለት አስረድተዋል፡፡

    በዕለቱ ከተፈጠረው ግጭት በተጨማሪ ሰማያዊ ፓርቲ አባላቶቹ እንደታሰሩበት የሚገልጽ መግለጫ ያወጣ ሲሆን፣ በዚህም መሠረት አባላቱ መታሠራቸውን አረጋግጫለሁ ብሏል፡፡ በዕለቱ የታሰሩት የሰማያዊ ፓርቲ አባላት ብሎ የዘረዘራቸው ወይንሸት ሞላ የድርጅት ጉዳይ አባል፣ ጠና ይታየው የ2007 አገራዊ ምርጫ የተወካዮች ምክር ቤት ተወዳዳሪ፣ ኤርምያስ ሥዩም የፓርቲው አባል፣ ማስተዋል ፈቃዱ የፓርቲው የቂርቆስ ክፍለ ከተማ አስተባባሪ፣ ዳንኤል ተስፋዬ የፓርቲው የጉለሌ ክፍለ ከተማ አስተባባሪ፣ ቴዎድሮስ አስፋው የአዲስ አበባ ምርጫ ጉዳይ ኮሚቴ ሕዝብ ግንኙነት፣ እስክንድር ጥላሁን የ2007 አገራዊ ምርጫ የተወካዮች ምክር ቤት ዕጩ ተወዳዳሪ፣ ይድነቃቸው አዲስ የ2007 አገራዊ ምርጫ የተወካዮች ምክር ቤት ዕጩ ተወዳዳሪ ናቸው በማለት ሰማያዊ ፓርቲ አስታውቋል፡፡ በተጨማሪም በጉዳዩ ላይ ለሪፖርተር አስተያየት የሰጡት የሰማያዊ ፓርቲ የሕዝብ ግንኙነት ኃላፊ አቶ ዮናታን ተስፋዬ በበኩላቸው፣ ‹‹መንግሥት በጉዳዩ ላይ የያዘው አቋም ተገቢ አይደለም፤›› በማለት መግለጫውን ተቃውመዋል፡፡

    ‹‹ሰማያዊ ፓርቲ የመንግሥት ኮሙዩኒኬሽን ጽሕፈት ቤት ኃላፊውንም ሆነ ጽሕፈት ቤቱን ዝም ብሎ አያልፋቸውም፡፡ በስም ማጥፋት ወንጀል ክስ ሊመሠርት ይችላል፤›› በማለት ለሪፖርተር አስረድተዋል፡፡

    ‹‹ይህ ችግር እውነት ቢሆን እንኳን፣ ሰማያዊ ፓርቲ እንደተባለው አድርጎ ቢሆን እንኳን፣ ጉዳዩን አጣርቶ የመወሰንና የመክሰስ ሥልጣን ያላቸው ዓቃቤ ሕግና ፖሊስ ምንም ሳይሉ እንደዚህ ዓይነቱን ስም ማጥፋት በቀላሉ አናልፈውም፤›› በማለት አቶ ዮናታን ተቃውሞአቸውን አሰምተዋል፡፡

    በተደራጀ መልኩ ተንቀሳቅሰዋል የሚለውን ጉዳይ በተመለከተ ደግሞ፣ ‹‹ሐዘኑ የተፈጠረው አሁን ነው፡፡ እንዴት ነው በአንድ ቀን ውስጥ እንደዚህ ዓይነት ዝግጅት ሊደረግ የሚችለው? የማይመስል ነገር ነው፤›› በማለት የተሰነዘረውን አስተያየት ተቃውመዋል፡፡ አቶ ዮናታን በዕለቱ የተከሰተውን ግጭት የፈጠረው ከአንድ ሰዓት በላይ የፈጀው የተለያዩ ግለሰቦችና የሃይማኖት መሪዎች ንግግር አሰልቺነት ሊሆን እንደሚችል ግምት እንዳላቸው ገልጸው፣ ጉዳዩንም እንዲህ ያስረዳሉ፡፡ ‹‹ረዥም ንግግር ነበር፡፡ ከዚያም አልፎ በሕፃናት የተደረገው ዳንስ ዓይነት የሚመስል እንቅስቃሴ ሰውን እንዳስቆጣ መረዳት ይቻላል፤›› ብለዋል፡፡

    አረመኔው አሸባሪ ድርጅት ዓላማው ምንድነው?

    በሶሪያ የተፈጠረውን ቀውስና አለመረጋጋት ለእኩይ ተግባሩ መጠናከር ምቹ ሁኔታን የፈጠረለት አይኤስ የተሰኘው ይህ የሽብር ቡድን፣ ምሥረታው ግን ከሶሪያ ቀውስ ቀደም ብሎ ነው፡፡

    በቡድኑ ዙሪያ ጥናት ያካሄዱ ተመራማሪዎች እንደሚገልጹት፣ ከአሜሪካ መራሹ የኢራቅ ዘመቻ በኋላ በኢራቅ የተከሰተው ቀውስ ለቡድኑ መስፋፋት ከፍተኛ አስተዋጽኦ አበርክቷል፡፡

    የቡድኑ ዋነኛ ዓላማ ኢስላማዊ መንግሥት መመሥረት ሲሆን፣ በኢራቅ በሁለቱ የሙስሊም ቡድኖች መካከል የተፈጠረው ግጭት ደግሞ ከኢራቅ አልፎ ወደ ሶሪያ እንዲስፋፋ አስፈላጊውን ምቹ ሁኔታ ፈጥሮለታል፡፡

    የድርጅቱ የገንዘብ ምንጭ ከተቆጣጠራቸው የኢራቅና የሶሪያ ከተሞች በሚያገኘው የነዳጅ ጉድጓዶች ከሚገኝ ገንዘብ መሆኑ ይነገራል፡፡ ይህም ይህንን የሽብር ቡድን ለመቆጣጠርና ለማክሰም የሚደረገውን ጥረት አስቸጋሪ አድርጎታል፡፡

    ከኢራቅ በመነሳት በተለይ ራቃ የተባለች ሶሪያ አሌፓ ከተማ አካባቢ የምትገኝ ከተማን ከተቆጣጠረ በኋላ፣ ቡድኑ የእስላማዊ መንግሥት ለመመሥረት ዕቅዱ ውስጥ ካካተታቸው በርካታ የመካከለኛው ምሥራቅና የሰሜን አፍሪካ አገሮች ተርታ ኢትዮጵያንም አካቶ ከወራት በፊት ይፋ አድርጎ ነበር፡፡

    ሆኖም ግን ጉዳዩን በቅርብ የሚከታተሉና የሚያጠኑ ተመራማሪዎች ይህ ሐሳብ ከህልም የማይዘል የቁም ቅዥት ነው ይሉታል፡፡ ለዚህ የሚያቀርቡት መከራከሪያ ደግሞ ቡድኑ አሁን በያዘው አካሄድ እንኳን በካርታው ያካተታቸውን አገሮች ሊቆጣጠር ቀርቶ፣ መረጋጋት በተሳናቸው ሶሪያና ኢራቅ ውስጥ እንኳን አገሮቹን ሙሉ በሙሉ መቆጣጠር የሚያስችል አቅም አልፈጠረም የሚል ነው፡፡

    በተጨማሪም ቡድኑ በእስካሁኑ እንቅስቃሴው መቆጣጠር የቻለው የግዛት ስፋት መጠን ልክ በደፈናው ከአውሮፓዊቷ ትንሽ አገር ቤልጂየም መጠን ጋር የሚመሳሰል ነው በማለት፣ የድርጅቱን ህልም ለምን የቀን ቅዠት እንደሆነ አስረግጠው ያስረዳሉ፡፡

    ይህ የሽብር ቡድን የተለያዩ አገሮች ዜጎችን በግፍ ሲገድል የከረመ ሲሆን፣ አሁን ኢትዮጵያውያንን በአሰቃቂ ሁኔታ ሕይወታቸውን እንዲያጡ አድርጓል፡፡ በዚህም መላ ኢትዮጵያውያን ሐዘን አንጀታቸው ውስጥ ገብቶ አንሰፍስፏቸዋል፡፡ ባለፈው ረቡዕ በሠልፉ ማጠናቀቂያ ላይ በተፈጠረው ረብሻና ግርግር መንግሥትና ሰማያዊ ፓርቲ እርስ በርስ እየተወነጃጀሉ ናቸው፡፡ በሽብር ቡድኑ ሕይወታቸውን ያጡ ሌሎች ሟቾችም ማንነት እየታወቀ ነው፡፡ አጠቃላይ የጉዳዩ መቋጫ የሚሆነው ስደትን ለአንዴና ለመጨረሻ ጊዜ ማስወገድ ነው የሚለው የበርካቶች ሐሳብ ነው፡፡ ይህንን ስደት ለማስቆም ደግሞ መፍትሔው ዙሪያ ገባውን የአገሪቱን የፖለቲካ፣ የኢኮኖሚና የማኅበራዊ ችግሮች መነሻን በሚገባ መመርመር ነው የሚሉ ሐሳቦች በብዛት እየተደመጡ ነው፡፡

    - Advertisement -
    - Advertisement -spot_img

    ትኩስ ጽሑፎች

    ተዛማጅ ጽሑፎች

    - Advertisement -
    - Advertisement -