Thursday, August 18, 2022
ሌሎች ዓምዶች
    - Advertisement -
    - Advertisement -
    ዜናየድሬዳዋ ዩኒቨርሲቲ መማር ማስተማር ተቋረጠ

    የድሬዳዋ ዩኒቨርሲቲ መማር ማስተማር ተቋረጠ

    ቀን:

    በድሬዳዋ ዩኒቨርሲቲ መማር ማስተማር ሙሉ በሙሉ መቋረጡ ታወቀ፡፡ የትምህርት ሚኒስቴር የሕዝብ ግንኙነት ዋና ዳይሬክተር ወ/ሮ ሐረጓ ማሞ ዓርብ ታኅሳስ 13 ቀን 2010 ዓ.ም. ለሪፖርተር እንደተናገሩት፣ በድሬዳዋ ዩኒቨርሲቲ መማር ማስተማር ሙሉ በሙሉ ተቋርጧል፡፡

    ወ/ሮ ሐረጓ እንዳሉት፣ በዩኒቨርሲቲ ተማሪዎች ድንጋይ ውርወራና ጩኸት ተከስቷል፡፡ በተፈጠረው ሁከት የተጎዳ ተማሪ መኖሩንና አለመኖሩን የተጠየቁት ወ/ሮ ሐረጓ፣ ‹‹ድንጋይ ውርወራ ካለ ሊመታ የሚችል ተማሪና ቁስ የለም ማለት አይቻልም፤›› ብለዋል፡፡

    በተፈጠረው ሁከትና ትምህርት መቋረጥ ምክንያቱ ገና በመጣራት ላይ መሆኑንም አክለው ገልጸዋል፡፡ ጉዳዩን ለማረጋገጥም ከተማሪዎች ጋር ውይይት ለማድረግ ሙከራ እየተደረገ መሆኑን ተናግረዋል፡፡ ተማሪዎችን ለማሳመን ብቻ ሳይሆን፣ የሚያነሷቸው ጥያቄዎች በአግባቡ ለመመለስ ከአመራሩ ጋር ውይይት መደረጉንም ጠቁመዋል፡፡

    በተመሳሳይ ከረቡዕ ታኅሳስ 11 ቀን 2010 ዓ.ም. ጀምሮ በአዳማ ሳይንስና ቴክኖሎጂ ዩኒቨርሲቲ በተፈጠረ ሁከት አብዛኛዎቹ ተማሪዎች ከግቢ ወጥተው መቆየታቸውን ተናግረዋል፡፡ ‹‹ነገር ግን ሁከት የሚፈጥሩ ተማዎችን የማጣራት ሥራ ተሠርቶ ተማሪው ወደ ትምህርቱ ገብቷል፤›› ብለዋል፡፡ ‹‹ድንጋይ መወርወር ባይኖርም ከተመገቡ በኋላ ከግቢ በመውጣት፣ ክፍል ያለመግባት ችግሮች ተከስተው ነበር፤›› ብለዋል፡፡

    ሙሉ በሙሉ ወይም በከፊል የማስተማር ሥራቸውን አቋርጠው ከነበሩት 19 ዩኒቨርሲቲዎች መካከል፣ አብዛኛዎቹ ወደ ቀድሞ ሥራቸው መመለሳቸውን ዳይሬክተሯ ተናግረዋል፡፡

    በአምቦ፣ በመቱና በወለጋ ዩኒቨርሲቲዎች ተቋርጦ የነበረው የማስተማር ሥራ መጀመሩንም ገልጸዋል፡፡ በዩኒቨርሲቲዎች ውስጥ ትርምስ እንዲፈጠር የሚፈልግ ኃይል እንዳለ የጠቆሙት ዳይሬክተሩ፣ ችግሩን ተሸካሚ የሆኑ ተማሪዎችም ሆኑ ከተማሪዎች ጋር ተመሳስሎ ወደ ግቢ የሚገባ ኃይል የለም ማለት እንደማይቻል ጠቁመዋል፡፡

    በአገሪቱ የመማር ማስተማር ሥራ ተቋርጦባቸው በሚገኙ ዩኒቨርሲቲዎች ትምህርት ለመጀመር ስምምነት በመፍጠር፣ ሥራ የመጀመር ሒደት ላይ መደረሱን ገልጸዋል፡፡ ‹‹በአብዛኛው ዩኒቨርሲቲዎች ማለት ይቻላል የማስተማር ሥራ ተጀምሯል፡፡ ይህ ማለት ግን የተንጠባጠቡ ተማሪዎች የሉም ማለት አይቻልም፤›› ብለዋል፡፡

    በአምቦ ዩኒቨርሲቲ የመማር ማስተማር ሥራ ከሞላ ጎደል መጀመሩን የጠቆሙት ወ/ሮ ሐረጓ፣ በኢንጂነሪንግ ካምፓስ እስካሁን እንደተቋረጠ መሆኑን አስረድተዋል፡፡

    ‹‹በመቱ ዩኒቨርሲቲ ተማሪዎች መሉ በሙሉ ገብተው እየተማሩ ነው ባይባልም፣ መምህራን ግን እያስተማሩ ነው፤›› ብለዋል፡፡

    በአዲግራት ዩኒቨርሲቲ ብሔር ተኮር ግጭት ተቀስቅሶ የአንድ ተማሪ ሕይወት ካለፈ በኋላ፣ በአሥራ ዘጠኝ ዩኒቨርሲቲዎች ሙሉ በሙሉ ወይም በከፊል የማስተማር ሥራ ተቋርጦ እንደነበር መዘገባችን አይዘነጋም፡፡

    ባለፈው ሳምንት ተመሳሳይ ግጭት ተከስቶ የተማሪ ሕይወት ባይጠፋም፣ በድሬዳዋና በአዳማ ሳይንስና ቴክኖሎጂ ዩኒቨርሲቲዎች ሌላ አዲስ ተቃውሞ ታይቷል፡፡ በተለይ በድሬዳዋ ዩኒቨርሲቲ በተቀሰቀሰው ሁከት በንብረት ላይ ከፍተኛ ጉዳት መድረሱን ለማወቅ ተችሏል፡፡

    በአዲግራት፣ በመቱ፣ በወልዲያ፣ በአምቦና በወለጋ ዩኒቨርሲቲዎች የማስተማር ሥራ እንደተጀመረ እየተነገረ ቢሆንም፣ አብዛኛዎቹ ተማሪዎች ወደ ክፍል ገብተው ትምርታቸውን እየተከታተሉ እንዳልሆነ መረጃዎች ያመለክታሉ፡፡

    በአምቦ፣ በመቱና በወለጋ ዩኒቨርሲቲዎች ይማሩ የነበሩ ከአራት መቶ በላይ የትግራይ ብሔር ተወላጅ ተማሪዎች ግቢውን ለቀው እንደወጡና ለትምህርት ሚኒስቴር ጥያቄ ማቅረባቸውን መዘገባችን የሚታወስ ሲሆን፣ ተማሪዎቹ ወደ ዩኒቨርሲቲዎቻቸው በመሄድ ትምህርት እንዳልጀመሩ ለማወቅ ተችሏል፡፡

    ከአዲግራት፣ ከወልዲያ፣ ከመቱ፣ ከአምቦና ከወለጋ ዩኒቨርሲቲ በመውጣት ወደ የአካባቢያቸው እየተመለሱ ያሉ ተማሪዎች እንዳሉ መረጃዎች ያሳያሉ፡፡

    ትምህርት ሚኒስቴር ወደ ቤተሰቦቻቸው ሄደው የነበሩ ተማሪዎች እንዲመለሱ በቴሌቪዥን፣ በሬዲዮና በጋዜጣ መልዕክት ለማስተላለፍ በዝግጅት ላይ እንደሆነ ወ/ሮ ሐረጓ ተናግረዋል፡፡

     

      

     

     

    - Advertisement -

    ይመዝገቡ

    spot_img
    spot_img

    ተዛማጅ ጽሑፎች
    ተዛማጅ

    12ኛ ክልል እንዲቋቋም ህዝበ ውሳኔ እንዲካሄድ ተወሰነ

    የፌዴሬሽን ምክር ቤት በክልል የመደራጀት አቤቱታን ተቀብሎ በመመርመር ሕዝበ...

    የኬንያ ምርጫ ቀጣናዊ አንድምታው

    በዘመናት ውስጥ ሳይናወጥ መዝለቅ የቻለ ይሉታል አንዳንዶች፡፡ የአገሮቹ መሪዎች...

    ባንኮች በትልልቅ ባለሀብቶችና በከተሞች ላይ ያተኮረ የብድር አቅርቦታቸውን እንዲያርሙ ብሔራዊ ባንክ አሳሰበ

    የአገሪቱ ባንኮች ዋነኛ ተግባራቸው የሆነው ብድር የማቅረብ አገልግሎት እንከን...