Sunday, August 7, 2022
ሌሎች ዓምዶች
    - Advertisment -
    - Advertisment -

    ክቡር ሚኒስትር

    [ክቡር ሚኒስትሩ በአዲሱ ሹመት ውስጥ ባለመካተታቸው ተበሳጭተው ከባለቤታቸው ጋር እያወሩ ነው]

    • ምንድነው ብስጭትጭት ያደረገህ?
    • እንዴት አልበሳጭ?
    • ካልተሾምክ ምን ታደርገዋለህ ታዲያ?
    • የእኔ ውለታ ይኼ ነው?
    • የምን ውለታ?
    • ለድርጅቴ ብትይ ለመንግሥት ብትይ የሠራሁት ውለታ?
    • ድንቄም ውለታ፡፡
    • ምን ማለትሽ ነው?
    • አንተን ብሎ ባለውለታ?
    • አንቺም እንዲህ ትያለሽ?
    • አንዳንዴ እውነቱን እንነጋር እንጂ፡፡
    • የምን እውነት?
    • በሹመትህ ዘመን ምን ሠራህ?
    • እኔ?
    • እኔ ነኝ ታዲያ?
    • እንዴት ምን ሠራህ ትይኛለሽ?
    • ከአገልግሎትህ ይልቅ ያጋበስከው ጥቅም የትና የት ነው፡፡
    • በምን? በምን?
    • በውጭ ጉዞ ብትል ከአፍሪካ እስከ አውሮፓ፣ ከእስያ እስከ አሜሪካ ምኑ ቅጡ. . .
    • እሺ?
    • ከጉዞ አበል እስከ ክብር መጠበቂያ በዩሮ፣ በዶላር. . .
    • ሌላስ?
    • በመንግሥት ወጪ በውድ ሆቴሎች መንፈላሰስ፡፡
    • ከዚያስ?
    • ከፕራዶ እስከ ቪኤይት በየዓይነቱ፡፡
    • ህም. . .
    • የሚዥጎደጎድልህ ሥጦታና ገፀ በረከት በቀላሉ የሚነገር አይደለም፡፡
    • ሆሆ. . .
    • በዚያ ላይ ከተለያዩ ፕሮጀክቶች የሚገኘው በሚሊዮኖች የሚቆጠር ኮሚሽን፡፡
    • ወይ ጉድ?
    • በተለያዩ ዘመዶችህ ስም ሕንፃዎች፣ ሞሎች፣ ሆቴሎች፣ ሬስቶራንቶች፣ ጂሞች. . .
    • ኧረ አንቺ ሴትዮ ዝም በይ፡፡
    • እኔማ ዝም ብዬ ነው የኖርኩት፡፡
    • አሁን ይኼን ሁሉ የሚያስለፈልፍሽ ምንድነው?
    • አንተ ነሃ፡፡
    • እኔ ምን ሆንኩ?
    • ለምን አልተሾምኩም ብለህ ስትበሳጭ ነዋ?
    • ምን ልበል ታዲያ?
    • እንኳንም ሹልክ ብዬ ወጣሁ ነው ማለት ያለብህ፡፡
    • ለምን?
    • አላርፍ ካልክ የሚከተለውን አታውቅም ማለት ነው?
    • ምን እንዳይመጣ?
    • ተረቱን አታውቀውም?
    • ምን የሚባለውን?
    • ‹የአንበሳ ትራፊ አይጥ በልታ በልታ፣ አመጣች ነገሯን ጎትታ ጎትታ› የሚባለውን፡፡
    • ምን ለማለት ነው?
    • ካላረፍክ ዋ!
    • ምንድነው እሱ?
    • እጅህ ላይ ያጠልቁልሃል፡፡
    • የወርቅ ብራስሌት?
    • አይይ. . .
    • ምንድነው ታዲያ?
    • ካቴና!

    [ክቡር ሚኒስትሩ እንደተሰባጩ ወደ ቢሯቸው እየሄዱ ከሾፌራቸው ጋር እያወሩ ነው]

    • ክቡር ሚኒስትር?
    • አቤት፡፡
    • የእኔ ጉዳይ ምን ሊሆን ነው?
    • አንተ ደግሞ ምን ሆንክ?
    • እርስዎ ከሥልጣንዎ ተነሱ ማለት አይደል?
    • ማን ነገረህ እሱን?
    • አሁን ባረጋግጥም ቀደም ሲል ሠራተኛው ሁሉ ይኼንን አይደል እንዴ ሲያወራ የከረመው?
    • ቀድሞ ከየት ሰማው?
    • በዚህ ዘመን ወሬ ከየት መጣ አይባልም እኮ?
    • ፌስቡክ በተዘጋበት በዚህ ጊዜ የእኔ መነሳት ወሬ ከየት መጣ?
    • ፌስቡክ ቢዘጋም ወሬው ግን በእግሩ መጥቷል፡፡
    • አንተ ከየት ሰማህ?
    • ሠራተኞች ክበብ ውስጥ ሲወራ፡፡
    • ምን ተባለ?
    • ክቡር ሚኒስትሩ ተንሳፈፉ፡፡
    • የሚያንሳፍፍ ያንሳፋችሁ፡፡
    • እኔ ግራ የገባኝ የራሴ ጉዳይ ነው፡፡
    • አንተ ምን ትሆናለህ?
    • እርስዎ ከተባረሩ ማለቴ ከተነሱ አለቀልኝ፡፡
    • እንዴት?
    • የሚወራውማ ሌላ ነው፡፡
    • ምን ተባለ?
    • እርስዎ ከተጫሩ እኔም መውረዴ ነው፡፡
    • ከምንድነው የምትወርደው?
    • ከቪኤይት ነዋ፡፡
    • ከዚያስ?
    • ጠቅላላ አገልግሎት ሊወሽቁኝ ነው ተብሏል፡፡
    • ወይ ጣጣ?
    • ሞተሩ እንደ ወፍጮ የሚጮህ አሮጌ ፒካፕ ላይ መመደቤን ሰምቻለሁ፡፡
    • እኔ ሳላውቅ ይኼ ሁሉ ከምኔው ተወሰነ?
    • እርስዎ ጥቅም የሚያስገኙ ትልልቅ ፕሮጀክቶች ላይ ብቻ ሲሯሯጡ ሌላውን እኮ አያውቁትም ነበር፡፡
    • ማለት?
    • ማለትማ እንደሌሉ ነበር የሚቆጠረው፡፡
    • እንዴት?
    • ለዚህም እኮ ነው የሚንሳፈፉት፡፡
    • አንተ ምን እያልክ ነው?
    • እየተባለ ያለውን ነው የደገምኩልዎት፡፡

    [ክቡር ሚኒስትሩ የበለጠ እየተናደዱ ቢሮአቸው ገብተው ጸሐፊያቸውን ጠሯት]

    • አንቺ ምን እየተከናወነ ነው ያለው፡፡
    • ኧረ ጉድ ነው ክቡር ሚኒስትር፡፡
    • ምንድነው ጉዱ?
    • ልክ እንደ እግር ኳስ ቡድን ነው የሆነው፡፡
    • ምን ማለት ነው?
    • አዲስ ፎርሜሽን ተሠራ እየተባለ ነው፡፡
    • የምን ፎርሜሽን?
    • በፊት የነበረው 4-4-2 ፎርሜሽን ተለውጧል፡፡
    • እና ምን ሆነ ታዲያ?
    • አሁን 3-5-2 ሆኗል ተብሏል፡፡
    • ምን ማለት ነው?
    • በጥልቀት ማጥቃት የሚያስችል፡፡
    • ከጥልቅ ተሃድሶ ጋር ይገናኛል?
    • እንዲያ ነው አሉ፡፡
    • ይኼንን ከእኔ ጋር ምን ያገናኘዋል?
    • እርስዎ ቻው ከተባሉ አሠላለፉ እንዲህ ነው እየተባለ ነው፡፡
    • ማን ነው የነገረሽ?
    • አማካሪዎ፡፡
    • እሱም እየዶለተብኝ ነበር እንዴ?
    • አሠላለፍን መቀየር ብቻ ሳይሆን ማሊያ መቀየርም ተጀምሯል፡፡
    • እኔን ከዳኝ ማለት ነው?
    • መሰለኝ፡፡
    • በምን አወቅሽ?
    • የሆነ ጥቅስ ሲያነበንብ ነበር፡፡
    • ምን የሚሉት ጥቅስ?
    • ‹በሚሰጥም ጀልባ ማንም አይሳፈርም› የሚል፡፡
    • ምን አልሽ አንቺ?
    • እኔ አይደለሁም ያልኩት፡፡
    • ያንቺስ አቋም ምንድነው?
    • ከተጨባጭ ሁኔታው አንፃር የተቃኘ ነው፡፡
    • ምን ማለት ነው?
    • እኔ ደግሞ አንድ አባባል ደስ ይለኛል፡፡
    • ምንድነው እሱ ደግሞ?
    • ‹ሁለት ባላ ትከል አንዱ ሲሰበር ሌላው ላይ ተንጠልጠል› የሚል፡፡
    • እና?
    • እናማ አሳዘኑኝ፡፡
    • አሳዝኜሽስ?
    • አማካሪዎት እንዳለው መሆኑ ነው፡፡
    • ምንድነው የሚሆነው?
    • አዲሱን ፎርሜሽን በአዲሱ ማሊያ መቀላቀል፡፡
    • በቃ?
    • ምን ይደረግ እንግዲህ?
    • ወይ ሰው?
    • ቀበሮም እንዲህ ነው ያለችው፡፡
    • ምን አለች?
    • ‹ለሰው ሞት አነሰው›፡፡

    [ክቡር ሚኒስትሩ ተናደው በትካዜ ውስጥ እንዳሉ አንድ የሚያውቁት ባለሀብት ደወለላቸው]

    • ክቡር ሚኒስትር ምንድነው የምሰማው?
    • ምን ሰማህ?
    • ተንሳፋፉ መባልን፡፡
    • ይኼ ቃል ከየት ነው የተሠራጨው?
    • ምኑ?
    • መንሳፈፍ የሚባለው?
    • መባረር ከሚባለው ይሻላል ተብሎ ነው፡፡
    • አንተም እንዲህ አልክ?
    • ምን ልበል ታዲያ?
    • ትንሽ ኃፍረት የለህም?
    • ለምን የሚሆን?
    • ይሉኝታ፡፡
    • ይሉኝታ ድሮ ቀረ፡፡
    • በምን ተተካ?
    • በአማራጭ ፍለጋ፡፡
    • ምን ዓይነት አማራጭ?
    • ከወቅቱ ጋር መራመድ፡፡
    • ምን ማለት ነው?
    • አሮጌውን ሸኝቶ አዲሱን ማላመድ፡፡
    • በዚህ ነው የተካንከው፡፡
    • ይኼንንማ እርስዎ ከእኔ በላይ ያውቁታል፡፡
    • እንዴት እባክህ?
    • ያኔ ጨረታዎቹን እንደ ካርታ እየፐወዙ ሲጫወቱብን ነዋ፡፡
    • አሁን እየተካካድን ነው ማለት ነው?
    • አዎን፡፡
    • ስለዚህ?
    • ያው እንግዲህ እኔም በጨረታው አልገደድም፡፡
    • ምን ለመሆን?
    • ከእርስዎ ጋር የነበረኝን ግንኙነት ለማቋረጥ፡፡
    • ይዝጋህ!
    • እርስዎም እንዳይዘጋብዎት፡፡
    • የት ነው የሚዘጋብኝ?
    • ቅሊንጦ!

    [ክቡር ሚኒስትሩ እንዲሁ ሲጨሱ እንደዋሉ የማታ ማታ ቤታቸው ደርሰው ከልጃቸው ጋር ማውራት ጀመሩ]

    • ዳዲ ምን ሆነሃል?
    • ምን ሆንኩ?
    • ፊትህ?
    • ፊቴ ምን ሆነ?
    • ጥለኸዋል፡፡
    • ምን ማለት ነው?
    • አኩርፈሃል፡፡
    • የሆነ ነገር አበሳጭቶኝ ነው፡፡
    • ምንድነው እሱ?
    • ከሥልጣኔ ተነሳሁ፡፡
    • ሶ ዋት?
    • አያናድድም?
    • ኧረ ዳዲ አትቀልድ፡፡
    • ለምን?
    • ብዙ ነገር ቀለለልህ፡፡
    • ለምሳሌ?
    • ስኳር፡፡
    • ምን?
    • ደም ግፊት፡፡
    • እ. . . ?
    • ኮሌስትሮል፡፡
    • ምንድነው የምትይው?
    • ከበሽታ ዓይነቶች ትገላገላለህ፡፡
    • በቃ እንዲህ ብቻ ነው የምታስቢው?
    • ዋናው ጤና ነው ዳድ፡፡
    • አንቺ ምን አለብሽ?
    • ኧረ ዳድ አታካብድ፡፡
    • ለምንድነው የማላካብደው?
    • ከጤናህ በላይ ሌላም ችግር አለ፡፡
    • የምን ችግር?
    • የአንተ ነገር መጣራት ቢጀመር እኮ ብዙ ችግር ይፈጠራል፡፡
    • ምን ስለሆነ?
    • ዳድ ታውቀዋለህ፡፡
    • ምኑን ነው የማውቀው?
    • እስከ ዛሬ የሠራኸውን፡፡
    • ምን ሠራሁ?
    • ከሠራኸው ይልቅ ያልሠራኸውን ብቆጥር ይቀለኛል፡፡
    • በምን አወቅሽ?
    • ሁሉንም ነገር አውቃለሁ፡፡
    • ለምሳሌ?
    • ሥልጣንህን ለምን ተግባር እንደተጠቀምክበት፡፡
    • እና ከሥልጣን መነሳቴ ትክክል ነበር?
    • ኧረ በእሱ በተገላገልክ?
    • ምን እንዳይመጣ?
    • የሚመጣውን ለመተንበይ ነብይ መሆን አያስፈልግም፡፡
    • እንቺ ልጅ ምን እያልሽ ነው?
    • እኔማ የምልህ ሪያሊቲውን አትሽሽ ነው፡፡
    • እና?
    • እናማ ውጤቱን በፀጋ መቀበል ነው ያለብህ፡፡
    • የምኑን ውጤት?
    • የመባረሩን፡፡
    • ምን አልሽ አንቺ?
    • ማለቴ የመንሳፈፉን፡፡
    • ምን?
    • ገብቶሃል፡፡
    • ባይገባኝስ?
    • አፉን ከፍቶ ይጠብቅሃል፡፡
    • ምንድነው የሚጠብቀኝ?
    • ታውቀዋለህ፡፡
    • ምንድነው እሱ?
    • ሸቤ!

    በብዛት የተነበቡ ፅሁፎች

    የዩኒቨርሲቲ መምህራን ከደመወዝ ጭማሪና ከዕርከን ዕድገት ጋር በተያያዘ መንግሥትን አስጠነቀቁ

    ‹‹የደመወዝ ጉዳይ የትምህርት ሚኒስቴር ብቻ ሳይሆን የሲቪል ሰርቪስ ኮሚሽንም...

    በዩኒቨርሲቲዎች ነፃ የትምህርት ዕድል ለሚያገኙ የመንግሥት ሠራተኞች የዕድሜ ጣሪያ ተቀመጠ

    የመንግሥት መሥሪያ ቤቶች በከፍተኛ የትምህርት ተቋማት ለሚገኝ ነፃ የትምህርት...

    በደራሼ ልዩ ወረዳ የፀጥታ ኃይሎች በወሰዱት ዕርምጃ 11 ሰዎች ተገደሉ

    በደቡብ ክልል ደራሼ ልዩ ወረዳ የፀጥታ ኃይሎች በወሰዱት ዕርምጃ...
    - Advertisment -

    ትኩስ ፅሁፎች

    በዓለም ጂኦ ፖለቲካ መድረክ የኢትዮጵያ ተፈላጊነት

    የአሜሪካው የውጭ ጉዳይ ሚኒስትር አንቶኒ ብሊንከን በሦስት የአፍሪካ አገሮች...

    በአገር ጉዳይ አንዱ ባለቤት ሌላው ባይተዋር መሆኑ ይብቃ!

    ኢትዮጵያ የታፈረችና የተከበረች አፍሪካዊት አገር ናት፡፡ ለመላው የዓለም ጥቁር...

    ኢትዮጵያ ንግድ ባንክ በ2015 የሒሳብ ዓመት ተቀማጭ ገንዘቡን ከአንድ ትሪሊዮን ብር በላይ ለማሳደግ እንደሚሠራ አስታወቀ

    በተጠናቀቀው የሒሳብ ዓመት በተለያዩ ክንውኖቹ ከዕቅድ በላይ ውጤት ማስመዝገቡን...

    በውዝግብ የታጀበው የኢትዮጵያ እግር ኳስ ፌዴሬሽን ምርጫ

    ፊፋ ከምርጫው በፊት የሥነ ምግባር ባለሙያ ሊልክ መሆኑ ተሰምቷል የኢትዮጵያ...
    spot_img

    ተዛማጅ ፅሁፎች

    [ክቡር ሚኒስትሩ በስንዴ የተሸፈኑ ሰፋፊ እርሻዎች ያሉበትን ሁኔታ ለመገምገም ከስንዴ ምርት ድጋፍና ክትትል ኮሚቴ ሰብሳቢ ጋር እየመከሩ ነው] 

    ክቡር ሚኒስትር እንደነገርክዎት በሁሉም ስንዴ አብቃይ አካባቢዎቻችን ያሉ አርሶ አደሮች ጥሪያችንን ተቀብለው መሬታቸውን በኩታ ገጠም አርሰው በስንዴ ዘር ሸፍነዋል። በጣም ጥሩ ዜና ነው። በጣም እንጂ። የሚገርምዎት...

    [ክቡር ሚኒስትሩ የሚመሩት የሥራ አስፈጻሚ ኮሚቴ ስብሰባ አጀንዳ አድርጎ በያዘው ወቅታዊ የፀጥታና ደኅንነት ጉዳዮች ላይ ትኩረት በመስጠት ቢጀመርም በስተመጨረሻ አጀንዳውን ስቶ ስለ መዋደድ እየተጨቃጨቀ...

    በዛሬው መደበኛው መድረካችን አጀንዳ የተለመደው የፀጥታና ደኅንነት ጉዳይ ይሆናል። ሌላ አጀንዳ የምታስይዙት አጀንዳ ከሌለ በቀር ማለቴ ነው። ክቡር ሚኒስትር... እሺ ...ቀጥል አመሰግናለሁ ክቡር ሚኒስትር። መደበኛ አጀንዳው እንደተጠበቀ...

    [ክቡር ሚኒስትሩ ወደ መኖሪያ ቤታቸው ሲገቡ ባለቤታቸው የኢትዮጵያ አትሌቶች በዓለም ሻምፒዎና መንገሣቸውን እያነሱ ደስታቸውን ሲገልጹ አገኟቸው]

    እሰይ አገሬ... እሰይ አገሬ እልልል ምን ተገኘ ደግሞ ዛሬ? የአትሌቶቻችንን ድል ነዋ! በክፉ ሲነሳ የቆየውን የአገራቸውን ስም በወርቅ እያደሱ እኮ ነው?  አየሽ፣ መንግሥት የአገራችን ችግር ያልፋል ስሟም...