Monday, August 8, 2022
ሌሎች ዓምዶች
    - Advertisement -
    - Advertisement -
    ኪንና ባህልየተዋናይና ተመልካች ድንበር ሲጣስ

    የተዋናይና ተመልካች ድንበር ሲጣስ

    ቀን:

    ቴአትሩ ይጀመራል የተባለው ከምሽቱ አንድ ሰዓት ስለሆነ ተመልካቾች አዳራሹ ውስጥ ለመግባት መጠባበቅ ጀመሩ፡፡ ነገር ግን አንድ ሰዓት ሆኖም አምስት ኪሎ የሚገኘው የአዲስ አበባ ዩኒቨርሲቲ ድኅረ ምረቃ አዳራሽ አልተከፈተም፡፡ የቴአትሩ አዘጋጆች ቴአትሩ ይጀመራል ካሉበት ሰዓት ዘግይተው ይሆናል የሚል ሐሳብ የነበራቸው ተመልካቾች አዳራሹ አጠገብ ባለው ኮሪደር መጠበቃቸውን ቀጠሉ፡፡ ከመቅጽበት የተለያዩ እንስሳቶችን አስመስለው የለበሱ ተዋንያን ኅብረ ዝማሬ ማሰማት ጀመሩ፡፡ ተመልካቾቹ ሁኔታው ግር እያላቸው የሚሆነውን በአጽንኦት መከታተል ያዙ፡፡ ቴአትሩ የተጀመረው እንደተመለመደው የቴአትር አቀራረብ መድረክ ላይ ሳይሆን ኮሪደር ላይ ነበር፡፡

     የተዋንያኑ ኅብረ ዝማሬ ውሸት ላይ ያተኮረ ነበር፡፡ የቴአትሩ ርዕስ ‹‹ውሸት እንሠራለን›› ሲሆን፣ ኮሪደር ላይ የነበሩት ተዋንያን ተመልካቾች መሀል እየገቡ ትወናቸውን ቀጠሉ፡፡ ቴአትሩ በአዲስ አበባ ዩኒቨርሲቲ የመልቲሚዲያ ቴአትር ተማሪዎች የተዘጋጀ ሙከራዊ ቴአትር (ኤክስፐርመንታል ቴአትር) ነው፡፡ ሙከራዊ እንደመሆኑም የተለመደው (ሜንስትሪም) የቴአትር አቀራረብን እንደየአስፈላጊነቱ ሊጥስ ይችላል፡፡

    ሙከራዊ ቴአትሩ፣ ከትወና በተጨማሪ በርካታ ኪነ ጥበባትን (መልቲሚዲያ) በመጠቀም ተሠርቷል፡፡ አንዱ መንገድ ሥነ ጽሑፍ ሲሆን፣ ተዋንያኑ ኮሪደር ላይ ለተመልካቾች ወረቀት እያደሉ እንዲያነቡ ያዙ ነበር፡፡ ወረቀቱ ‹‹ወንፊት›› የሚል ርዕስ ያለው ልቦለዳዊ ጋዜጣ ነው፡፡ ዕለታዊ ጋዜጣው ውሸት ነክ ዜናዎችን ማለትም ‹‹ውሸት ዕድሜ እንደሚያረዝም ጥናቶች አረጋገጡ›› እና ‹‹የውሸት ቀን በድምቀት ይከበራል›› የሚሉ ዜናዎች ይዟል፡፡ የጋዜጣው መሪ ቃል፣ የአዘጋጆቹና የዘጋቢዎቹ ስምም እንደ ‹‹ቀዳዳው ሰውነት›› ያሉ ከውሸት ጽንሰ ሐሳብ ጋር የተያያዘ ትርጓሜ ያላቸው ናቸው፡፡ ተመልካቾች በድንግዝግዝ ብርሃን ወረቀቱን ለማንበብ ይጣጣሩም ነበር፡፡

    ቴአትሩ የተለመደውን የተዋንያንና የተመልካቾች የግንኙነት ወሰንን ማፍረሱ ቀጥሎ፣ ተመልካቾች ወደ አዳራሹ መግባት የሚፈቀድላቸው መዋሸት ከቻሉ ብቻ እንደሆነ ተገለጸላቸው፡፡ የእንስሳት አልባሳት ያጠለቁት ተዋንያን በአዳራሹ በር ግራና ቀኝ ቆመው ወደ አዳራሹ የሚገቡትን ተመልካቾች እያዋከቡ ‹‹መዋሸት ትችያለሽ?›› ‹‹መዋሸት ትችላለህ?›› እያሉ ወዲህ ወዲያ እየነቀነቁ በሚያስደነግጥ መልኩ ይጠይቃሉ፡፡ ‹‹መዋሸት እችላለሁ›› ያለ ተመልካች ወደ አዳራሹ ተገፍትሮ ይገባል፡፡ ተመልካቾች በተዋንያኑ ጥያቄ እየተገረሙ፣ እየሳቁና ግራ እየተጋቡም ‹‹እዋሻለሁ›› እያሉ ገቡ፡፡  በአዳራሹ መግቢያ በር ‹‹መዋሸት ካልቻልክ እንዳትገባ›› የሚል መፈክር በደማቁ ተጽፎ ነበር፡፡ በአዳራሹ ያሉት መቀመጫዎች ላይም መዋሸት የማይችል እንዳይቀመጥ የሚያሳስብ ወረቀት ተቀምጧል፡፡

    የ‹‹ውሸት እንሠራለን›› ዋና ገፀ ባህሪ ዶ/ር እውነቱ ውብሸት ይባላል፡፡ ስለ ውሸት አስፈላጊነት በመስበክና ሰዎች እንዲዋሹ በማበረታታት ዕውቅናን ያተረፈ ‹‹ምሁር›› ነው፡፡ በሙያው ዝነኛ በመሆኑ መገናኛ ብዙኃን ከሱ ጋር ቃለ ምልልስ ለማድረግ ይሽቀዳደማሉ፡፡ እሱም ከሰው ለሰው ግንኙነት እስከ ቤተሰብና በአገር ደረጃም ውሸት ስለሚሰጠው ቦታ በኩራት ይናገራል፡፡ ስለ ውሸት ገናናነት በሙሉ ልብ የሚናገረው ዶ/ር እውነቱ የደራ ገበያ ቢኖረውም፣ አልፎ አልፎ የህሊናው የእውነት ደወል ያቃጭልበታል፡፡ በተደጋጋሚ ችላ ሊለው ቢሞክርም በውስጡ ያለው ጭላንጭል እውነት ጎልቶ ሊወጣ ሲታገለው በቴአትሩ ይታያል፡፡ እውነት በሴት ተመስላ ወደ ዶክተሩ በመምጣትም ትጋፈጠዋለች፡፡ ስለምወድህ አብረን እንሁን ስትልም በተደጋጋሚ ትጠይቀዋለች፡፡ ጥያቄዋን ስታቀርብ በአዳራሹ የሞባይል ስልክ ጥሪ ይሰማል፡፡ የሱ ልብ በፍጥነት ሲመታ ለማስመሰልም በስክሪኑ የልብ ምስል ይታያል፡፡ የቴአትሩ መሠረታዊ ጭብጥ ከትወና በተጨማሪ በቅንጭብጭብ ቪዲዮዎች፣ በጽሑፎች፣ በተቀዱ ድምጾች፣ በዳንስና ሌሎችም ግብዓቶች ታግዞ ቀርቧል፡፡

    ሙከራዊ ቴአትር ከላይ እንደተጠቀሰው ቴአትር ልዩ ልዩ ነገሮች ይሞከሩበታል፡፡ የተለመደውን የቴአትር አቀራረብ፣ ማለትም ተዋንያን መድረክ ላይ ተመልካቾች ከበታች  ሆነው መመልከትን ይሰብራል፡፡ በ‹‹ውሸት እንሠራለን›› ተዋንያኑ መድረክ ላይና ወደ ተመልካቾች በመቅረብም ይተውኑ ነበር፡፡ በሙከራዊ ቴአትር ተዋንያንና ተመልካቾች መካከል ያለው የሚና ክፍፍልም ይሰበራል፡፡ የተመልካቾች ሚና ማየት ብቻ ሳይሆን መሳተፍም ሊሆን ይችላል፡፡

    በተጠቀሰው ቴአትር ተዋንያን በተመልካቾች መካከል እየተዘዋወሩ እንደ ሃይማኖታዊ ስብከት ‹‹ውሸትን ተቀበሉ›› ይሉ ነበር፡፡ የተመልካቾችን ትከሻ ማሳጅ እንደሚሰጥ ሰው እያሻሹ ‹‹የውሸት ቴራፒ›› ይሰጡ ነበር፡፡ ዶ/ር እውነቱ ውሸት በሁሉም ማኅበረሰባዊ መስተጋብሮች እንደሚገባ ሲገልጽ፣ ተመልካቾቹ መካከል የሚገኙ ጥንዶችና አንዲት ተዋናይት ፊት ለፊት ሄዶ ነበር፡፡ ውሸት በፍቅረኞች መካከልና በጥበቡ ባለሙያዎችም እንደ ዘበት ተለምዷል ይላል፡፡ በቴአትሩ ከተካተቱ ውሸትን የሚያሞጋግሱ ኅብረ ዝማሬዎች በተጨማሪ የጥላሁን ገሠሠ ‹‹እውነት ለመናገር አልሳሳም ለነፍሴ. . .›› እና ሌሎች ዘፈኖችም ይደመጡ ነበር፡፡ ተዋንያኑ ሲደንሱ የሚያሳይ ቪዲዮ በቴአትሩ መካከል ይታያል፡፡ ተዋንያኑ በዕውንም ተመልካቾች መካከል ይወዛወዛሉ፡፡

    ተዋንያኑ ለተመልካቾች አድለው እንዲያነቡ ያስገደዷቸው በራሪ ወረቀት፣ ‹‹እስኪ ዛሬ ከነጋ ስንቴ ዋሽተሃል? ምነው ቀና ብለህ አየኸኝ? ይኼኔ ይህን ጽሑፍ እያነበብክ. . . ወይ ጉድ! በገዛ እጄ ልሰደብ? ቴአትር ነው ስድብ? ትል ይሆናል፡፡ ራስህን እንደ እውነተኛ ቆጥረህ ማለት ነው. . .? አይ ቀዳድዬ. . . ነሸጥ ሲያደርግህ ደግሞ . . .ግን እኮ አሪፍ ቴአትር ነው ሐሳቡም አሪፍ ነው. . . ሰው ሁሉ ከዚህ ቴአትር መማር አለበት. . . ቴአትሩን አይቶ ሲጨርስ ቢያንስ የውሸት መጠኑን መቀነስ አለበት ብለህ አስበህም ይሆናል. . . ሰው ሁሉ ስትል አንተ የለህበትም ንፁህ ነህ ማለት ነው. . . አይ ቦትራ!›› ይላል፡፡ ተመልካቾች ላይ በማሾፍ በማስደንገጥም ስለ ውሸት እንዲያስቡ ይገፋፋል፡፡ ቴአትሩ ሰዎች ራሳቸውን እንዲፈትሹ ሥነ ልቦናዊ ግፊት የሚያደርግም ነው፡፡

    በየዘመኑ የቴአትር ባለሙያዎች የቅርፅ ለውጥ እያደረጉ ልዩ ልዩ ዘዬዎች ያስተዋውቃሉ፡፡ የተዋንያንንና ተመልካቾችን ሚና መለወጥ አንዱ መንገድ ሲሆን፣ ቴአትር የሚቀርብበትን መንገድና ቦታ መቀየርም ይጠቀሳል፡፡ ተመልካቾችን ጥያቄ መጠየቅ፣ ባልተጠበቀ ትዕይንት ማስደንገጥና በሌላም መንገድ የቴአትሩ አንድ አካል እንደሆኑ እንዲሰማቸው ማድረግ ይቻላል፡፡ ተመልካቾችን በተለያየ መንገድ በቴአትሩ ማሳተፍ በቴአትሩ የሚነሳው ጽንሰ ሐሳብ ትኩረት እንዲሰጠው እንዲሁም እንዳይዘነጋም ያግዛል፡፡ ሙከራዊ ቴአትር እስከ 20ኛው መቶ ክፍለ ዘመን ድረስ ገናና ከሆነው የተፈጥሯዊ (ናቹራሊዝም) አቀራረብ የተለየ መንገድ ይከተላል፡፡ ርዕዮተ ሐሳቡ በቴአትርና በማኅበረሰቡ መካከል ያለውን የመደብ ልዩነት ከመሰባበር እንቅስቃሴ ጋርም ይያያዛል፡፡

    በሙከራዊ ቴአትር ረገድ ሪፖርተር የተከታተላቸው ሁለት ቴአትሮች እንደ ምሳሌ ይነሳሉ፡፡ የመጀመርያው በአለ የሥነ ጥበብና ዲዛይን ትምህርት ቤት የቀረበ ነው፡፡ ቴአትሩ የጎዳና ተዳዳሪና አካል ጉዳተኛ ሴቶችን ሕይወት ይዳስሳል፡፡ የጎዳና ተዳዳሪ ሴቶች፣ በፖሊሶችና ሌሎችም የማኅበረሰቡ አካላት ጥቃት ሲደርስባቸው፣ አካል ጉዳተኛ ሴቶች ከማኅበራዊ ሕይወት ሲገለሉ ይታያል፡፡ ቴአትሩ አንዴ ከቀረበ በኋላ ለሁለተኛ ጊዜ ሲደገም ተመልካቾች በቴአትሩ ካሉት ገፀ ባህሪዎች መካከል መለወጥ የሚፈልጉት ካለ ያጨበጭቡና ቴአትሩ ይቆማል፡፡ ከዚያም ተዋንያኑን ተክተው ይገቡና ቴአትሩ ይቀጥላሉ፡፡ በዚህ መንገድ የቴአትሩን አቅጣጫ ለውጠው መደምደሚያም ከኦሪጅናሉ የተለየ ይሆናል፡፡ ብዙ ተመልካቾች መለወጥ የፈለጉት ገፀ ባህሪ በጎዳና ተዳዳሪና አካል ጉዳተኛ ሴቶች ላይ ጥቃት የሚያደርሱትን ሰዎች ነበር፡፡ ተመልካቾቹ በተዋንያኑ ምትክ ወደ ቴአትሩ ከገቡ በኋላ አሳቢና ፍቅር ሰጪ ሆነው የሴቶቹን ሕይወት ለመለወጥ ይጣጣራሉ፡፡ ይህ ሳይመልቲኒየስ ድራማተርጂ ይባላል፡፡

    ሁለተኛው በአዲስ አበባ ዩኒቨርሲቲ የባህል ማዕከል የቀረበው በአንድ ኮንዶሚኒየም ሕንፃ ውስጥ የሚኖሩ ጎረቤታሞች ላይ ያተኮረው ቴአትር ነው፡፡ ጎረቤታሞቹ አጠገብ ለአጠገብ ቢኖሩም አንዳቸው ከሌላቸው ጋር አይተዋወቁም፡፡ የመተዋወቅና የመቀራረብ ፍላጎትም የላቸውም፡፡ ግላዊ ሕይወትን መምረጣቸው በችግር ጊዜ እንኳን አንዳቸው ሌላቸውን እንዳይደግፉ ሲያደርግ ታየና፣ በአሳታፊ (ፓርቲስፓቶሪ) ቴአትር አካሄድ ተዋንያኑ ለተመልካቾቹ ጥያቄ አቀረቡ፡፡ ብዙዎቻችን ከማኀበራዊ ሕይወት ይልቅ ግላዊነትን እየመረጥን መምጣታችን ትክክል ነው ወይስ ተሳስተናል? በሚል ተመልካቾች እንዲወያዩም ተደረገ፡፡

    ሁለቱ ቴአትሮች ተዋንያን ከመድረክ ማማ ቆመው ሲተውኑ ተመልካቹ ሽቅብ የማየቱን ሒደት ይሰብራሉ፡፡ ትወና ከጽሑፍ፣ ከሙዚቃና ከዳንስ ጋርም ተዋህዷል፡፡ ‹‹ውሸት እንሠራለን›› እና ሁለቱ ቴአትሮች ተዋንያንና ተመልካቾች መካከል ያለውን ሐሳባዊ ግንብ አፍርሰዋል፡፡ የቴአትሮቹ ቅርፅ የተመልካቾችን ቀልብ ሊስብ ቢችልም፣ ከቀረቡባቸው የትምህርት ተቋሞች ውጪ አልታዩም፡፡ ከተማሪዎች፣ ከመምህራንና አንዳንድ ከተቋሞቹ ውጪ ካሉ ተመልካቾችም አላለፉም፡፡ ይህ ባለሙያዎቹ የቴአትሮቹን ተደራሽነት ለማስፋት ምን ያህል ርቀት ተጉዘዋል? የሚል ጥያቄ ያስነሳል፡፡ ሙከራዊ ቴአትር ለኢትዮጵያ የቴአትር መድረክ አዲስ አይደለም፡፡ ሙከራ የታየባቸው ቴአትሮች ለሕዝብ የቀረቡበት ወቅት ቢኖርም፣ ዛሬ ላይ አብላጫውን ቁጥር የያዙት ተለምዷዊውን መንገድ የሚከተሉቱ ናቸው፡፡

    በአዲስ አበባ ዩኒቨርሲቲ የሥነ ጥበባት ኮሌጅ ዲን ነብዩ ባዬ እንደሚናገረው፣ ከጥንታዊ ግሪክ ጀምሮ የዓለም የቴአትር ባለሙያዎች በቴአትር ላይ ሙከራ እያደረጉ መምጣታቸው መሞከር የሚለውን ሐሳብ ጥንታዊነት ይሰጠዋል፡፡ የሰው ልጅ ዕለት ከዕለት በተለያየ ሁኔታ ውስጥና ከተለያዩ ሰዎች ጋር ሲሆን እንደየአስፈላጊነቱ የሚያሳየው ባህሪ ድራማ እንደሆነ በመግለጽ የቴአትር ቅርፅ መነሻ የሚያደርጉት ተመራማሪዎች አሉ፡፡ በሌላ በኩል ቴአትር ተጽፎና ተዘጋጅቶ ለተመልካቾች ድራማ መሆኑ ተገልጾላቸው መድረክ ላይ መቅረቡ ዘመናዊ መልክ ያላብሰዋል የሚል ክርክር አለ፡፡ ሙከራዊ ቴአትር ደግሞ ይህ የተለመደው የቴአትር ቅርፅ ላይ የሚደረግ ለውጥን ያመለክታል፡፡ ከተለመደው ባለ አራት ግርግዳ (ፕሮሲንየም) መድረክ ተዋንያንን አውርዶ ተመልካቾች መካከል ማስገባትን መጥቀስ ይቻላል፡፡

    በዚህ መንገድ ከተሠሩ የኢትዮጵያ ቴአትሮች ውስጥ ነብዩ ወደ ኋላ መለስ ብሎ የሚጠቅሳቸው አሉ፡፡ የእዮኤል ዮሐንስ፣ ዮፍታሔ ንጉሤና መላኩ በጎሰው ቴአትሮች የሚከፈቱት በበገና ዜማ ሲሆን፣ ከቴአትሮቹ ጎን ለጎን ቀልድ ይቀርባል፤ ከተመልካች ጋር መጨዋወት ሊኖርም ይችላል፡፡ ስለ አርበኝነት የሚያወሳ ቴአትር ተመልካቹ እንዲሳተፍ በሚጋብዝ መልኩ ይቀርባል፡፡ ተዋንያን ሲተውኑ ከተመልካቾች ጋር የሚለያቸው ሐሳባዊ ግርግዳ እንዳለ በመስማማት እንደሆነ ገልጾ፣ ‹‹የኢትዮጵያ ቴአትሮች ይህንን ግርግዳ የሚሰብሩ ነበሩ፤›› ይላል፡፡ ቴአትሮቹ ተመልካችን የሚያገሉ ሳይሆን ለተሳትፎ የሚጋብዙ መሆናቸውንም ያክላል፡፡ ተመልካችን ማሳተፍ የሚለው ሐሳብ በፀጋዬ ገብረ መድኅን ‹‹ሀሁ በስድስት ወር›› እና ‹‹እናት ዓለም ጠኑ››ም ታይቷል፡፡ ተመልካቾች መፈክር አብረው እንዲያሰሙ ይደረግ ነበር፡፡ አባተ መኩሪያ ሁለቱን ቴአትሮች ሲያዘጋጅና በሌሎቹ ሥራዎቹም የተለመደውን አካሄድ በመስበር ግንባር ቀደም ሞካሪ እንደሆነ ይገልጻል፡፡ አበበ ባልቻ፣ ፍቃዱ ተክለ ማርያምና ሌሎችም ተዋንያንን ያሳተፈው ‹‹ሊስትሮ ኦፔራ›› የኦፔራ ሙዚቃ፣ ዳንስና ሌሎችም ግብዓቶች የተሞከሩበት ሲሆን፣ አባተ በደቡብ አፍሪካ የተሸለመበትም ነው፡፡

    በ1970ዎቹ ቴአትር ፎር ዴቨሎፕመንት በሚል ተመልካቾችን የሚያሳትፉና በተለያየ ርዕሰ ጉዳይ ላይ ያተኮሩ ቴአትሮች ተሠርተዋል፡፡ ቀጥሎም በማንያዘዋል እንደሻው፣ መሐመድ ሐሚድና በላይነህ አቡኔ የተሠሩ ወለፈንድ (አብዘርድ) ቴአትሮች ቀርበዋል፡፡ ከቅርብ ጊዜዎቹ በዘሪሁን ብርሃኑ ‹‹የብርሃን መንገድ›› ቴአትር ክራር የሚጫወቱ ሰዎች፣ ፊልምና ሌሎችም ግብዓቶች ታክለዋል፡፡ እንደነዚህ ሥራዎች ሁሉ በቴአትር መሞከርን ለማስፋፋት በአዲስ አበባ ዩኒቨርሲቲ የመልቲሚዲያ ቴአትር ትምህርት ክፍል በሁለተኛ ዲግሪ መሰጠት ተጀምሯል፡፡ የመጀመርያው ባች የሆኑት 13 ተማሪዎችም በሚቀጥለው ዓመት ይመረቃሉ፡፡

    ነብዩ እንደሚለው፣ አንድ ሚዲያ የሌለውን በሌላው መሸፈንና ሁሉንም ሚዲያዎች አጣጥሞ ማቅረብን እያስተማሩ ይገኛሉ፡፡ ፊልም፣ ሙዚቃ፣ ዳንስ፣ ሐውልት፣ ጋዜጣ፣ ሬዲዮና ሌሎችም ሚዲያዎች በተለያየ መንገድ አንድ ሐሳብን እንዲያቀርቡ ማድረግ ማለት ነው፡፡ ቴአትሩ የሚታየው ከቴአትር ቤት ውጪ ባሉ አማራጮች ማለትም መንገድ ላይ ወይም ሌላ ቦታም ይሆናል፡፡ ተማሪዎቹ በሙከራዊ ቴአትር ረገድ ተስፋ እንደሚጣልባቸው ገልጾ፣ ቴአትር ቤቶች ዕድሉን ሊሰጧቸው እንደሚገባ ይናገራል፡፡ በቴአትር ቤቶች አዲስ ነገር አይታይም፣ የቴአትር ተመልካችም ቀንሷል ለሚለው ትችት መፍትሔ እንደሚሆንም ያምናል፡፡

    ሙከራዊ ቴአትሮች ተመልካችን አሳታፊ መሆናቸው ከሥነ ልቦና አንፃር ተመልካቾች በቴአትሩ ለሚነሳው ጉዳይ የተሻለ ትኩረት እንዲሰጡ የማድረግ ኃይል እንዳላቸው ይታመናል፡፡ በዚህም ተመልካችን ይስባሉ፡፡ የመልቲሚዲያ ቴአትር ሁለተኛ ዲግሪ ተማሪና የ‹‹ውሸት እንሠራለን›› ጸሐፊ ምንያህል ተሾመም በዚህ ሕሳብ ይስማማል፡፡ ቴአትር በመልቲሚዲያ ሲቀርብ በተሻለ መንገድ ሐሳብን ለመግለጽ እንደሚቻል ገልጾ፣ ለተመልካቾች ሙከራዊ ቴአትሮች በአማራጭ መቅረብ አለባቸው ይላል፡፡

    ብዙ ባለሙያዎች ዘመን አመጣሽ በሆኑ የቴክኖሎጂ መሣሪያዎች በመታገዝ ቴአትር ሲሠሩ ግን አይታይም፡፡ ባለሙያዎች አንድ ዕርምጃ ወደፊት ሄደው በድፍረት መሥራት እንዳለባቸው ይናገራል፡፡ ካለው የቴክኖሎጂ ውስንነት አንፃር ሥራው ሊፈትን ቢችልም፣ ከትምህርት ቤቶች ባለፈ ለሰፊው ሕዝብ የሚቀርብበት መንገድ መመቻቸት እንዳለበት ያስረዳል፡፡ የኢትዮጵያ ሙከራዊ ቴአትር ከአጎራባች አገሮች ሲነፃፀር ወደ ኋላ እንደቀረ ገልጾ ‹‹ባለሙያዎች መስዕዋትነት ከፍለው ዘርፉን ማሳደግ አለባቸው፤›› ይላል፡፡

    ምንያህል ቅንነት ጠፍቶ ከትንሽ እስከ ትልቅ ውሸት ውስጥ መዘፈቁን ለመተቸት ቴአትሩን እንዳዘጋጀው ይናገራል፡፡ ሐሳቡን ለማስረገጥም በመልቲሚዲያ የሬዲዮ ማስታወቂያ፣ የጡሩንባ ለፋፊ መልዕክትና ሌላም ታክሏል፡፡ የዶ/ር እውነቱን ንዴት ለመግለጽ በስክሪን ላይ ማሽላ ሲቆላ ይታያል፡፡ ተዋናዩ መድረክ ላይ ከማሽላው ጋር እንደሚቆላ ሁሉ ይንፈራገጣል፡፡ ተዋናዩ በእሳት ሲቃጠልና ጭስ ሲተነፍስም የመድረክ ትወናው በቪዲዮ ታጅቦ ቀርቧል፡፡ እነዚህ ተምሳሌታዊ (ሲምቦሊክ) አገላለጾች በመልቲሚዲያ ሲቀርቡ ተመልካቹ የበለጠ እንዳተኮረባቸው የሚናገረው ጸሐፊው፣ ቴአትሩን ከተቋሙ ውጪ የማሳየት ዕቅድ እንዳላቸውም ይገልጻል፡፡

    አዘውትሮ ቴአትር የሚመለከተው ይገረም ስለሺ፣ ከአዲስ አበባ ዩኒቨርሲቲ ውጪ ሙከራዊ ቴአትር እንዳልገጠመው ይናገራል፡፡ በአሁኑ ወቅት ቴአትር ቤት የሚታዩት ተመሳሳይ ሥራዎች በመሆናቸው እንደ አማራጭ ቢቀርብም ደስተኛ ነው፡፡  ‹‹ቴአትር ቤቶች ለሙከራዊ ቴአትሮች ጊዜና ገንዘብ መመደብ አለባቸው፤›› ይላል፡፡ ከዚህ ቀደም ራስ ቴአትር የሙከራዊ ቴአትር ጅማሮ እንዳለ ቢሰማም ተሳክቶ አላየውም፡፡ ‹‹ባለሙያዎች ተመልካቹን የሚስብ ሙከራዊ ቴአትር እስካዘጋጁ ድረስ፣ ተመልካቹ ከማየት ወደ ኋላ አይልም፤›› ሲልም ይገልጻል፡፡ ሙከራዊ ቴአትር እንደ ፕሮጀክት ወይም መመረቂያ ሥራ ብቻ ከሚሆን በቴአትር ቤቶች በተከታታይነት ቢታይ መልካም እንደሆነም ይገልጻል፡፡ አስተያየታቸውን የሰጡን የሚስማሙበት ጉዳይ የሙከራዊ ቴአትርን ተደራሽነት በማስፋት ረገድ የቴአትሩ ባለሙያዎች፣ ቴአትር ቤቶችና ሌሎችም በዘርፉ ያሉ በገንዘብ፣ በቴክኒክና ቦታ በመስጠትም ኃላፊነት እንዳለባቸው ነው፡፡

     

    - Advertisement -

    ይመዝገቡ

    ተዛማጅ ጽሑፎች
    ተዛማጅ

    የአገሪቱ ባንኮች ካፒታል 199.1 ቢሊዮን ብር ደረሰ

    ከታክስ በኋላ 50 ቢሊዮን ብር ማትረፋቸውን ብሔራዊ ባንክ አስታወቀ የአገሪቱ...

    በዓለም ጂኦ ፖለቲካ መድረክ የኢትዮጵያ ተፈላጊነት

    የአሜሪካው የውጭ ጉዳይ ሚኒስትር አንቶኒ ብሊንከን በሦስት የአፍሪካ አገሮች...

    በአገር ጉዳይ አንዱ ባለቤት ሌላው ባይተዋር መሆኑ ይብቃ!

    ኢትዮጵያ የታፈረችና የተከበረች አፍሪካዊት አገር ናት፡፡ ለመላው የዓለም ጥቁር...

    ኢትዮጵያ ንግድ ባንክ በ2015 የሒሳብ ዓመት ተቀማጭ ገንዘቡን ከአንድ ትሪሊዮን ብር በላይ ለማሳደግ እንደሚሠራ አስታወቀ

    በተጠናቀቀው የሒሳብ ዓመት በተለያዩ ክንውኖቹ ከዕቅድ በላይ ውጤት ማስመዝገቡን...