Sunday, August 7, 2022
ሌሎች ዓምዶች
    - ማስታወቂያ -
    - ማስታወቂያ -

    ከ149 ሺሕ በላይ የተከለከሉ ኃይል አባካኝ አምፖሎች በሕገወጥ መንገድ በማስገባት የተጠረጠሩ ነጋዴዎች ተከሰሱ

    - ማስታወቂያ -

    ተዛማጅ ፅሁፎች

    መንግሥት ክልከላ ያደረገባቸውን ባለ 40፣ 60 እና 200 ዋት ኃይል አባካኝ የቻይና ሥሪት አምፖሎችን በሕገወጥ መንገድ ወደ አገር ውስጥ በማስገባት የተጠረጠሩ ሦስት የጉምሩክ ሠራተኞች፣ ሁለት አስመጪዎች፣ ሦስት የግል ሥራ ያላቸውና አንድ ተማሪ ክስ ተመሠረተባቸው፡፡

    በሥልጣን ያላግባብ መገልገል ወንጀል፣ በጉምሩክ ማጭበርበር ወንጀልና የሕዝባዊ ድርጅት ሰነዶችን አስመስሎ በማዘጋጀት መገልገል ወንጀል የተጠረጠሩት ተከሳሾች፣ የገቢዎችና ጉምሩክ ባለሥልጣን መጋዘን ኢንስፔክተር አቶ አዲሱ ዓለሙ፣ የጉምሩክ አስተላላፊዎቹ ታዲዮስ ፋንታሁንና ሁሴን ኑር፣ አስመጪ (ነጋዴ) ወ/ሮ ሪሃና ጀማል፣ በግል ሥራ የሚተዳደሩት አቶ መሐመድ አብደላ፣ ሙኒር ተማም፣ እስማኤል ሙዘይንና የአስመጪ ድርጅቱ ሥራ አስኪያጅ አቶ በሻዳ ደጉና ተማሪ ቴዎድሮስ ዘመኔ ናቸው፡፡

    ከሳሹ ጠቅላይ ዓቃቤ ሕግ ለፌዴራል ከፍተኛ ፍርድ ቤት ልደታ ምድብ አንደኛ ወንጀል ችሎት ያቀረበው ክስ እንደሚያስረዳው፣ በአስመጪ የንግድ ዘርፍ የተሰማሩት ወ/ሮ ሪሃና፣ ወደ አገር ውስጥ እንዳይገቡ ክልከላ የተደረገባቸውን ባለ 40 እና 60 ዋት 53,400 ኃይል አባካኝ አምፖሎችና ባለ 250 ዋት 96,050 ኃይል አባካኝ አምፖሎችን ወደ አገር ውስጥ አስገብተዋል፡፡ አምፖሎቹን ካስገቡ በኋላ በሕጋዊ  ዕቃ ከለላነት በመልቲ ሞዳል ሥርዓት በአራት ኮንቴይነሮች ከጅቡቲ አስጭነው ሞጆ ደረቅ ወደብ ደርሰዋል፡፡ አስመጪዋ ስማቸው በዲክላራሲዮን ቁጥር ሲ-13579/16 ችፑድ ተደርጎ በሕገወጥ መንገድ ሊያስወጡ ሲሉ በተደረገ ፍተሻ መያዙን ክሱ ያብራራል፡፡ ሌሎቹም ተከሳሾች በጥቅም በመመሳጠር የተጠቀሱትን ኮንቴይነሮች የሥጋት ደረጃቸው ዝቅተኛ የሆኑ የዕቃ ስሞች (ችፑድ) የያዘ የሚል ሐሰተኛ የመንገድ ወረቀትና ተያያዥ የጉምሩክ ሰነዶች በማዘጋጀት፣ ዕቃዎቹ በሕገወጥ መንገድ እንዲለቀቁ ለማድረግ በማሰብና ለጉምሩክ አስተላላፊዎቹ ዕቃዎቹ ሕጋዊ መሆናቸውን በመግለጽ ማመልከታቸውን ክሱ ይዘረዝራል፡፡

    የባለሥልጣኑ መጋዘን ኢንስፔክተር የሆኑት አቶ አዲሱ ከአስመጭዋ ወ/ሮ ሪሃና ውክልና በመውሰድ፣ ክልከላ የተደረገባቸውን ዕቃዎች ሕጋዊ ናቸው በማለት ለትራንዚት ቡድኑ በአካል ቀርበው ማመልከታቸውን ክሱ ያስረዳል፡፡

    እስማኤል ሙዘይን የተባሉት ተከሳሽም ከአስመጪዋ ውክልና በመውሰድ የማጭበርበር ተግባር መፈጸማቸውን፣ የጉምሩክ አስተላላፊው አቶ ታድዮስም በስማቸው የጉምሩክ አስተላላፊ ፈቃድ ማኅተም በማድረግ ዕቃውን ዝቅተኛ የሥጋት ደረጃ በማለት ሲስተም ላይ በመሙላት፣ ሁሉም ተከሳሾች የጉምሩክ ማጭበርበር ወንጀል መፈጸማቸውን ዓቃቤ ሕግ በክሱ ጠቁሟል፡፡

    ሐሰተኛ መግለጫ በማቅረብና ክልከላ ባልተደረገባቸውና በተደረገባቸው አምፖሎች ላይ መንግሥት ከቀረጥና ከታክስ ማግኘት ይችል የነበረውን 1,777,721 ብር አስመጪዋ ሳይከፍሉ ከጉምሩክ ማስወጣት እንዲችሉ በድርጅታቸው ሥራ አስኪያጅ አቶ በሻዳ በኩል ዲክላራሲዮን ሞልተው፣ አስመጪ ወይም ለአስመጪ ወኪል ትራንዚት ቡድን ኦፊሰሮች ብቻ የሚሰጥ የጉምሩክ የመንገድ ወረቀት እንዲወጣ ማድረጋቸውን ክሱ ያስረዳል፡፡

    ተማሪ ቴዎድሮስ ዘመኔ ደግሞ በእነ ወ/ሮ ሪሃና መዝገብ ላይ ምርመራ በሚደረግበት ወቅት፣ በአስመጪዋ ድርጅት ሥም የተዘጋጀ መታወቂያ ይዞ በመቅረብ ከትራንዚት ቡድን የጠፋውን ሰነድ ያወጣው ራሱ መሆኑን በሐሰት በመግለጽ በኃይለ በረከት ሚካኤል ስም የተከሳሽነት ቃሉን በመስጠቱ፣ በፈጸመው የፍትሕ ሥራን የማሳሳት ወንጀል ክስ ማክሰኞ ጥቅምት 29 ቀን 2009 ዓ.ም ተመሥርቶበታል፡፡    

    - Advertisement -spot_img

    የ ጋዜጠኛው ሌሎች ፅሁፎች

    - ማስታወቂያ -
    - ማስታወቂያ -spot_img

    በብዛት ከተነበቡ ፅሁፎች