Monday, August 8, 2022
ሌሎች ዓምዶች
    - Advertisment -
    - Advertisment -

    የሕዝባችን ተምሳሌታዊ እሴቶች ይከበሩ!

    የኢትዮጵያ ሕዝብ በዓለም አቀፍ ደረጃ ታላቅ አክብሮት ከሚያገኝባቸው ተምሳሌታዊ እሴቶቹ መካከል በግንባር ቀደምትነት የሚወሳው አገር ወዳድነቱ ነው፡፡ ይህ ለቅኝ አገዛዝ ያልተንበረከከ የአገር ፍቅር ፅናት በአጋጣሚ የተገኘ ሳይሆን፣ ሕዝባችን ባሉት ለየት ያሉ ተምሳሌታዊ እሴቶች ነው፡፡ በተለያዩ ዘመናት በሕዝባችን ውስጥ የታዩት ጨዋነት፣ አርቆ ማሰብ፣ መከባበር፣ መመካከር፣ የሚያጋጥሙ ችግሮችን በሰላማዊ መንገድ መፍታት፣ አገርን በጋራ የመጠበቅና የመሳሰሉት አኩሪ እሴቶች የአገሪቱን አንድነት ለማስጠበቅ ያገለገሉ ዋነኛ መሠረቶች ናቸው፡፡ ልዩነትን ያከበሩ መሠረቶች፡፡  የዘር፣ የሃይማኖት፣ የቋንቋ፣ የባህል፣ የአመለካከትና የመሳሰሉት ልዩነቶችን አክብሮ የመኖር የዘመናት ልምድ ያለውን ይኼንን ኩሩ ሕዝብ መምሰል ያስፈልጋል፡፡ በዓለም አንፀባራቂ የሆነውን ታላቁን ፀረ ኮሎኒያሊስት የአድዋ ጦርነት በአስደናቂ ድል ዓለምን ያስደመመው የዚህ ጀግና ሕዝብ የልጅ ልጆች ቆም ብለን ማሰብ የሚገቡን ብዙ ነጥቦች አሉ፡፡

    ሕዝባችን ታላቅነቱን የተጎናፀፈው ደልቶት አይደለም፡፡ ይልቁንም በተለያዩ ዘመናት የተፈራረቁበትን ገዥዎች በደልና መከራ ተሸክሞ ነው፡፡ ተምሳሌታዊ የሚባሉት የጋራ እሴቶቹ ልዩነቱን በብልኃት እየፈታና አንድነቱን እያጠናከረ እንዲዘልቅ ያደረጉት ናቸው፡፡ በውስጡ የነበሩት ጨዋነትና አርቆ አሳቢነት ጥልቅ በመሆናቸው ነው ከልዩነት ይልቅ አንድነቱ የበለጠው፡፡ እርስ በርሱ እየተከባበረና እየተመካከረ ልዩነቱን በአንድነት መንፈስ እያሸነፈ ኖሯል፡፡ ‹በልዩነት ውስጥ አንድነትን፣ በአንድነት ውስጥ ልዩነትን› በተግባር ያፀናውን ሕዝባችንን የሚመስል ምግባር ሊኖረን ይገባል፡፡ በአሁኑ ጊዜ ከጨዋነት ጋር የማይመጋገቡና የሰዎችን መብት የሚዳፈሩ አሳሳቢ ድርጊቶች በስፋት ይታያሉ፡፡ ሐሳብን በነፃነት የመግለጽ መብትና ፈተና ውስጥ ከወደቀባቸው ምክንያቶች መካከል አንደኛው በመንግሥት አማካይነት የሚፈጸመው መሆኑ ግልጽ ቢሆንም፣ በማኅበረሰባችን ውስጥ የሚታየው የተለየ ሐሳብን ያለማክበር ብሎም በጠላትነት  የመፈረጅ አባዜ በነፃነት ማሰብ የሚፈልጉ ዜጎችን እያሳቀቀ ነው፡፡ ከሕዝባችን ተምሳሌታዊ እሴቶች ጋር የሚቃረን ድርጊት ነው፡፡

    በሐሳብ መለያየት ያለ፣ የነበረና ወደፊትም የሚኖር የተፈጥሮ ፀጋ መሆን ሲገባው ለምን ተቃራኒ ሐሳብ እንሰማለን የሚሉ አምባገነኖች በየሥርቻው ሞልተዋል፡፡ ከግለሰብ ጀምሮ እስከ ቡድን ድረስ ያሉ መብቶች ይከበሩ ብለው የሚጮሁ ሰዎች፣ እኛ ከምንለው ውጪ ሌላ ሐሳብ መደመጥ የለበትም ሲሉ ምን ማለት ነው? ማንም ሰው አዕምሮው ውስጥ የሚጉላላውን ሐሳብ እንዳይናገር መከልከል ማለት ፀረ ዴሞክራሲ መሆኑን እንዴት መገንዘብ ያቅታል? ሰዎች አዕምሮአቸው የነገራቸውን እንዲተነፍሱት ጋሬጣ መሆን ምን ይባላል? የፌስቡክ፣ የአይፎን፣ የሳምሰንግ፣ ወዘተ ፈጣሪዎች በተፈጥሮ የተቀዳጁትን መብት እንዳይጠቀሙበት ቢታገዱ ኖሮ የዘመናችን ቴክኖሎጂ እዚህ ይደርስ ነበር? የፌስቡክ ፈጣሪው ወጣቱ ማርክ ዙከርበርግ የተለየ ነው የሚባልለትና ከአንድ ቢሊዮን በላይ ተጠቃሚዎችን ያፈራውና የ55 ቢሊዮን ዶላር ማኅበራዊ ትስስር የፈጠረው በነፃነት የማሰብ መብቱን ተጠቅሞ ነው፡፡ የእሱን የፈጠራ ውጤት የሚጠቀሙ ወገኖቻችንስ የሌሎችን መብት እንዴት እያከበሩ ነው? በጣም አጠያያቂ ነው፡፡

    በተበላሸው የአገራችን የፖለቲካ ምኅዳር ውስጥ በተለያዩ ገጽታዎች ተዋናይ የሆኑ ግለሰቦችም ሆኑ ሌሎች ዜጎች መዘንጋት የሌለባቸው ነጥብ አለ፡፡ በአገራችን ሰዎች አዕምሮአቸው ያመጣላቸውን እንዲናገሩ ማበረታታት ተገቢ ነው፡፡ ሐሳብን ከመገደብ በላይ አሸማቃቂ ነገር የለም፡፡ ሰዎች በተናገሩ ቁጥር እንዲሸማቀቁ ከተደረገ የአገር ጉዳይ ያገባናል የሚሉ ሰዎች ከመናገር ይቆጠባሉ፡፡ ሰዎች በተናገሩ ቁጥር በሌላ ሐሳብ ከመሞገት ይልቅ ማንነትንና ሰብዕናን የሚያዋርድ ስድብ እየበዛ ነው፡፡ ዴሞክራሲ የተለያዩ ሐሳቦች የሚስተናገዱበት ገበያ ነው ሲባል እኮ፣ ከየትኛውም አካባቢ የሚነሱ ሐሳቦች በነፃነት እንዲሸራሸሩ ዕድል ይኑራቸው ማለት ነው፡፡ አሁን እየታየ ያለው ግን በተለይ በሶሻል ሚዲያ ያውም በፌስቡክ ‹ለምን ተናገራችሁ?› በሚያስብል ሁኔታ ዜጎች ይወረፋሉ፡፡ የሰዎች ሐሳብ በድጋፍና በተቃውሞ ውስጥ እየተቀረቀረ እንደ ስሜቱ ልክ ይሞገሳል፣ ይዋረዳል፡፡ ይህ የሕዝባችንን የጋራ እሴቶች የማይወክልና ከተራ የፖለቲካ ፍጆታ የማያልፍ አጓጉል ፍረጃ ለአገር የማይበጅ ከመሆኑም በላይ፣ ቅን ዜጎችን የአደባባይ ሰዎች እንዳይሆኑ ያደርጋል፡፡ ደጋፊው ‹ነገረልኝ!› እያለ ጮቤ ሲረግጥ፣ ተቃዋሚው ‹ዓይንህ ላፈር!› ብሎ መቆሚያ መቀመጫ ሲያሳጣ በነፃነት ማሰብ ያከትምለታል፡፡ በነፃነት ማሰብ ሲያከትም የት ይደረሳል? ይኼ በጣም አስፈሪ ነው፡፡

    ሌላው ችግር የዘመኑ ፖለቲከኞችና የሕዝባችን አልመሳሰል ማለት ነው፡፡ ሕዝባችን ውስጥ ያሉት ጨዋነት፣ አርቆ ማሰብ፣ መከባበርና የመሳሰሉት የጋራ ተምሳሌታዊ እሴቶች ፖለቲከኞች ሠፈር ውስጥ ከመከኑ ግማሸ ክፍለ ዘመን ሊቆጠር ነው፡፡ በገዥውም ሠፈር ሆነ በተቃውሞ ጎራ ውስጥ ከፖለቲካ ሥልጣን በላይ የሆነ የአገር ጉዳይ ወደ ጎን እየተገፋ ጥላቻ፣ ጽንፈኝነትና ሴራ የበላይነታቸውን ይዘው ቀጥለዋል፡፡ የፖለቲካ ልዩነትን አቻችሎ ለውይይትና ለድርድር ከመቀመጥ ይልቅ የመጠፋፋት አባዜው ያየለበት ይኼ የተበላሸ የፖለቲካ ምኅዳር፣ በሕዝባችን ውስጥ ለዘመናት የዘለቁትን እሴቶች እየናደ ነው፡፡ የፖለቲከኞቹ የተበላሸ ግንኙነት መስተካከል ስላቃተው ብቻ ሕዝብን በዘር፣ በሃይማኖት፣ በቋንቋና በመሳሰሉት የመከፋፈል አዝማሚያዎች በስፋት እየታዩ ነው፡፡ ሰጥቶ የመቀበል መርህ የፖለቲካ ሥራው የመነሻ ምዕራፍ መሆን ሲገባው የአጥፍቶ ጠፊ ተግባር ውስጥ የሚያስገቡ አጓጉል ድርጊቶች አመዝነው ይስተዋላሉ፡፡ እነዚህ ዘመን የማያስተምራቸው አጓጉል ፖለቲከኞች ወጣቶችን ጭምር እየመረዙ ነው፡፡ ወጣቱን ትውልድ በጠንካራ መሠረት ላይ መገንባት ይገባቸው የነበሩት ፖለቲከኞቻችን፣ ወጣቱን ሐሜተኛና አሉባልተኛ አድርገው ከመቅረፃቸው በተጨማሪ ያረጁ መፈክሮቻቸው ተሸካሚ እያደረጉት ነው፡፡ ይህ ፈጽሞ የሕዝባችንን ተምሳሌታዊ እሴቶች የሚጋፋ አደገኛ ተግባር ነው፡፡

    በኢትዮጵያ ፖለቲካ ውስጥ ከመጠን በላይ በሚግለበለቡ ሴራዎች ምክንያት ለአገር የሚጠቅሙ ፖለቲከኞች በሐሰተኛ አሉባልታ እንዲጠፉ ተደርገዋል፡፡ በተለያዩ የፖለቲካ ፓቲዎች ውስጥ የሚካሄዱ ሽኩቻዎች ልዩነትን የማያከብሩና መጠፋፋትን የሚያማሙቁ በመሆናቸው ብቻ፣ ብን ብለው እንዲጠፉ የተደረጉ ልሂቃን ቁጥራቸው ቀላል አይደለም፡፡ ሰዎች በመልክ፣ በአረማመድ፣ በአነጋገር፣ በአስተሳሰብና በመሳሰሉት ብቻ ሳይሆን፣ በአሻራቸው ልዩነት ሳይቀር አንዳቸውን ከሌላኛው ለመለየት መቻሉ ለሳይንስ ትልቅ አስተዋጽኦ አበርክቷል፡፡ ሕዝባችን በውስጡ ያሉትን ልዩነቶች እያከበረ የኖረውም በተለያዩ ጉዳዮች እርስ በርሱ የሚወራረሳቸው ጠቃሚ ነገሮች ስላሉት ነው፡፡ በሕዝባችን ውስጥ ታላላቆችን ማክበርና ምክራቸውን ማዳመጥ፣ የእኩዮችን ሙግት ማስተናገድና ለታናናሾች ደግሞ አርዓያ የመሆን የቆየ ልምድ ለዚህ ዘመን ሰዎች አስተማሪ መሆን ይኖርበታል፡፡ ሰዎች ሲሠሩ ማጥፋት የተለመደ ሲሆን፣ ሐሳብ ሲንፀባረቅም ስህተት ሊኖር ይችላል፡፡ ምንም ፍፁማዊ ነገር የለምና፡፡ ነገር ግን ሐሳብ ሲታመቅ ወይም ሲታፈን ዕድገት አይኖርም፡፡ ዴሞክራሲ አይሰፍንም፡፡ ሰብዓዊ መብት አይከበርም፡፡ ሐሳብ በታፈነ ቁጥር አደባባይ ወጥተው ማስተማር የሚችሉ ዜጎች ‹ጎመን በጤና› ብለው ይሸሻሉ፡፡ ይህ ማለት ደግሞ ጥቂቶች ብቻ የሚፈነጩበት አምባገነንነት ይንሰራፋል፡፡ ይልቁንም ማንም ሐሳብ አለኝ የሚል ዜጋ እንዲናገር ወይም እንዲጽፍ ይበረታታ፡፡ ልዩነት ይከበር፡፡ ይህ የሕዝባች የዘመናት መገለጫ ባህሪ ነው፡፡ ለዚህም ነው የሕዝባችን ተምሳሌታዊ እሴቶች መከበር ያለባቸው!

    በብዛት የተነበቡ ፅሁፎች

    በአገር ጉዳይ አንዱ ባለቤት ሌላው ባይተዋር መሆኑ ይብቃ!

    ኢትዮጵያ የታፈረችና የተከበረች አፍሪካዊት አገር ናት፡፡ ለመላው የዓለም ጥቁር...

    ኢትዮጵያ ንግድ ባንክ በ2015 የሒሳብ ዓመት ተቀማጭ ገንዘቡን ከአንድ ትሪሊዮን ብር በላይ ለማሳደግ እንደሚሠራ አስታወቀ

    በተጠናቀቀው የሒሳብ ዓመት በተለያዩ ክንውኖቹ ከዕቅድ በላይ ውጤት ማስመዝገቡን...

    የዩኒቨርሲቲ መምህራን ከደመወዝ ጭማሪና ከዕርከን ዕድገት ጋር በተያያዘ መንግሥትን አስጠነቀቁ

    ‹‹የደመወዝ ጉዳይ የትምህርት ሚኒስቴር ብቻ ሳይሆን የሲቪል ሰርቪስ ኮሚሽንም...
    - Advertisment -

    ትኩስ ፅሁፎች

    በዓለም ጂኦ ፖለቲካ መድረክ የኢትዮጵያ ተፈላጊነት

    የአሜሪካው የውጭ ጉዳይ ሚኒስትር አንቶኒ ብሊንከን በሦስት የአፍሪካ አገሮች...

    በአገር ጉዳይ አንዱ ባለቤት ሌላው ባይተዋር መሆኑ ይብቃ!

    ኢትዮጵያ የታፈረችና የተከበረች አፍሪካዊት አገር ናት፡፡ ለመላው የዓለም ጥቁር...

    ኢትዮጵያ ንግድ ባንክ በ2015 የሒሳብ ዓመት ተቀማጭ ገንዘቡን ከአንድ ትሪሊዮን ብር በላይ ለማሳደግ እንደሚሠራ አስታወቀ

    በተጠናቀቀው የሒሳብ ዓመት በተለያዩ ክንውኖቹ ከዕቅድ በላይ ውጤት ማስመዝገቡን...

    በውዝግብ የታጀበው የኢትዮጵያ እግር ኳስ ፌዴሬሽን ምርጫ

    ፊፋ ከምርጫው በፊት የሥነ ምግባር ባለሙያ ሊልክ መሆኑ ተሰምቷል የኢትዮጵያ...
    spot_img

    ተዛማጅ ፅሁፎች

    በአገር ጉዳይ አንዱ ባለቤት ሌላው ባይተዋር መሆኑ ይብቃ!

    ኢትዮጵያ የታፈረችና የተከበረች አፍሪካዊት አገር ናት፡፡ ለመላው የዓለም ጥቁር ሕዝቦችና ለአፍሪካውያን ነፃነትም ተምሳሌት ናት፡፡ የጥንቶቹ ኢትዮጵያውያን አገራቸውን የሚያኮራ ተግባር ፈጽመው ያለፉት፣ ከአገራቸው በፊት የሚቀድም...

    የማንም ሥልጣንና ጥቅም ከኢትዮጵያ አይበልጥም!

    የታላቁ ህዳሴ ግድብ ሦስተኛ ዙር የውኃ ሙሌት በስኬት መጠናቀቁ፣ የኢትዮጵያን የወደፊት ብሩህ ጊዜ አመላካች ነው ቢባል ማጋነን አይሆንም፡፡ ይህ የአፍሪካ ታላቅ ግድብ ፕሮጀክት ዕውን...

    የሴራ ፖለቲካ መረብ ይበጣጠስ!

    ኢትዮጵያ አሁንም ከበርካታ ፈተናዎች ጋር እንደ ተፋጠጠች ነው ያለችው፡፡ በታላቁ የህዳሴ ግድብ ምክንያት ግብፅ በጎረቤት አገሮች አማካይነት ኢትዮጵያ ላይ ጫና ለማሳደር ፍጥነቷን ጨምራ እየተንቀሳቀሰች...